ʻI ha savea ʻe taha, ko e pēseti ʻe 97 ʻo e kau taʻu hongofulu tupú naʻa nau fakahaaʻi ai ʻoku nau ngāueʻaki ʻa e mītia fakasōsialé. ʻOku vēkeveke hoʻo kiʻi tamá ke muimui ʻi he founga ko iá? Kapau ko ia, ʻoku ʻi ai ʻa e ngaahi meʻa ʻoku totonu ke ke fakakaukau ki ai.

ʻI he kupu ko ení

•  Founga hono ngāueʻaki ʻe hoʻo kiʻi tamá ʻa e taimí

•  Ko e vakai ʻa hoʻo kiʻi tamá ki he kaungāmeʻá

•  Ko e tuʻunga moʻui lelei fakaeongo ʻa hoʻo kiʻi tamá

•  Ko e meʻa ʻoku fai ʻe hoʻo kiʻi tamá ʻi he ʻinitanetí

•  ʻOku mahuʻinga ʻa e mītia fakasōsialé?

•  Meʻa ʻoku leaʻaki ʻe he ngaahi mātuʻá

 ʻOku pehē ʻi he uepisaiti HelpGuide, “Ko e mītia fakasōsialé ʻoku faʻu ia ke ne kaihaʻasi hoʻo tokangá, ʻai koe ke nofo maʻu pē ʻi he ʻinitanetí pea ʻai koe ke ke toutou vakaiʻi ʻa e ngaahi fakamatala fakamuimui tahá.”

 “ʻOku ou fokotuʻu ke sio ki he mītia fakasōsialé ʻi ha kiʻi miniti siʻi pē, ka ʻoku ou faʻa nofo ai ʻo laui houa. ʻOku lava ke mātuʻaki faingataʻa hono tuku hifo ʻa e telefoní pea fai ha ngāue ʻoku ʻaonga angé.”​—Lynne, 20.

 ʻEke hifo kiate koe: ʻE maʻu nai ʻe heʻeku kiʻi tamá ʻa e mapuleʻi-kita feʻunga ke muimui ki he ngaahi fakangatangata ʻoku ou fokotuʻu ke ne ngāueʻaki ki he mītia fakasōsialé? ʻOku matuʻotuʻa feʻunga ʻeku kiʻi tamá ke ne fokotuʻu pē ʻene fakangatangata pē ʻaʻana pea muimui ki ai?

 Tefitoʻi moʻoni Fakatohitapu: “Mou mātuʻaki tokanga maʻu pē ki he anga hoʻomou laká ke . . . hoko ko e faʻahinga ʻoku fakapotopoto, ʻo ngāue lelei taha ʻaki ho taimí.”​—ʻEfesō 5:15, 16.

 Ko e kupuʻi lea “mītia fakasōsiale” ʻoku fakahaaʻi mai ai ko e kakai ʻoku nau ngāueʻaki iá ʻoku ʻi ai honau kaungāmeʻa pe ko e kakai ʻoku nau fetuʻutaki mo iá ʻoku nau ʻiloʻi. Ka, ko e anga-mahení, ko e ngaahi kaungāmeʻa ko iá ʻoku ʻikai ko ha ngaahi kaungāmeʻa moʻoni.

 “ʻOku ou fakatokangaʻi ko e tokolahi taha ʻo e toʻutupú ʻoku nau maʻu ʻa e fakakaukau hala ʻo pehē ko e lahi ange ʻa e faʻahinga ʻoku nau saiʻia ʻi heʻenau pousí pe hoko ko honau kaumeʻa ʻi he ʻinitanetí, ʻoku ʻuhinga iá ʻoku nau tokanga moʻoni fekauʻaki mo kinautolu, neongo ʻoku ʻikai ke nau ʻiloʻi kinautolu.”​—Patricia, 17.

 ʻEke hifo kiate koe: ʻOku matuʻotuʻa feʻunga ʻeku kiʻi tamá ke ne ʻiloʻi ko e hoko ʻo manakoa ʻi he ʻinitanetí ʻoku ʻikai ke mahuʻinga? ʻE lava ke ne fakatupulekina ha kaungāmeʻá mo e niʻihi kehé mata ki he mata?

 Tefitoʻi moʻoni Fakatohitapu: “Ko ha kaumeʻa moʻoni ʻokú ne ʻofa ʻi he taimi kotoa pē pea ko ha tokoua ia ʻoku fanauʻi mai ki he taimi faingataʻá.”​—Palōveepi 17:17.

