Vahe 24

ʻOku Aʻusia ʻe he Taumuʻa ʻa Sihová ʻa e Lavameʻa Lāngilangiʻia

1, 2. (a) Ko e hā ʻa e taumuʻa ʻa Sihova ʻo fekauʻaki mo ʻene ngaahi meʻa moʻui maʻu-ʻatamai potó? (e) Ko hai naʻe kau ki he fāmili fāʻūtaha ʻo e kau lotu ki he ʻOtuá? (f) Ko e hā ʻa e fehuʻi fakafoʻituitui ʻoku taau ke tau fakakaukau atu ki ai fekauʻaki mo e meʻá ni?

 KO E taumuʻa poto mo anga-ʻofa ʻa Sihová ke fāʻūtaha ʻa e meʻa moʻui maʻu-ʻatamai poto kotoa pē ʻi he lotu moʻoni pea ke aʻusia ʻe kinautolu kotoa ʻa e tauʻatāina lāngilangiʻia ʻo e fānau ʻa e ʻOtuá. Ko e meʻa foki ia ʻoku holi tōtōivi ki ai ʻa e kau ʻofa kotoa pē ki he māʻoniʻoní.

² Naʻe kamata ʻa hono fakahoko ʻe Sihova ʻa e taumuʻa maʻongoʻongá ni ʻi heʻene kamata ʻa ʻene ngaahi ngāue fakaefakatupú. Ko ʻene ʻuluaki fakatupú ko ha ʻAlo, ʻa e tokotaha ko ia naʻe hoko “ko e Toko Taha ʻa ia ko e ulo atu ʻo Hono langilangi, mo e imisi ʻo ʻEne ʻAfio moʻoni.” (Hep. 1:1-3) Ko e tokotahá ni naʻe laulōtaha, he naʻe fakatupu ia ʻe he ʻOtuá tonu pē. Naʻe fakafou mai ʻiate ia ʻa hono fakatupu ʻo e ngaahi foha kehe​—ʻuluakí, ko e kau ʻāngelo ʻi hēvani, pea ko hono hokó ko e tangata ʻi he māmaní. (Siope 38:7; Luke 3:38) Naʻe hoko ʻa e ngaahi fohá ni kotoa ko e foʻi fāmili fakakātoa pē ʻe taha. Naʻa nau ʻOtua kotoa pē kia Sihova, ko e tokotaha pē ia ke fai ki ai ʻa e lotú. Ko ia pē ʻa e Hau Fakalevelevá. Naʻá ne toe hoko ko ʻenau Tamai anga-ʻofa. ʻOku toe hoko ia ko hoʻo Tamai, pea ko ha taha koe ʻo ʻene fānaú? Ko ha vahaʻangatae mātuʻaki mahuʻinga ē ʻe lava ke hoko!

3. (a) Ko e hā kuo ʻikai ke ʻi ai ai ha taha ʻiate kitautolu naʻe fanauʻi mai pē ko e foha ʻo e ʻOtuá? (e) Ka ko e hā ʻa e tokonaki anga-ʻofa naʻe fai ʻe Sihova maʻá e hako ʻo ʻĀtamá?

³ Ka neongo ia, kuo pau ke tau tokangaʻi lelei ʻa e moʻoniʻi meʻa, ʻi he taimi naʻe tautea ai ʻa ʻetau ʻuluaki ongo mātuʻa  fakaetangatá ke na mate ʻi heʻena hoko ko e ongo angahala loto pē ki aí, naʻe kapusi kinaua mei ʻĪteni pea fakafisingaʻi kinaua ʻe he ʻOtuá. Naʻe ʻikai te na kei hoko ko e konga ʻo e fāmili fakakātoa ʻo Sihová. (Sēn. 3:22-24; fehoanaki mo Teutalōnome 32:4, 5.) Koeʻuhi ko e ngaahi hako kitautolu ʻo e tokotaha angahala ko ʻĀtamá, kuo fanauʻi mai kitautolu kotoa fakataha mo e ngaahi hehema angahalaʻia. Koeʻuhi ko e fānau kitautolu ʻa e ongo mātuʻa naʻe kapusi mei he fāmili ʻo e ʻOtuá, heʻikai malava ke tau pehē ko e ngaahi foha kitautolu ʻo e ʻOtuá ʻo makatuʻunga pē ʻi hono fanauʻi mai kitautolu ko e tangatá. Ka naʻe ʻafioʻi ʻe Sihova ʻe ʻi ai ʻa e niʻihi mei he lotolotonga ʻo e ngaahi hako ʻo ʻĀtamá te nau ʻofa ki he māʻoniʻoní, pea naʻá Ne fai leva ha tokonaki anga-ʻofa ʻa ia ʻe malava ke aʻusia ai ʻe he faʻahingá ni ʻa e tauʻatāina lāngilangiʻia ʻo e fānau ʻa e ʻOtuá.​—Loma 8:20, 21.

