Vahe 21

“ʻOku ʻIkai Te Nau ʻo Māmāni”

1. (a) Ko e hā naʻe lotuʻaki ʻe Sīsū koeʻuhi ko ʻene kau ākongá ʻi he pō ki muʻa peá ne pekiá? (e) Ko e hā naʻe mahuʻinga fau ai ke “ʻikai . . . ʻo māmāni”?

 ʻI HE PŌ ki muʻa pea tutuki ʻa Sīsuú, naʻá ne lotu faka-mātoato koeʻuhi ko ʻene kau ākongá. ʻI heʻene ʻilo te nau tofanga ʻi ha mafasia fakalilifu meia Sētané, naʻá ne pehē ki heʻene Tamaí: “ʻOku ʻikai te u pehē, ke ke toʻo kinautolu mei māmani, ka ke ke taʻofi kinautolu mei he Fili. ʻOku ʻikai te nau ʻo māmāni, hange ko au, ʻoku ʻikai te u ʻo māmāni.” (Sione 17:15, 16) Ko e hā ʻoku mahuʻinga fau ai ʻa e mavahe mei he māmaní? Koeʻuhi ko Sētane ʻa e tokotaha pule aí. Ko e faʻahinga ko ia ʻoku nau ʻo māmaní ʻoku nau ʻi he malumalu ʻo ʻene pulé. (Sione 14:30; 1 Sione 5:19) Koeʻuhi ko e meʻá ni, ʻoku mātuʻaki mahuʻinga ki he kau Kalisitiane taki taha ke mahino kiate ia ʻa e meʻa pē ko ia ʻoku ʻuhinga ki ai ʻa e pehē “ʻikai . . . ʻo māmāni.” Naʻe moʻoni fēfē eni ʻi he fekauʻaki mo Sīsuú?

2. ʻI he ngaahi founga fē naʻe “ʻikai . . . ʻo māmāni” ai ʻa Sīsū?

² ʻOku pau naʻe ʻikai ke fakamavaheʻi ʻe Sīsū ʻa ia tonu mei he kakai kehé. Naʻe ʻikai ʻuhinga ʻa ʻene hoko ʻo “ʻikai . . . ʻo māmāni” naʻe ʻikai ʻofa ai ia ki he niʻihi kehé. Ko hono mātuʻaki kehekehé, he naʻá ne ʻalu mei he kolo ki he kolo ʻo tala kiate kinautolu ʻa e ongoongo lelei ʻo fekauʻaki mo e Puleʻanga ʻo e ʻOtuá. Naʻá ne fakamoʻui ʻa e mahamahakí, fakaʻā ʻa e kui, fokotuʻu ʻa e mate, pea aʻu ʻo ne foaki ʻa ʻene moʻui ʻaʻaná koeʻuhi ko e faʻahinga ʻo e tangatá. Ka naʻe ʻikai te ne saiʻia ʻi he ngaahi fakakaukau taʻefakaʻotua mo e ngaahi ngāue anga-fulikivanu ʻa e kakai naʻe fonu ai ʻa e laumālie ʻo e māmaní. Naʻá ne fai fakatokanga ʻo fekauʻaki mo e ngaahi holi taʻetaaú, ko e tuli ki he founga moʻui ʻoku holi ki he ngaahi meʻa fakamatelié mo e havala siokita ki he tuʻunga tuʻu-ki-muʻa fakaekita. (Mt. 5:27, 28; 6:19-21; Luke 12:15-21; 20:46, 47) ʻI he ʻikai ke faʻifaʻitaki ki he founga  moʻui ʻa e kakai naʻa nau fakamavaheʻi kinautolu mei he ʻOtuá, naʻe ʻaʻeva ʻa Sīsū ia ʻi he ngaahi founga ʻa e ʻOtuá. (Sione 8:28, 29) Naʻe ʻikai ke kau ʻa Sīsū ki ha faʻahi ʻi he ngaahi fekīhiaki fakapolitikale ʻi he kau Lomá pea mo e kau Siú, neongo ko ha Siu ia.

