TOKONI KI HE FĀMILÍ
Founga ke Mapuleʻi Ai Hoʻo ʻItá
ʻOku leaʻaki pe fai ho hoá ha meʻa ʻokú ne fakaʻitaʻi koe pea ʻokú ke feinga ke fufū hoʻo ʻitá. Ka ʻoku fakatokangaʻi ʻe ho hoá ʻoku ʻi ai ʻa e meʻa ʻoku hoko pea kamata ke ne ʻeke ha ngaahi fehuʻi. ʻOku toe fakatupu ʻita ange ia kiate koe. ʻE lava fēfē ke ke mapuleʻi hoʻo ʻitá ʻi he ngaahi tuʻunga peheé?
Meʻa ʻoku totonu ke ke ʻiló
Ko e ʻitá ʻe lava ke fakatuʻutāmaki ki hoʻo moʻui leleí. Kuo ʻiloʻi ʻe he kau fakatotoló ko e ʻita taʻemapuleʻí ʻokú ne fakatupunga ʻa e toto māʻolungá, mahaki mafú, loto-mafasiá mo e palopalema ʻi he fakamolū-meʻakaí. Ko e ʻitá ʻoku toe ʻi ai ʻene kaunga ki he taʻemamohe ʻi he poʻulí, tupulaki ʻa e loto-hohaʻá, palopalema ʻi he kilí mo e pā-kālavá. ʻI ha ʻuhinga lelei, ʻoku pehē ʻe he Tohi Tapú: “Tuku ange ʻa e ʻitá . . . , he ʻe iku pē ia ki he kovi.”—Saame 37:8, fakamatala ‘i lalo.
Ko e tukulotoʻi ʻa e ʻitá ʻe lava ke fakatupu maumau foki. Kapau te tau fakaʻatā ʻa e ʻitá ke tupulaki ʻi hotau lotó ʻoku hangē ia ha mahaki ʻoku lava ke ne uesia kitautolu. Ko e fakatātaá, te ke fakatupulekina ai ʻa e tōʻonga fakaangá pe huʻuhuʻú. Ko e laumālie peheé ʻokú ne ʻai ai koe ke faingataʻa ke nofo fakataha mo ia pea ʻe lava ke ne maumauʻi lahi hoʻo nofo malí.
Meʻa ʻe lava ke ke faí
Sio ki he ngaahi ʻulungaanga lelei ho hoá. Hikiʻi hifo ʻa e ngaahi meʻa ʻe tolu ʻokú ke saiʻia ai ho hoá. ʻI he taimi hoko te ke ʻita ai ʻi ha meʻa naʻe fai ʻe ho hoá, fakakaukau fekauʻaki mo e ngaahi ʻulungaanga naʻá ke saiʻia aí.
Tefitoʻi moʻoni Fakatohitapu: “Fai maʻu pē ʻa e fakamālō.”—Kolose 3:15.
Hoko maʻu pē ʻo faʻa fakamolemole. ʻUluakí, feinga ke maʻu ʻa e anga ʻo e vakai ho hoá. ʻE tokoniʻi ai koe ke ke fakatupulekina ʻa e kaungāongoʻí. (1 Pita 3:8) Hokó, ʻeke hifó, ‘ʻOku ʻi ai ha ʻuhinga mafatukituki ʻeku ʻitá ʻoku faingataʻa ai ke u fakamolemolé?’
Tefitoʻi moʻoni Fakatohitapu: “Ko e meʻa fakaʻofoʻofa ia . . . ʻene tukunoaʻi ha fakatupu ʻita.”—Palōveepi 19:11.
Fakahaaʻi hoʻo ngaahi ongoʻí ʻi he anga-lelei mo e fakapotopoto. Ngāueʻaki ʻa e lea “ʻoku ou.” Ko e fakatātaá, ʻi he ʻikai ke pehē, “ʻOkú ke taʻefakakaukau ho ʻikai ke ke tā mai ʻo tala mai ʻa e feituʻu ʻokú ke ʻi aí,” ka ke pehē, “ʻOku ou hohaʻa ho tōmui maí naʻa ʻoku ʻi ai ha meʻa ʻoku hoko.” ʻI hoʻo fakahaaʻi atu hoʻo ongoʻí ʻi he anga-malū ʻe lava ke ne tokoniʻi koe ke mapuleʻi hoʻo ʻitá.
Tefitoʻi moʻoni Fakatohitapu: “Tuku ke hoko maʻu pē hoʻomou leá ʻo anga-ʻofa, ʻo fakaifoifo ʻaki ha māsima.”—Kolose 4:6.
Fanongo ʻi he anga-fakaʻapaʻapa. Hili ho fakahaaʻi atu hoʻo ngaahi ongoʻí, fakaʻatā ho hoá ke ne lea mai ʻo ʻoua ʻe taʻofi ʻene leá. ʻI he ʻosi ʻa e lea ho hoá, toe leaʻaki ʻa e meʻa naʻá ne leaʻakí ke sio pe ʻokú ke mahinoʻi lelei ia. Ko e fanongó ʻe tokoni lahi ia ki hono mapuleʻi hoʻo ʻitá.
Tefitoʻi moʻoni Fakatohitapu: “Vave ki he fanongo, fakatuotuai ki he lea.”—Sēmisi 1:19.