TOKONI KI HE FĀMILÍ | NOFO MALÍ
Ko ha Vakai Lelei Ange ki he Tōʻonga Fakatupu-ʻItá
ʻOkú ke saiʻia ke toki fakavaveʻi hake pē ha meʻa ʻi he taimi ko iá; ka ko ho hoá ʻokú ne loto ke palani tokamuʻa.
ʻOkú ke anga-fakalongolongo mo natula mā; ka ko ho hoá ʻoku saiʻia ia he feohí.
ʻOku maʻu ʻe ho hoá ha ngaahi tōʻonga ʻoku fakatupu-ʻita kiate koe? Ko e nōfoʻi aí ʻe lava ke ne maumauʻi hoʻomo nofo malí. Ko e moʻoni, ʻoku pehē ʻe he Tohi Tapú “ko e tokotaha ʻokú ne toutou langaʻi ha meʻá ʻokú ne fakamavahevaheʻi ʻa e ngaahi kaungāmeʻa ofí.”—Palōveepi 17:9.
ʻI he ʻikai ke fakaʻatā ʻa e tōʻonga fakatupu-ʻitá ke ne fakatupunga ha palopalema ʻi hoʻomo nofo malí, fēfē ke ke ako ke sio ki he tōʻonga ko iá mei ha tafaʻaki lelei ange.
ʻI he kupu ko ení
Ko ha vakai lelei ange ki he ngaahi tōʻonga ʻoku fakatupu-ʻita kiate koé
Ko e tōʻonga ho hoá ʻa ia ʻoku fakatupu-ʻita kiate koé ʻoku felāveʻi ia mo e ngaahi ʻulungaanga naʻá ke saiʻia aí. Fakakaukau ki ha fakatātā ʻe tolu:
“Ko hoku husepānití ʻoku faʻa tōʻohi ʻi hono fakahoko ha ngaahi meʻa pe ʻi heʻene teuteu ke ʻalu ki ha feituʻu. Ka ko e ʻulungaanga tofu pē ko iá ʻokú ne ʻai ai ia ke ne anga-kātaki—kau ai ʻene fakafeangai maí. Taimi ʻe niʻihi ko ʻene tōʻohí ʻoku fakatupu-ʻita kiate au, ka ko e meʻa ia naʻá ku ʻofa ai ʻiate iá.”—Chelsea.
“Ko hoku uaifí ʻokú ne fokotuʻutuʻu maau ʻaupito; ʻokú ne saiʻia ke maau ʻa e meʻa kotoa pē, ʻa ia ʻoku lava ke fakatupu-ʻita. ʻI he tafaʻaki ʻ e tahá, ko ʻene tokanga ki he fanga kiʻi fakaikiikí ʻoku ʻuhinga iá heʻikai te ne tuku ha meʻa ki he mōmeniti fakaʻosí.”—Christopher.
“ʻOku kehe ʻa e vakai hoku husepānití ki he ngaahi meʻá, ʻa ia ʻoku fakatupu-ʻita. ʻI he taimi tatau, ko ʻene tōʻonga fakafiefiemālie ko iá naʻá ne tohoakiʻi ai au kiate iá. ʻOku ou saiʻia ʻi heʻene malava ke nofoʻaki nonga ʻi he ngaahi tuʻunga faingataʻá.”—Danielle.
Hangē ko ia naʻe ʻilo ʻe Chelsea, Christopher, mo Danielle, ko e ngaahi mālohinga mo e ngaahi vaivaiʻanga ʻo ha hoa mali ko ha ngaahi tafaʻaki kehekehe ia ʻo ha ʻulungaanga tatau pē. ʻI he tuʻunga ko iá, kapau te ke fakaleleiʻi ʻa e vaivaiʻangá ʻe lava foki ke mole ai mo hono mālohingá, ʻo hangē pē ko e mole ʻa e mahuʻinga ʻo ha foʻi koini kapau te ke toʻo hano tafaʻaki ʻe taha.
Ko e moʻoni ko e ngaahi tōʻonga ʻe niʻihi ʻoku ʻikai hano tafaʻaki lelei. Ko e fakatātaá, ʻoku pehē ʻe he Tohi Tapú ko e kakai ʻe niʻihi ʻoku nau “hehema ki he ʻitá.” (Palōveepi 29:22) ʻI he tuʻunga ko iá, ʻoku totonu ki he tokotahá ke ne feinga mālohi ke ne huʻi atu ʻa e “faʻahinga kotoa pē ʻo e loto-kona fakalotokoví, ʻitá, lilí, fekailangakí, mo e laukoví.” a—ʻEfesō 4:31.
Ka ʻi he taimi ʻoku hoko ai ha tōʻonga ʻo fakatupu-ʻita, muimui ki he faleʻi ʻa e Tohi Tapú: “Hokohoko atu ʻa e fekātakiʻaki . . . neongo ai pē ʻo kapau ʻoku ʻi ai ha taha ʻokú ne maʻu ha ʻuhinga ke lāunga ai.”—Kolose 3:13.
Tānaki atu ki aí, feinga ke sio ki ha tafaʻaki lelei ʻo e tōʻongá—ʻa e tafaʻaki naʻá ne tohoakiʻi nai ai koe ki ho hoá ʻi he kamatá. ʻOku pehē ʻe ha husepāniti ko Joseph, “Ko e tokangataha ki he tōʻonga fakatupu-ʻitá ʻoku hangē ia haʻo nōfoʻi ʻi he tapa māsila ʻo ha foʻi taiamoni kae ʻikai houngaʻia ʻi hono fetapaki fakaʻofoʻofá.”
Tokoni ki ha fetalanoaʻaki
ʻUluakí, ʻe lava ke mo lāulea fakafoʻituitui ki he ngaahi fehuʻi ko ení. Pea lāulea ki hoʻomo ngaahi talí.
ʻOku ʻi ai ha tōʻonga ho hoá ʻoku fakatupu palopalema ki hoʻomo nofo malí? Kapau ko iá, ko e hā ʻa e tōʻonga ko iá?
Ko e tōʻonga ko iá ʻoku kovi ʻaupito pe ʻoku fakatupu-ʻita pē?
ʻOku ʻi ai ha tafaʻaki lelei ʻo e tōʻonga ko iá? Kapau ko ia, ko e hā ia pea ko e hā ʻokú ke fakamahuʻingaʻi ai ʻa e ʻulungaanga ko ia ho hoá?
a Sio ki he ngaahi kupu “Founga ke Mapuleʻi Ai Hoʻo ʻItá,” “How to Avoid Hurtful Speech,” mo e “How to Stop Arguing.”