“Ko Hoku Puleʻanga ʻOku ʻIkai ʻo e Maama Ko Eni”

3. (a) Ko e hā ʻa e talatalaakiʻi ʻo fekauʻaki mo Sīsū naʻe fai ʻe he kau taki lotu Siú kia Pailató, pea ko e hā hono ʻuhingá? (e) Ko e hā ʻokú ne fakahāhaaʻi naʻe ʻikai manako ʻa Sīsū ke hoko ko ha tuʻi fakaetangata?

³ Kaekehe, naʻe talatalaakiʻi ʻe he kau taki lotu ʻo e kau Siú ʻo pehē naʻe fakamoveuveu ʻe Sīsū ʻa e kakaí. Naʻa nau fakatupunga ʻa e fekau ke puke pōpula ia pea ʻave kia Ponito Pailato, ko e kōvana Lomá. Ko e meʻa naʻá ne fakaʻitaʻi moʻoni kinautolú ko hono fakaeʻa ko ia ʻe he akonaki ʻa Sīsuú ʻa ʻenau mālualoí. Ka naʻa nau fai hano talatalaakiʻi ke ʻai ʻa e kōvaná ke ne fai ha meʻa ki ai: “Naʻa mau ʻilo ʻa e siana ni ʻoku ne veuveuki homau kakai, mo ne taʻofi ʻa e fai tukuhau kia Sisa, mo ne pehe ko Kingi Kalaisi ia.” (Luke 23:2) Ko hono moʻoní, ʻi he taʻu ʻe taha ki muʻa aí ʻi he feinga ʻa e kakaí ke ʻai ia ko ha tuʻi, naʻe fakafisingaʻi ia ʻe Sīsū. (Sione 6:15) Naʻá ne ʻilo te ne hoko ko ha Tuʻi fakahēvani pea naʻe teʻeki ai ke hoko ʻa e taimi ke ne hoko ai ko e Tuʻí, pea ʻe fakanofo ia ki he taloní ʻe Sihova ko e ʻOtuá kae ʻikai ʻi ha founga fakatemokalati pe ko e manakoekina ia ʻe he tokolahi.

4. Ko e hā ʻoku fakahaaʻi ʻe he ngaahi moʻoniʻi meʻa ʻo fekauʻaki mo e anga ʻo e fakakaukau ʻa Sīsū ki he “fai tukuhau kia Sisa”?

⁴ ʻI he meʻa fekauʻaki mo hono totongi ʻo e ngaahi tukuhaú, ʻi he ʻaho pē ʻe tolu ki muʻa pea toki puke pōpula atu ʻa Sīsuú naʻe feinga ai ʻa e kau Fālesí ke ʻai ia ke ne leaʻaki ha meʻa ke fakahalaiaʻiʻaki ia ʻi he meʻá ni. Ka naʻe pehē ʻe Sīsū ʻi he tali ki heʻenau fehuʻi olopotó: “Fakahā mai ha foʻi paʻanga [Loma]. Ko e fofonga mo e hingoa ʻo hai ʻoku ʻi ai?” ʻI heʻenau pehē, “ʻO Sisa,” naʻá ne tali atu: “ʻAua; peʻi ʻange kia Sisa ʻa e ngaahi meʻa ʻa Sisa, pea ki he ʻOtua ʻa e ngaahi meʻa ʻa e ʻOtua.”​—Luke 20:20-25.

5. (a) Ko e hā ʻa e meʻa naʻe akoʻi ʻe Sīsū ki heʻene kau ākongá ʻi he taimi naʻe puke pōpula ai iá? (e) Ko e hā ʻa e fakamatala ʻa Sīsū kia Pailato ki he ʻuhinga ʻo e meʻa naʻá ne faí?

