Ko e ngaahi kaumeʻa moʻoní ʻokú nau falalaʻanga. Hangē pē ko e vahaʻangatae vāofi ʻi he vahaʻa ʻo e fānaú, ko e ngaahi kaumeʻa moʻoní ʻoku nau mateaki mo fetokangaʻaki, tautefito ʻi he ngaahi taimi faingataʻá.

 “Ko ha kaumeʻa moʻoni ʻokú ne ʻofa ʻi he taimi kotoa pē.” Ko e kupuʻi lea ko ení ʻe lava ke toe fakalea ia ko e “ngaahi kaumeʻá ʻoku nau fakahāhā maʻu pē ʻenau ʻofá.” Ko e foʻi lea faka-Hepelū naʻe ngāueʻaki ki he kupuʻi lea ko e “ʻofá” ʻoku kau ki ai ʻa e meʻa lahi ange ʻi heʻete ongoʻi ki ha tokotaha. Ko e ʻofa taʻesiokita ia ʻoku fakahaaʻi ki ha tokotaha ʻo fakafou ʻi he ngāué. (1 Kolinitō 13:4-7) Ko e ngaahi kaumeʻa ʻoku nau maʻu ʻa e faʻahinga ʻofa peheé ʻoku nau femateakiʻaki ʻi he taimi ʻoku hoko ai ha fetaʻemahinoʻaki pe loto-mafasia ʻi he ngaahi palopalema ʻi he moʻuí. ʻOku nau toe fefakamolemoleʻaki loto-lelei. (Palōveepi 10:12) Pea ko ha kaumeʻa ʻoku ʻikai ke ne meheka ʻi he hoko ha ngaahi meʻa lelei ki he tokotaha ʻe tahá. ʻI hono kehé, ʻokú ne kaungāfiefia mo hono ngaahi kaumeʻá.—Loma 12:15.

 “Ko ha kaumeʻa moʻoni . . . ko ha tokoua ia ʻoku fanauʻi mai ki he taimi faingataʻá.” ʻOku fakatefito ʻa e palōvēpí ʻi he foʻi fakakaukau ko e fānaú ʻoku nau maʻu ʻa e vahaʻangatae vāofi. Ko ia ʻi he taimi ʻoku tau fai ai hotau lelei tahá ke tokoni ki ha kaumeʻa ʻokú ne fehangahangai mo ha faingataʻa, ʻoku tau hangē ai ha tokoua moʻoní. ʻIkai ko ia pē, ko e vā ʻoku maʻu ʻe he ngaahi kaungāmeʻa peheé ʻoku ʻikai ke fakavaivaiʻi ia ʻe he ngaahi ʻahiʻahí. ʻI hono kehé, ʻoku fakaivimālohiʻi ʻenau kaumeʻá koeʻuhí ʻi he hoko ʻa e palopalemá ʻoku toe mālohi ange ai ʻenau feʻofaʻakí mo e fefakaʻapaʻapaʻakí.

 Ko e tohi Palōvēpí ʻokú ne ʻomai ʻa e ngaahi fakakaukau mo e fokotuʻu fakapotopoto ʻoku hiki ia ʻi ha founga fakamānako mo nounou ʻa ia ʻokú ne ueʻi ʻa e tokotaha lautohí ke fakakaukau. Naʻe hiki ʻe Tuʻi Solomone ʻa e konga lahi taha ʻo e tohi ko ení. Ko ʻene founga hiki tohí ʻoku tatau ia mo e faʻu maau faka-Hepeluú ʻi he ʻikai ke ngāueʻaki ʻa e ngaahi lea ʻoku ongo tataú, ʻokú ne ngāueʻaki ha ongo fakakaukau ʻoku meimei tatau pea toe fakamamafaʻi pe ʻokú ne ngāueʻaki ha ongo fakakaukau ʻoku tuʻu fehangahangai. Ko e fakatātaá ʻi he Palōveepi 17:17 ʻokú ne ngāueʻaki ai ʻa e faʻu maau fakakaukau tataú, ʻa ia ko e konga hono ua ʻo e vēsí ʻokú ne fakamamafaʻi ʻa e fakakaukau ʻoku ʻi he ʻuluaki konga ʻo e vēsí. Pea ʻi he Palōveepi 18:24 ko e fakatātā ia ʻo e ongo fakakaukau fehangahangaí. “ʻOku ʻi ai ha ngaahi kaungāmeʻa ʻoku nau mateuteu ke fefaikoviʻaki, ka ʻoku ʻi ai ha kaumeʻa ʻoku pipiki ofi ange ia ʻi ha tokoua.”

 ʻI hono hiki ʻa e Palōveepi 17:17, naʻe fakakaukau nai ʻa Solomone ki he kaumeʻa vāofi ʻa ʻene tamai ko Tēvitá mo Sionatane ko e foha ʻo Tuʻi Saulá. (1 Sāmiuela 13:16; 18:1; 19:1-3; 20:30-34, 41, 42; 23:16-18) Neongo ko Tēvita mo Sionatané naʻe ʻikai ke na fāmili ka naʻá na vāofi ange ʻi ha tokoua moʻoni. Naʻe aʻu ʻo tuku atu ʻe Sionatane ʻene moʻuí ke ʻi ha tuʻunga fakatuʻutāmaki ke maluʻi hono kaumeʻa ko Tēvitá. a

 “Oku ofa mau ai be ae kaiga mooni, bea kuo fanauʻi ho tokoua ke talifaki ae aho oe kovi.”—Paaki Motuʻa.

Sio ʻi he vitiō nounou ko ení ke maʻu ha vakai fakalūkufua ki he tohi ʻa Palōveepí.