Ko ha faʻē taʻehoa ko hono hingoá ko Desicar naʻá ne loto ke fakalahi ʻene ngāue fakafaifekaú ʻaki ʻene hoko ko ha tāimuʻa tuʻumaʻu. ʻOkú ne nofo ʻi Venisuela ko ha fonua ʻoku fāinga mo e palopalema fakaʻekonōmiká. Neongo ia, naʻá ne fakapapauʻi ke kamata tāimuʻa, pea ko e meʻa ia naʻá ne faí. Lolotonga ʻene fiefia ʻi heʻene tāimuʻá mo e kamata ʻa e mahaki fakaʻauha COVID-19.

 ʻI he kamata ʻa e mahaki fakaʻauha COVID-19, naʻe faingataʻa kia Desicar ke feʻunuʻaki ʻene ngāue fakafaifekaú ki he ngaahi tuʻunga foʻoú. Ko e faitohí ko ha pole lahi ia kiate ia. Tānaki atu ki aí, naʻe ʻikai lava ke ne ngāueʻaki ʻa e ʻInitanetí ki heʻene ngāue fakafaifekaú koeʻuhí naʻe fuʻu mamafa ʻi honau feituʻú. “Naʻá ku loto-siʻi,” ko ʻene leá ia. “Fakafokifā pē kuo ʻikai toe lava ke u malanga ʻi he founga naʻá ku anga ki aí. Naʻá ku fakakaukau ʻoku ʻikai ke ola lelei ʻeku ngāue ko ha tāimuʻa tuʻumaʻu.”

 Pea ʻi Sanuali 2021, naʻe tali ʻe he ʻōfisi vaʻa ʻo e Kau Fakamoʻoni ʻa Sihova ʻi Venisuelá ha feingangāue fakamalanga makehe. Naʻe fai ʻa e ngaahi fokotuʻutuʻu ki he ngaahi fale fakamafola lea ʻe 60 mo e ngaahi sēnolo televīsone ʻe 7 ke nau fakamafola ʻa e ngaahi malanga Fakatohitapu kuo fili maʻá e kakaí lolotonga ʻa e ngaahi fakaʻosinga uike ʻe nima ʻo e māhina ko iá. Naʻe fakalototoʻaʻi ʻa e Kau Fakamoʻoní ke nau fakaafeʻi ʻa e faʻahinga mahuʻingaʻiá ke nau sio mo fanongo ai. Naʻe toe tokonaki ʻe he vaʻá ʻa e ngaahi fehuʻi mo e ngaahi konga Tohi Tapu naʻe lave ki ai ʻa e malanga taki taha, ʻa ia ʻe lava ke ngāueʻaki ʻe he fanga tokouá mo e fanga tuofāfiné ʻi heʻenau faitohí mo e tā telefoní. Tānaki atu ki aí, naʻe fakamamafaʻi ʻe he vaʻá ʻa hono ngāueʻaki ʻa e ʻave pōpoaki ʻi he telefoní ʻi he ngāue fakamalangá​—ko ha founga foʻou ia ʻo e malangá ki he Kau Fakamoʻoni tokolahi ʻi Venisuela.

 Naʻe fiefia ʻa Desicar ke kau ʻi he feingangāué. Neongo naʻe teʻeki ai ʻaupito ke ne faifakamoʻoni ʻo ngāueʻaki ʻa e ʻave pōpoaki ʻi he telefoní, naʻá ne fili ke ʻahiʻahiʻi ia. Neongo ia, naʻá ne fiemaʻu ha tokoni. “ʻOku ʻikai ke u poto ʻi hono ngāueʻaki ʻa e tekinolosiá,” ko e lau ia ʻa Desicar. Ko ia naʻá ne kole ange ki heʻene taʻahiné ke ne akoʻi ia pea ʻi he hili pē ha kiʻi taimi mei ai, naʻe mateuteu ʻa Desicar ke kau ki he feingangāué.

 ʻI hono ngāueʻaki ʻe Desicar ʻa e founga foʻou ʻo e ʻave pōpoaki ʻi he telefoní, naʻá ne fakaafeʻi ai ʻa hono ngaahi kaungāmeʻá ke nau fanongo ki he ngaahi malanga naʻe ʻosi hikí. Naʻá ne ofoofo ʻi he ngaahi olá. Ko e tokolahi ʻi heʻene kau fakaafé naʻa nau fanongo ki he ngaahi malangá mo ʻeke ha ngaahi fehuʻi. Ko e niʻihi naʻe ʻikai ke nau kau ki aí naʻa nau ʻeke kia Desicar ʻa e meʻa naʻe lāulea ki ai ʻa e ngaahi malangá. “Naʻá ku hiki ha ngaahi nouti pea vahevahe ia mo kinautolu,” ko e lea ia ʻa Desicar. “Naʻe teʻeki pē ke u lava ʻo fai ha ngaahi toe ʻaʻahi ʻo laka hake ʻi he 5, ka ʻi he ngataʻanga ʻo e feingangāué, naʻá ku fai ha ngaahi toe ʻaʻahi ʻe 112!” a

 Naʻe toe fakaafeʻi foki ʻe Desicar hono tokoua taʻetuí​—ʻa ia naʻá na kaungāʻapi​—ke ne fanongo ki he ngaahi malanga ʻi he letioó. “Naʻá ku ʻohovale ʻi he tali ʻe hoku tokouá,” ko e lea ia ʻa Desicar. “ʻI he ʻaho Sāpate kotoa pē ʻi he 8:00 a.m., naʻá ku ʻalu ki hono ʻapaatimení ʻo fanongo fakataha mo ia. ʻI he lolotonga mo e hili ʻa e polokalamá, naʻe lahi ʻene ngaahi fehuʻí.” Naʻe maʻu foki ʻe he tokoua ʻo Desicar ʻa e Fakamanatu ʻo e pekia ʻa Sīsuú ʻo fakafou ʻi he ʻInitanetí, pea naʻá ne toe fakaʻatā ʻa Desicar ke ne ngāueʻaki ʻene ʻInitanetí ki heʻene ngāue fakamalangá.

 “ʻOku ou houngaʻia lahi ʻia Sihova,” ko e lea ia ʻa Desicar. “Naʻá ku fakamālō ki he kau mātuʻa ʻi he fakatahaʻangá ʻi heʻenau fakalototoʻaʻi aú. Naʻá nau tokoniʻi au ke toe maʻu ʻeku fiefia ʻi he ngāue fakamalangá.” (Selemaia 15:16) ʻOku hokohoko atu ʻa Desicar ʻi he ngāue tāimuʻá pea toe foki ki he faʻahinga mahuʻingaʻia naʻá ne maʻu fakafou ʻi he ʻave pōpoaki ʻi he telefoní.