ʻOku lave tuʻo taha pē ʻa e Tohi Tapú ki he tā-tataú ʻi he Livitiko 19:28, ʻa ia ʻoku pehē: “Kuo pau ke ʻoua naʻa mou ʻai ha tā-tatau ʻiate kimoutolu.” Naʻe ʻoange ʻe he ʻOtuá ʻa e fekau ko ení ki he puleʻanga ʻIsilelí ke fakamavaheʻi ʻaki kinautolu mei he ngaahi kaungāʻapí ʻa ia naʻa nau tā-tatau ʻi honau sinó ʻa e hingoa pe fakaʻilonga honau ngaahi ʻotuá. (Teutalōnome 14:2) Neongo ʻoku ʻikai kei fiemaʻu ki he kau Kalisitiané ke talangofua ki he lao ʻa Mōsesé, ʻoku totonu ke nau kei fakakaukau pē ki he meʻa ʻoku fakahaaʻi mai ʻe he lao ko ení fekauʻaki mo e fakakaukau ʻa e ʻOtuá.

ʻOku totonu ki ha Kalisitiane ke tā-tatau hono sinó?

 ʻE lava ke tokoni ʻa e ngaahi veesi Tohi Tapu ko ení ke fakaʻuhinga ai ʻi he tuʻungá ni:

•   “Bea ke behe ae kau fefine foki, ke nau teuʻi aki akinautolu ae . . . mata agavaivai.” (1 Tīmote 2:9, Paaki Motuʻa) ʻOku ngāueʻaki fakatouʻosi ʻa e tefitoʻi moʻoni ko ení ki he kakai fefine mo e tangata. ʻOku totonu ke tau fakaʻapaʻapaʻi ʻa e ongoʻi ʻa e niʻihi kehé pea ʻoua ʻe tohoakiʻi taʻetotonu mai ha tokanga kiate kitautolu.

•   Ko e kakai ʻe niʻihi ʻoku nau tā-tatau ke fakahaaʻi ʻoku nau kau ki ha kulupu pau pe ke fakamoʻoniʻi ʻoku ʻi ai ʻenau totonu ke fai ʻa e meʻa ʻoku nau loto ki aí. Kae kehe, ʻoku fakalototoʻaʻi ʻe he Tohi Tapú ʻa e kau Kalisitiané: “Ke mou ʻoatu homou sinó ko ha feilaulau ʻoku moʻui, toputapu pea mo fakahōifua ki he ʻOtuá, ko ha ngāue toputapu ʻo ngāueʻaki hoʻomou mafai fakaefakaʻuhingá.” (Loma 12:1) Ngāueʻaki hoʻomou “mafai fakaefakaʻuhingá” ke sivisiviʻi ʻa e ʻuhinga ʻokú ke loto ai ke tā-tataú. Kapau ko e ʻuhingá ʻokú ke loto ke muimui ʻi he ākenga fakamuimui tahá pe koeʻuhí ʻokú ke loto ke fakahaaʻi ko e konga koe ʻo ha kulupu, manatuʻi ʻe lava ke liliu nai ho fakakaukaú ʻamui ka ko e tā-tataú ʻe faingataʻa ke toʻo ia. Ko hono sivisiviʻi hoʻo fakaueʻilotó ʻe lava ke ne tokoniʻi koe ke fai ha fili fakapotopoto.​—Palōveepi 4:7.

•   “Ko e ngaahi palani ʻa e tokotaha faʻa ngāué ʻe iku moʻoni ki ha lelei, ka ko e faʻahinga kotoa ʻoku fakavave koví te nau tūʻulu moʻoni atu ki he masiva.” (Palōveepi 21:5) ʻOku faʻa fili fakavave ʻa e kakaí ke tā-tatau, ka ʻi heʻenau maʻu pē ha tā-tataú, ʻoku uesia ai ʻa e vakai kiate kinautolu ʻa e niʻihi kehé pea faingataʻa ke maʻu ha ngāue. Ko e tā-tataú ʻoku mamafa hono totongí pea ʻoku mamahi ʻaupito kapau ʻe feinga ke tāmateʻi ia. ʻOku fakahaaʻi ʻe he kau ako mo e kau pisinisi ʻoku nau ngāue ki hono toʻo ʻo e tā-tataú, ko e tokolahi ʻo e faʻahinga naʻe tā-tataú ʻoku nau fakatomala ʻi heʻenau tā-tataú.