 Kuo ʻiloʻi ʻe he kau fakatotoló, ko e faʻahinga ʻoku nau ngāueʻaki tōtuʻa ʻa e mītia fakasōsialé, ʻoku nau faʻa ongoʻi tuēnoa, loto-moʻua pea aʻu ʻo nau ongoʻi loto-mafasia.

 “Ko e vakai ki he ngaahi tā ʻo e meʻa ʻoku fai ʻe ho ngaahi kaungāmeʻá mo ho ngaahi kaungāmeʻa kehé​—ʻo ʻikai ke ke kau aí​—ʻokú ne ʻai koe ke ongoʻi taʻeoliʻia.”​—Serena, 19.

 ʻEke hifo kiate koe: ʻE maʻu nai ʻe heʻeku kiʻi tamá ʻa e matuʻotuʻa feʻunga ke fakaʻehiʻehi mei he hoko ʻo siokitá pe feʻauʻauhí ʻi heʻene sio ki he meʻa ʻoku fai ʻe he niʻihi kehé ʻi he mītia fakasōsialé?

 Tefitoʻi moʻoni Fakatohitapu: “ʻAi ke ʻoua te tau hoko ʻo hīkisia, ʻo fakatupunga ha feʻauʻauhi, mo e femehekaʻaki.”​—Kalētia 5:26.

 ʻE lava ke fakaava mai ʻe he mītia fakasōsialé ʻa e matapā ki he houtamaki ʻi he ʻinitanetí, feʻaveʻaki pōpoaki taʻetāú mo e sio ʻi he ʻata fakalieliá. Neongo ʻe ʻikai fakataumuʻa ʻa e kiʻi tamá ia ke sio ʻi he ngaahi meʻa ko ení, ka ʻe malava pē ke ne fai pehē.

 “ʻOku ou fakatokangaʻi ko e ngaahi meʻa ʻoku pousi ʻi he ʻinitanetí ʻe hā ngali lelei pē ia, ka ʻe faingofua pē ke liliu ia ki ha meʻa ʻoku ʻikai ke lelei. ʻOku hā ai ʻa e ngaahi lea ʻoku kovi mo e ngaahi fasi ʻoku taʻetaau.”​—Linda, 23.

 ʻEke hifo kiate koe: ʻOku maʻu ʻe heʻeku kiʻi tamá ʻa e matuʻotuʻa feʻunga ke ngāue fakapotopotoʻaki ʻa e ʻinitanetí? Te ne maʻu nai ʻa e mālohi feʻunga ke talitekeʻi ʻa e ngaahi fakamatala ʻikai leleí?

 Tefitoʻi moʻoni Fakatohitapu: “Ko e fehokotaki fakasino taʻetāú mo e faʻahinga kotoa pē ʻo e taʻemaʻá pe mānumanú, tuku ke ʻoua naʻa fai ha talanoa ki ai ʻi homou lotolotongá, . . . pehē foki ki he tōʻonga fakamā pe talanoa launoa pe fakakata fakalielia.”​—ʻEfesō 5:3, 4.

 Ko e mītia fakasōsialé ʻoku ʻikai ko ha fiemaʻu pau ia ki he moʻuí, naʻa mo hono maʻu ha moʻui fiemālie mo fiefia. ʻOku fiemālie pē ʻa e faʻahinga kei siʻi tokolahi ke hokohoko atu ʻenau moʻuí ʻo taʻekau ai ʻa e mītia fakasōsialé​—kau ai ʻa e niʻihi naʻa nau ngāueʻaki ia ki muʻa ka kuo nau fili ke ʻoua ʻe toe ngāueʻaki.

 “Hili ʻeku sio ki hono uesia kovi ʻe he mītia fakasōsialé hoku taʻoketé, naʻá ku fili leva ke taʻofi hono ngāueʻaki iá. Talu mei ai, ʻoku ou toe ongoʻi fiefia ange pea ongoʻi ʻoku mohu ʻuhinga ange ʻeku moʻuí.”​—Nathan, 17.

 Ko e meʻa mahuʻinga tahá: Ki muʻa ke ke fakaʻatā hoʻo kiʻi tamá ke ne ngāueʻaki ʻa e mītia fakasōsialé, fakapapauʻi ʻokú ne matuʻotuʻa feʻunga ke muimui ki he fakangatangata ʻo e taimi ʻoku vaheʻi ke ne ngāueʻaki ai ʻa e mītia fakasōsialé, maʻu ʻa e ngaahi kaungāmeʻa lelei pea fakaʻehiʻehi mei he ngaahi fakamatala taʻetāú.

 Tefitoʻi moʻoni Fakatohitapu: “Ko e tokotaha fakapotopotó ʻokú ne fakakaukauʻi ʻene laka taki taha.”​—Palōveepi 14:15.