ʻI he tuʻunga ko e Kau Fakamoʻoni ʻa Sihová, ʻoku mau ngāue ke langa hake ʻa e ngaahi fāmilí, ʻa homau fāmilí tonu mo homau ngaahi kaungāʻapí. ʻOku mau fakaʻapaʻapaʻi ʻa e ʻOtuá ko e Tokotaha-Fakatupu ia ʻo e fokotuʻutuʻu fakafāmilí. (Sēnesi 2:​21-​24; ʻEfesō 3:​14, 15) ʻI he Tohi Tapú, ʻokú ne akoʻi ai ʻa e ngaahi tefitoʻi moʻoni kuó ne tokoniʻi ʻa e kakai takatakai ʻi he māmaní ke maʻu ha nofo mali ʻoku mālohi mo fiefia.

 ʻOku mau fai homau lelei tahá ke muimui ʻi he faleʻi ʻa e Tohi Tapú, koeʻuhi ʻoku tokoniʻi heni kimautolu ke hoko ko e ngaahi husepāniti, uaifi, mo e mātuʻa lelei ange. (Palōveepi 31:10-​31; ʻEfesō 5:22–​6:4; 1 Tīmote 5:8) Ko e poto ʻi he Tohi Tapú ʻoku tokoni ia naʻa mo e ngaahi fāmili tui kehekehé ke lavameʻa. (1 Pita 3:​1, 2) Fakakaukau ki he fakamatala ko eni ʻa e faʻahinga ʻikai Fakamoʻoni ʻa ia naʻe hoko honau ngaahi hoa malí ko e Kau Fakamoʻoni ʻa Sihova:

•   “Ko ʻema ʻuluaki taʻu ʻe onó naʻe fonu ʻi he fekīhiaki mo e ongoʻi feifeitamaki. Ka, ʻi he hili ʻa e hoko ʻa Ivete ko e taha ʻo e Kau Fakamoʻoni ʻa Sihová, naʻá ne anga-ʻofa mo anga-kātaki ange. Ko e ngaahi liliu naʻá ne faí naʻe fakahaofi ai ʻema nofo malí.”​—Clauir, mei Pelēsila.

•   “Naʻá ku fakafepakiʻi hoku husepānití, ʻa Chansa, ʻi he taimi naʻá ne kamata ako Tohi Tapu ai mo e Kau Fakamoʻoni ʻa Sihová, koeʻuhí naʻá ku fakakaukau ʻoku nau veteki ʻa e ngaahi fāmilí. Talu mei ai, naʻá ku sio naʻe tokoniʻi moʻoni ʻe he Tohi Tapú ʻema nofo malí.”​—Agness, mei Semipia.

 ʻI heʻemau ngāue fakafaifekaú, ʻoku mau fakahaaʻi ki homau ngaahi kaungāʻapí ʻa e founga ʻe lava ke tokoniʻi ai kinautolu ʻe he poto ʻi he Tohi Tapú ke

•   Fili fakapotopoto ha hoa mali

•   Ikuʻi lavameʻa ʻa e ʻuluaki taʻu ʻo e nofo malí

•   Fakafeangai ki he mātuʻa-ʻi-he-fonó

•   Tokangaʻi ʻa e paʻangá

•   Tuku ʻa e fakafekikí

•   Ako ke fakamolemole

•   Akoʻi ʻa e fānaú

 Ko hono moʻoní, ʻoku pehē ʻi he taimi ʻe niʻihi. Ko e fakatātaá, naʻe pehē ʻi ha līpooti ʻi he 1998 ʻa e kautaha fakaefekumi ko e Sofres ko e nofo mali ʻe taha mei he 20 ʻa ia ko e hoa mali pē taha ko ha Fakamoʻoní naʻe ʻi ai ha ngaahi palopalema mafatukituki ʻi he taimi naʻe liliu ai ʻa e tui ʻa e tokotaha ko iá.