Tuʻunga Fakahōifua ʻo ʻIsilelí

4. (a) Naʻe makatuʻunga ʻi he hā ʻa e hoko ʻa e kau ʻIsilelí ko e ngaahi “foha” ʻo e ʻOtuá? (e) Ko e hā naʻe ʻikai ʻuhinga ki ai ʻa e meʻá ni?

⁴ ʻI he meimei taʻu ʻe 2,500 hili ʻa hono fakatupu ʻo ʻĀtamá, naʻe toe fakaaʻu ai ʻe Sihova ki he niʻihi ʻo e faʻahinga ʻo e tangatá ʻa e monū ko hono maʻu ha vahaʻangatae mo ia ʻi he tuʻunga ko hono ngaahi foha. ʻI he fehoanaki mo ʻene fuakava mo ʻĒpalahamé, naʻe fili ai ʻe Sihova ʻa ʻIsileli ke hoko ko ʻene kakai. Ko ia ai, naʻá ne lea kia Felo ʻo ʻIsipité ʻo fekauʻaki mo e kakai ʻIsilelí ʻo ne pehē “ko hoku foha.” (ʻEki. 4:22, 23; Sēn. 12:1, 2) Ki mui mai ai naʻá ne foaki ki ʻIsileli ʻa ʻene Laó ʻi Moʻunga Sainai, ʻo ne fokotuʻu ai ʻa e kakai ko iá ke hoko ko ha puleʻanga pea ngāueʻaki kinautolu ʻo fekauʻaki mo ʻene taumuʻá. ʻI he tuʻunga ko ha puleʻangá, koeʻuhi ko ʻenau hoko ko e “kakai makehe” ʻa Sihová, naʻe toe lave kiate kinautolu ʻo pehē ko e “ngaahi foha” ʻo e ʻOtuá. (Teu. 14:1, 2, NW; ʻAi. 43:1) ʻIkai ngata ai, koeʻuhi ko ʻene ngaahi fakafeangai makehe mo e niʻihi ʻi he puleʻanga ko iá, naʻe toe lave ʻa Sihova kiate kinautolu ko e ngaahi foha. (1 Kal. 22:9, 10) Naʻe makatuʻunga ʻa e tuʻunga ko ʻení ʻi he vahaʻangatae fakaefuakava mo e ʻOtuá. Kaekehe, naʻe ʻikai ʻuhinga ia ʻo pehē naʻa nau aʻusia ʻa e tauʻatāina lāngilangiʻia ʻa ia naʻe maʻu ʻe ʻĀtama ʻi hono tuʻunga ko ha foha ʻo e ʻOtuá. Naʻa nau kei nofo fakapōpula pē ki he angahalá mo e maté.

