Kuo pau ke tau lotu ki he ʻOtuá ʻo fakafou ʻi he huafa ʻo Sīsuú koeʻuhí ko e founga pē eni ʻe taha ʻoku hōifua mai ʻa e ʻOtuá ke tau fakaofiofi ange ai kiate Iá. Naʻe pehē ʻe Sīsū: “Ko au ʻa e halá pea mo e moʻoní pea mo e moʻuí. ʻOku ʻikai haʻu ha taha ki he Tamaí ka ʻi heʻene fou pē ʻiate au.” (Sione 14:6) Naʻe toe tala ʻe Sīsū ki heʻene kau ʻapositolo faitōnungá: “ʻOku ou mātuʻaki tala moʻoni atu kiate kimoutolu, kapau te mou kole ha meʻa ki he Tamaí, te ne ʻoatu ia kiate kimoutolu ʻi hoku hingoá.”—Sione 16:23.

ʻUhinga lahi ange ke lotu ai ʻo fakafou ʻi he huafa ʻo Sīsuú

•   ʻOku tau fakalāngilangiʻi ʻa Sīsū mo ʻene Tamaí, ʻa Sihova ko e ʻOtuá.—Filipai 2:9-11.

•   ʻOku tau fakahāhā ʻoku tau mahinoʻi ko e pekia ʻa Sīsuú ko e tokonaki ia ʻa e ʻOtuá ki hotau fakamoʻuí.—Mātiu 20:28; Ngāue 4:12.

•   ʻOku tau ʻiloʻi ʻa e ngafa laulōtaha ʻo Sīsū ko e Fakalaloa ʻi he vahaʻa ʻo e ʻOtuá mo e tangatá.—Hepelū 7:25.

•   ʻOku tau fakaʻapaʻapaʻi ʻa e ngāue ʻa Sīsū ko e Taulaʻeiki Lahí ʻa ia ʻe lava ke ne tokoniʻi kitautolu ke tau maʻu ha tuʻunga lelei mo e ʻOtuá.—Hepelū 4:14-16