ʻI Nōvema 13 ki he ʻaho 16, 2014, naʻe fakalele ai ʻi he Metro Toronto Convention Center ha Fakaʻaliʻali Tohi Fakavahaʻapuleʻanga, ko e fakaʻaliʻali ʻo e ʻū tohi kuo pulusi mo e ʻū tohi ʻi he tatau fakaʻilekitulōnika. Ko e kakai ʻe toko 20,000 tupu naʻa nau kau atu ki he fakaʻaliʻali ko ení ʻi he ʻaho ʻe fā.

ʻI he haʻohaʻonga ʻo e kau fakaʻaliʻali ko ení naʻe kau atu ai ʻa e Kau Fakamoʻoni ʻa Sihová, naʻa nau ngāueʻaki ʻa e ngaahi meʻa fakaʻaliʻali fakaʻilekitulōnika lanu maama. Ko e ngaahi tuʻuʻanga ki he tepiletí naʻe fakahaaʻi atu ai ʻa e founga ke hū ki he jw.org.

Ko e taha ʻi he kau pule ʻo e polokalamá naʻá ne pehē: “Ko hoʻomou uepisaití ʻoku fuʻu fakaeonopooni moʻoni. ʻOku ou fakakaukau ʻoku totonu ke ako ʻa e kau fakaʻaliʻali kehé mei he founga hoʻomou fakaʻaliʻalí.” Naʻe pehē ʻe he kau ʻaʻahí naʻe fakapalōfesinale ʻaupito ʻa e uepisaití pea faingofua ke hū ki ai pea ʻoku ʻohake ai ha ngaahi fehuʻi mahuʻinga. Naʻe toe maongo kiate kinautolu hono tokoniʻi ʻe he uepisaití ʻa e kakaí ke nau fekuki mo ʻenau ngaahi palopalemá mo e hohaʻá.

Ko e Kau Fakamoʻoni naʻa nau pole ki hono tokangaʻi ʻa e ngaahi meʻa fakaʻaliʻalí naʻa nau talanoa mo e kakaí, pea nau ʻiloʻi ko e tokolahi ʻo e faʻahinga naʻa nau kau ki aí naʻe teʻeki pē ke nau fanongo ʻi he jw.org ki muʻa ʻi he fakaʻaliʻali tohi ko ení. Meimei ko e tokotaha ʻaʻahi kotoa pē naʻa nau tali ʻa e kaati fetuʻutakí pe ko e tuleki Te Tau Maʻu mei Fē ʻa e Tali ki he Ngaahi Fehuʻi Lalahi ʻi he Moʻuí? Naʻe pehē ʻe he tokolahi te nau toe vakaiʻi ʻa e uepisaití, pea kole ʻa e niʻihi ke ʻaʻahi ange ʻa e Kau Fakamoʻoni ʻa Sihová ki honau ʻapí.

Ko e Falaité ko e “ʻAho ʻo e Fānaú” ʻi he fakaʻaliʻali tohí, pea naʻe fakaʻaliʻali ʻe he kau ngāue polé ʻa e vitiō tā fakatātā mei he jw.org. Naʻe omi fakataha ʻa e fānau akó mo ʻenau kau faiakó ʻo mamata ai.

Ko ha tangata mei Chicago naʻe ngāue ki he kautaha naʻa nau pulusi ʻa e Tohi Tapú naʻá ne houngaʻia ʻi he lelei hono faʻu ʻa e New World Translation of the Holy Scriptures ʻoku fakaʻaliʻali atú. Naʻá ne loto ke fetuʻutaki ki he kau fai pulusí pea naʻe ʻoange ʻene kaati fetuʻutaki.

Ko e lea ʻe 700 tupu ʻoku ala maʻu atu ʻi he uepisaití, naʻe sio ʻa e kau ʻaʻahí ʻi ha lea ʻe 16​—faka-Falanisē, faka-Hinitī, faka-Kalisi, faka-Kōlea, faka-Kusalati, faka-Pengali, faka-Pilitānia, faka-Potukali, faka-Siaina, faka-Sipeini, faka-Suēteni, faka-Tamili, faka-Tikilinia, faka-Vietinemi, faka-ʻAmihaliki mo e faka-ʻUtu.

Ko ha Fakamoʻoni naʻá ne talitali ʻa e kau ʻaʻahí ki he meʻa fakaʻaliʻali tohí naʻá ne fakatokangaʻi ʻoku ʻi ai ʻa e kehekehe lahi ʻi hono tala ki he kakaí ʻa e uepisaití pea mo hono fakahaaʻi tonu kia kinautolú. Naʻá ne pehē, “Naʻa mau maʻu ha faingamālie fisifisimuʻa ke fakaʻaliʻali ʻa e uepisaití.”