Fakakaukau ki he ngaahi fakatuʻutāmaki ʻoku fekauʻaki mo e mītia fakasōsialé, ʻoku ʻikai ke fakaʻatā ʻe he ngaahi mātuʻa tokolahi ʻenau fānaú ke ngāueʻaki ia. Ka neongo ia, kapau ʻokú ke fakaʻatā ho taʻu hongofulu tupú ke ngāueʻaki ʻa e mītia fakasōsialé, ʻe lava fēfē ke ke tokoniʻi ia ke fakaʻehiʻehi mei he ngaahi fakatuʻutāmakí mo e founga ke ngāueʻaki fakapotopoto ai ʻa e ʻinitanetí?

ʻI he kupu ko ení

•  Meʻa ke fakamuʻomuʻa ʻe hoʻo taʻu hongofulu tupú

•  Tuʻunga moʻui lelei fakaeongo hoʻo taʻu hongofulu tupú

•  Tōʻonga hoʻo taʻu hongofulu tupú ʻi he ʻinitanetí

•  Tokoni ki ha fetalanoaʻaki

 Meʻa ʻoku totonu ke ke ʻiló: ʻI he vakai ki he malava ke maʻunimā ʻe he mītia fakasōsialé ʻa hoʻo taʻu hongofulu tupú, te nau fiemaʻu nai hoʻo tokoní ke mapuleʻi ʻa e lahi ʻo e taimi ʻoku nau fakamoleki ki aí.

 Tefitoʻi moʻoni Fakatohitapu: “Fakapapauʻi ʻa e ngaahi meʻa ʻoku mahuʻinga angé.”​—Filipai 1:10.

 Ke fakakaukau ki ai: ʻI hono ngāueʻaki ʻa e mītia fakasōsialé, ʻokú ne fakahohaʻasi nai ʻa e taimi mohe, ngāue fakaako pe moʻui fakafāmili hoʻo taʻu hongofulu tupú? ʻOku pehē ʻe he kau fakatotoló ʻoku fiemaʻu ki he kau taʻu hongofulu tupú ke nau mohe ʻi he houa nai ʻe hiva ʻi he poʻulí, ka ko e faʻahinga ʻoku nau fakamoleki ʻa e ngaahi houa lahi he ʻaho ʻi he mītia fakasōsialé ʻoku ngalingali ko ʻenau taimi mohé ʻoku siʻisiʻi ange ia ʻi he houa ʻe fitú.

 Meʻa ʻe lava ke ke faí: Lāulea mo hoʻo taʻu hongofulu tupú ki he ngaahi meʻa ke fakamuʻomuʻá pea talanoa mo ia ki he fakapotopoto hono fokotuʻu ha taimi fakangatangata ki hono ngāueʻaki ʻa e mītia fakasōsialé. Fokotuʻu ha ngaahi lao mohu ʻuhinga, hangē ko e ʻikai ngofua ke ʻi ai ha meʻangāue fakaʻilekitulōnika ʻi he lokí he taimi poʻulí. Ko hoʻo taumuʻá ia ke tokoniʻi hoʻo taʻu hongofulu tupú ke fakatupulekina ʻa e mapuleʻi-kitá​—ko ha ʻulungaanga te ne tokoniʻi ia ʻi heʻene fuʻu lahí.​—1 Kolinitō 9:25.

 Meʻa ʻoku totonu ke ke ʻiló: ʻE lava ke ongoʻi tuēnoa ha tokotaha kei siʻi, ʻi he taimi ʻokú ne sio ai ki he ngaahi tā ʻa e niʻihi kehé mo e ngaahi meʻa fakafiefia ʻoku fai ʻe hono ngaahi kaungāmeʻá.

 Tefitoʻi moʻoni Fakatohitapu: “Huʻi atu meiate kimoutolu ʻa e . . . meheka.”​—1 Pita 2:1.

