Tsebe ya ntlha ya websaete ya rona e na le ditlhogo le dibidio tse di ka kgatlhang batho ba e seng Basupi ba ga Jehofa. (Dit 13:48) Gantsi e na le ditlhogo tse di tlhagang mo dikganyeng kgotsa dilo tse batho ba buang ka tsone le tse ba akantseng ka tsone.

O ka dirisa jang tsebe ya ntlha ya jw.org fa o le mo bodireding?

• Tsena mo websaeteng ka metlha. Lebelela ditlhogo tse di tlhagang kwa tlase mo karolong ya “Tse di Gone” mme bona gore o ka dirisa ditlhogo tseo jang go thusa motho yo o kgatlhegelang molaetsa. (Go bona dikgatiso tse di neng di tlhagelela mo karolong eno, tobetsa “Bona mo go Oketsegileng.”) Go nna o tsena mo websaeteng go tlile go go thusa gore o nne le dikakantsho tse disha tse o ka di dirisang fa o rera.

• Dirisa ditlhogo le dibidio tse di tlhagang mo tsebeng ya ntlha go simolola motlotlo. Ditlhogo le dibidio tseno di ka re thusa go itse gore batho mo tshimong ya rona ba akantse ka eng.

• Bontsha batho tsebe ya ntlha ya websaete. Mmolelele ka ditlhogo tse di kgatlhang mo websaeteng o bo o mmontsha gore a ka bona jang tshedimosetso e e oketsegileng.

• Romela linki. Batho bangwe ga ba batle go bua le rona mme gone ga ba na bothata le go tsena mo websaeteng ya rona. Ka jalo, o se ka wa tshaba go ba romelela linki ya tsebe ya ntlha, setlhogo sengwe kgotsa bidio mo websaeteng.