ʻIkai. Ko e Kau Fakamoʻoni ʻa Sihová ʻoku nau tui naʻe fakatupu ʻe he ʻOtuá ʻa e meʻa kotoa. Ka ʻoku ʻikai ke mau loto-tatau mo e tui ko ia ko e ʻunivēsí mo e māmaní naʻe fakatupu ʻi ha ʻaho houa ʻe 24 ʻe ono. Ko e hā hono ʻuhingá? Koeʻuhí ʻoku lahi ʻa e ngaahi fakakaukau ʻa e faʻahinga ʻoku taku ʻoku nau tui ki he fakatupú ʻoku fepaki ia mo e Tohi Tapú. Fakakaukau ki he fakatātā ʻe ua ko ení:

1.   Lōloa ʻo e ʻaho fakaefakatupu ʻe onó. ʻOku pehē ʻe he niʻihi ko e ʻaho fakaefakatupu ʻe onó ko e ngaahi ʻaho houa ʻe 24. Ka ko e foʻi lea “ʻaho” ʻi he Tohi Tapú ʻe lava ke ʻuhinga ia ki ha vahaʻa taimi lōloa.​—Sēnesi 2:4; Saame 90:4.

2.   Motuʻa ʻo e māmaní. ʻOku akoʻi ʻe he niʻihi ko e foʻi māmaní ʻoku taʻu ʻe laui afe siʻi pē hono motuʻá. Kae kehe, fakatatau ki he Tohi Tapú, ko e māmaní mo e ʻunivēsí naʻe ʻi ai pē ia ki muʻa ʻi he ngaahi ʻaho fakaefakatupu ʻe onó. (Sēnesi 1:1) ʻI he ʻuhinga ko iá, ko e Kau Fakamoʻoni ʻa Sihová ʻoku ʻikai ke nau fakafepakiʻi ʻa e ngaahi fakatotolo fakasaienisi falalaʻanga ʻokú ne fakahaaʻi ko e foʻi māmaní ʻoku taʻu nai ʻe laui piliona hono motuʻá.

 Neongo ʻoku tui ʻa e Kau Fakamoʻoni ʻa Sihová ki he fakatupú, ʻoku ʻikai ke mau fakataleʻi ʻa e saienisí. ʻOku mau tui ko e moʻoni fakasaienisí mo e Tohi Tapú ʻokú na fehoanaki.