 Ke fakakaukau ki ai: ʻI hono ngāueʻaki ʻa e mītia fakasōsialé, ʻokú ne ʻai nai hoʻo taʻu hongofulu tupú ke ne fai ha ngaahi fakahoa ʻikai lelei fekauʻaki mo hono fōtunga hā maí? ʻOku ongoʻi ʻe hoʻo taʻu hongofulu tupú ʻoku fakafiefia ange ʻa e moʻui ia ʻa e niʻihi kehé ʻi heʻene moʻuí?

 Meʻa ʻe lava ke ke faí: Lāulea mo hoʻo taʻu hongofulu tupú ki he fakatuʻutāmaki hono ngāueʻaki ʻo e fakahoá. Hoko ʻo ʻiloʻi, ʻoku uesia lahi ange ʻa e tamaiki fefiné ʻi he tamaiki tangatá, koeʻuhí ʻoku tokanga lahi ange ʻa e tamaiki fefiné ia ki he feohí mo e fōtunga hā maí. ʻE lava foki ke ke fokotuʻu ange ki hoʻo taʻu hongofulu tupú ke kiʻi tuku fakataimi hono ngāueʻaki ʻa e mītia fakasōsialé. ʻOku pehē ʻe ha talavou ko Jacob: “Naʻá ku tāmateʻi ʻeku ngaahi app mītia fakasōsialé ʻi ha kiʻi taimi. Naʻe tokoni eni kiate au ke u fai ha fengaʻunuʻaki ʻi he ngaahi meʻa ʻoku ou fakamuʻomuʻá pehē foki ki he anga ʻeku vakai kiate au mo e niʻihi kehé.”

 Meʻa ʻoku totonu ke ke ʻiló: Ko hono ngāueʻaki ʻa e mītia fakasōsialé ʻoku hangē ia haʻo nofo ʻi muʻa ʻi ha fuʻu kakai ʻa ia ko e tokotaha kotoa ʻe lava ke nau sio ki he meʻa ʻokú ke faí. ʻE lavangofua ke fakatupunga ʻe he meʻá ni ha kē mo ha ngaahi taʻefemahinoʻaki.

 Tefitoʻi moʻoni Fakatohitapu: “Huʻi atu meiate kimoutolu ʻa e faʻahinga kotoa pē ʻo e loto-kona fakalotokoví, ʻitá, lilí, fekailangakí, mo e laukoví . . . Hoko ʻo feangaleleiʻaki.”​—ʻEfesō 4:31, 32.

 Ke fakakaukau ki ai: ʻOku ‘ai ʻe he mītia fakasōsialé hoʻo taʻu hongofulu tupú ke kau ʻi he ngutu-laú, keé pe lea taʻeʻofá?

 Meʻa ʻe lava ke ke faí: Tokoniʻi hoʻo taʻu hongofulu tupú ke ne mahinoʻi ʻa e ngaahi tefitoʻi moʻoni ʻo e fakahāhā ʻa e tōʻonga lelei ʻi he ʻinitanetí. ʻOku pehē ʻi he tohi Digital Kids: “ʻI he tuʻunga ko e ngaahi mātuʻa, ko e konga ia hotau fatongiá ke akoʻi mahino ki he fānaú ko e anga-fakamamahí ʻoku ʻikai tali ia ʻi ha faʻahinga ʻātakai pē​—ʻo tatau ai pē pe ʻoku nau ʻi he ʻinitanetí pe fesiofaki mata ki he mata mo ha tokotaha.”

 Manatuʻi, ʻoku ʻikai ke fuʻu fiemaʻu ʻa e mītia fakasōsialé ia pea ʻoku ʻikai ke fakaʻata ʻe he kotoa ia ʻo e ngaahi mātuʻá ʻenau taʻu hongofulu tupú ke ngāueʻaki ia. Kapau ʻokú ke fakaʻatā hoʻo taʻu hongofulu tupú ke ngāueʻaki ʻa e mītia fakasōsialé, ʻoku totonu ke ke fakapapauʻi ʻokú ne matuʻotuʻa feʻunga ke fokotuʻu ha taimi fakangatangata, tauhi maʻu ha ngaahi kaungāmeʻa lelei pea fakaʻehiʻehi mei he ngaahi meʻa taʻetāú.