Naʻe fanauʻi au ʻi San Juan Chancalaito, ko ha kiʻi kolo ʻi he siteiti ʻo Chiapas, Mekisikou. Ko hoku fāmilí ʻoku nau kau ki he kakai Chol, ko ha matakali ʻo e hako ʻo e kau Meiá. Naʻe toko 12 ʻa e fānau ʻeku ongo mātuʻá, pea ko au ʻa e fika nimá. ʻI heʻeku kei siʻí, naʻe ako Tohi Tapu ʻemau fānaú mo e Kau Fakamoʻoni ʻa Sihová. Ko e meʻa pangó, naʻe ʻikai ke u ngāueʻaki ʻa e faleʻi ʻa e Tohi Tapú ʻi heʻeku kei siʻí.

 ʻI he aʻu ki hoku taʻu 13, naʻá ku ʻosi ngāueʻaki ʻa e faitoʻo kona tapú pea kaihaʻa mei he niʻihi kehé. ʻI he taʻu ko iá naʻá ku mavahe ai mei ʻapi pea hikihiki holo mei he feituʻu ki he feituʻu. ʻI heʻeku taʻu 16, naʻá ku kamata ngāue ʻi ha ngoue maliuana. Naʻá ku ʻi ai ʻi he meimei taʻu ʻe taha, pea ʻi he pō ʻe taha lolotonga ʻemau fetuku ha fuʻu uta maliuana ʻi ha vaka, naʻe ʻohofi kimautolu ʻe ha kau tangata ʻosi fakanaunau tau kakato mei ha kulupu tila faitoʻo kona tapu ʻe taha. Naʻá ku hao mei he tau faná ʻi heʻeku puna ki he vaitafé pea uku ʻo toki ʻasi hake he faʻahi ʻe tahá. Hili iá, naʻá ku hola ki ʻAmelika.

 ʻI ʻAmelika, naʻe hokohoko atu ai ʻeku feʻaveʻaki faitoʻo kona tapú pea tō ki he ngaahi faingataʻa lahi ange. ʻI heʻeku taʻu 19, naʻe puke au pea tautea ngāue pōpula ki he kaihaʻa mo e teuaki fakapō. ʻI he pilīsoné, naʻá ku kau ki ha kau kengi pea fai ʻa e ngaahi tōʻonga fakamālohi lahi ange. Ko e olá, naʻe ʻave au ʻe he kau maʻu mafaí ki ha pilīsone malu ʻi Lewisburg, Pennsylvania.

 ʻI he pilīsone Lewisburg, ko ʻeku tōʻongá naʻe ʻalu mei he kovi ki he kovi ange. Koeʻuhí naʻá ku ʻosi maʻu ʻa e ngaahi tā-tatau ʻo e kau kengí, naʻe faingofua pē ʻeku kau mo e kau kengi tatau ʻi he pilīsone ko ení. Naʻá ku toe anga-fakamālohi ange, ʻo fuhu pē mei he taimi ki he taimi. ʻI he taimi ʻe taha, naʻá ku kau ai ʻi ha fetāʻaki fakakaukengi ʻi he loto ʻataʻatā ʻo e pilīsoné. Naʻa mau tau tāmate, ʻo ngāueʻaki ʻa e ngaahi pate peisipolo mo e ngaahi foʻi pāuni hikihikí. Ke veteki ʻa e fuhú, naʻe ngāueʻaki ʻe he kau selá ʻa e kasa koná. Hili iá, ko e kau maʻu mafai ʻi he pilīsoné naʻa nau ʻave au ki he tafaʻaki ʻoku tokangaʻi makehe ai ʻa e kau pōpula fakatuʻutāmakí. Naʻá ku fakapoʻuli vave mo lea taʻefakaʻapaʻapa. Naʻe faingofua pē kiate au ke u tā ʻa e kakaí. Ko hono moʻoní, naʻá ku fiefia ai. Naʻe ʻikai haʻaku ongoʻi fakatomala ʻe taha ʻi heʻeku tōʻongá.

