Maʻuhala: ʻOku ʻikai tui ʻa e Kau Fakamoʻoni ʻa Sihová ki he faitoʻó pe ngāue fakafaitoʻó.

 Moʻoní: ʻOku mau kumi ki he faitoʻo lelei taha ʻe ala lavá maʻa kimautolu mo homau fāmilí. ʻI he taimi ʻoku mau puke aí, ʻoku mau ʻalu ki he kau toketā ʻoku nau pōtoʻi ʻi hono ʻomai ʻa e faitoʻo pe fai ʻa e tafa ʻoku ʻikai kau ai ʻa e totó. ʻOku mau houngaʻia ʻi he ngaahi fakalakalaka kuo fai ʻi he malaʻe fakafaitoʻó. Ko hono moʻoní, ko e ngaahi faitoʻo ʻikai kau ai ʻa e totó naʻe ʻai ia ke tokoni ki he kau mahaki Fakamoʻoní ʻoku ngāueʻaki ia he taimí ni ʻo ʻaonga ki he kotoa ʻi he komiunitií. ʻI he ngaahi fonua lahi, ʻe lava ke fili he taimí ni ʻe ha tokotaha mahaki pē ke fakaʻehiʻehi mei he fakatuʻutāmaki ʻo e huhu totó, hangē ko e ngaahi mahaki ʻi he totó, ʻikai tali ʻe he sisitemi maluʻí mo e fehālaaki ʻa e tangatá.

 Maʻuhala: ʻOku tui ʻa e Kau Fakamoʻoni ʻa Sihová ʻe fakamoʻui ʻe he tuí ʻa e puke ha taha.

 Moʻoní: ʻOku ʻikai ke mau fai ʻa e fakamoʻui mahaki ʻi he tuí.

 Maʻuhala: Ko e fakaʻehiʻehi mei he huhu totó ʻoku fuʻu mamafa.

 Moʻoní: Ko e ngaahi ngāue faitoʻo ʻoku ʻikai kau ai ʻa e totó ʻoku fuʻu maʻamaʻa ʻaupito. a

 Maʻuhala: ʻOku tokolahi ʻa e Kau Fakamoʻoni, kau ai ʻa e fānau, ʻoku nau mate he taʻu taki taha ko e ola ia ʻo hono talitekeʻi ʻa e huhu totó.

 Moʻoní: Ko e fakamatala ko ení ʻoku ʻikai hano makatuʻunga. ʻOku fai maʻu pē ʻe he kau toketā faitafá ʻa e ngaahi tafa fihi hangē ko e tafa mafu, tafa hui mo e ngaahi tafa kehe ʻo ʻikai ngāueʻaki ʻa e totó. b Ko e kau mahaki, kau ai ʻa e fānau, ʻoku ʻikai ke nau huhu totó ʻoku faʻa vave ange ʻenau saí pe toe lelei ange ʻi he faʻahinga ko ia naʻa nau huhu totó. c ʻI ha faʻahinga tuʻunga pē, heʻikai lava ʻe ha taha ke ne fakapapauʻi ʻe mate ha tokotaha mahaki ko ʻene talitekeʻi ʻa e totó pe moʻui koeʻuhi ko ʻene tali iá.

 Ko e ʻīsiu fakalotu eni ʻo ʻikai ko ha ʻīsiu fakafaitoʻo. Fakatouʻosi ʻa e Fuakava Motuʻá mo e Fuakava Foʻoú ʻoku fekauʻi mahino ai kimautolu ke fakaʻehiʻehi mei he totó. (Sēnesi 9:4; Livitiko 17:10; Teutalōnome 12:23; Ngāue 15:28, 29) Pehē foki, ʻoku vakai ʻa e ʻOtuá ki he totó ʻokú ne fakafofongaʻi ʻa e moʻuí. (Livitiko 17:14) Ko ia ʻoku mau fakaʻehiʻehi mei he huhu totó ʻo ʻikai ko e talangofua pē ki he ʻOtuá ka ko e fakaʻapaʻapa foki kiate ia ko e Tokotaha-Foaki ʻo e moʻuí.

 ʻI he taimi ʻe taha, ko e kautaha fakafaitoʻó naʻa nau vakai fakalūkufua ki he ngaahi founga ʻo e fakaʻehiʻehi mei he huhu totó, ʻoku toe ui ko e faitoʻo taʻekau ai ʻa e toto, ʻoku fuʻu tōtuʻa, ʻo aʻu ki he taonakita, ka kuo liliu eni ʻi he ngaahi taʻu ki mui ní. Ko e fakatātaá, ʻi he 2004, naʻe pulusi ha kupu ʻi ha tohi ako fakafaitoʻo ʻo pehē ko e “ngaahi founga lahi naʻe ʻai ke ngāueʻaki ki he kau mahaki ʻa e Kau Fakamoʻoni ʻa Sihová ʻe hoko ia ʻo ngāueʻaki tefito ʻi he ngaahi taʻu ka hoko maí.” d Naʻe pehē ʻi ha kupu ʻi he tohi Heart, Lung and Circulation ʻi he 2010 ko e “‘tafa taʻekau ai ʻa e totó’ ʻoku totonu ke ʻoua ʻe fakangatangata pē ki he [Kau Fakamoʻoni ʻa Sihová] ka ʻoku totonu ke hoko ia ko ha konga mahuʻinga ʻo e tafa fakaʻahó.”

 Ko e kau toketā ʻe laui afe ʻi māmani lahi ʻoku nau ngāueʻaki he taimí ni ʻa e ngaahi founga fakahaofi ʻo e totó ʻi hono fai ʻa e ngaahi tafa fihi ʻo taʻekau ai ʻa e totó. Ko e ngaahi fetongi ʻo e huhu totó ʻoku ngāueʻaki ia naʻa mo e ngaahi fonua langalanga haké pea ʻoku faʻa kole ʻe he kau mahaki tokolahi ʻoku ʻikai ko e Kau Fakamoʻoni ʻa Sihová.