Fela jaaka dipokano tse dingwe mo phuthegong, pokano ya tirelo ya tshimo ke thulaganyo ya ga Jehofa e e re thusang gore re tlhotlheletsane go nna le lorato le go dira ditiro tse di molemo. (Bah 10:24, 25) Pokano eno, e tshwanetse go tsaya metsotso e le metlhano go ya go e le supa. Mo metsotsong eo, go tshwanetse ga rulaganngwa ditlhopha, ga abiwa tshimo go bo go rapelwa. (Fa pokano eno e tshwarwa morago ga dipokano tse dingwe, e tshwanetse go nna khutshwane thata.) Motshwari wa pokano eo, o tshwanetse go baakanyetsa sengwe se se tla thusang ba ba yang bodireding mo letsatsing leo. Ka sekai, ka Matlhatso fa go na le baboledi ba le bantsi ba ba neng ba seyo mo tshimong mo gare ga beke, go ka nna molemo gore o tlotle ka se ba ka se buang le mong wa ntlo. Ke dintlha dife gape tse go ka tlotliwang ka tsone tse di ka thusang baboledi mo bodireding?

• Karolo ya se re ka se buang mo bodireding e e mo kgatisong ya, Bukana ya Pokano ya Botshelo le Bodiredi Jwa Rona

• Kafa re ka dirisang dikgang kgotsa tiragalo ya bosheng ka gone go simolola motlotlo

• Kafa re ka arabang ka gone motho yo o buang sengwe go re thibela go rera

• Kafa re ka arabang ka gone motho yo o sa dumeleng mo Modimong, motho yo o sa dumeleng gore dilo di bopilwe mme a dumela gore dilo di itlhagetse fela, motho yo o buang puo e nngwe kgotsa motho yo o mo bodumeding jo bo sa tlwaelegang mo tshimong ya rona

• Kafa re ka dirisang ka gone websaete ya jw.org, app ya JW Library^® kgotsa Baebele

• Kafa re ka dirisang ka gone kgatiso nngwe go tswa mo Lebokosong la go Ruta

• Kafa re ka dirang ka gone mefuta e e farologaneng ya bodiredi e e jaaka, go rera ka founo, go kwala makwalo, go rera phatlalatsa, go dira maeto a go boela kgotsa go tshwara dithuto tsa Baebele

• Dikgakololo tse di ka ga go itshireletsa, go fetofetoga le maemo, go itshwara sentle, go nna le boikutlo jo bo siameng mo bodireding kgotsa sengwe se se tshwanang le seo

• Setlhogo sengwe kgotsa bidio nngwe go tswa mo boroutšhareng jwa, Dira Bojotlhe go Bala le go Ruta

• Kafa o ka kgothatsang ka gone motho yo o berekang le ene mo tshimong

• Temana e e amanang le bodiredi kgotsa maitemogelo a a kgothatsang a mo tshimong