Naʻe fanauʻi au ʻi Ciudad Obregón ʻi he fakatokelau ʻo Mekisikoú, ko e fika nima au ʻi he fānau ʻe toko hiva. Naʻa mau nofo ʻi he tuʻa koló, ʻa ia naʻe tokangaʻi ai ʻe heʻeku tamaí ha kiʻi faama. Ko ha feituʻu lelei ia ke nofo ai, pea ko homau fāmilí naʻe fāʻūtaha mo fiefia. Ko e meʻa fakamamahí, ʻi heʻeku taʻu nimá, naʻe maumauʻi ai ʻe ha afā ʻemau fāmá pea naʻe pau ke mau hiki ki ha kolo ʻe taha.

 Naʻe kamata ke ʻi ha tuʻunga lelei ange ʻa e tuʻunga fakapaʻanga ʻeku tamaí. Ka ʻi he taimi tatau, naʻá ne hoko ʻo ʻolokahōlika. Naʻe uesia heni ʻena nofo malí pea mo kimautolu fānaú. Ko au mo hoku ongo taʻoketé naʻe kamata ke mau ifi ʻa e ngaahi sikaleti naʻa mau kaihaʻasi mei heʻeku tamaí. ʻI heʻeku taʻu onó, ko e ʻuluaki taimi ia naʻá ku konā aí. Taimi siʻi pē mei ai, naʻe māvae ʻeku ongo mātuʻá pea naʻe toe kovi ange hoku ʻulungāngá.

 Naʻe ʻave kimautolu ʻe heʻeku faʻeé ʻi heʻene ʻalu ke nofo mo ha tangata kehe. Naʻe ʻikai ke ʻoange ʻe he tangatá ha paʻanga ki heʻemau faʻeé, pea naʻe ʻikai lava ʻo feau ʻemau fiemaʻú ʻi he meʻa naʻá ne maʻú. Ko ia ko kimautolu fānaú naʻa mau fai pē ha ngāue naʻa mau lavá, ka naʻe ʻikai pē lava ʻo feau heni ʻemau ngaahi fiemaʻu tefitó. Naʻá ku ngāue ko ha tokotaha fakangingila sū pea fakatau atu ʻa e ngaahi foʻi mā, nusipepa, pululole, mo e ngaahi meʻa kehe. Naʻá ku takai holo ʻi he loto koló ʻo kumi ha meʻakai ʻi he ngaahi kapa veve ʻa e kau tuʻumālié.

 ʻI heʻeku taʻu hongofulú, naʻe fakaafeʻi au ʻe ha tangata ke ma ngāue ʻi he lingiʻanga veve ʻa e koló. Naʻá ku tali ʻene fakaafé pea naʻá ku liʻaki ʻa e akó pea mavahe mei ʻapi. Naʻe ʻikai aʻu ʻo paʻanga ʻe taha ʻene totongi aú pea naʻá ne ʻomai mo e meʻakai naʻe tānaki mei he lingiʻanga vevé. Naʻá ku nofo ʻi ha kiʻi hati ʻa ia naʻe tātānaki pē mei he lingiʻanga vevé. Ko e kakai takatakai ʻiate aú naʻa nau ngāueʻaki ʻa e talanoa fakalieliá pea tōʻongaʻaki ʻa e fehokotaki fakasino taʻetāú. Ko e tokolahi naʻe maʻunimā ʻe he faitoʻo kona tapú pea ʻolokahōlika. Ko e taimi kovi taha ia ʻi heʻeku moʻuí pea naʻá ku tangi ʻi he pō kotoa pea tetetete ʻi he ilifia. Koeʻuhi ko ʻeku masivá mo e fakangatangata ʻeku tuʻunga fakaeakó naʻá ku ongoʻi mā ʻaupito. Naʻá ku nofo ʻi he lingiʻanga vevé ʻi he taʻu nai ʻe tolu, pea naʻá ku toki hiki leva ki ha feituʻu ʻe taha ʻi Mekisikou. ʻI aí naʻá ku ngāue ʻi ha faama ʻo paki matalaʻiʻakau mo tufi vavae pea tānaki mai ʻa e toó pea mo taʻaki pateta.

 Hili ha taʻu ʻe fā ai naʻá ku toe foki ki Ciudad Obregón. Ko e taha hoku ngaahi mehikitangá ʻa ia ko ha taula-faʻahikehe, naʻá ne ʻomai ha loki ke u nofo ai ʻi hono ʻapí. Naʻe kamata ke u maʻu ha ngaahi misi fakailifia pea naʻá ku hoko ʻo loto-mafasia ʻou faʻa fakakaukau ke taonakita. ʻI he pō ʻe taha naʻá ku lotu ai ki he ʻOtuá: “ʻEiki, kapau ʻokú ke ʻi ai, ʻoku ou loto ke ʻiloʻi koe pea tauhi kiate koe ʻo taʻengata. Kapau ʻoku ʻi ai ha lotu moʻoni, ʻoku ou loto ke ʻiloʻi ia.”

