Ko Daiane ko e taha ia ʻo e Kau Fakamoʻoni ʻa Sihová pea ko ha ʻevangeliō taimi-kakato ʻi Pelēsila. ʻI he ʻaho ʻe taha, lolotonga ʻene vahevahe ʻa e pōpaki ʻo e Tohi Tapú ʻi he telefoní, naʻá ne talanoa ai ki ha ongo meʻa mali kei siʻi naʻá na mahuʻingaʻia. Naʻá na fakahaaʻi ange kia Daiane te na hiki ki ha kiʻi kolo ʻoku tuʻu mavahe ʻa ia ʻoku ʻikai ha ʻuhila pe ʻInitaneti ai. Tānaki atu ki aí, naʻe ʻikai ha taha ʻo e Kau Fakamoʻoni ʻa Sihová ʻe nofo ʻi he kolo ko iá. Ke hokohoko atu ʻenau fetalanoaʻaki Fakatohitapú, naʻe ʻoange ʻe he ongo mātuʻá kia Daiane ʻa e fika ki he telefoni ʻa e koló pea ʻoange mo e taimi mo e ʻaho ke nau fetuʻutaki aí.

 ʻI he aʻu ki he taimi naʻa nau felotoi ki aí, naʻe tā ʻa Daiane ki he telefoni ʻa e koló pea naʻe tali mai ʻe he ongo mātuʻá! ʻI he uike ʻe ua hokó, naʻe tuʻo tolu ʻenau fetalanoʻaki Fakatohitapu ʻi he telefoní.

 Hili iá, naʻe ʻikai ke toe tali mai ʻe he ongo mātuʻá ʻene tā atú. ʻI he ʻikai loto-siʻí, naʻe hokohoko atu ʻa e tā ʻa Daiane ki he telefoni ʻa e koló ʻo tuʻo tolu ʻi he uike, pea naʻá ne vahevahe ʻa e Tohi Tapú ki he tokotaha naʻá ne tali mai ʻa e telefoní. Ko e olá, naʻe kamataʻi ʻe Daiane ha ngaahi ako Tohi Tapu mo e kakai ʻo e koló.

 ʻI he ʻaho ʻe taha, lolotonga ʻa e ako Tohi Tapu ʻa Daiane mo hono husepānití mo ha kiʻi talavou ʻi he telefoni ʻa e koló, naʻe fakafanongo atu ʻa e faifekau ʻo e koló ki heʻenau fetalanoaʻakí. Naʻá ne tuʻu ʻi he tafaʻaki ʻa e tokotaha ako Tohi Tapú koeʻuhí ke ne fanongo lelei ange ki he fetalanoaʻakí. Naʻe kole leva ʻe he faifekaú ke ne lea kia Daiane mo hono husepānití. Naʻá ne saiʻia ʻaupito ʻi he meʻa naʻá ne fanongo ki aí peá ne loto foki ke ne ako Tohi Tapu!

 ʻI he faai atu ʻa e taimí, naʻe fakahoko ʻe Daiane mo hono husepānití ʻa e ako Tohi Tapu ʻe ono ʻi he telefoni ʻa e koló ʻo kau ai mo e faifekaú. Ko e niʻihi ʻo e kau akó kuo nau maʻu ʻa e ngaahi fakataha Fakakalisitiané ʻo fakafou ʻi he fanongo ʻi he telefoni ʻa e koló. Ko e taha ʻo kinautolu naʻá ne faʻu ha sea papa ke tangutu ai ʻa e kau akó ʻi he lolotonga ʻenau akó.

 ʻOku houngaʻia ʻa Daiane mo hono husepānití ʻi heʻena maʻu ʻa e faingamālie ke vahevahe atu ʻa e pōpoaki ʻo e Puleʻangá ki he kiʻi kolo tuʻu mavahe ko ení. ʻOku pehē ʻe Daiane, “ʻOku malava ʻe Sihova ke ne fakaaʻu ʻa e ongoongo leleí ki ha taha pē, neongo ai kapau ʻokú ne nofo ʻi ha feituʻu ʻoku tuʻu mavahe.”