“Maʻu ʻa e fiefia lahi ʻia Sihova, pea te ne ʻoatu kiate koe ʻa e ngaahi holi ʻo ho lotó.”​—Saame 37:4, Liliu Tohi Tapu Māmani Foʻoú.

 “Tuʻu foki ʻi he ʻEiki hoʻo manako, pea te ne ʻatu ʻa e ngaahi kole ʻa ho loto.”​—Saame 37:4, Paaki Foʻou.

 ʻOku fakalototoʻaʻi ʻe he tokotaha-tohi-sāmé ʻa e kau lotu ki he ʻOtuá ke nau fiefia ʻi hono maʻu ha kaungāmeʻa vāofi mo Ia. Ko e faʻahinga ʻoku nau fiefia ʻi he kaungāmeʻa ko iá ʻe lava ke nau fakapapauʻi ko Sihova a ko e ʻOtuá te ne fakalato ʻenau ngaahi holi totonú.

 “Maʻu ʻa e fiefia lahi ʻia Sihova.” Ko e kupuʻi lea ko ení ʻe lava ke toe liliu ia ko e “maʻu hoʻo fiefia lahi tahá ʻia Sihova,” “maʻu ʻa e fiefia lahi ʻi he tauhi ki he ʻEikí,” pe “maʻu ʻa e fiefia lahi ʻi he meʻa kuo talaʻofa atu kiate koe ʻe he ʻEikí.” Ko hono ʻai mahinó, ʻoku totonu ke tau “maʻu [ʻetau] fiefia lahi tahá” ʻi he lotu ki he ʻOtua moʻoní. (Saame 37:4, fakamatala ʻi lalo) Ko e hā hono ʻuhingá?

 Ko e faʻahinga ʻoku lotu kia Sihová ʻoku nau maʻu ʻa e anga ʻo ʻene vakai ki he ngaahi meʻá, ʻo hangē ko ia ʻoku fakahaaʻi ʻi he Tohi Tapú. ʻOku ʻikai ngata pē ʻi heʻenau ʻiloʻi ʻa e ʻOtuá ka ʻoku nau toe ʻiloʻi foki ʻoku fakapotopoto ke talangofua kiate ia. Ko e olá, ʻoku nau tauhi maʻu ha konisēnisi lelei pea fakaʻehiʻehi mei he ngaahi palopalema lahi ʻi he moʻuí. (Palōveepi 3:5, 6) Ko e fakatātaá, ʻoku ʻikai ke nau tukulotoʻi ʻa e ʻitá pe meheká ʻi he taimi ʻoku hā ngali lakalakaimonū ai ʻa e kakai mānumanu mo taʻefaitotonú. (Saame 37:1, 7-9) Ko e kakai ʻa e ʻOtuá ʻoku nau fiefia ʻi he ʻiloʻi ʻe vavé ni ke ne fakangata ʻa e kotoa ʻo e fakamaau taʻetotonú pea fakapaleʻi ʻa e kau anga-tonú ʻi heʻenau tōʻonga leleí. (Saame 37:34) ʻOku nau toe maʻu foki ʻa e fiefia lahi ʻi he ʻiloʻi ʻoku nau maʻu ʻa e hōifua ʻenau Tamai fakahēvaní.​—Saame 5:12; Palōveepi 27:11.

 “Te ne ʻoatu kiate koe ʻa e ngaahi holi ʻo ho lotó.” Ko e ngaahi lea ko ení ʻe lava ke toe liliu ia ko e “te ne tali hoʻo ngaahi lotú” pe “te ne ʻoatu kiate koe ʻa e meʻa ʻokú ke holi lahi taha ki aí.” Ko e moʻoni, ʻe ʻikai ke tali ʻe Sihova ha faʻahinga kole pē. ʻI he hangē ko ha mātuʻa lelei, ʻoku ʻiloʻi ʻe Sihova ʻa e meʻa ʻoku lelei taha maʻa ʻEne fānaú. ʻIkai ngata aí, ko ʻetau ngaahi kolé, fakataha mo ʻetau founga moʻuí, kuo pau ke fehoanaki ia mo ʻene ngaahi tuʻungá pea mo hono finangaló. (Palōveepi 28:9; Sēmisi 4:3; 1 Sione 5:14) ʻI heʻetau fai iá, ʻe lava ke tau fakaofiofi ki he “Tokotaha-Fanongo ki he lotú” ʻi he tuipau te ne fanongo mai kiate kitautolu.​—Saame 65:2; Mātiu 21:22.

 Ko e Saame 37 naʻe faʻu ʻe Tuʻi Tēvita ʻo ʻIsileli ʻo e kuonga muʻá. Naʻá ne hiki ʻa e sāmé ʻi ha sīpinga fakaʻalafapeti pe fakaʻakolositiki. b

 Naʻe fekuki ʻa Tēvita mo e ngaahi fakamaau taʻetotonu. Naʻe tuli holo ia ʻe Tuʻi Saula pea mo e niʻihi kehe ʻa ia naʻa nau loto ke tāmateʻi iá. (2 Sāmiuela 22:1) Neongo ia, naʻe falala kakato maʻu pē ʻa Tēvita ki hono ʻOtuá. Naʻe ʻiloʻi ʻe Tēvita ʻe faai atu pē ʻo tauteaʻi ʻe Sihova ʻa e kau fulikivanú. (Saame 37:10, 11) Neongo kapau ʻe hā ngali ʻoku nau lakalakaimonū ʻo hangē ha “musie lanu mata toki tupú,” ʻe faai atu pē pea nau mole atu.​—Saame 37:2, 20, 35, 36.

 Ko e Saame 37 ʻoku fakafaikehekeheʻi ai ʻa e meʻa ʻe hoko ki he faʻahinga ʻoku nau fakamoʻulaloa ki he ngaahi tuʻunga ʻa e ʻOtuá pea mo e ikuʻanga ʻo e faʻahinga ʻoku nau taʻetokaʻi iá. (Saame 37:16, 17, 21, 22, 27, 28) Ko ia ai ʻoku tokoniʻi kitautolu ʻe he sāmé ke tau maʻu ʻa e potó pea hoko ko e faʻahinga tokotaha ʻoku hōifua ki ai ʻa e ʻOtuá.

 Sio ʻi he vitiō nounou ko ení ke maʻu ha vakai fakalūkufua ki he tohi ʻo e Ngaahi Sāmé.