 Naʻá ku mahuʻingaʻia maʻu pē ʻi he ngaahi meʻa fakalaumālié. Naʻa mo ʻeku kei siʻí, naʻá ku ʻalu ki he ngaahi lotu kehekehe, ka naʻe ʻikai pē ke u fiemālie ha taha ʻo kinautolu. Naʻe ʻikai ha taha ʻo kinautolu ʻe lave ki he Tohi Tapú pe tokoni ke fakalato ʻeku fiemaʻu fakalaumālié. Ko e niʻihi naʻe tō ʻenau fakamamafá ki he paʻangá, lolotonga ia ko e niʻihi naʻa nau pāʻusiʻi ʻa e kāinga lotú.

 ʻI heʻeku taʻu 19, ko e taha ʻi hoku ngaahi matāpulé naʻá ne tala mai naʻe fakahaaʻi ange ʻe he Kau Fakamoʻoni ʻa Sihová ʻa e meʻa ʻoku leaʻaki ʻe he Tohi Tapú ʻo fekauʻaki mo hono ngāueʻaki ʻo e ngaahi ʻīmisí. Naʻá ne lau mai kiate au ʻa e ʻEkisoto 20:4, 5. ʻOku pehē ai kuo pau ke ʻoua naʻa tau ngaohi ha ʻīmisi kuo tongi. ʻOku pehē ʻi he veesi 5: “Kuo pau ke ʻoua naʻá ke punou hifo kiate kinautolu pe hoko ʻo fakataueleʻi ke tauhi kiate kinautolu, he ko au Sihova ko ho ʻOtuá, ko ha ʻOtua ʻokú ne fiemaʻu ʻa e anga-līʻoa maʻataʻatā.” Naʻe ʻeke mai leva ʻe hoku matāpulé, “Kapau ʻoku ngāueʻaki ʻe he ʻOtuá ʻa e ngaahi ʻīmisí ke fakahoko ʻaki ʻa e ngaahi maná pe kapau ʻokú ne loto ke tau ngāueʻaki ia ʻi he lotú, ko e hā ʻokú ne tapui ai iá?” Naʻe ʻai ai heni ke u fifili. Talu mei ai, naʻá ma faʻa fetalanoaʻaki ki ha ngaahi kaveinga Fakatohitapu. Naʻá ku saiʻia ʻaupito ʻi he ngaahi fetalanoaʻaki ko iá pea naʻe hangē naʻe toe vave ange ʻalu ʻa e taimí.

 Ki mui aí, naʻá ne ʻave au ki he fakataha ʻa e Kau Fakamoʻoni ʻa Sihová. Naʻe maongo ʻaupito kiate au ʻa e meʻa naʻá ku sio mo fanongo ki aí. Naʻa mo e fānau īkí ʻoku nau kau ʻi he polokalama pea lea mahino mei he peletifōmú! Naʻá ku pehē, ‘Ko e kakai ko ení ʻoku akoʻi lelei ʻaupito!’ Neongo naʻe loloa hoku ʻulú pea hā taʻemaau, ka naʻe talitali loto-māfana au ʻe he Kau Fakamoʻoní. Naʻe aʻu ʻo fakaafeʻi au ʻe ha fāmili ke kai efiafi mo kinautolu ʻi he hili ʻa e fakatahá!

 Mei heʻeku ako Tohi Tapu mo e Kau Fakamoʻoní, naʻá ku ako ai ko Sihova ko e ʻOtuá ko ha Tamai ʻofa ʻokú ne tokanga mai kiate kitautolu ʻo tatau ai pē pe ko e hā hotau tuʻunga fakapaʻanga, fakasōsiale, fakamatakali pe tuʻunga fakaakó. ʻOkú ne taʻefilifilimānako moʻoni. (Ngāue 10:34, 35) Faai atu pē, naʻe fakalato ʻeku fiemaʻu fakalaumālié. Naʻá ku ongoʻi fiefia moʻoni.

 Naʻe vave ʻa e liliu ʻo lelei ange ʻeku moʻuí! Naʻá ku taʻofi ʻeku ifí, ngāuekoviʻaki ʻa e ʻolokaholó pea mo hono ngāueʻaki ʻa e talanoa fakalieliá. Naʻe kamata ke mole atu ʻa e ngaahi mamahi naʻá ku maʻu talu mei he kei siʻí pea pehē ki heʻeku ngaahi misi fakailifiá. Pea naʻá ku ikuʻi ʻa e ongoʻi taʻefeʻungá ʻa ia naʻe kaunga ki ai ʻeku mafasia fakaeongo talu mei heʻeku kei siʻí mo e fakangatangata ʻeku tuʻunga fakaeakó.

 ʻOku ou maʻu ha uaifi fakaʻofoʻofa ʻokú ne ʻofa kia Sihova pea ko ha tokoni lahi ia kiate au. ʻI he ʻahó ni ʻoku ou ngāue ko ha ʻovasia fefonongaʻaki ʻa e Kau Fakamoʻoni ʻa Sihová, ʻokú ma ʻaʻahi ki he ngaahi fakatahaʻangá ke fakalototoʻaʻi mo akoʻi hoku fāmili fakalaumālié. Mālō ki he ʻaonga ʻo e Tohi Tapú mo e ako tuʻu-ki-muʻa ʻoku ʻomai ʻe he ʻOtuá kiate kitautolú, ʻoku ʻikai te u kei ongoʻi fakamāʻia ʻiate au.