ʻI he 2014, naʻe ʻoatu ai ʻe he Kulupu Pule ʻo e Kau Fakamoʻoni ʻa Sihová ʻa e fakahinohino fekauʻaki mo e polokalama foʻou ki hono ʻave ʻa e pōpoaki Fakatohitapú ki he feituʻu tokelau mamaʻo ʻo ʻIulope mo ʻAmelika Tokelaú. (Ngāue 1:8) ʻI he kamataʻangá, naʻe fakahangataha ʻa e polokalamá ki he ngaahi feituʻu naʻe ʻosi fili ʻi ʻAlasikā (ʻAmelika), Lepileni (Finilani), Nunavut mo e Ngaahi Feituʻu Tokelau Hihifo ʻo Kānatá.

Kuo hongofuluʻi taʻu ʻa e ʻaʻahi e Kau Fakamoʻoni ʻa Sihová ki he ngaahi feituʻu tukuʻuta mamaʻo ko ení ke malanga. Kae kehe, naʻe taimi nounou pē ʻa e ʻi ai ʻa e Kau Fakamoʻoní pea naʻe fakangatangata pē ʻenau feingá ki he tufaki ʻo e ʻū tohi makatuʻunga ʻi he Tohi Tapú.

ʻI he polokalama foʻou ko ení, ko e ngaahi ʻōfisi vaʻa ʻoku nau tokangaʻi ʻa e ngāue ʻa e Kau Fakamoʻoni ʻa Sihová ʻi he ngaahi feituʻu tokelau mamaʻó ʻoku nau fakaafeʻi ʻa e kau faifekau taimi-kakató (kau tāimuʻa) ke nofo ʻi ha māhina ʻe tolu nai ʻi he ngaahi feituʻu naʻe filí. Kapau ʻe tokolahi ha kau mahuʻingaʻia ke ako ʻa e Tohi Tapú ʻi he koló, ʻe kiʻi fuoloa e nofo ʻa e kau faifekaú naʻa mo hano fakahoko ha ngaahi fakataha ki he lotu maʻá e kakaí.

Ko e moʻoni, naʻe ʻi ai ʻa e ngaahi pole makehe ʻi he Tokelaú. Naʻe vaheʻi ha ongo tāimuʻa ki Barrow, ʻAlasikā, ko e taha naʻe nofo ʻi he fakatonga ʻo Kalefōniá pea ko e taha ʻi Siōsia, ʻAmelika. ʻI he ʻuluaki faʻahitaʻu momoko ʻena ʻi Barrow, naʻá na aʻusia ha momoko ʻīʻī he naʻe tō lalo ʻa e fua māfaná ki he tikilī Selosiasi mainasi 38 (-36°F)! Neongo ia, ʻi ha ngaahi māhina siʻi ʻo ʻena ʻi aí, naʻá na ʻaʻahi ki he pēseti ʻe 95 nai ʻo e ngaahi ʻapi ʻi he koló pea kamataʻi ha ako Tohi Tapu ʻe fā, ʻo kau ai mo ha kiʻi tangata naʻe hingoa ko John. Ko ia mo hono kaumeʻa fefiné naʻá na ako ʻa e tohi Ko e Hā ʻOku Akoʻi Moʻoni ʻe he Tohi Tapú? pea naʻá ne vahevahe e meʻa naʻá ne akó mo hono ngaahi kaumeʻá mo e kaungāngāué. Naʻá ne faʻa lau ʻa e potutohi fakaʻahó mei he Ko Hono Vakaiʻi Fakaʻaho ʻa e Tohi Tapú ʻo ngāueʻaki ʻa e app JW Library ʻi heʻene telefoní.

Naʻe ʻikai ke ʻi ai ha hala ki Rankin ʻo Nunavut ko e vahefonua ʻo Kānata. Ko ia ai, naʻe puna ʻa e ongo tāimuʻá ki he kolo siʻisiʻi ko ení pea kamataʻi ha ngaahi ako Tohi Tapu lahi. Hili ʻa e sio ha tangata ʻi he vitiō Ko e Hā ʻOku Fai ʻi ha Fale Fakatahaʻanga? naʻá ne ʻeke mai pe ko fē ʻa e taimi te mau langa ai ha Fale Fakatahaʻanga ʻi he koló. Naʻá ne hoko atu, “Kapau te u kei ʻi heni ʻi hono langa hoʻomou falé, te u haʻu ki he fakatahá.”

“Naʻe tō lalo ʻa e fua māfaná pea naʻe fuʻu sinou ʻaupito,” ko e lau ia ʻa e tāimuʻa naʻe vaheʻi ki Savukoski, Finilani, ʻi aí ʻoku liunga hongofulu e tokolahi ʻa e fanga tiá ʻi he kakaí. Ka, neongo ia naʻá na pehē naʻe taimi tonu pē ʻena ʻi aí. Ko e hā hono ʻuhingá? Naʻá na pehē: “Naʻe malava ke ma ngāueʻi fakaʻauliliki ʻa e ngaahi feituʻú. Ko e hala ki he ngaahi koló naʻe teke mo tauhi ʻi ha tuʻunga lelei. Ko e momokó naʻá ne ʻai ʻa e kakaí ke nofo maʻu pē ʻi honau ʻapí.”

Ko ʻemau ngaahi feinga ke vahevahe ʻa e moʻoni ʻo e Tohi Tapú ki he ngaahi feituʻu fakatokelau mamaʻó naʻe fakatupu tokanga. Hili ʻa e ʻaʻahi ʻa e ongo tāimuʻá ki he pule kolo ʻo e tokelau hihifo ʻo ʻAlasikā, naʻá ne ʻoatu ha pōpoaki ʻi he mītia fakasōsialé ʻo fekauʻaki mo ʻene fetalanoaʻaki mo e ongo tāimuʻá fakataha mo e fakatātā ʻo e tuleki Ko e hā ʻa e Puleʻanga ʻo e ʻOtuá?

ʻI Haines, ʻAlasikā, naʻe fakaafeʻi ai ʻe he ongo tāimuʻá ha toko valu ki he ngaahi fakataha naʻe fakahoko ʻi he laipeli fakakoló, ko ia ai naʻe fakamatala ai ʻe he nusipepa fakalotofonuá ko ha ongo tangata mei Tekisisi mo e Tokelau ʻo Carolina ʻokú na ʻi he loto koló ʻo tuʻuaki ha, ako Tohi Tapu ʻi ʻapi. Naʻe fakaʻosiʻaki ʻa e fakamatala ko ení: “ʻAlu ki he jw.org ke maʻu ʻa e ʻilo lahi ange.”