⁵ Ko e meʻa ko ia naʻe hoko ʻi he taimi pē ko ia naʻe puke  pōpula ai ʻa Sīsuú naʻe fakahāhā ai naʻe ʻikai te ne fakatupunga ha angatuʻu ki he kau Lomá, pea naʻe ʻikai te ne loto ke fai pehē ʻa ʻene kau ākongá. Naʻe haʻu ʻa e kau sōtia Lomá fakataha mo e kau Siú ʻo nau toʻo heletā mai mo e ngaahi pōvai ke nau puke ʻa Sīsū. (Sione 18:3, 12; Mk. 14:43) ʻI he sio atu ki he meʻá ni, naʻe unuhi hake ʻe he ʻapositolo ko Pitá ha heletā peá ne taaʻi ʻaki ʻa e taha ʻo e kau tangatá, ʻo ne tuʻusi ʻa hono telinga toʻomataʻú. Ka naʻe valokiʻi ai ʻe Sīsū ʻa Pita, ʻo ne pehē: “Fakafoki hoʻo heletā ki hono tuʻunga: he ʻilonga kinautolu ʻoku ala ki he heletā te nau mate heletā.” (Mt. 26:51, 52) ʻI he pongipongi hono hokó, ʻi he ʻao ʻo Pailató, naʻe fakamatala ai ʻa Sīsū ki he ʻuhinga ʻo ʻene fai peheé, ʻo ne pehē: “Ko hoku puleʻanga ʻoku ʻikai ʻo e maama ko eni: ka ne ʻo e maama ko eni ʻa hoku puleʻanga, pehē ʻe tau haʻaku kau ʻofisa ke taʻofi hoku tukuange ki haʻa Siu: ka ko eni, ko hoku puleʻanga ʻoku ʻikai ʻo ʻeni.”​—Sione 18:36.

6. Ko e hā naʻe iku ki ai ʻa e hopó?

⁶ ʻI he hili ha fakakaukau atu ki he fakamoʻoní, naʻe fakahā ʻe Pailato ʻoku ʻikai ʻilo ha “momoʻi hala ʻe taha ʻi he ngaahi meʻa” naʻe talatalaakiʻi ai ʻa Sīsuú. Ka neongo ia, naʻá ne tukulolo ki he fakakouna ia ʻe he fuʻu kakaí pea naʻe tutuki ai ʻa Sīsū.​—Luke 23:13-15; Sione 19:12-16.

Muimui ʻa e Kau Ākongá ʻi he Taki ʻa e ʻEikí

7. Naʻe fakahāhā fēfē ʻe he muʻaki kau Kalisitiané naʻa nau fakaʻehiʻehi mei he laumālie ʻo e māmaní ka naʻa nau ʻofa ki he kakaí?

⁷ ʻOku hā mei he lekooti ʻo e muʻaki lotu faka-Kalisitiané, fakatouʻosi ʻi he Tohitapú pea mo e ngaahi tohi fakahisitōlia kehe, naʻe mahino ki he kau ākonga ʻa Sīsuú ʻa e meʻa ko ia naʻe fiemaʻu meiate kinautolu ʻi he pehē ko ia ke “ʻikai . . . ʻo māmāni.” Naʻa nau feinga ke fakaʻehiʻehi mei he laumālie ʻo e māmaní. Naʻe manukiʻi ʻa kinautolu ʻo pehē ko e kau fehiʻa ki he faʻahinga ʻo e tangatá koeʻuhi ko ʻenau fakamamaʻo mei he ngaahi fakafiefia fakamālohi mo taʻetaau ʻi he ngaahi faiʻanga faiva ʻa e kau Lomá. Kaekehe, naʻe hala ʻatā haʻanau fehiʻa ki honau kaungātangatá, he naʻa nau ngāue mālohi ʻaupito ke tokoniʻi ʻa e niʻihi kehé ke nau maʻu ʻa e ʻaonga mei he ngaahi tokonaki ʻofa ʻa e ʻOtuá ki he fakahaofi moʻuí.

8. (a) Koeʻuhi ko e “ʻikai . . . ʻo māmāni,” ko e hā naʻe hokosia ʻe he muʻaki kau ākongá? (e) Ka ko e hā ʻa e anga ʻo ʻenau vakai ki he kau taki fakapolitikalé pea mo hono totongi ʻo e ngaahi tukuhaú, pea ko e hā hono ʻuhingá?

