“ʻOku ou malava ʻa e meʻa kotoa pē koeʻuhi ʻoku ou maʻu ʻa e ivi fakafou ʻi he tokotaha ko ia ʻokú ne ʻomai kiate au ʻa e mālohí.”​—Filipai 4:13, Liliu Tohi Tapu Māmani Foʻoú.

 “Oku ou faa fai ae gaahi mea kotoabe ia Kalaisi oku ne fakamalohiʻi au.”​—Filipai 4:13, Paaki Motuʻa.

 Ko e ngaahi lea ko ení, naʻe hiki ʻe he ʻapositolo ko Paulá, ʻokú ne fakapapauʻi ki he faʻahinga ʻoku nau lotu ki he ʻOtuá te nau maʻu ʻa e mālohi ke fakahoko Hono finangaló.

 ʻOku pehē ʻe he ngaahi liliu Tohi Tapu ʻe niʻihi ko Kalaisi ʻa e tokotaha naʻá ne tokonaki ʻa e mālohí kia Paulá. Kae kehe, ko e foʻi lea “Kalaisi” ʻoku ʻikai ke ʻasi ia heni ʻi he ngaahi tatau tohinima faka-Kalisi motuʻa tahá. Ko ia, ko e ngaahi liliu ʻi onopōní ʻoku nau ngāueʻaki ʻa e fakalea hangē ko e “tokotaha ko ia ʻokú ne ʻomai kiate au ʻa e mālohí” (Liliu Tohi Tapu Māmani Foʻoú), “ko ia ʻokú ne ʻomai kiate au ʻa e mālohi” (New International Version), mo e “ko ia ko e matavai ʻo hoku mālohí” (New American Bible). Ko ia ko hai naʻe fakakaukau ki ai ʻa Paulá?

 ʻOku fokotuʻu mai ʻi he potutohí naʻe ʻuhinga ʻa Paula ia ki he ʻOtuá. (Filipai 4:6, 7, 10) Ki muʻa ʻi he tohi tatau pē ko ení, naʻe tohi ʻa Paula ki he kau Filipaí: “Ko e ʻOtuá ʻa e tokotaha ʻokú ne fakaivia kimoutolú, ʻo ne fakatou ʻoatu kiate kimoutolu ʻa e . . . mālohi ke mou ngāue.” (Filipai 2:13) Pea ʻi he 2 Kolinitō 4:7, naʻá ne tohi ai ko e ʻOtuá naʻá ne ʻoange kiate ia ʻa e mālohi ke ne fakahoko ʻene ngāue fakafaifekaú. (Fakafehoanaki mo e 2 Tīmote 1:8.) Ko ia ai, ʻoku ʻi ai ha ngaahi ʻuhinga lelei ke tau pehē naʻe ʻuhinga ʻa Paula ki he ʻOtuá ko e “tokotaha ko ia ʻokú ne ʻomai kiate au ʻa e mālohí.”

 Naʻe ʻuhinga ʻa Paula ki he hā ʻi heʻene tohi te ne maʻu ʻa e mālohi ki he “meʻa kotoa pē”? Ko e ngaahi meʻa naʻe lave ki ai ʻa Paulá ʻoku ngalingali ko e ngaahi tafaʻaki kehekehe naʻá ne fehangahangai mo ia ʻi heʻene fai ʻa e finangalo ʻo e ʻOtuá. Tatau ai pē pe naʻe lahi pe siʻi ʻa e meʻa fakamatelie naʻá ne maʻú, naʻá ne falala ki he ʻOtuá ke ne tokangaʻi ia. Ko ia naʻe ako ʻa Paula ke ne hoko ʻo fiemālie pē neongo hono ngaahi tuʻungá.​—2 Kolinitō 11:23-27; Filipai 4:11.

 Ko e ngaahi lea ʻa Paulá ʻe lava ke hoko ko ha fakapapauʻiʻanga ki he kau lotu ʻa e ʻOtuá ʻi he ʻahó ni. Ko e ʻOtuá te ne tokonaki ʻa e mālohi ʻoku nau fiemaʻu ke kātekina ai ʻa e ngaahi ʻahiʻahí mo fai hono finangaló. ʻE lava ke fakaivia kinautolu ʻe he ʻOtuá fakafou ʻi hono laumālie māʻoniʻoní, pe ivi ngāué, pea pehē foki fakafou ʻi he kaungālotú mo ʻene Folofolá, ʻa e Tohi Tapú.​—Luke 11:13; Ngāue 14:21, 22; Hepelū 4:12.

 Ko e ngaahi lea ko ení ko ha konga ia ʻo e lea fakaʻosi ʻa Paula ʻi heʻene tohi ki he kau Kalisitiane ʻi Filipaí. Naʻá ne hiki ʻa e tohi ko ení ʻi he 60-61 T.S. nai, lolotonga hono ʻuluaki tuku pilīsone ia ʻi Lomá. ʻI ha vahaʻa taimi naʻe ʻikai ke fakapapauʻi, ko e kau Kalisitiane ʻi Filipaí naʻe ʻikai malava ke nau poupou fakamatelie ki he ʻapositolo ko Paulá. Ka ko eni, naʻa nau lava ʻo ʻave ʻa e ngaahi meʻaʻofa kia Paula ke feau ʻene ngaahi fiemaʻú.​—Filipai 4:10, 14.

 Naʻe fakaongoongoleleiʻi loto-māfana ʻe Paula ʻa e kau Kalisitiane ʻi Filipaí ki heʻenau nima-homó pea fakapapauʻi ange kiate kinautolu naʻá ne maʻu ʻa e meʻa naʻá ne fiemaʻú. (Filipai 4:18) Naʻá ne toe puke foki ʻa e faingamālié ke vahevahe atu kiate kinautolu ha fakapulipuli fekauʻaki mo e moʻui ko ha Kalisitiané: Ko e kau Kalisitiane kotoa pē, pe ʻoku nau koloaʻia pe masiva, ʻe lava ke nau maʻu ʻa e fiemālie moʻoní kapau te nau falala ki he tokoni ʻa e ʻOtuá.​—Filipai 4:12.