“ʻOku ʻikai ha ʻahiʻahi kuo hoko mai kiate kimoutolu tuku kehe pē ʻa ia ʻoku anga-maheni ki ai ʻa e tangatá. Ka ko e ʻOtuá ʻoku faitōnunga, pea ʻe ʻikai te ne tuku ke ʻahiʻahiʻi kimoutolu ʻo fakalaka atu ia ʻi he meʻa ʻoku malava ke mou kātekiná, kae fakataha mo e ʻahiʻahí te ne ʻai foki mo ha haoʻanga koeʻuhi ke mou malava ai ke kātakiʻi ia.”​—1 Kolinitō 10:13, Liliu Tohi Tapu Māmani Foʻoú.

 “Oku ikai ha ahiahi e to kiate kimoutolu ka koia oku faa hoko ki he tagata: ka oku mooni ae Otua, bea e ikai te ne tuku ke lahi hono ahiahiʻi akimoutolu i he mea te mou faa fai; ka i he ahiahi e tofa foki eia ae hala ke hao ai, koeuhi ke mou faa kataki ia.”​—1 Kolinitō 10:13, Paaki Motuʻa.

 Ko e veesi ko ení ʻoku fakahaaʻi mai ai ʻa e ʻulungaanga fakatupu ʻofeina ʻo e ʻOtuá, ʻa ia ko e faitōnungá. Ko e kau lotu mateaki ʻa e ʻOtuá ʻe lava ke nau falala ki heʻene tokoní, tautefito ʻi he taimi ʻoku nau fehangahangai ai mo e ngaahi ʻahiʻahí pe fakatauelé.

 “ʻOku ʻikai ha ʻahiʻahi kuo hoko mai kiate kimoutolu tuku kehe pē ʻa ia ʻoku anga-maheni ki ai ʻa e tangatá.” Ko e kau lotu ʻa e ʻOtuá ʻe fakataueleʻi nai kinautolu ke fai ha meʻa ʻoku taʻefakahōifua kiate ia. Neongo ʻa e faingataʻa ʻa e ngaahi ʻahiʻahi peheé, ʻoku anga-maheni pē ia ki he kakai tokolahi kuo nau hokosia iá. Ko ia ai, ko e kau lotu ʻa e ʻOtuá ʻe lava foki mo kinautolu ʻo kātekina ʻa e ngaahi ʻahiʻahi peheé.

 “Ko e ʻOtuá ʻoku faitōnunga.” Ko Sihova a ko e ʻOtuá ʻoku ala falalaʻanga mo taau ke falala ki ai. ʻOkú ne tauhi maʻu pē ʻene talaʻofá, heʻikai ʻaupito te ne liʻaki ʻa e faʻahinga ʻoku ʻofa pea nofoʻaki mateaki mo talangofua kiate iá. (Teutalōnome 7:9; Saame 9:10; 37:28) Ko ia ai, ko e faʻahinga ʻoku lotu kiate iá ʻe lava ke nau falala pau te ne tauhi foki ʻa e ongo talaʻofa fakalototoʻa ʻoku hoko atu ʻi he vēsí.

 “ʻE ʻikai te ne tuku ke ʻahiʻahiʻi kimoutolu ʻo fakalaka atu ia ʻi he meʻa ʻoku malava ke mou kātekiná.” ʻOku fakahaaʻi ʻe he ʻOtuá ʻene faitōnungá ʻaki ʻa e ʻikai fakaʻatā ʻa e ngaahi ʻahiʻahí ke hoko ʻo fuʻu kakaha, ʻo ʻikai malava ʻe ha taha ke ne kātekina. ʻOkú ne ʻafioʻi ʻa e ngaahi fakangatangata ʻo e kotoa ʻo ʻene kau lotú.​—Saame 94:14.

 “Fakataha mo e ʻahiʻahí te ne ʻai foki mo ha haoʻanga koeʻuhi ke mou malava ai ke kātakiʻi ia.” ʻE lava ke toʻo atu ʻe he ʻOtuá ʻa e ʻahiʻahí pe tokonaki mai ʻa e meʻa ʻoku fiemaʻu heʻene kau lotú ke kātekinaʻaki ʻa e ʻahiʻahí. Ko e fakatātaá, ʻe lava ke ne tokonaki mai ʻa e tataki fakafou ʻi hono laumālie māʻoniʻoní, ko ha fakafiemālie mei he Tohi Tapú, pe tokoni ʻaonga mei ha kaungātui.​—Sione 14:26; 2 Kolinitō 1:3, 4; Kolose 4:11.

 ʻOku hā ʻa e veesi ko ení ʻi ha tohi naʻe hiki ʻe he ʻapositolo ko Paulá ki he fakatahaʻanga Kalisitiane ʻi Kolinitoó. ʻI he konga ko eni ʻo ʻene tohí, naʻe ngāueʻaki ʻe Paula ʻa e hisitōlia ʻo e kau ʻIsileli ʻo e kuonga muʻá ko ha faʻifaʻitakiʻanga fakaefakatokanga ki he kau Kolinitoó. (1 Kolinitō 10:11) ʻOku fakamatalaʻi ʻe Paula ʻa e ngaahi ʻahiʻahi mo e fakatauele naʻe fehangahangai mo e kau ʻIsilelí, ʻo kau ai ʻa e tauhi ʻaitolí mo e fehokotaki fakasino taʻetāú. (1 Kolinitō 10:6-10) Ko e niʻihi ʻo kinautolu naʻa nau tō ʻi he ngaahi ʻahiʻahi ko ení. Makatuʻunga ʻi heʻenau faʻifaʻitakiʻangá, naʻe fakamanatu ai ʻe Paula ki he kau Kalisitiané ʻoku totonu ke ʻoua te nau falala tōtuʻa kiate kinautolu, ʻo fakakaukau heʻikai ʻaupito te nau tō. (1 Kolinitō 10:12) Kae kehe, naʻá ne hoko atu ke fakatuipauʻi kinautolu ʻaki ʻa e ngaahi lea ʻi he 1 Kolinitō 10:13. Ko e kau lotu mateaki ʻa e ʻOtuá ʻoku lava ke nau ikuʻi ha faʻahinga ʻahiʻahi pē.

 Sio ʻi he vitiō nounou ko ení ke maʻu ha vakai fakalūkufua ki he tohi ʻa 1 Kolinitoó.