 ʻI he feituʻu tokangaʻi makehé, naʻá ku nofo maʻu pē ʻi hoku lokí ʻi he konga lahi taha ʻo e ʻahó, ko ia naʻá ku kamata lau ʻa e Tohi Tapú ke mole atu ai e taimí. Ki mui ai, naʻe ʻomai ʻe ha sela ha tatau ʻo e tohi Te Ke Malava ʻo Moʻui Taʻengata he Palataisi ʻi he Māmaní. a ʻI heʻeku lau ʻa e tohi tokoni ko ʻeni ki he ako Tohi Tapú, naʻá ku manatuʻi ʻa e ngaahi meʻa lahi naʻá ku ako ʻi heʻeku kei siʻí ʻi he taimi naʻá ku ako ai ʻa e Tohi Tapú mo e Kau Fakamoʻoní. Hili iá, naʻá ku fakakaukauloto ki he tuʻunga ololalo kuó u aʻu ki ai koeʻuhi ko ʻeku tōʻonga fakamālohí. Naʻá ku toe fakakaukau ki hoku fāmilí. Koeʻuhi ko e toko ua ʻo hoku fanga tuofāfiné naʻá na hoko ko e Kau Fakamoʻoni ʻa Sihova, naʻá ku fakakaukau, ‘Te na moʻui taʻengata kinaua.’ Naʻá ku ʻeke hifo leva, ‘Ko e hā ka ʻikai malava ai ke u maʻu iá?’ Ko e taimi ia naʻá ku toki fakapapauʻi ai ke u liliú.

 Kae kehe, naʻá ku ʻiloʻi naʻá ku fiemaʻu ha tokoni kae lava ke u liliu. Ko ia, ko e ʻuluakí, naʻá ku lotu kia Sihova ko e ʻOtuá pea kōlenga kiate ia ke ne tokoniʻi au. Hokó, naʻá ku tohi ki he ʻōfisi vaʻa ʻo e Kau Fakamoʻoni ʻa Sihová ʻi ʻAmeliká pea kole ki ha ako Tohi Tapu. Naʻe fokotuʻutuʻu ʻe he ʻōfisi vaʻá ha fakatahaʻanga ofi mai ke fetuʻutaki mai kiate au. ʻI he taimi ko iá, naʻe ʻikai ke fakaʻatā ha taha ke ʻaʻahi mai kiate au tuku kehe pē hoku fāmilí, ko ia ko ha tokotaha Fakamoʻoni mei he fakatahaʻangá naʻá ne kamata ʻomai ha ngaahi faitohi fakalototoʻa mo ha ʻū tohi Fakatohitapu, ʻa ia naʻe fakalolotoʻi ai ʻeku holi ke liliú.

 Naʻá ku fai ha fakalakalaka lahi ʻi heʻeku fili ke mavahe mei he kau kengi naʻá ku kau ki ai ʻi he taʻu lahi. Ko e taki ʻo e kau kengí naʻá ne toe ʻi he feituʻu tokangaʻi makehé, ko ia naʻá ku fakaofiofi kiate ia lolotonga ʻa e taha ʻo ʻemau ngaahi taimi mālōloó pea tala ange naʻá ku loto ke hoko ko ha taha ʻo e Kau Fakamoʻoni ʻa Sihová. Naʻá ku ʻohovale ʻi heʻene pehē mai: “Kapau ko hoʻo fakamātoato, peá ke fai ia. Heʻikai lava ke u fakafeʻātungiaʻi ʻa e ʻOtuá. Ka ʻo kapau ko hoʻo loto pē ke ke mavahe mei he kau kengí, ʻokú ke ʻilo pē hono nunuʻá.”

