Ko e faʻahinga naʻa nau papitaiso ko e Kau Fakamoʻoni ʻa Sihová kae ʻikai toe malanga ki he niʻihi kehé, mahalo ʻoku aʻu ʻo nau ʻauhia mei he feohi mo e ngaahi kaungātuí, ʻoku ʻikai ke mau fakaʻehiʻehi mei ai. Ko hono moʻoní, ʻoku mau feinga kia kinautolu ke toe fakatupulekina ʻenau mahuʻingaʻia fakalaumālie.

 ʻOku ʻikai ke ʻotomētiki pē hano tuʻusi ha taha ʻokú ne fai ha angahala mamafa. Kae kehe, kapau ʻoku hokohoko atu ha Fakamoʻoni papitaiso ke maumauʻi ʻa e lao fakaeʻulungaanga ʻa e Tohi Tapú pea ʻikai fakatomala, ʻe fakaʻehiʻehi meiate ia pe tuʻusi ia. ʻOku fakahaaʻi mahino ʻe he Tohi Tapú: “Kapusi ʻa e tangata fulikivanú mei homou haʻohaʻongá.”—1 Kolinitō 5:13.

 Kae fēfē ha tangata ʻoku tuʻusi ka ko hono uaifí mo e fānaú ʻoku nau kei hoko pē ko e Kau Fakamoʻoni ʻa Sihova? ʻE liliu hono haʻi fakalotu mo hono fāmilí, ka heʻikai motuhi ai honau totó. ʻE kei hoko atu pē ʻa e vahaʻangatae fakaemalí mo e ʻofa mo e feangainga fakafāmilí.

 Ko e kau tuʻusí ʻe lava ke nau maʻu ʻemau ngaahi fakataha fakalotú. Kapau ʻoku nau loto ki ai, ʻe lava foki ke nau maʻu ha akonaki fakalaumālie mei he kau mātuʻa he fakatahaʻangá. Ko e taumuʻá ke tokoniʻi ʻa e tokotaha tāutaha ke ne toe hoko ʻo taau ko ha taha ʻo e Kau Fakamoʻoni ʻa Sihová. Ko e kau tuʻusi ʻoku nau siʻaki ʻenau tōʻonga taʻetāú pea fakahāhā ʻa e holi loto-moʻoni ke moʻuiʻaki ʻa e ngaahi tuʻunga Fakatohitapú ʻoku talitali lelei maʻu pē kinautolu ke toe hoko ko ha taha ʻo e Kau Fakamoʻoni ʻa Sihová.