 ⁸ Hangē pē ko ia naʻe hoko ki honau ʻEikí, naʻa nau toe tofanga foki ʻi ha fakatanga lahi, ʻa ia naʻe faʻa hoko mei he kau taki fakapuleʻanga kuo nau maʻu ʻa e ngaahi fakamatala hala. (Sione 15:18-20) Ka ʻi he 56 T.S. nai naʻe tohi ai ʻa e ʻapositolo ko Paulá ki hono kaungā-Kalisitiane ʻi Lomá ʻo toe fakamamafaʻi ʻa e akonaki ko ia naʻe ʻomai ʻe Sīsuú. Naʻe naʻinaʻi ʻa Paula kiate kinautolu ke nau “moʻulaloa . . . ki he kau maʻu mafai māʻolunga ange,” ʻa ia ko e kau taki fakapolitikalé, “he ʻoku ʻikai ha mafai, ka ʻoku mei he ʻOtua pē.” ʻOku ʻikai ke fokotuʻu ʻe Sihova ʻa e ngaahi puleʻanga fakaemāmaní, ka ʻokú ne fakangofua ke nau pule. Naʻe fakamatalaʻi ʻe Paula ʻo pehē kuo “fokotuʻu ʻe he ʻOtua ki honau ngaahi tuʻunga fakafelāveʻiʻaki,” koeʻuhi he naʻe tomuʻa ʻafioʻi ʻe he ʻOtuá ʻo kikiteʻi ʻa e anga ʻo e hokohoko ʻo ʻenau pulé. Ko ia ai, ko e “kau maʻu mafai māʻolunga ange” ʻoku nau hoko ko e “fokotuʻutuʻu ʻa e ʻOtua” ʻi he taimi lolotongá ni, kaeʻoua ke toki hoko mai ʻa e Puleʻanga ʻo e ʻOtuá tonu ʻi he mafai ʻo Sīsū Kalaisí ʻa ia ko e founga-pule pē ia ʻe taha ʻe pule ki he foʻi māmaní. Ko ia naʻe faleʻi ʻe Paula ʻa e kau Kalisitiané ke nau fakahāhā ʻa e fakaʻapaʻapa totonu ki he kau taki fakaemāmaní pea totongi ʻa e ngaahi tukuhau ʻoku nau fokotuʻu maí.​—Loma 13:1-7, NW; Tai. 3:1, 2.

9. (a) Ko e hā ke ʻoua ʻe taʻetokangaʻi ʻi he moʻulaloa ki he “kau maʻu mafai māʻolunga ange”? (e) ʻI he founga fē ʻoku fakahā ai ʻe he hisitōliá naʻe muimui ofi ʻa e muʻaki kau Kalisitiané ki he faʻifaʻitakiʻanga ʻa Sīsuú?

⁹ Ka, naʻe ʻikai tala ʻe Paula kiate kinautolu ke nau moʻulaloa maʻataʻatā ʻo ʻikai fai ha tokanga ki he ʻOtuá, ki he Folofola ʻa e ʻOtuá pea mo honau konisēnisi faka-Kalisitiané. Naʻa nau ʻilo naʻe lotu pē ʻa Sīsū kia Sihova, pea naʻe fakafisi ʻa Sīsū ke ʻai ia ʻe he kakaí ke hoko ko ha tuʻi pea naʻá ne tala kia Pita ke toe faʻo ʻene heletaá. Naʻa nau loto-tōnunga ʻo pīkitai ki he taki ʻa honau ʻEikí. ʻOku pehē ʻe he tohi ko e On the Road to Civilization​—A World History (naʻe fai ʻe Heckel mo Sigman, peesi 237, 238): “Naʻe fakafisi ʻa e kau Kalisitiané ke kau ki he ngaahi ngafa ʻe niʻihi ʻo e kau tangataʻifonua Lomá. Ko e kau Kalisitiané . . . naʻa nau fakakaukau ko ha maumau ia ʻo ʻenau tuí ke kau ki ha ngāue fakakautau.  Naʻe ʻikai te nau maʻu ha lakanga fakapolitikale. Naʻe ʻikai te nau lotu ki he ʻemipolá.”

