ʻI Siulai 2013, naʻe ʻoatu ai ha tohi fakalotomāfana mei he Kulupu Pule ʻo e Kau Fakamoʻoni ʻa Sihová ki he kau misinale mo e niʻihi kehe ʻi he ngāue taimi-kakato makehe ʻi he fonua mulí. Naʻe hā ʻi he tohí ʻa e fokotuʻutuʻu ke tokoni ki he faʻahinga ʻi he vāhenga-ngāue mulí ke nau folau ki he ngaahi fakataha-lahi fakavahefonua mo e fakavahaʻapuleʻanga ʻa ia naʻe teu ke fakahoko ʻi he 2014 mo e konga ki muʻa ʻo e 2015.

Ko e taumuʻa ʻo e fokotuʻutuʻu ko ení ke tokoni ki he faʻahinga ʻi he vāhenga-ngāue mulí ke nau maʻu ha fakataha-lahi pea pehē foki ke nau malava ʻo fakamoleki ha taimi mo honau fāmilí mo e kaungāmeʻá. Naʻe fakahaaʻi ʻi he tohí ʻe totongi ʻe he kautahá ʻa e ngaahi tikite ʻalu mo e foki.

Neongo naʻe ʻi ai ʻa e ngaahi fokotuʻutuʻu meimei tatau ʻi he kuohilí, ko e taʻu ko ení naʻe kehe ia. ʻI he tataki ʻa e Kōmiti Faiako ʻa e Kulupu Pulé, naʻe fokotuʻu ai ha potungāue foʻou, ko e Fefolauʻaki ʻa e ʻUluʻi ʻApitanga ki he Māmaní (WHQ) ke nau fai ʻa e puká.

Hili pē hono ʻave atu ʻa e tohi fakaafé, naʻe kamata ke tō tahataha atu ʻa e ngaahi kole tikite folaú ki he potungāue Fefolauʻaki ʻa e WHQ. Ka ʻi Sanuali 2014, naʻe kamata ke ʻuha mai e kole ki ha tikité. Ko e kulupu naʻe vaheʻi ke nau tokangaʻi ʻa e fokotuʻutuʻu ki he folau ko ení naʻa nau kumi mo puka ʻa e ngaahi halanga folau ki he kau sevāniti taimi-kakato makehe ʻi māmani lahí.

Ko e niʻihi ʻo e ngaahi halanga folau ko ení naʻe faingataʻa. Ko e kau folau mei Reykjavík, ʻAisileni, naʻe fiemaʻu ke nau ʻalu ki Cochabamba, Polivia. Ko e niʻihi mei Nouméa, Niu Kaletōnia naʻe fiemaʻu ke nau puna ki Antananarivo, Matakesikā. Naʻe puna ʻa e niʻihi mei he Taulanga Molesipī, Pāpua Niu Kiní ki Seattle, Uāsingatoni, ʻAmelika pea mo e niʻihi mei Ouagadougou, Pēkina Faso, ki Winnipeg, Kānata.

Ko e toko nima ʻi he timi Fefolauʻaki ʻa e WHQ naʻa nau puka ʻa e puna ʻe 19,000. ʻI hono ngāueʻaki ʻa e paʻanga naʻe foaki ʻe he ngaahi fakatahaʻangá tautefito ki he taumuʻa ko ení, naʻa nau fakatau pea ʻoatu ai ʻa e tikite folau ki he kau folau ʻe toko 4,300 nai ʻi he fonua ʻe 176.

Naʻe fakahoungaʻi lahi ʻaupito ʻa e tokoni ko ení. Naʻe tohi ʻe ha ongo meʻa misinale: “ʻI he ʻahó ni ʻokú ma foki ki homa vāhenga-ngāue ʻi ʻĒsia Tonga-Hahaké. ʻOkú ma houngaʻia lahi ʻi hoʻomou tokoni mai kiate kimaua ke foki ki ʻIngilaní, ʻa homa fonua tupuʻangá, pea ke fakataha mo homa fāmilí hili ē ha taʻu ʻe nima. Ka ne taʻeʻoua ʻa e tokoni ko ení, naʻe ʻikai mei malava ke ma fakahoko eni. Ko ia ʻokú ma fakamālō loto-moʻoni atu ki he faʻahinga kotoa naʻá nau ʻai ke malava ení.”