5. Ko e hā naʻe mole ai mei ʻIsileli ʻa honau tuʻunga makehe ki he ʻOtuá?

 ⁵ Ka neongo ia, ʻi honau tuʻunga ko e ngaahi fohá naʻa nau maʻu ai ha tuʻunga fakahōifua ki he ʻOtuá. Naʻa nau toe maʻu ʻa e fatongia ke ʻapasia ki heʻenau Tamaí pea ke ngāue ʻo fehoanaki mo ʻene taumuʻá. Naʻe fakamamafaʻi ʻe Sīsū ʻa e mahuʻinga ʻo ʻenau fakahoko ʻa e moʻua ko iá​—ʻo ʻikai ko hono taku pē ko e ʻOtuá ko ʻenau Tamai, ka ko hono ‘ʻai ke nau taau’ ke nau hoko ko hono ngaahi foha. (Mt. 5:43-48; Mal. 1:6) Kaekehe, naʻe tō ʻa e kau Siú ʻi honau tuʻunga ko ha puleʻangá mei hono fai ʻa e meʻá ni. Ko ia, ʻi he lolotonga ʻo e taʻu fakaʻosi ʻo e ngāue fakafaifekau ʻa Sīsū ʻi he māmaní, ʻi he talaki ko ia ʻe he kau Siu naʻa nau fekumi ke tāmateʻi ʻa Sīsuú ʻo pehē, “ʻOku taha pē ʻemau tamai, ko e ʻOtua,” naʻe fakahaaʻi fakahangatonu atu ʻe Sīsū ʻo pehē ʻoku hanga ʻe heʻenau ngaahi ngāué pea mo e laumālie naʻa nau fakahaá ʻo fakaʻikaiʻi ʻa e taukaveʻi ko iá. (Sione 8:41, 44, 47) Naʻe fakangata leva ʻe he ʻOtuá ʻa e fuakava ko e Laó ʻi he 33 T.S., pea naʻe fakangata ai mo e makatuʻunga ki he vahaʻangatae makehe naʻe maʻu ʻe ʻIsilelí. Ka, naʻe ʻikai tuku ai ʻe Sihova ʻa hono ʻai ke maʻu mei he lotolotonga ʻo e faʻahinga ʻo e tangatá ha faʻahinga ke ne tali ko hono ngaahi foha.

ʻOku Fakafāʻūtahaʻi ʻe Sihova ʻa ʻEne Kakaí

6. Ko e hā ʻa e “founga puleʻi” naʻe fakamatalaʻi ʻe Paula ʻia ʻEfesō 1:9, 10, pea ko e hā hono taumuʻá?

⁶ Naʻe tohi ʻa e ʻapositolo ko Paulá ki he kau Kalisitiane ʻi ʻEfesoó ʻo fekauʻaki mo e fokotuʻutuʻu ʻa Sihova ki hono fakafāʻūtahaʻi ʻene kakaí​—ʻa e fokotuʻutuʻu ko ia ʻa e ʻOtuá ki he faʻahinga ʻoku ngāueʻi ʻa e tuí ke malava ke nau hoko ko e kau memipa ʻofeina ʻo Hono fāmilí, ʻo pehē: “[Ko e ʻOtua] naʻá ne fakaʻilo mai kiate kitautolu ʻa e fakalilolilo toputapu ʻo hono finangaló. ʻOku fakatatau ia ki heʻene loto-lelei ʻaʻana, ʻa ia naʻá ne taumuʻa ʻiate ia pē ha founga puleʻi [founga hono puleʻi ʻo e fāmilí] ʻi he kakato ʻo e taimi kuo kotofa, koeʻuhi ke toe fakatahatahaʻi ʻa e ngaahi meʻa kotoa pē ʻo fakafou ʻia Kalaisi, ʻa e ngaahi meʻa ʻoku ʻi hēvani mo e ngaahi meʻa ʻi māmani.” (ʻEf. 1:9, 10, NW) Ko e “founga puleʻi” ko ʻení ʻoku fakatefito ia ʻia Sīsū Kalaisi. ʻOku fakafou mai ʻiate ia ʻa hono ʻomai ʻo e faʻahinga ʻo e tangatá ki ha tuʻunga fakahōifua ʻi he  ʻao ʻo e ʻOtuá​—ʻa e niʻihi ʻoku nau maʻu ʻa e ʻamanaki ke ʻi hēvaní; mo e niʻihi kehe ke ʻi māmaní​—ke nau ngāue ʻi he fāʻūtaha fakataha mo e ngaahi foha fakaeʻāngelo ʻo e ʻOtuá ʻa ia kuo fakamoʻoniʻi ʻoku nau mateaki kia Sihová.

