ʻI ʻAokosi 2014, naʻe tufaki ʻe he Kau Fakamoʻoni ʻa Sihová ʻi māmani lahi ha tuleki ke tohoakiʻi ʻa e mahuʻingaʻia ʻi he jw.org. Ko hono olá, naʻe tupu ʻaki ʻa e pēseti ʻe 20 tupu ʻa e tokolahi ʻo e faʻahinga naʻe ʻaʻahi ki he uepisaití lolotonga ʻa e māhina ko iá, ʻo ofi ki he 65 milioná. ʻI māmani lahi, naʻe meimei ko e kakai ʻe toko 10,000 naʻa nau kole ki ha ako Tohi Tapu taʻetotongi ʻi ʻapi fakafou ʻi he saití​—ʻo laka ʻaki ʻa e pēseti ʻe 67 ʻi he māhina ki muʻa aí! Naʻe tokoni ʻa e feingangāué ki he kakai ʻi he feituʻu kotoa pē.

Ko ha Fakamoʻoni ʻi Kānata naʻá ne fakalea kia Madeline ʻi ha lifi pea fakahaaʻi ange ʻa e tuleki ki he feingangāué, Te Tau Maʻu mei Fē ʻa e Tali ki he Ngaahi Fehuʻi Lalahi ʻi he Moʻuí? Naʻe pehē ʻe Madeline naʻá ne nofo pē ʻi hono falefakatoló ʻi he pō ki muʻá ʻo lotu tōtōivi ki he ʻOtuá ke tokoniʻi ia ke ne maʻu ʻa e tali ki he ngaahi fehuʻi ko iá. Naʻá ne kole ki muʻa ki he ngaahi siasi kehekehe ki ha ako Tohi Tapu, ka naʻe ʻikai pē ha taha ʻe ʻaʻahi ange. Naʻá ne ako Tohi Tapu leva mo e Kau Fakamoʻoni ʻa Sihová.

ʻI he ʻOtu Motu Filipainí, naʻe talanoa ʻa Rowena mo ha tangata Siaina naʻá ne tuʻu ʻi muʻa ʻi ha falekai. Naʻá ne ʻoange kiate ia ʻa e tulekí pea fakamatala ange ʻoku loto ʻa e Kau Fakamoʻoni ʻa Sihová ke tokoniʻi ʻa e kakaí ke maʻu ʻaonga mei he ako Tohi Tapu taʻetotongi.

Naʻe tala ange ʻe he tangatá naʻe teʻeki ai ke ne sio ʻi ha Tohi Tapu. Ko e fetalanoaʻaki naʻe hoko atu aí naʻe ueʻi ai ia ke ne maʻu ha ʻasemipilī ʻa e Kau Fakamoʻoni ʻa Sihová. Hili iá naʻá ne tala ange naʻá ne loto ke ʻilo lahi ange fekauʻaki mo e Tohi Tapú peá ne palani ke download ia mei heʻetau uepisaití.

Ko Guillermo, ko ha tokotaha tuli Fakamoʻoni ʻi Sipeini, naʻá ne fetaulaki mo Jorge, ko hano kaungāako ki muʻa ʻoku tuli foki mo ia. Naʻe pehē ʻe Jorge naʻe toki mate ʻene fineʻeikí pea ʻoku lahi ʻene ngaahi fehuʻí mo e ngaahi hohaʻá. Naʻe ʻoange kiate ia ʻe Guillermo ʻa e tuleki ki he feingangāué pea fakahaaʻi ange ʻa e founga ʻe lava ke ne maʻu ai mei he jw.org ha fakamatala ʻi he lea fakanoá ʻa ia ʻe tali ai ʻene ngaahi fehuʻí. Naʻe toe fakaafeʻi ʻe Guillermo ʻa Jorge ke haʻu ki he fakataha ʻi he Fale Fakatahaʻangá. Naʻe haʻu ʻa Jorge pea talu mei ai kuo teʻeki ke ne liʻaki ha fakataha, neongo ʻene nofo ʻi he kilomita ʻe 60 (maile ʻe 37) mei he Fale Fakatahaʻangá.

ʻI ha fakamole fakapaʻanga lahi, naʻe folau ha ongo Fakamoʻoni ʻi Kulinileni ʻi ha houa ʻe ono ʻi ha kiʻi vaka ke aʻu ki ha feituʻu naʻe nofo ai ʻa e toko 280. Naʻá na malanga ai, tufa ʻa e ngaahi tuleki pea hulu ha vitiō mei he jw.org ʻi he lea faka-Kulinilení. Naʻá na kamataʻi foki ha ako Tohi Tapu mo ha ongo meʻa naʻá na fetaulaki mo ia. ʻOkú na fakahoko ʻa e akó he taimí ni ʻi he telefoní ʻo tuʻo ua he uike.

Ko e ngaahi feinga ko iá naʻe ʻikai ngata pē ʻi he Tokelau Mamaʻó. Naʻe fokotuʻutuʻu ʻe he Kau Fakamoʻoni ʻi Nikalākuā ke tufaki ʻa e tulekí ki he kakai ʻoku lea ʻi he lea Mayangna ʻi he vaotā Kalipiané. Hili ʻa e fononga lōloa ʻi he houa ʻe 20 ʻi ha pasi fengataliaki ʻi ha hala tokakovi, naʻá na lue ʻi he houa ʻe 11, ʻi he taimi ʻe niʻihi ʻo fou atu he pelepela fatu, ke aʻu ki he ngaahi nofoʻangá. Naʻá na tufaki ai ʻa e ngaahi tuleki pea hulu ʻa e ngaahi vitiō ʻi he lea Mayangna, naʻe ofoofo mo fiefia ʻa e faʻahinga ʻi he feituʻu ko iá.

Naʻe tuʻuaki ʻe Estela ha tuleki ki ha tangata naʻe fou hake ʻi ha kiʻi kolo ʻi he vaotā ʻAmasoní ʻi Pelēsila. Naʻe tali ʻe he tangatá ʻa e tulekí, ka naʻá ne faʻo ia ki hono kató, ʻo ʻikai loko mahuʻingaʻia ai. ʻI heʻene foki ki ʻapí, naʻe mate ʻa e mīsini hono vaká peá ne tēkina pē ʻi he vaitafé. Lolotonga ʻa e tatali ki ha tokoní, naʻe lau ʻe he tangatá ʻa e tulekí. Naʻá ne ngāueʻaki ʻene telefoni toʻotoʻó ke hū ki he jw.org, ʻo ne lau ai ʻa e ngaahi kupu kehekehe pea download mo e ngaahi vitiō. ʻI ha ngaahi ʻaho siʻi ki mui ai, naʻe fetaulaki ʻa e tangatá mo e husepāniti ʻo Estela pea kole ange kiate ia ke fakamālō kia Estela ʻi he tulekí. “Ko e ngaahi kupu naʻá ku lau lolotonga ʻeku tēkina ʻi he vaitafé naʻe tokoniʻi ai au ke u nonga kae ʻoua ke aʻu mai ʻa e vaka fakahaofi moʻuí,” ko ʻene laú ia. “Naʻe saiʻia ʻeku fānaú ʻi he ngaahi vitiō ʻo Kēlepí. Te u hokohoko ʻaʻahi ki he jw.org.”