Ko e ngaahi hoa tokolahi ʻoku nau nonofo ki muʻa ke nau malí. ʻOku fai pehē ʻa e niʻihi koeʻuhí ʻoku nau loto ke tesiʻi pe ʻoku nau hōhoamālie pea ʻamanaki ʻe lahi ange ai honau faingamālie ke maʻu ha nofo mali lavameʻá. Ka ko ha fakakaukau lelei ia ke nonofo ki muʻa ʻi he malí?

ʻI he kupu ko ení

•  Ko e hā ʻoku leaʻaki ʻe he Tohi Tapú?

•  Ko e nonofo fakatahá ʻe teuʻi ai koe ki he nofo malí?

•  Ko e nonofo fakatahá ʻe tokoni ia ki ho tuʻunga fakapaʻangá?

•  Ko e nonofo fakatahá ʻe tokoniʻi ai koe ke fakaʻehiʻehi mei he mali mo e tokotaha halá?

•  ʻOku ʻi ai ha fili ʻoku toe lelei ange?

•   ʻOku fakahalaiaʻi ʻe he Tohi Tapú ʻa e fehokotaki fakasino ʻi tuʻa ʻi he nofo malí. Ko e fakatātaá, ʻoku pehē ai: “Fakaʻehiʻehi mei he fehokotaki fakasino taʻetāú.” (1 Tesalonaika 4:3; 1 Kolinitō 6:18) ʻOku kau ki ai ʻa e fehokotaki fakasino ʻi he vahaʻa ʻo ha ongo meʻa ʻokú na nonofo taʻemali, neongo kapau ʻokú na taumuʻa ke mali ʻamui ange. a Ko e ngaahi tuʻunga ʻa e Tohi Tapú ʻokú ne maluʻi ha ongo meʻa mei he feitama teʻeki malí mo e ngaahi nunuʻa kovi kehe ʻo e nonofo fakataha ki muʻa ʻi he malí.

•   Ko e fokotuʻutuʻu ʻo e nofo malí ʻoku haʻu mei he ʻOtuá. ʻI heʻene fokotuʻu iá, naʻá ne pehē: “ʻE tuku ange . . . ʻe ha tangata ʻene tamaí mo ʻene faʻeé pea te ne pīkitai ki hono uaifí, pea te na hoko ko e kakano pē taha.” (Sēnesi 2:24) Ko e tukupā ʻo e nofo malí ʻokú ne tokonaki ʻa e fakavaʻe lelei taha ki ha fāmili ʻofa mo tuʻuloa.

 Ko e niʻihi ʻoku nau pehē ʻio. ʻOku nau ongoʻi ʻoku maʻu ʻe ha ongo meʻa ʻa e taukei ʻaonga ʻi heʻena fai fakataha ʻa e ngaahi ngāue fakaʻapí pea siofi ʻa e tōʻonga ʻa e tokotaha ʻe tahá. Kae kehe, ko e fakapulipuli ki ha nofo mali lavameʻá ko e tukupā.

 ʻE lava fēfē ke ako ha ongo meʻa ke na tauʻaki pīkitai lolotonga ʻa e ngaahi taimi leleí pe koví? ʻOku ʻikai ko e ʻuluaki nonofo fakataha ʻi ha vahaʻa taimi, ʻa ia ko e ongo meʻá fakatouʻosi ʻokú na maʻu ʻa e vakai ko hona vahaʻangataé ʻoku ala fakangata pea faʻiteliha pē ha taha ia ʻiate kinaua pe ʻe mavahe. ʻI hono kehé, ʻoku lakalakaimonū ʻa e vahaʻangataé ʻi he taimi ʻoku fakatou mālohi ai ʻena tukupaá pea ngāue fakataha ke ikuʻi ʻa e ngaahi palopalemá.

 Ko e meʻa mahuʻinga tahá: Ko e ngaahi hoa ʻoku nau fili ke nonofo taʻemalí ko hono moʻoní ʻoku ʻikai ke nau mateuteu ai ki he nofo malí ka ʻoku nau mateuteu kinautolu ki he māvaé.

 Tefitoʻi moʻoni Fakatohitapu: “ʻIlonga ha meʻa ʻoku tō ʻe ha taha, ko e meʻa ia te ne utú foki.”​—Kalētia 6:7.

 Ko e niʻihi ʻoku nau pehē ʻio. Naʻe maʻu ʻi ha savea ʻa e Senitā Fakatotolo Pew, ʻi ʻAmeliká, ʻoku fakafuofua ko e toko fā ʻi he toko hongofulu ʻo e kakai lalahi naʻa nau kamata nonofo fakatahá, naʻa nau fai pehē koeʻuhí ko ha ngaahi ʻuhinga fakapaʻanga. Kae kehe, ʻi he hili atu ha kiʻi vahaʻa taimi ʻenau nonofo fakatahá, ko e tokolahi naʻe kau ʻi he saveá naʻa nau pehē ko e palopalema fakapaʻangá ko e ʻuhinga lahi ia naʻe ʻikai ke nau mateuteu ai ke malí.