10. (a) Ko e hā naʻe fai ai ʻe he kau Kalisitiane ʻi Selusalemá ʻa e meʻa naʻa nau fai ʻi he 66 T.S.? (e) ʻI he founga fē ʻoku ʻomai ai ʻe he meʻá ni ha sīpinga mātuʻaki ʻaonga?

¹⁰ Naʻe tauhi maʻu ʻe he kau ākonga ʻa Sīsuú ʻa ʻenau mātuʻaki tuʻu ʻatā fekauʻaki mo e ngaahi fekīhiaki fakapolitikale mo fakakautau ʻi honau taimí. ʻI he taʻu 66 T.S. naʻe angatuʻu ai kia Sisa ʻa e kau Siu ʻo e vahefonua Loma ko Siuteá. Naʻe ʻātakaiʻi vave leva ʻe he kau tau Lomá ʻa Selusalema. Ko e hā ʻa e meʻa naʻe fai ʻe he kau Kalisitiane ʻi he kolo ko iá? Naʻa nau manatuʻi ʻa e akonaki ʻa Sīsū ke tauhi maʻu ʻa e tuʻu ʻatā pea ke hola mamaʻo mei he vahaʻa ʻo e ongo kau tau ʻoku fai taú. ʻI he taimi naʻe foki fakataimi ai ʻa e kau tau Lomá, naʻe maʻu ai ʻe he kau Kalisitiané ʻa e faingamālie pea naʻa nau hola ʻo kolosi atu ʻi he Vaitafe Sioataní ki he feituʻu moʻungaʻia ko Pela. (Luke 21:20-24) ʻI heʻenau tuʻu ʻataá naʻa nau hoko ai ko ha sīpinga angatonu ki he kau Kalisitiane ki mui aí.

Kau Tuʻu ʻAtā Faka-Kalisitiane ʻi he Taimi ʻo e Ngataʻangá

11. (a) Ko e hā ʻa e ngāue ʻoku femoʻuekina ki ai ʻa e Kau Fakamoʻoni ʻa Sihová, pea ko e hā hono ʻuhingá? (e) ʻOku nau tuʻu ʻatā ʻi he fekauʻaki mo e hā?

¹¹ ʻOku fakahā ʻe he fakamatala fakahisitōliá ʻoku ʻi ai ha faʻahinga kulupu ʻi he “taimi ʻo e ngataʻanga” ko ení, talu mei he 1914 T.S., kuo nau tulitāupau ki ha ʻalunga ʻo e tuʻu ʻatā faka-Kalisitiané ʻi heʻenau faʻifaʻitaki ki he muʻaki kau Kalisitiané? ʻIo, kuo fai pehē ʻa e Kau Fakamoʻoni ʻa Sihová. ʻI he māmaní kotoa kuo nau femoʻuekina ʻi hono malangaʻi ʻa e Puleʻanga ʻo e ʻOtuá ko e founga pē ia ʻe taha ʻoku malava ke maʻu ai ʻa e melinó, founga moʻui lelei mo e fiefia tuʻuloá ʻe he kau ʻofa ki he māʻoniʻoní ʻi māmani kotoa. (Mt. 24:14) Ka kuo nau tauhi maʻu ʻa e mātuʻaki tuʻu ʻatā mei he ngaahi fekīhiaki ʻi he lotolotonga ʻo e ngaahi puleʻangá.

12. (a) ʻI he founga fē ʻoku kehe ʻaupito ai ʻa e tuʻu ʻatā ʻa e Kau Fakamoʻoní mei he ngaahi meʻa ko ia ʻoku fai ʻe haʻa-faifekaú? (e) Ko e hā ʻa e meʻa ʻoku kau ki he tuʻu ʻatā ʻa e Kau Fakamoʻoni ʻa Sihová mei he ngaahi meʻa fakapolitikalé?