Naʻe tohi ʻe ha misinale ʻoku ngāue ʻi Palakuei: “ʻOku ou loto mo hoku uaifí ke fakahaaʻi atu ʻema houngaʻia lahi ʻi he faingamālie ke ma maʻu ʻa e fakataha-lahi fakavahaʻapuleʻanga ʻi New Jersey, ʻAmelika. ʻI he konga ki muʻa ʻo e 2011, naʻá ma kamata palani ke folau ki ʻAmelika ke sio ʻi he ʻuluʻi ʻapitanga ki he māmaní. Naʻá ma tātānaki ha paʻanga ki ai. Kae kehe, ʻi Sune ʻo e taʻu ko iá, naʻe fakaafeʻi kimaua ke ʻaʻahi ki he ngaahi fakatahaʻanga lea fakanoa ʻi Palakueí. Naʻe fiemaʻu ha paʻanga lahi ki he fononga ko ení. Hili ha fakakaukau lahi ki ai, naʻá ma fili ke feilaulauʻi ʻema ʻeva ki ʻAmeliká kae kumi ha meʻalele ʻe ʻaonga ange ia ki homa vāhenga-ngāue foʻoú. Naʻá ma maʻu leva ʻa e fakaafe ke maʻu ʻa e fakataha-lahi fakavahaʻapuleʻangá. Ko ia, naʻe hoko moʻoni ʻema misí! ʻOkú ma fakamālō lahi ki he lelei ʻo Sihová mo ʻene anga-ʻofá ʻo fakahaaʻi mai ʻi he founga ko ení.”

“ʻOkú ma loto pē ke ʻoatu ha kiʻi ʻīmeili nounou ke fakamālō lahi atu!” ko e tohi ia ʻa ha ongo meʻa mei Malauī. “ʻOku lava ke ma sioloto atu ki he lahi ʻo e ngāue, taimi mo e fakamole naʻe fai ke fakahoko ai ʻa e ngaahi fefolauʻaki ko ení. ʻOkú ma houngaʻia lahi ʻi hoʻomou ngāue mālohí, pea hiliō he meʻa kotoa, ko e nima-homo ʻa e kautaha ʻa Sihová ʻi hono ʻai ke malava ke mau folau ki homau fonua tupuʻangá ke maʻu ʻa e fakataha-lahi fakavahaʻapuleʻangá pea fakamoleki ha taimi mo homa fāmilí mo e kaungāmeʻá.”

Naʻe saiʻia ʻaupito mo e faʻahinga ʻi he potungāue Fefolauʻaki ʻa e WHQ ʻi heʻenau ngāué. “Ko e tokoni ki he kau misinalé ke foki ki honau fonuá ke sio ki honau fāmilí mo e kaungāmeʻá ko ha meʻa makehe ʻaupito ia,” ko e lau ia ʻa Mileivi. “Naʻe tokoniʻi ai au ke u houngaʻia ʻi he ʻofa lahi ʻa e kautahá ʻi he faʻahinga he ngaahi vāhenga-ngāue mulí,” ko e lau ia ʻa Dorise. Pea naʻe pehē ʻe Rodney, ko e ʻovasia ʻo e potungāué, “Ko ha meʻa fakafiefia ia ke kau ʻi he ngāue ko ení.”

Ko e Kau Fakamoʻoni ʻa Sihova ʻi māmani lahí naʻa nau fiefia ʻi he faingamālie ke kau ʻi hono foaki ʻa e meʻaʻofa anga-ʻofa ko ení ki honau fanga tokoua mo e fanga tuofāfine ngāue mālohi mo feilaulauʻi-kitá.