 Ko e nonofo fakataha ki muʻa ʻi he malí ʻoku ʻi ai hono ngaahi nunuʻa kehe, tautefito ki he kakai fefiné. Ko e fakatātaá, ʻi he ngata ha vā, ko e kakai fefiné ʻoku nau faʻa fua ʻa e fatongia ʻo hono ʻohake ʻa e fānaú.

 Ko e meʻa mahuʻinga tahá: Ko e ngaahi nunuʻa kovi ʻo e nonofo fakataha ki muʻa ʻi he malí ʻoku lahi mamaʻo ange ia ʻi ha faʻahinga ʻaonga pē naʻe pehē ʻe maʻu mei ai.

 Tefitoʻi moʻoni Fakatohitapu: “Ko au Sihova, ko ho ʻOtuá, ʻa e Tokotaha ʻokú ne akoʻi koe ke ke maʻu ʻaonga aí.”​—ʻAisea 48:17.

 Ko e niʻihi ʻoku nau pehē ʻio. Kae kehe, “ko e kakai ʻoku nau nonofo ki muʻa ʻi he malí ʻoku ʻikai ke nau faʻa fakatokangaʻi ko e nonofo fakatahá ʻokú ne ʻai ke faingataʻa ange hono fakangata ʻa e vahaʻangataé,” ko e lau ia ʻa e tohi Fighting for Your Marriage. Ko e hā hono ʻuhingá? Ko e ngaahi hoa ʻoku nau nonofó te nau ʻiloʻi nai ʻoku ʻikai ke nau fuʻu hōhoamālie. Ka koeʻuhi ko e ngaahi meʻa ʻoku nau moʻuaʻaki hangē ko ha kiʻi manu pusiaki ʻokú na tauhi fakataha, ko ha ʻapi ʻokú na lisi fakataha, pe ko ha feitama taʻeʻamanekina, ʻoku hoko ai ʻa e meʻa ʻoku ui ʻe he kau fakatotoló ko e “tauhele ʻo e nonofó.” b ʻI hono fakalea ʻe tahá, “ko e kakai ʻe niʻihi ʻa ia naʻa nau loto ke fakangata honau vaá ki muʻa he malí ʻoku nau toe iku mali pē koeʻuhí naʻe faingofua ange ʻa e nonofo fakatahá ia,” ko e hoko atu ia ʻa e Fighting for Your Marriage.

 Ko e meʻa mahuʻinga tahá: ʻI he ʻikai tokoniʻi koe ke ke fai ha fili leleí, ko e nonofo fakatahá ʻe lava moʻoni ke ne ʻai ke faingataʻa ange ke fakangata ha vahaʻangatae ʻoku ʻikai lavameʻa.

 Tefitoʻi moʻoni Fakatohitapu: “Ko e tokotaha fakapotopotó ʻokú ne sio ki he fakatuʻutāmakí peá ne toi, ka ko e tokotaha taʻetaukeí ʻokú ne hanganaki laka atu pē ʻo ne fuesia ʻa e ngaahi nunuʻá.”​—Palōveepi 22:3.

 ʻE lava ke ke fakaʻehiʻehi mei he ngaahi fakatuʻutāmaki ʻoku haʻu mo e nonofo fakataha ki muʻa ʻi he malí pea fakalahi ho ngaahi faingamālie ke maʻu ha nofo mali lavameʻá. Anga-fēfē? ʻAki ʻa e pipiki ki he ngaahi tuʻunga Fakatohitapu ki he nofo malí. Vaheʻi ha taimi feʻunga ke ke hoko ai ʻo ʻiloʻi ʻa e tokotaha ʻokú ke fakakaukau ke mali mo iá ki muʻa peá mo kamata nofo fakataha ʻi he tuʻunga ko e husepāniti mo e uaifi. ʻOku lelei taha hono fili ha hoá ʻo makatuʻunga ʻi he tatau ʻa e ngaahi meʻa ʻokú mo fakamahuʻingaʻí mo hoʻomo ngaahi tuí, ʻa ia ʻoku mahuʻinga lahi ange ia ʻi he holi fakaefehokotaki fakasinó.

 ʻOku maʻu ʻi he Tohi Tapú ʻa e faleʻi ʻe lava ke ne tokoniʻi koe ke fakatoka ʻa e fakavaʻe ki ha nofo mali fiefia mo tuʻuloa. c Ko e fakatātaá, ʻoku maʻu ʻi he Tohi Tapú ʻa e ngaahi tefitoʻi moʻoni ʻe lava ke ne tokoniʻi koe ke ke . . .

•   fakaʻehiʻehi mei he hoko ʻo taʻefaitōnungá

•   hoko ko e faʻahinga tokotaha ʻe hoko ko ha hoa mali lelei ʻi he kahaʻú

•   tokanga ki he ngaahi fakaʻilonga ʻoku ʻikai nai ko e tokotaha totonu ia kiate koé ʻi he lolotonga ʻa e faialeá

 Ke ako lahi ange fekauʻaki mo e ngaahi kaveinga ko ení, sio ki he konga “Nofo Malí mo e Fāmilí” ʻi he jw.org.

 Tefitoʻi moʻoni Fakatohitapu: “Ko e potu Folofola kotoa pē kuo fakamānavaʻi ia ʻe he ʻOtuá pea ʻoku ʻaonga ki he akonaki.”​—2 Tīmote 3:16.