Re na le dibidio di le nnê tsa go ithuta Baebele tse re ka di dirisang mo bodireding. Re ka dirisa nngwe le nngwe ya tsone mo maemong afe?

• Bidio ya Ke Eng fa o Tshwanetse go Ithuta Baebele?—Bidio e e Feletseng e diretswe go thusa motho gore a kgatlhegele Baebele le fa a tswa mo bodumeding jo bo farologaneng. E kgothaletsa batho ba ba e lebileng gore ba batle dipotso tsa dikarabo tse di botlhokwa tse ba nang le tsone mo Baebeleng e bile e ba naya lemmenyana la dikarabo tsa dipotso tseo. Gape e tlhalosa kafa motho a ka tsenyang kopo ya go ithuta Baebele ka gone.

• Bidio ya Ke Eng fa o Tshwanetse go Ithuta Baebele? (e e khutswafaditsweng) e tshwana fela le bidio e e feletseng mme yone e boleele jwa motsotso o le mongwe. O ka e dirisa fa o kopana le batho ba ba senang nako e e lekaneng ya go tlotla.

• Bidio ya Thuto ya Baebele e Tshwarwa Jang? e diretswe go thusa motho gore a kgatlhegele go ithuta Baebele. Gape e diretswe go araba dipotso tse batho ba ipotsang tsone ka thulaganyo eno, go akaretsa le gore motho a ka tsenya kopo jang ya go ithuta Baebele.

• Bidio ya Itumelele go Ithuta Baebele e diretswe motho yo o ithutang Baebele. Le fa bidio eno e tlhaga mo tsebe 2 mo bukeng ya Itumelele go Tshelela Ruri!, o ka e bontsha mongwe fa lo tlotla ka boroutšhara jwa Itumelele go Tshelela Ruri! Bidio eno e bua ka dilo tse lo tlileng go tlotla ka tsone mo bukeng eo le gore motho yo o ithutang a ka solofela eng fa lo ntse lo ithuta.

Le fa bidio nngwe le nngwe e diretswe maemo a a rileng, o ka kgona go e bontsha mongwe kgotsa wa e mo romelela mo maemong mangwe le mangwe. Baboledi ba kgothalediwa gore ba itse dibidio tseno le gore ba di dirise sentle fa ba le mo bodireding.