GORENG GO LE BOTLHOKWA: Go ithuta o le nosi go re thusa go tlhaloganya “bophara le boleele le bogodimo le boteng” jwa boammaaruri jo bo mo Lefokong la Modimo. (Bae 3:18) Gape go re thusa gore re nne re se na selabe e bile re se na molato mo lefatsheng leno le le sa iketlang le gore re ‘ngangatlele lefoko la botshelo thata.’ (Baf 2:15, 16) Go ithuta Lefoko la Modimo go re thusa go lemoga se mongwe le mongwe wa rona a tlhokang go se dira. Ke eng se se ka re thusang gore re solegelwe molemo ke go bala le go ithuta Baebele?

SE O KA SE DIRANG:

• Tshwaya ditemana o bo o kwala dintlha mo Baebeleng ya gago e o e dirisang fa o ithuta

• Fa o ntse o bala Lefoko la Modimo, ipotse dipotso tseno: ‘Go buiwa ka mang? O dirile eng? Leng? Kae? Goreng? Jang?’

• Dira dipatlisiso ka go dirisa dithulusu tse di gone. O ka nna wa batlisisa ka setlhogo sengwe kgotsa temana

• Akanya ka se o se balang gore o kgone go itse gore o ka dirisa jang se o se ithutang

• Dirisa se o se ithutang.—Luk 6:47, 48

LEBA BIDIO YA NGANGATLELA GO ITHUTA BAEBELE O LE ESI O BO O ARABA DIPOTSO TSE DI LATELANG:

• Batho bangwe ba tlhalosa maikutlo a bone jang ka go ithuta ba le bosi?

• Goreng re tshwanetse go simolola ka thapelo nako le nako fa re ithuta?

• Ke eng se se ka re thusang go tlhaloganya ditemana dingwe tsa Baebele botoka?

• Re ka tshwaya Dibaebele tsa rona jang?

• Goreng go le botlhokwa gore re akanye ka se re se ithutang mo Lefokong la Modimo?

• Re tshwanetse go dira eng ka se re se ithutang?