¹² ʻI hono mātuʻaki kehe ʻaupitó, ʻoku kau lahi ʻaupito ʻa e haʻa-faifekau ʻo e Puleʻanga-Haʻa-Kalisitiané ʻi he ngaahi  meʻa fakapolitikale ʻo e māmaní. ʻI he ngaahi fonua ʻe niʻihi ʻoku nau kau longomoʻui ʻi ha kemipeini ke poupouʻi pe fakafepakiʻi ʻa e kau kanititeití. ʻOku maʻu ʻe he niʻihi ʻo e haʻa-faifekaú tonu ha lakanga fakapolitikale. ʻOku vili mālohi ʻa e niʻihi ki he kau politikalé ke nau tali ʻa e ngaahi ngāue ko ia ʻoku leleiʻia ai ʻa haʻa-faifekaú. ʻI ha ngaahi feituʻu kehe ʻoku kaungākau vāofi ai ʻa e haʻa-faifekau “ʻoku pipiki ki he ngaahi fakakaukau motuʻá” mo e kau tangata ko ia ʻoku takí pea lolotonga iá ko e kau pātele mo e kau faifekau “ʻoku pipiki ki he ngaahi fakakaukau foʻoú” ʻoku nau poupouʻi nai ʻa e kau tau fakafepakí ʻi heʻenau ngaahi feinga ke toʻo ʻa e kau pule ko é. Kaekehe, ʻoku ʻikai kaunoa ʻa e Kau Fakamoʻoni ʻa Sihová ʻi he ngaahi meʻa fakapolitikalé, ʻo tatau ai pē pe ko e hā ʻa e fonua ʻoku nau nofo ai. ʻOku ʻikai te nau kaunoa ʻi he meʻa ʻoku fai ʻe he niʻihi kehé ke kau ai ki ha faʻahi fakapolitikale, ki he feinga ke maʻu ha lakanga fakapolitikale pe pāloti ʻi ha ngaahi fili ʻoku fai. Ka, koeʻuhi naʻe pehē ʻe Sīsū ko ʻene kau ākongá ʻe “ʻikai. . . ʻo māmāni,” ʻoku ʻikai kau ai ʻa e Kau Fakamoʻoni ʻa Sihová ia ʻi ha meʻa pē ʻo kau ki he ngaahi meʻa fakapolitikalé.

13. Ko e hā ʻoku fakahaaʻi ʻe he ngaahi moʻoniʻi meʻa ʻo kau ki he anga ʻo e vakai kuo maʻu ʻe he Kau Fakamoʻoni ʻa Sihová ʻo fekauʻaki mo haʻanau kau ki he taú?

¹³ Hangē ko ia naʻe kikiteʻi ʻe Sīsuú, ʻi he lolotonga ko eni ʻa e “taimi ʻo e ngataʻanga” kuo toutou tau ai ʻa e ngaahi puleʻangá, pea aʻu ʻo hoko mo e ngaahi mavahevahe ʻi loto ʻi he ngaahi puleʻangá ʻo nau fetauʻaki. (Mt. 24:3, 6, 7) Ka neongo ʻa e ngaahi meʻá ni kotoa, ko e hā ʻa e anga ʻo e vakai kuo maʻu ʻe he Kau Fakamoʻoni ʻa Sihová? ʻOku ʻiloa ʻi he tapa kotoa pē ʻo e māmaní ʻa ʻenau tuʻu ʻatā ʻo fekauʻaki mo e ngaahi fepaki pehē ní. ʻI he faitatau mo e anga ʻo e vakai naʻe maʻu ʻe Sīsū Kalaisí pea naʻe fakahāhā ki mui mai ʻe heʻene muʻaki kau ākongá, naʻe pehē ʻi he Ko e Taua Leʻo (English) ʻi hono tatau ʻo Nōvema 1, 1939: “Ko kinautolu kotoa ʻoku nau kau mo e ʻEikí te nau tuʻu ʻatā mei he ngaahi puleʻanga ʻoku fai tau, pea te nau kau fakakātoa mo fakaʻaufuli ki he Tokotaha-Fakateokalati lahi [ko Sihova] pea mo ʻene Tuʻi [ko Sīsū Kalaisi].” ʻOku fakahā ʻe he ngaahi moʻoniʻi meʻa ʻoku hokohoko atu ʻa hono tauhi maʻu ʻa e anga ʻo e vakai ko ení ʻe he Kau Fakamoʻoni ʻa Sihová ʻi he ngaahi puleʻanga  kotoa pē pea ʻi he ngaahi tuʻunga kotoa pē. Kuo ʻikai te nau fakaʻatā ʻa e ngaahi meʻa fakapolitikale fakatupu fakamavahevahe ʻa e māmaní mo e ngaahi taú ke nau motuhi ʻenau fetokouaʻaki fakavahaʻapuleʻanga ʻi honau tuʻunga ko e kau lotu kia Sihová.​—ʻAi. 2:3, 4; fehoanaki mo 2 Kolinitō 10:3, 4.

