Baebele e na le dikai tsa dithapelo tse Jehofa a neng a di araba. Tumelo ya batlhanka ba ga Jehofa ba bogologolo e ne ya nonofa fa ba sena go lemoga gore o ne a ba reetsa fa ba ne ba mmolelela ka mathata a bone le gore o ne a ba thusa. Ka jalo, go botlhokwa gore fa re rapela, re bolelele Jehofa bothata jwa rona, re bo re leka go bona gore o araba thapelo ya rona jang. Gopola gore tsela e Jehofa a ka arabang thapelo ya gago ka gone e ka tswa e farologane kgotsa e feta se o neng o se kopile. (2Bk 12:7-9; Bae 3:20) Ke dilo dife tse Jehofa a ka di dirang go araba dithapelo tsa rona?

• A ka re thusa go lebana le bothata ka go re naya maatla a go itshoka, ka go re naya kagiso ya mogopolo kgotsa ka go dirisa tumelo e re nang le yone.—Baf 4:13

• A ka re naya botlhale jwa go dira ditshwetso tse di molemo.—Jak 1:5

• A ka re naya keletso le maatla a go dira sengwe.—Baf 2:13

• O tla re thusa go ritibala fa re tlhobaela.—Baf 4:6, 7

• O tla re naya batho ba ba tla re thusang ka dilo tse re di tlhokang.—1Jo 3:17, 18

• O tla thusa ba re ba rapelelang.—Dit 12:5, 11

LEBANG BIDIO YA JEHOFA KE “MOUTLWI WA THAPELO”, LO BO LO ARABA DIPOTSO TSE DI LATELANG:

• Sekao sa ga Mokaulengwe Shimizu se ka re thusa jang fa re kgobegile marapo ka gonne re sa kgone go direla Jehofa mo go oketsegileng ka ntlha ya bolwetse?

• Re ka etsa jang sekao sa ga Mokaulengwe Shimizu?