 Naʻe tomuʻa tala ʻe Sīsū ko e faʻahinga ʻoku muimui ki heʻene ngaahi akonakí te nau tofanga ʻi he ngaahi fekeʻikeʻi fakafāmili ʻi ha taimi. (Mātiu 10:32-​36) ʻOku pehē ʻe he Faihisitōlia ko Will Durant ʻi he malumalu ʻo e ʻEmipaea Lomá, “Naʻe tukuakiʻi ʻa e lotu faka-Kalisitiané ʻi hono veteki ʻa e ngaahi fāmilí,” a pea ko e niʻihi ʻo e Kau Fakamoʻoni ʻa Sihová ʻoku nau fehangahangai mo e tukuakiʻi tatau ʻi he ʻahó ni. Ka ʻoku ʻuhinga ení ko e Kau Fakamoʻoní ʻoku nau fakatupunga ʻa e fekeʻikeʻí?

 ʻI he tuʻutuʻuni fekauʻaki mo hono tukuakiʻi ʻa e Kau Fakamoʻoni ʻa Sihová ki hono veteki ʻa e ngaahi fāmilí, naʻe pehē ʻe he Fakamaauʻanga ʻIulope ki he Ngaahi Totonu ʻa e Tangatá ko e ngaahi mēmipa ʻo e fāmili ʻikai Fakamoʻoní ʻoku nau faʻa fakatupunga ʻa e fakafekiki ʻaki ʻa e ʻikai “ke tali mo fakaʻapaʻapaʻi ʻa e tauʻatāina fakalotu honau kāingá ke fakahaaʻi tauʻatāina mo ngāueʻaki ʻene lotú.” Naʻe toe pehē ʻe he Fakamaauʻangá: “Ko e tuʻunga ko ení ʻoku anga-maheni ki he kotoa ʻo e ngaahi nofo mali tui kehekehé pea ʻoku kau ai ʻa e Kau Fakamoʻoni ʻa Sihová.” b Ko ia, neongo ʻa e fehangahangai mo e ngaahi fetōkehekeheʻaki fakalotú, ʻoku feinga ʻa e Kau Fakamoʻoni ʻa Sihová ke muimui ʻi he fekau ʻa e Tohi Tapú: “ʻOua ʻe fetongi ʻa e koví ʻaki ʻa e kovi ki ha taha. . . . ʻO ka ala lava, ʻo fakatatau ki he lahi taha ʻo hoʻomou malavá, mou nofo melino mo e tangata kotoa pē.”​—Loma 12:17, 18.

 ʻOku talangofua ʻa e Kau Fakamoʻoní ki he fakahinohino Fakatohitapu ke mali “ʻi he ʻEikí pē,” ʻa ia, ko e mali mo ha taha ʻoku nau tui tatau. (1 Kolinitō 7:​39) Ko e fekau ko ení ʻoku Fakatohitapu mo ʻaonga. Ko e fakatātaá, naʻe pehē ʻi ha kupu he 2010 ʻi he Journal of Marriage and Family “ko e ongo meʻa mali ʻa ia ko e ongo meʻá ʻokú na maʻu ʻa e tui fakalotu, tōʻonga mo e taumuʻa tatau” ʻokú na hehema ke maʻu ʻa e vahaʻangatae lelei ʻaupito. c

 Kae kehe, ʻoku ʻikai fakalototoʻaʻi ʻe he Kau Fakamoʻoní ʻa e faʻahinga ʻoku kau ki heʻenau tuí ke mavahe mei ha hoa mali ʻoku ʻikai ko ha Fakamoʻoni. ʻOku pehē ʻe he Tohi Tapú: “Kapau ʻoku maʻu ʻe ha tokoua ha uaifi taʻetui, pea ʻoku loto-lelei pē ʻa e uaifí ke ne nofo fakataha mo ia, tuku ke ʻoua te ne liʻaki hono uaifí; pea kapau ʻoku maʻu ʻe ha fefine ha husepāniti taʻetui, pea ʻoku loto-lelei pē ʻa e husepānití ke ne nofo fakataha mo ia, tuku ke ʻoua te ne liʻaki hono husepānití.” (1 Kolinitō 7:​12, 13) ʻOku muimui ʻa e Kau Fakamoʻoni ʻa Sihová ki he fekau ko ení.