TLHAGAFALELA BODIREDI
Go Tokafatsa Bokgoni Jwa Rona mo Bodireding—Go Itirela Dipuisano Tsa go Tsamaisa Dimakasine
GORENG GO LE BOTLHOKWA: Le fa dipuisano tse di mo bukaneng ya pokano di re naya dikakantsho tse di molemo, ga go reye gore re tshwanetse go dirisa tsone fela. O tshwanetse go dirisa mafoko a gago. Gongwe o ka batla go dirisa puisano nngwe kgotsa setlhogo sengwe se o akanyang gore se ka tshwanela lefelo la lona. Fa go ntse jalo, morago ga go bala dimakasine, go sekaseka dipuisano le go leba dibidio tsa go tsamaisa dikgatiso, o ka nna wa dirisa dikakantsho tse di latelang go itirela dipuisano.
O KA DIRA SENO JANG?:
Ipotse jaana, ‘A ke batla go dirisa nngwe ya dipuisano tse di mo bukaneng ya pokano?’
EE
-
Baakanyetsa matseno. Fa o sena go dumedisa, tlhalosa lebaka la go bo o etetse mo lelapeng. (Sekai: “Ke go etetse ka gore . . . ”)
-
Akanya gore o tla mo araba jang ka temana fa o sena go mmotsa potso le go mo naya kgatiso. (Sekai: Pele o bala temana o ka re, “Re ka bona karabo e e tlhatswang pelo mo temaneng eno.”)
NNYAA
-
Tlhopha setlhogo se se go kgatlhang se o bonang se ka ama batho mo tshimong ya lona
-
Baakanyetsa potso e e tla dirang gore motho a ntshe maikutlo le gore lo nne le motlotlo, mme gone o se ka wa dira gore a tlhabiwa ke ditlhong. (Sekai: Dipotso tse di mo tsebe 2 ya dimakasine.)
-
Tlhopha temana e o tla e balang. (Go tla tswa mo go wena fa o tsamaisa Tsogang! gore a o tla bala temana kgotsa nnyaa, ka gonne makasine ono o diretswe batho ba ba sa itseng go le gontsi ka Baebele e bile ba sa tshepe bodumedi.)
-
Kwala seele kgotsa tse pedi tse di tlhalosetsang mong wa ntlo gore setlhogo seo se tla mo solegela molemo jang fa a ka se bala
MO MAEMONG OTLHE
-
Baakanyetsa potso e o tla e tlogelelang mong wa ntlo e o tla e arabang mo loetong lwa go boela
-
Kwala dintlha tse di tla go gopotsang se o batlang go se bua mo nakong e e tlang