 ʻI he taʻu ʻe ua hono hokó, ko e kau ngāue ʻi he pilīsoné naʻa nau fakatokangaʻi ʻa e ngaahi liliu ʻi hoku angaʻitangatá. Ko e olá, naʻa nau anga-lelei ange kiate au. Ko e fakatātaá, ko e kau selá naʻe ʻikai ke nau toe kiiʻi hoku nimá ʻi hono fakafeʻao au mei hoku lokí ke kaukaú. Ko e taha ʻo e kau selá naʻe aʻu ʻo ne haʻu ʻo fakalototoʻaʻi au ke hokohoko atu ʻeku fai ʻa e ngaahi liliú. Ko hono moʻoní, ko e kau maʻu mafai ʻi he pilīsoné naʻa nau ʻave au ki ha ʻapi pōpula ofi ki he pilīsone lahí ʻa ia naʻe ʻikai ke fuʻu leʻohi malu, ʻo u ʻi ai ʻi hoku taʻu fakaʻosí. ʻI he 2004, hili ia hono tuku pilīsone au ʻi he taʻu ʻe hongofulu, naʻá ku ʻatā pea naʻe fakafoki fakapuleʻanga au ki Mekisikou ʻi ha pasi ʻa e pilīsoné.

 ʻI ha taimi nounou hili ʻeku aʻu ki Mekisikoú, naʻá ku maʻu ha Fale Fakatahaʻanga ʻa e Kau Fakamoʻoni ʻa Sihová. Ko e fuofua fakataha naʻá ku maʻú naʻá ku tui pē hoku teunga pōpulá​—ko e vala taau pē ia naʻá ku maʻú. Neongo hoku fōtungá, ko e Kau Fakamoʻoní naʻa nau talitali loto-māfana au. ʻI heʻeku sio ki heʻenau anga-leleí, naʻá ku ongoʻi naʻá ku ʻi he lotolotonga ʻo e kau Kalisitiane moʻoní. (Sione 13:35) ʻI he fakataha ko iá ko e kau mātuʻa ʻi he fakatahaʻangá naʻa nau fokotuʻutuʻu ke fai ha ako Tohi Tapu mo au. Naʻá ku papitaiso ko ha taha ʻo e Kau Fakamoʻoni ʻa Sihová hili ha taʻu ʻe taha mei ai, ʻi Sepitema 3, 2005.

 ʻI Sanuali 2007, naʻá ku kamata ngāue ko ha faifekau taimi-kakato, ʻo fakamoleki ʻa e houa ʻe 70 ʻi he māhina taki taha ʻi hono akoʻi ʻa e Tohi Tapú ki he niʻihi kehé. ʻI he 2011, naʻá ku maʻu tohi fakamoʻoni ako ai mei he Ako Fakatohitapu Maʻá e Fanga Tokoua Taʻemalí (ʻoku ui he taimí ni ko e Ako Maʻá e Kau ʻEvangeliō ʻo e Puleʻangá). Ko e ako ko ení naʻe tokoni lahi ia kiate au ke fakakakato hoku ngaahi fatongia ʻi he fakatahaʻangá.

 ʻI he 2013, naʻá ku mali ai mo hoku uaifi ʻofeiná, ʻa Pilar. ʻOkú ne fakakata ʻo pehē ʻoku faingataʻa ke ne tui ki he ngaahi meʻa ʻoku ou tala ange fekauʻaki mo hoku kuohilí. Kuo ʻikai ʻaupito ke u toe foki ki hoku ngaahi ʻalunga ki muʻá. Ko au mo hoku uaifí ʻokú ma tui ko e faʻahinga tokotaha ʻoku ou hoko ki ai ʻi he ʻaho ní ko e fakamoʻoni ia ʻo e malava ʻa e mālohi ʻo e Tohi Tapú ke liliu ʻa e moʻuí.​—Loma 12:2.

 ʻOku ou ongoʻi ko e ngaahi lea ʻa Sīsū ʻi he Luke 19:10 ʻoku kaunga kiate au. Naʻá ne pehē ai: “[Naʻá ku] haʻu . . . ke kumi pea ke fakahaofi ʻa ia naʻe molé.” ʻOku ʻikai ke u toe ongoʻi ʻoku taumuʻavalea ʻeku moʻuí. Pea ʻoku ʻikai ke u ʻalu holo ʻo fakamamahiʻi ʻa e kakaí. Mālō mo e Tohi Tapú, ʻoku ou fiefia ʻi hono maʻu ʻa e taumuʻa lāngilangiʻia taha ʻi he moʻuí, feangainga melino mo e niʻihi kehé, pea ko e mahuʻinga tahá, ko ha vahaʻangatae lelei mo hoku Tokotaha-Fakatupú, ʻa Sihova.