7. Ko e hā “ʻa e ngaahi meʻa ʻoku ʻi hēvani,” pea ko e hā hono ʻuhinga kiate kinautolu ʻa hono fakatahaʻi kinautolu?

⁷ Ko e ʻuluaki meʻá, naʻe kamata ʻi he Penitekosi ʻo e 33 T.S. ʻa hono fai ʻa e tokanga ki he “ngaahi meʻa ʻoku ʻi hēvani,” ʻa ia ko e faʻahinga te nau kaungāʻea mo Kalaisi ʻi he Puleʻanga fakahēvaní. Naʻe lau kinautolu ʻe he ʻOtuá ʻoku nau māʻoniʻoni ʻo makatuʻunga ʻi heʻenau tui ki he mahuʻinga ʻo e feilaulau ʻa Sīsuú. (Loma 5:1, 2) Pea naʻa nau hoko leva ʻo “fanauʻi foʻou,” pe hoko ko e ngaahi foha ʻo e ʻOtuá ʻoku maʻu ʻa e ʻamanaki ki he moʻui fakahēvani. (Sione 3:3; 1:12, 13) Naʻe fai ʻe he ʻOtuá ha fuakava foʻou mo e faʻahingá ni ʻi honau tuʻunga ko ha puleʻanga fakalaumālie. ʻI he faai mai ʻa e taimí, naʻe kau fakatouʻosi ki ai ʻa e kakai Siú mo e kakai Senitailé, pea ko hono fakakātoa ʻo e faʻahingá ni ko e toko 144,000.​—Kal. 3:26-29; Fkh. 14:1.

8. ʻOku fēfē ʻa e vahaʻangatae ʻo e Tamaí pea mo e kau ʻea ki he Puleʻangá ʻi hono fakahoa atu ia ki hono vahaʻangatae mo e kau Siú ʻi he malumalu ʻo e Lao ʻia Mōsesé?

⁸ Neongo ʻa hono kei maʻu ʻa e kakano taʻehaohaoá, ʻoku aʻusia ʻe he toenga ʻo e kau ʻea ko ʻeni ki he Puleʻanga fakahēvaní ha vahaʻangatae mātuʻaki mahuʻinga mo fekoekoeʻi pea mo e Tamaí. Naʻe tohi ʻa Paula ʻo fekauʻaki mo e meʻá ni: “Pea koeʻuhiā ko e ngaahi foha ʻa kimoutolu, ko ia naʻe fekau atu ʻe he ʻOtua ki hotau loto ʻa e Laumalie ʻo hono ʻAlo, ʻoku ne kalanga, Apa, Tamai. Ko ia ʻoku ʻikai te ke kei ko ha popula, ka ko ha foha: pea kapau ko ha foha, pea ta ko ha ʻea, ko e meʻa ʻi he ʻOtua.” (Kal. 4:6, 7) Ko e kupuʻi lea faka-Alamea ko ia ko e “Apa” ʻoku ʻuhinga ki he “tamai,” ka ko ha founga fakalea fakatupu ʻofeina​—ko e faʻahinga lea ʻoku ngāueʻaki ʻe ha kiʻi tama ki heʻene tamai. ʻOku makatuʻunga ʻi he tuʻunga māʻolunga ange ʻo e feilaulau ʻa Sīsuú pea mo e ʻofa maʻataʻatā ʻa e ʻOtuá ʻa hono maʻu ai ʻe he kau Kalisitiane pani ʻe he laumālié ni ha vahaʻangatae mo e ʻOtuá ʻa ia ʻoku fekoekoeʻi lahi ange ia mei ha faʻahinga vahaʻangatae naʻe malava ke maʻu ʻe he faʻahinga taʻehaohaoa ʻo e tangatá ʻi he malumalu ʻo e Laó. Kaekehe, ko e meʻa ʻoku ʻi he kahaʻu kiate kinautolú ʻoku toe fakaofo lahi ange ia.

9. ʻOku ʻuhinga ki he hā ʻa e pehē te nau toki maʻu ai ʻa e tuʻunga kakato ko e ngaahi foha?

 ⁹ Kapau te nau tauhi ʻenau angatonú ʻo aʻu ki he mate, te nau toki maʻu ai ʻa e tuʻunga kakato ko e ngaahi fohá ʻi hono fokotuʻu hake kinautolu ki he moʻui taʻe faʻa mate ʻi hēvani. Te nau monūʻia ai ke fai fāʻūtaha ʻa e tauhi ʻi he ʻi ai tonu ʻa Sihova ko e ʻOtuá. Ko ha kiʻi tokosiʻi pē ʻo e ngaahi foha ko ʻeni ʻo e ʻOtuá ʻoku nau kei ʻi he māmaní.​—Loma 8:14, 23; 1 Sione 3:2, 3 [1 Sione 3:1, 2 , PM].