14. (a) Ko e toe hā ʻa e meʻa naʻe fakafisi ʻa e kau Fakamoʻoní ke nau fai koeʻuhi ko honau tuʻunga tuʻu ʻatā? (e) Ko e hā ʻa ʻenau fakamatala ki he ʻuhinga ʻo e meʻá ni?

¹⁴ ʻI hano sivisiviʻi ʻo e ngaahi moʻoniʻi meʻa ʻi he hisitōliá ʻoku hā mei ai naʻe ʻikai ngata pē ʻi hono talitekeʻi ʻe he Kau Fakamoʻoni ʻa Sihová ke nau tui ha ngaahi teunga fakakautau pea toʻo meʻataú, ka ʻi he lolotonga ʻo e vaeua senituli pe lahi hake ai kuo maliu atú, naʻa nau toe fakafisi ki hano fai ha ngāue maʻá e kau sōtiá kae ʻikai sōtia pe ko hono tali ha toe ngāue kehe ko ha fakafetongi ʻo e ngāue fakakautaú. Ko e hā hono ʻuhingá? Koeʻuhi kuo nau ako ki he ngaahi fiemaʻu ʻa e ʻOtuá pea naʻa nau toki fai leva ai ha fili fakafoʻituitui mo fakakonisēnisi. ʻOku ʻikai tala ange ʻe ha taha kiate kinautolu ʻa e meʻa kuo pau ke nau faí. Pea ʻikai te nau kaunoa ʻi he meʻa kuo fili ʻa e niʻihi kehé ke nau faí. Ka ʻi he taimi ʻoku fiemaʻu ai ke fai ha fakamatala ki he anga ʻo e vakai ʻoku nau maʻú, kuo fakamaʻalaʻala ʻe he Kau Fakamoʻoni ʻa Sihová ʻo pehē, ʻi honau tuʻunga ko ha faʻahinga kuo nau foaki kinautolu ki he ʻOtuá ʻi he fakatapui, ʻoku nau moʻua ai ke ngāueʻaki honau sinó ʻi heʻene ngāué pea heʻikai malava ke nau tuku atu ia ki he kau pule fakaemāmani ʻa ia ʻoku nau ngāue fakafepaki ki he taumuʻa ʻa e ʻOtuá.​—Loma 6:12-14; 12:1, 2; Mai. 4:3.

15. (a) Ko e hā kuo hokosia ʻe he Kau Fakamoʻoni ʻa Sihová koeʻuhi ko hono tauhi maʻu ʻenau mavahe mei he māmaní? (e) Naʻa mo e taimi naʻe tuku pilīsoneʻi ai kinautolú, ʻi he founga fē kuo tataki ai kinautolu ʻe he ngaahi tefitoʻi moʻoni faka-Kalisitiané?

