Mo nakong e e sa fediseng pelo Jehofa o tlile go fedisa tsamaiso eno ya dilo. Bodumedi jwa maaka bo tlile go fedisiwa, dipuso tse di kopaneng di tlile go tlhasela batho ba Modimo mme Jehofa o tla fedisa batho ba ba sa siamang ka ntwa ya Aramagedona. Bakeresete ba lebile pele go bona ditiragalo tseno di diragadiwa.

Boammaaruri ke gore ga re itse dintlha tsotlhe ka pitlagano e kgolo. Ka sekai, ga re itse gore e tla simologa leng. Ga re itse gore dipuso tse di maatla tsa sepolotiki di tla ntsha diipato dife fa di tlhasela madumedi. Ga re itse gore tlhaselo ya dipuso tse di farologaneng mo bathong ba Modimo e tla tsaya lobaka lo lo kae kgotsa gore e tla akaretsa eng. Gape ga re itse gore Jehofa o tla dirisa eng fa a tla bo a senya batho ba ba sa siamang ka Aramagedona.

Le fa go ntse jalo, Baebele e re naya tshedimosetso e re tlhokang go e itse gore re kgone go itshokela se se tla diregang mo isagweng ka katlego le bopelokgale. Ka sekai, re a itse gore re tshela mo bofelong jwa ‘malatsi a bofelo.’ (2Ti 3:1) Re a itse gore tlhaselo ya bodumedi e tlile go “khutshwafadiwa” gore bodumedi jwa boammaaruri bo se ka jwa fedisiwa. (Mat 24:22) Re a itse gore Jehofa o tlile go golola batho ba gagwe. (2Pe 2:9) Re a itse gore Yo Jehofa a mo tlhophileng gore a tle go fedisa batho ba ba busula le gore a sireletse boidiidi jo bogolo a dirisa Aramagedona, o dira dilo ka tsela e e siameng e bile o maatla.—Tsh 19:11, 15, 16.

Ditiragalo tsa mo isagweng di tlile go dira gore “batho ba idibale ka ntlha ya letshogo.” Le fa go ntse jalo, fa re bala Baebele re bo re akanyetsa kwa teng ka ditsela tse Jehofa a neng a boloka batho ba gagwe mo nakong e e fetileng ka yone le ka dilo tse a re bolelelang tsone tse di tla diragalang mo isagweng, re ka ‘ema re tlhamaletse re bo re tsholetsa ditlhogo tsa rona,’ ka gonne re itse gore kgololo ya rona e gaufi.—Luk 21:26, 28.