ʻIkai, ko e palanite ko Māmaní ʻe ʻikai ʻaupito ke fakaʻauha, tutu ʻi ha afi, pe fetongi. ʻOku akoʻi he Tohi Tapú naʻe fakatupu ʻe he ʻOtuá ʻa e foʻi māmaní ke nofoʻi ʻo taʻengata.

•   “Ko e kau māʻoniʻoní te nau maʻu ʻa e māmaní, pea te nau nofo ai ʻo taʻengata.”​—Saame 37:29.

•   “Kuó ne [ʻOtua] fokotuʻu ʻa e māmaní ʻi hono makatuʻungá; ʻe ʻikai ke ueʻi ia mei hono tuʻuʻangá ʻo taʻengata pea taʻengata.”​—Saame 104:5.

•   “ʻOku kei tuʻu ai pē ʻa e foʻi māmaní ʻo taʻengata.”​—Tangata Malanga 1:4.

•   “ʻA e Tokotaha naʻá ne faʻu ʻa e māmaní, ʻa hono Tokotaha-Ngaohi naʻá ne fokotuʻu maʻu iá, . . . naʻe ʻikai te ne fakatupu ia ke hoko ko e koto taʻeʻaonga, ka naʻá ne faʻu ia ke nofoʻi.”​—ʻAisea 45:18.

 ʻE ʻikai ke fakaʻatā ʻe he ʻOtuá ʻa e faʻahinga ʻo e tangatá ke nau fakaʻauha kakato ʻa e foʻi māmaní ʻaki hono ʻuliʻi ʻo e ʻeá, taú pe ʻi ha toe founga kehe. Ka ʻi hono kehé, te ne “fakaʻauha ʻa e faʻahinga ʻoku nau fakaʻauha ʻa e māmaní.” (Fakahā 11:18) Ko e hā ʻa e founga te ne fakahoko ai iá?

 ʻE fetongi ʻe he ʻOtuá ʻa e ngaahi founga pule fakaetangatá, ʻa ia kuo ʻikai malava ke nau maluʻi ʻa e māmaní, ʻaki ha Puleʻanga haohaoa fakahēvani. (Taniela 2:​44; Mātiu 6:​9, 10) Ko e Puleʻanga ko iá ʻe pule ai ʻa e ʻAlo ʻo e ʻOtuá, ʻa Sīsū Kalaisi. (ʻAisea 9:​6, 7) ʻI he taimi naʻe ʻi he māmaní ai ʻa Sīsuú, naʻá ne ngāueʻaki ʻa e mālohi fakaemana ke puleʻiʻaki ʻa e ngaahi ʻelemēniti ʻo natulá. (Maʻake 4:​35-​41) ʻI he tuʻunga ko e Tuʻi ʻo e Puleʻanga ʻo e ʻOtuá, ʻe puleʻi kakato ʻe Sīsū ʻa e māmaní mo hono ngaahi ʻelemēnití. Te ne toe fakatupu, pe fakafoʻou ʻa e ngaahi tuʻunga ʻo e māmaní, ʻo ʻai ia ke ʻi ha tuʻunga meimei tatau mo ia ʻi he ngoue ko ʻĪtení.​—Mātiu 19:28; Luke 23:43.

 ʻIkai. Ko e maʻuhala ko ení ʻoku tupu ia mei he ʻikai ke mahinoʻi ʻa e 2 Pita 3:7, ʻa ia ʻoku pehē: “Ko e ngaahi langi pea mo e māmani ʻa ia ʻoku ʻi ai ʻi he taimi ní, ʻoku tuku tauhi ia ki he afi.” Lāulea ki ha poini mahuʻinga ʻe ua te ne tokoniʻi kitautolu ke mahinoʻi ʻa e ʻuhinga ʻo e ngaahi lea ko iá:

1.   ʻOku ngāueʻaki ʻe he Tohi Tapú ʻa e foʻi lea “langi,” “māmani,” mo e “afi” ke ʻuhinga ʻo ʻikai ki ha meʻa pē ʻe taha ka ki ha meʻa lahi ange. Ko e fakatātaá, ʻi he Sēnesi 11:1 ʻoku pehē: “Ko e kotoa ʻo e māmaní naʻe hokohoko atu ʻenau lea tahá.” ʻI hení, ʻoku ʻuhinga ʻa e “māmaní” ki he faʻahinga ʻo e tangatá.

2.   Ko e potutohi ʻo e 2 Pita 3:7 ʻokú ne fakahaaʻi mai ʻa e ʻuhinga ʻo e ngaahi langí, māmaní, mo e afí. ʻI he veesi 5 mo e 6 ʻoku fakahoa ia ki he Lōmaki ʻo e ʻaho ʻo Noá. ʻI he tuʻunga ko iá, ko e māmani ʻo e kuonga muʻá naʻe fakaʻauha, ka ko hotau palanité naʻe kei tuʻu pē. ʻI hono kehé, naʻe tafiʻi atu ʻe he Lōmakí ʻa e kakai fulikivanú, pe “māmaní.” (Sēnesi 6:​11) Naʻá ne toe fakaʻauha foki ʻa e ngaahi “langi”​—ʻa ia ko e kakai naʻa nau puleʻi ʻa e sōsaieti ʻo e māmaní. Ko ia, naʻe fakaʻauha ʻa e kakai fulikivanú, kae ʻikai ko hotau palanité. Naʻe hao ʻa Noa mo hono fāmilí ʻi hono fakaʻauha ʻa e māmani ko iá pea nofoʻi ʻa e foʻi māmaní hili ʻa e Lōmakí.​—Sēnesi 8:​15-​18.

 ʻI he tuʻunga meimei tatau mo e vai ʻi he Lōmakí, ko e fakaʻauhá, pe “afi” ʻi he 2 Pita 3:7 te ne ʻomai ʻa e ngataʻanga ki he māmani ʻo e kakai fulikivanú, ka ʻoku ʻikai ko e palanite ʻo e Foʻi Māmaní. ʻOku talaʻofa ʻe he ʻOtuá ha “ngaahi langi foʻou mo ha māmani foʻou” ʻa ia “ʻe māʻoniʻoni ʻa e meʻa kotoa pē ʻi ai.” (2 Pita 3:​13) Ko e “māmani foʻou,” pe sōsaieti foʻou ʻo e faʻahinga ʻo e tangatá ʻe puleʻi ia ʻe he “ngaahi langi foʻou,” pe taki foʻou​—ko e Puleʻanga ʻo e ʻOtuá. ʻI he malumalu ʻo e pule ʻo e Puleʻanga ko iá, ko e māmaní ʻe hoko ia ko ha palataisi fonu ʻi he melino.​—Fakahā 21:​1-4.