¹⁵ Ko e meʻa kuo hoko aí ʻoku hangē ko ia naʻe leaʻaki ʻe Sīsū: “Ko e meʻa ʻi he ʻikai ʻo māmani ʻa kimoutolu . . . ʻoku fehiʻa ai ʻa māmani kiate kimoutolu.” (Sione 15:19) Kuo tuku pilīsoneʻi ʻa e tokolahi ʻo e Kau Fakamoʻoni ʻa Sihová koeʻuhi ko e ʻikai te nau maumauʻi ʻenau tuʻunga tuʻu ʻatā faka-Kalisitiané. Kuo ngaohikoviʻi anga-kakaha ʻa e niʻihi, ʻo aʻu ki he maté. Kuo hokohoko atu ʻa hono fakahāhā ʻe he niʻihi kehe ʻenau tuʻu ʻataá he ngaahi taʻu lahi ʻo e ngāue pōpula. ʻOku  pehē ʻe he tohi ko e Values and Violence in Auschwitz (ʻa ia naʻe fai ʻe Anna Pawelczynska, peesi 89): “Naʻe ʻilo ʻe he tokotaha kotoa pē ʻe ʻikai ha Fakamoʻoni ʻa Sihova ʻe taha [ʻi he kemi fakamamahí] te ne fai ha fekau ʻoku fepaki mo ʻene tui pea mo ʻene ngaahi tui pau fakalotú pe fai ha faʻahinga ngāue fakafepaki ki ha tokotaha kehe, neongo ko e tokotaha ko iá ko ha tokotaha-fakapō pe ko ha tokotaha-ʻofisa SS. ʻI he tafaʻaki ʻe tahá, te ne fai ʻa e ngāue kehe kotoa pē ki he lelei taha ʻo ʻene malavá, ʻo aʻu ki he ngāue ʻoku taukovi kiate iá, ʻo kapau naʻá ne ʻai ke tuʻu ʻatā fakaeʻulungaanga ai ia.”

16. (a) Ko e hā ʻoku laka atu ki ai ʻa e ngaahi puleʻanga kotoa, pea ko e hā ʻoku tokanga ʻa e Kau Fakamoʻoni ʻa Sihová ke fakaʻehiʻehi mei ai? (e) Ko ia ai, ko e hā ko ha meʻa mafatukituki ai ʻa e mavahe mei he māmaní?

¹⁶ ʻOku lāuʻilo ʻa e Kau Fakamoʻoni ʻa Sihová ʻoku laka atu ʻa e ngaahi puleʻangá kotoa ki he “tau ʻo e ʻaho lahi ʻo e ʻOtua Aoniu” ʻi ʻĀmaketone. ʻI he tuʻunga ko ha kakai fāʻūtahá, ʻoku poupouʻi ʻe he kau sevāniti ʻa Sihová ʻa Hono Puleʻanga Faka-Mīsaiá. Ko ia ʻoku nau tokanga maʻu pē ke fakaʻehiʻehi mei hano fakaʻatā ke ngaohi kākaaʻi kinautolu ki ha tuʻunga ʻoku fakafepaki ki he Puleʻanga ko iá. (Fkh. 16:14, 16; 19:11-21) ʻOku mahino kiate kinautolu ʻa e mafatukituki ʻo e lea ko ia ʻa Sīsū ʻo pehē ko hono kau muimui moʻoní ʻoku “ʻikai . . . ʻo māmāni.” ʻOku nau ʻilo ʻoku vavé ni ke mole atu ʻa e māmani motuʻá ni, pea ko e faʻahinga pē ʻoku nau fai moʻoni ʻa e finangalo ʻo e ʻOtuá te nau nofo maʻu ʻo taʻengata.​—1 Sione 2:15-17.

Fetalanoaʻaki ʻo Fakamanatu

● Naʻe fakahaaʻi fēfē ʻe Sīsū ʻa e meʻa ʻoku kau ki he hoko ʻo “ʻikai . . . ʻo māmāni.”?

● Ko e hā ʻokú ne fakahaaʻi ʻa e anga ʻo e fakakaukau ʻa e muʻaki kau Kalisitiané ki he (1) laumālie ʻo e māmaní? (2) kau pule fakaemāmaní pea mo hono totongi ʻo e ngaahi tukuhaú? (3) ngāue fakakautaú?

● ʻI he ngaahi founga fē kuo fakamoʻoniʻi ai ʻe he Kau Fakamoʻoni ʻa Sihová ʻi onopooni ʻa ʻenau tuʻu ʻatā faka-Kalisitiané?

[Fehuʻi ki he Ako]