“ʻIkai kuó u tuʻutuʻuni kiate koe? Ke ke loto-toʻa peá ke tuʻu mālohi. ʻOua naʻá ke manavahē pe ilifia, he ko Sihova ko ho ʻOtuá ʻe ʻiate koe ʻi ha feituʻu pē te ke ʻalu ki ai.”—Siosiua 1:9, Liliu Tohi Tapu Māmani Foʻoú.

 “Ikai ko au kuou fekauʻi koe? Ke ke malohi koe bea ke loto toʻa; oua naa ke manavahe, bea oua naa ke bubutuu: he ko Jihova ko ho Otua oku iate koe ia i he botu kotoabe oku ke alu ki ai.”—Siosiua 1:9, Paaki Motuʻa.

 ʻI he ngaahi lea ko ení, naʻe fakapapauʻi ʻe Sihova a ko e ʻOtuá ki heʻene tokotaha lotu faitōnunga ko Siosiuá ke ne “loto-toʻa peá ke tuʻu mālohi” neongo ʻa e fehangahangai nai mo e ngaahi tuʻunga faingataʻá pe lōmekina ʻe he ngaahi fakafaingataʻaʻiaʻangá. Kapau naʻe talangofua ʻa Siosiua ki he fekau ʻa e ʻOtuá, naʻe ʻikai ha ʻuhinga ke ne manavahē ki he kahaʻú, koeʻuhí ʻe hangē ia ʻoku ʻi ai tonu ʻa Sihova ʻo tokoniʻi ia ke ne lavameʻa. Naʻe kau ʻa Sihova mo Siosiua fakafou ʻi heʻene fakahinohinoʻi ia mo tuku ke ne ikunaʻi hono ngaahi filí.

 ʻE lava fēfē ke hoko ʻa Siosiua ʻo “loto-toʻa peá ke tuʻu mālohi”? Naʻá ne maʻu ʻa e loto-toʻa pea mo e mālohí mei he ngaahi tohi fakamānavaʻi naʻe tokonaki ʻe Sihova ʻi he taimi ko iá. Naʻe kau ki ai ʻa e “Lao kotoa naʻe tuʻutuʻuni ʻe Mōsese ko ʻeku sevānití [ʻa Sihova] kiate koé [Siosiua].” b (Siosiua 1:7) Naʻe tala ʻe Sihova kia Siosiua ke ne “lau leʻo-siʻi ia [“fakalaulauloto ki ai,”] ʻi he ʻaho mo e pō.”(Siosiua 1:8) Ko e lau mo e fakalaulauloto ko iá naʻa ne tokoniʻi ʻa e loto mo e fakakaukau ʻa Siosiuá ke ne fai ʻa e finangalo ʻo e ʻOtuá. Naʻe fiemaʻu leva ʻe Siosiua ke ne ngāueʻaki ʻa e meʻa kuó ne ako mei he folofola ʻa e ʻOtuá “ke tokanga ke tauhi ʻa e meʻa kotoa pē [naʻe] hiki ʻi aí.” Kapau naʻá ne fai ia, te ne ngāue fakapotopoto mo lavameʻa. Pea ko e meʻa tofu pē ia naʻe hokó. Neongo naʻá ne fehangahangai mo e ngaahi faingataʻa, naʻe maʻu ʻe Siosiua ʻa e moʻui fiemālie mo kakato ko ha tokotaha lotu faitōnunga ʻa Sihova.—Siosiua 23:14; 24:15.

 Ko e ngaahi lea ʻa Sihova kia Siosiuá ʻoku kei hoko pē ia ko e fakalototoʻa ʻi he ʻahó ni. ʻOku fakahaaʻi ai ʻa e tokanga lahi ʻa Sihova ki heʻene kau lotú kotoa, tautefito ʻi he taimi ʻoku nau fehangahangai ai mo e ngaahi polé. ʻOkú ne loto ke nau lavameʻa ʻo hangē pē ko Siosiuá! Hangē ko Siosiuá, ʻe lava ke nau “loto-toʻa peá ke tuʻu mālohi” ʻaki ʻenau lau mo fakalaulauloto ki he folofola ʻa e ʻOtuá, ko e Tohi Tapú, pea ngāue ʻo fehoanaki mo ʻene fakahinohinó.

 Hili ʻa e mate ʻa Mōsesé, naʻe fakahinohino ʻe Sihova ko Siosiua te ne tataki ʻa e puleʻanga ʻIsilelí. (Siosiua 1:1, 2) ʻI he taimi ko iá, naʻe teuteu ʻa e kau ʻIsilelí ke nau hū atu ki he Fonua ʻo e Talaʻofá, ʻa e fonua ʻo Kenaní. Ka naʻe pau ke nau faitau mo honau ngaahi fili mālohí. Ko e fakatātaá, naʻe faitau ʻa Siosiua mo e kau Kenaní, ʻa ia naʻa nau mātuʻaki fulikivanu. c (Teutalōnome 9:5; 20:17, 18) Ko e kau Kenaní naʻa nau toe tokolahi mo mateuteu fakakautau ange ʻi he kau ʻIsilelí. (Siosiua 9:1, 2; 17:18) Ka naʻe muimui loto-toʻa ʻa Siosiua ʻi he ngaahi fakahinohino ʻa Sihová. Naʻe fakamoʻoniʻi ʻe he ʻOtuá ʻene kau mo iá, ʻi hono ikunaʻi ʻe he kau ʻIsilelí ʻa e tokolahi taha honau ngaahi filí ʻi he taʻu pē ʻe ono.—Siosiua 21:43, 44.