Ko Hono Fakatahatahaʻi ʻa e “Ngaahi Meʻa ʻi Māmani”

10. (a) Ko e hā ʻa e “ngaahi meʻa ʻi māmani,” pea naʻe talu mei ʻanefē ʻa hono fakatahatahaʻi kinautolu ke fāʻūtaha ʻi he lotu? (e) Ko e hā honau fekāingaʻaki mo Sihová?

¹⁰ Ko e “founga puleʻi” tatau pē ʻa ia ʻokú ne ʻai ke malava ʻa e faʻahinga ʻo e tangatá ke fakatahaʻi ki he fāmili ʻo e ʻOtuá pea maʻu ʻa e ʻamanaki ki he moʻui fakahēvaní ʻokú ne toe tataki ʻa e tokanga ki he “ngaahi meʻa ʻi māmani.” ʻOku tautefito talu mei he 1935 T.S. ʻa hono fakatahaʻi ʻo e faʻahinga ʻoku nau tui ki he feilaulau ʻa Kalaisí pea ʻoku nau maʻu ʻa e ʻamanaki ke moʻui taʻengata ʻi he māmaní. ʻOku nau ngāue uouangataha mo e toenga ʻo e kau paní ʻi hono fakalāngilangiʻi ʻa e huafa ʻo Sihová pea mo hono hakeakiʻi ʻa e lotu kiate iá. (Sēf. 3:9; ʻAi. 2:2, 3) ʻI he ongoʻi ʻapasia loloto ʻa e faʻahingá ni, ʻoku nau toe ui kia Sihova ko e “Tamai,” ʻo lāuʻilo ko ia ʻa e Matavai ʻo e moʻuí, pea ʻoku nau feinga tōtōivi ke tapua atu meiate kinautolu ʻa hono ngaahi ʻulungaangá ʻo hangē ko ia ʻokú ne ʻamanekina ke fai ange ʻe kinautolu ko hono ngaahi fohá. ʻOku nau maʻu ha tuʻunga fakahōifua ʻi hono ʻaó ʻo fakatuʻunga ʻi heʻenau tui ki he taʻataʻa ne lilingi ʻo Sīsuú. (Mt. 6:9; Fkh. 7:9, 14) Ka ʻoku nau ʻilo ko e fiefia ʻi hono tali kakato ʻe he ʻOtuá ko ʻene fānau ʻa kinautolú ʻoku kei tuʻu ia mei he kahaʻú.

11. (a) Ko e hā ʻa e talaʻofa ʻoku tuku tauhi mai ʻia Loma 8:19-21 ki he faʻahinga ʻo e tangatá? (e) Ko e hā ʻa e “fakaeʻa ʻo e ngaahi foha ʻo e ʻOtua” ʻoku nau fakatatali loto-vēkeveke ki aí?

¹¹ Hangē ko ia ʻoku fakahā ʻia Loma 8:19-21, ʻoku nau fakatatali loto-vēkeveke ki he “fakaeʻa ʻo e ngaahi foha ʻo e ʻOtua,” koeʻuhi ʻi he hili iá ʻe hoko mai leva ʻa e taimi ki he faʻahinga ko ʻeni ʻo e tangatá ke “fakaʻataʻatā mei [he] popula ki he ʻauha.” ʻE hoko ʻa e “fakaeʻa” ko iá ʻi he taimi ʻe sio ai ʻa e  faʻahinga ʻo e tangatá ʻi heni ʻi he māmaní kuo kamata ʻa e ngaahi foha ʻo e ʻOtuá ʻa ia kuo pani ʻaki ʻa e laumālié pea kuo aʻusia honau pale fakahēvaní, ke nau ngāue fakataha mo honau ʻEiki kuo fakalāngilangiʻi, ko Sīsū Kalaisi. ʻE hā ʻa e meʻá ni ʻi hono fakaʻauha ʻo e ngaahi meʻa ʻo e tuʻu fulikivanu fakakātoa ko ʻení, pea hoko mai ai ʻa e ngaahi tāpuaki ʻo e Pule Taʻu Taha Afe ʻa Kalaisí ʻa ia ʻe kaungātuʻi mo taulaʻeiki ai mo Kalaisi ʻa e faʻahinga ko ʻeni ko e “ngaahi foha ʻo e ʻOtua.”​—Fkh. 2:26, 27; 20:6.

