Ko Hugo, taʻu hongofulu, naʻá ne maʻu ki muí ni ʻa e pale Diana Award mei ha kautaha Pilitānia ki heʻene tokoni ki he fānau ako ʻi hono ʻapiakó ke fekuki mo e houtamakí.

Naʻe pehē ʻe Hugo: “ʻOku ou ʻave ʻa e pale ko ení ki he talanoa tā fakatātā Ikuʻi e Houtamakí ʻo ʻIkai Fuhu. Naʻá ku malava ʻo tokoni ki hono taʻofi ʻa e houtamakí koeʻuhí pē ko e meʻa naʻá ku ako mei he vitiō ʻi he jw.org.”

Naʻe ʻuluaki huluʻi ʻe Hugo ʻa e vitiō Ikuʻi e Houtamakí ki heʻene kau faiakó. ʻI heʻenau saiʻia aí, naʻa nau fokotuʻutuʻu ke ʻai ke ala maʻu ʻa e uepisaiti jw.org ki he fānau akó kotoa. Ko e tokolahi ʻo e fānau ako taʻu valu ki he hongofulu ʻi he ʻapiako ʻo Hugo ʻoku nau ngāueʻaki maʻu pē ʻa e jw.org he taimí ni. ʻOku nau pehē ʻoku ʻikai ngata pē hono tokoniʻi heni kinautolu ke fekuki mo e ngaahi palopalema hangē ko e houtamakí kae pehē foki ki hono tali ʻa e fehuʻi hangē ko e, ʻE lava fēfē ke u maʻu ha ngaahi kaungāmeʻa moʻoni?

ʻI ha ʻapiako ʻe taha ʻi Pilitānia, naʻe fehangahangai ai ʻa e taʻu valu ko Elijah mo e houtamakí. Naʻe vakaiʻi fakalelei ʻe hono fāmilí ʻa e vitiō Ikuʻi e Houtamakí. Naʻa nau ʻahiʻahiʻi fakataha ʻa e meʻa ʻe lava ke ne leaʻaki mo fai ʻi hono fakamamahiʻi iá. Naʻe maʻu heni ʻe Elijah ʻa e loto-maʻu ke fekuki lavameʻa mo e palopalemá. Ki mui ai, lolotonga ʻa e uike tokangaekina ʻo e houtamakí, naʻe huluʻi ʻe he pule ako ʻa Elijah ʻa e vitioó ki he ʻapiakó kotoa.

Ko e moʻoni, ko e houtamakí ʻoku ʻikai ko ha palopalema pē ia ʻi Pilitānia. ʻOku hoko ia ʻi māmani lahi pea ko e vitiō talanoa tā fakatātā ko ení ʻokú ne tokoniʻi ʻa e fānau ʻi he feituʻu kotoa.

ʻI ʻAmelika, ko e taʻu hongofulu ko Ivie naʻá ne ilifia ʻi ha kaungāako naʻá ne fakamamahiʻi ia. Hili ʻa e sio ʻi he vitiō Ikuʻi e Houtamakí, naʻe maʻu ʻe Ivie ʻa e loto-toʻa ke fehangahangai mo e taʻahiné. Naʻá ne talanoa foki ki heʻene faiakó, ʻa ia naʻá ne tokoni ki he tuʻungá ni. Naʻe kole fakamolemole ange ʻa e kaungāakó kia Ivie pea ʻokú na vālelei he taimí ni.

ʻOku tokanga ʻa e Kau Fakamoʻoni ʻa Sihová ki he lelei ʻa e fānaú. Te mau hokohoko atu ke pulusi ʻa e faleʻi ʻaonga ke tokoni kiate kinautolu ke fekuki mo e ngaahi palopalema fakaʻaho hangē ko e houtamakí.