Mo kgweding ya September, re tlile go leka ka natla go simolola dithuto tsa Baebele re dirisa boroutšhara jwa Itumelele go Tshelela Ruri! Baboledi ba na le tshono ya go tsaya bobulatsela jo bo thusang jwa diura di le 30. Letsholo leno le le kgethegileng le tla dirwa jang?

• Loeto Lwa Ntlha: Dirisa tsebe e e ka fa morago ya boroutšhara jono, go thusa motho gore a batle go itse mo go oketsegileng, o bo o mmontsha gore thuto ya Baebele e tshwarwa jang. O se ka wa lebala batho ba ba ileng ba bontsha kgatlhego mo nakong e e fetileng, go akaretsa le maeto a go boela. Le fa ba ganne go ithuta Baebele mo nakong e e fetileng, gone jaanong ba ka nna ba itumelela boroutšhara jo bosha le tsela e re tshwarang dithuto tsa Baebele ka yone. Ga re a tshwanela go tlogela diboroutšhara kwa magaeng a go se nang batho kwa go one, kgotsa go di tsenya mo makwalong a re a romelelang batho ba ba neng ba sa bontshe kgatlhego. Komiti ya Tirelo ya Phuthego e ka rulaganya gore go nne le dipokano tse di oketsegileng tsa tirelo ya tshimo fa kgwedi e ntse e tsweletse.

• Ditsela Tse Dingwe Tsa go Simolola Dithuto Tsa Baebele: Fa phuthego ya lona e dirisa dikolotsana tsa dikgatiso, lo ka baya boroutšhara jwa Itumelele go Tshelela Ruri! mo go tsone. Fa mongwe yo o kgatlhegang a amogela boroutšhara jono, o ka mo tlhalosetsa gore go na le thulaganyo ya go ithuta Baebele ya mahala go dirisiwa boroutšhara jono. O ka mmontsha gore thuto ya Baebele e tshwarwa jang fa lo ntse lo tlotla kgotsa o ka dira dithulaganyo tsa go mo etela kgantele gore o mmontshe. Molebedi wa tirelo a ka rulaganya gore baboledi ba ba nang le maitemogelo ba dire letsholo leno le le kgethegileng mo mafelong a kgwebo. Gape re ka simolola dithuto tsa Baebele le batho ba re berekang le bone kgotsa ba re kopanang le bone re se mo bodireding.

Jesu o ne a re laela gore re ‘dire batho barutwa’ re bo re “ba rute.” (Mat 28:19, 20) E kete letsholo leno le le kgethegileng le ka re thusa go fitlhelela mekgele eno e re ipeetseng yone re dirisa kgatiso ya Itumelele go Tshelela Ruri!