Manyalo a a atlegang a galaletsa Jehofa mme gape a dira gore banyalani ba itumele. (Mar 10:9) Gore Bakeresete ba nne le lenyalo le le nnelang ruri e bile ba itumele ba tshwanetse go dirisa melaometheo ya Baebele fa ba tlhopha motho yo ba ka nyalanang le ene.

Ga go botlhale go intsha le mongwe fa o ise o fete nako e mo go yone o nang le keletso e e maatla ya tlhakanelodikobo, ka gonne ka nako eo, keletso eo e ka dira gore go nne thata gore o dire ditshwetso tse di botlhale. (1Bk 7:36) Dirisa nako ya pele o nyala kgotsa o nyalwa go nonotsha kamano ya gago le Modimo le go nna le dinonofo tsa Bokeresete. Mme o tla bo o le mo maemong a a siameng go dira gore lenyalo la gago le atlege.

Pele o dumela go nyalana le mongwe iphe nako ya go itse “se se mo pelong” ya gagwe. (1Pe 3:4) Bolelela motho yo o batlang go nyalana le ene fa o simolola go nna le dipelaelo tse di masisi. Gantsi fa re na le tsala re tlhoma mogopolo mo dilong tse re ka mo direlang tsone e seng gore o tla re naya eng, le mo lenyalong go tshwanetse go nna jalo. (Baf 2:3, 4) Fa o batla go itumela mo lenyalong, o tshwanetse go itlwaetsa go dirisa melaometheo ya Baebele pele ga o nyala kgotsa o nyalwa, ka gonne seno se tla dira gore go nne motlhofo gore o e dirise le fa o sena go nyalwa kgotsa nyala.

LEBANG BIDIO YA GO IPAAKANYETSA LENYALO—KAROLO 3: “BALA DITSHENYEGELO,” LO BO LO ARABA DIPOTSO TSE DI LATELANG:

• Kamano ya kgaitsadi yono le Tshepo e ne ya gola jang?

• Kgaitsadi yono o ne a lemoga eng ka Tshepo fa a ntse a mo ithuta?

• Batsadi ba gagwe ba ile ba mo thusa jang mme o ne a dira tshwetso efe e e botlhale?