ʻOku akoʻi ʻe he Tohi Tapú mei he kotoa ʻo e ngaahi meʻamoʻui ʻi he māmaní ko ha tokolahi fakangatangata pē ʻo e faʻahinga ʻo e tangatá te nau ʻalu ki hēvaní. (Fakahā 14:1, 3) ʻOku nau ʻalu ki ai ke pule ko e ngaahi tuʻi mo e kau taulaʻeiki fakataha mo Sīsū. (Luke 22:28-30; Fakahā 5:9, 10) Ko e fuʻu tokolahi ʻo e faʻahinga ʻo e tangatá te nau toetuʻu ke moʻui ʻi ha māmani palataisi.​—Saame 37:11, 29.

 ʻOku ʻikai lave ʻa e Tohi Tapú fekauʻaki mo ha hēvani ʻo e fanga manu pusiakí pe fanga kulī​—pea ʻi ha ʻuhinga lelei. ʻOku ʻikai lava ʻa e fanga manú ke fou ʻi he ngaahi sitepu ke taau ki he “ui ke ʻalu ki hēvaní.” (Hepelū 3:1) Ko e ngaahi sitepu ko ení ʻoku kau ki ai ʻa hono maʻu ʻa e ʻiló, ngāueʻi ʻa e tuí, pea talangofua ki he ngaahi fekau ʻa e ʻOtuá. (Mātiu 19:17; Sione 3:16; 17:3) Ko e faʻahinga pē ʻo e tangatá naʻe fakatupu fakataha mo e ʻamanaki ʻo e moʻui taʻengatá.​—Sēnesi 2:16, 17; 3:22, 23.

 Ke ʻalu ki hēvaní, kuo pau ke fokotuʻu hake ʻa e ngaahi meʻamoʻui ʻi he māmaní. (1 Kolinitō 15:42) ʻOku lave ʻa e Tohi Tapú ki ha ngaahi toetuʻu lahi. (1 Tuʻi 17:17-24; 2 Tuʻi 4:32-37; 13:20, 21; Luke 7:11-15; 8:41, 42, 49-56; Sione 11:38-44; Ngāue 9:36-42; 20:7-12) Kae kehe, ko e toetuʻu taki taha ko e fokotuʻu hake ia ʻo ha tangata ʻo ʻikai ko ha monumanu.

•  Ko e hā ʻoku hoko ki he fanga manú ʻi he taimi ʻoku nau mate aí?

•  ʻOku faiangahala ʻa e fanga manú?

•  ʻOku sai pē hono fakamamahiʻi ʻa e fanga manú?

 ʻOku fakahaaʻi ʻe he Tohi Tapú ko e fanga manú mo e faʻahinga ʻo e tangatá ʻokú na tatau ʻi he anga ʻo e vakai ʻa e ʻOtuá ki he moʻui ʻokú na maʻú. (Nōmipa 31:28) Ko e fanga manú mo e faʻahinga ʻo e tangatá ʻoku faʻuʻaki ha meʻa ʻe ua: Ko e “efu ʻo e kelekelé” mo e “mānava moʻuí.”​—Sēnesi 2:7

 ʻOku akoʻi ʻe he Tohi Tapú ko e fanga manú mo e faʻahinga ʻo e tangatá ʻoku lava ke nau mate. (Livitiko 21:11, fakamatala ʻi lalo; ʻIsikeli 18:20) ʻI he mate ʻa e fanga manú mo e faʻahinga ʻo e tangatá ʻoku nau foki ki he efu ʻo e kelekelé. (Tangata Malanga 3:19, 20) ʻI hono fakalea ʻe tahá, ʻoku ʻikai ke nau toe ʻi ai. a

 ʻIkai. ʻOku ʻuhinga ʻa e faiangahalá ko e fakakaukau, ongoʻi, pe fai ha meʻa ʻokú ne maumauʻi ʻa e ngaahi tuʻunga ʻa e ʻOtuá. Ke faiangahala ha meʻamoʻui, kuo pau ke ne lava ʻo fai ha ngaahi fili fakaeʻulungaanga ka ʻoku ʻikai ke maʻu ʻe he fanga manú ʻa e malava ko ʻení. ʻOku nau faʻa ngāue ʻo fakatatau ki honau poto fakaenatulá lolotonga ʻa e taimi fakangatangata ʻoku nau moʻui aí. (2 Pita 2:12) ʻI he ngataʻanga ʻo ʻenau moʻuí, ʻoku nau mate, neongo ʻoku ʻikai ke nau faiangahala.

 ʻIkai. Naʻe ʻoange ʻe he ʻOtuá ki he faʻahinga ʻo e tangatá ʻa e mafai ke pule ki he fanga manú ka ʻoku ʻikai ko e totonu ke ngaohikoviʻi kinautolu. (Sēnesi 1:28; Saame 8:6-8) ʻOku tokanga ʻa e ʻOtuá ki he moʻui ʻa e monumanu taki taha​—kau ai ʻa e fanga kiʻi manupuna īkí. (Siona 4:11; Mātiu 10:29) Naʻá ne tuʻutuʻuni ki heʻene kau lotú ke nau ngaahileleiʻi ʻa e fanga manú.​—ʻEkisoto 23:12; Teutalōnome 25:4; Palōveepi 12:10.