Ko ʻemau ngāue ʻi māmani lahí ʻoku fakapaʻanga tefito ia ʻaki ʻa e ngaahi tokoni loto-fiefoaki mei he faʻahinga ʻoku kau ki he Kau Fakamoʻoni ʻa Sihová. a ʻOku ʻi ai ʻa e ngaahi puha tokoni ʻi heʻemau ngaahi feituʻu faiʻanga fakatahá, pea ko e ngaahi founga kehe ʻo e tokoní ʻoku hā ia ʻi heʻemau peesi Fai ha Tokoni. ʻOku toe ʻi ai mo e ngaahi founga kehe ʻoku ala maʻu ki ha tokotaha ʻokú ne loto ke tokoni ki heʻemau ngāue ʻi māmani lahí pe ki he fakamole fakalotofonuá pe tokoni fakatouʻosi ki ai.

 ʻOku ʻikai ke fiemaʻu ki he Kau Fakamoʻoni ʻa Sihová ke nau vahe hongofulu pe fai ha tokoni ʻi ha mahuʻinga pe pēseti pau mei heʻenau paʻanga hū maí. (2 Kolinitō 9:7) ʻOku ʻikai ʻaupito ke mau fai ha tānaki paʻanga pe totongi ʻa e hū ki heʻemau ngaahi fakatahá pea ko ʻemau kau faifekaú ʻoku ʻikai ke totongi kinautolu ʻi heʻenau fai ha papitaiso, putu, mali pe ko ha faʻahinga ouau fakalotu pē. ʻOku ʻikai ke mau tānaki paʻanga ʻi hano fakatau atu ha meʻa naʻe taʻo, pasā, pingikou, ngaahi kātoanga, kai efiafi, lulu pe ko ha ngaahi kātoanga meimei tatau pe kole ki ha tokoni paʻanga. Ko e fakamatala fekauʻaki mo e tokotaha ʻokú ne fai ʻa e foakí ʻoku ʻikai ʻaupito ke ʻai ia ke ʻiloʻi ʻe ha taha. (Mātiu 6:2-4) Ko ʻemau uepisaití mo e ʻū tohí ʻoku ʻikai ke ʻi ai ha ngaahi tuʻuaki ai ke maʻu mei ai ha paʻanga.

 Ko e fakatahaʻanga kotoa ʻa e Kau Fakamoʻoni ʻa Sihová ʻoku fai ʻi he fakatahá ha fakamatala paʻanga fakamāhina, ʻa ia ʻoku ʻatā ki he kakaí. Ko e fakamatala paʻanga ʻa e fakatahaʻanga taki taha ʻoku ʻaotitaʻi maʻu pē ke fakapapauʻi ko e paʻanga tokoní ʻoku ngāueʻaki totonu.—2 Kolinitō 8:20, 21.

•   Ngaahi puha tokoni: ʻE lava ke ke lī ha tokoni paʻanga pe sieke ʻi he ngaahi puha tokoni ʻi he Fale Fakatahaʻangá, Holo ʻAsemipilií pe ʻi ha feituʻu kehe pē ʻoku fai ai ʻemau fakatahá.

•   Tokoni ʻi he ʻinitanetí: ʻI he ngaahi fonua lahi, ʻe lava ke ke ngāueʻaki ʻa e peesi “Tokoni ki he Kau Fakamoʻoni ʻa Sihová” ke fai ʻa e tokoní fakafou ʻi he kaati credit, debit, ʻave he pangikeé pea mo ha founga fakaʻilekitulōnika kehe pē. b ʻOku fili ʻa e Kau Fakamoʻoni ʻe niʻihi ke “tuku mavahe ha meʻa” ʻi he māhina taki taha ʻaki hono fai ha tokoni tukupau ʻo ngāueʻaki ha taha ʻo e ngaahi foungá ni.—1 Kolinitō 16:2.

•   Palani tokoni: Ko e ngaahi founga tokoni ʻe niʻihi ʻoku fiemaʻu ki ai ʻa e palani tokamuʻa mo e/pe faleʻi fakalao. Ko e palani peheé ʻe fakaʻatā nai ai ke ke maʻu ʻaonga mei he ngaahi monūʻia tukuhau ʻi ho fonuá. Ko e faʻahinga tokolahi kuo nau maʻu ʻaonga mei hono ʻiloʻi lelei ʻa e founga ʻe lava ke fai ai ʻa e palani tokoni ʻofá ʻi he lolotonga ʻenau moʻuí pe ʻi he maté. Kātaki ʻo fetuʻutaki ki he ʻōfisi vaʻa fakalotofonua ʻo e Kau Fakamoʻoni ʻa Sihová ki ha fakaikiiki lahi ange kapau ʻokú ke loto ke fai ha tokoni ʻi he founga ko ení:

  •   ʻakauni pangikē

  •   maluʻi mo e vāhenga mālōlō

  •   kelekele

  •   ʻinasi mo e pōnite

  •   tohi-tuku mo e talāsiti

 Ki ha fakamatala lahi ange fekauʻaki mo e ngaahi founga tokoni ʻoku ala maʻu ʻi ho feituʻú, sio ki he peesi “Tokoni ki he Kau Fakamoʻoni ʻa Sihová.”