12. ʻI he hili ʻa e fuʻu mamahi lahí, ko e hā ʻa e hiva fakamālō ʻe kau ki ai ʻa e ngaahi foha ikuna ʻo e ʻOtuá kuo pani ʻaki ʻa e laumālié, pea ʻoku ʻuhinga ia ki he hā?

¹² He toki meʻa fakafiefia moʻoni ia ʻe hoko ʻi he taimi ʻe mahili atu ai ʻa e fuʻu mamahi lahí pea ʻe kau fakataha mai ʻa e ngaahi foha ʻo e ʻOtuá kuo fakatahaʻi mo Kalaisí ʻi he fakamālō ki he ʻOtuá, ʻo kalanga fiefia: “ʻOku lahi mo fakaofo hoʻo ngāue, ʻa e ʻAfiona ko e ʻOtua Aoniu; ʻoku totonu mo moʻoni ho ngaahi ʻalunga, ʻa koe ko e Tuʻi ʻo e ngaahi Kuonga. Ko hai ʻe ʻikai ʻapasia ki he ʻAfiona, mo fakahikihikiʻi ho huafa? He ko koe toko taha ʻoku maʻoniʻoni: Pea ʻe haʻu kotoa pē ʻa e ngaahi kakai, ʻo punou ʻi ho ʻao; koeʻuhi kuo fakaeʻa hoʻo maʻoniʻoni.” (Fkh. 15:3, 4) ʻIo, ʻe fāʻūtaha ʻi he lotu ki he ʻOtua moʻoní ʻa e kotoa ʻo e faʻahinga ʻo e tangatá, ʻa e faʻahinga kuo toʻo mei he ngaahi puleʻanga kotoa pē ki muʻá. Naʻa mo e faʻahinga ʻoku nau ʻi he ngaahi faʻitoká ʻe fokotuʻu mai kinautolu pea ʻe foaki kiate kinautolu ʻa e faingamālie ke nau kau ki hono fakamālōʻia ʻo Sihová.

13. Ko e hā ʻa e tauʻatāina fakaofo ʻe aʻusia leva ʻe he kau hao moʻui atu mei he fuʻu mamahi lahí?

¹³ ʻE ʻikai ke kei hoko ʻa Sētane ko e Tēvoló ko e “ʻotua ʻo e tuʻu ko eni.” ʻE ʻikai ke kei fiemaʻu ke fekuki ʻa e kau lotu kia Sihova ʻi heni ʻi he māmaní pea mo ʻene tākiekina fakalieliá. (2 Kol.2Ko 4:4; Fkh. 20:1-3) ʻE ʻikai ke toe ʻi ai ha lotu loi ke ne talahalaʻi ʻa hotau ʻOtua anga-ʻofá pea hoko ko ha tākiekina fakatupu mavahevahe ʻi he faʻahinga ʻo e tangatá. ʻE ʻikai ke toe aʻusia ʻe he kau sevāniti ʻa e ʻOtua moʻoní ha fakamaau taʻetotonu mo ngāuekoviʻaki kinautolu ʻe ha kau tangata ngāue fakapuleʻanga ke maʻu ai haʻanau lelei. Ko ha tauʻatāina fakaofo lahi ē ʻe aʻusia ai ʻe he kau hao moʻui atu mei he fuʻu mamahi lahí!

14. ʻI he founga fē te nau ʻataʻatā ai mei he angahalá pea mo hono ngaahi nunuʻá?

 ¹⁴ ʻE hanga ʻe Sīsū Kalaisi ʻi hono tuʻunga ko e “Lami ʻa e ʻOtua, ʻa ia ʻoku ne ʻave ʻa e angahala ʻa māmani,” ʻo ngāueʻaki ʻa e mahuʻinga ʻo ʻene feilaulaú ke ne tāmateʻi ʻaki ʻa e ngaahi angahala ʻi he kuo hilí ʻa e faʻahinga ʻo e tangatá. (Sione 1:29) ʻI he ʻi māmani ʻa Sīsuú, ʻi he taimi naʻá ne fakahā atu ai kuo fakamolemoleʻi ha ngaahi angahala ʻa ha tokotaha, naʻá ne toe fakamoʻui ʻa e tokotaha ko ia naʻe fakamolemoleʻí koeʻuhi ke fakamoʻoniʻi ia. (Mt. 9:1-7) ʻI he founga tatau pē, te ne fai mei hēvani ha fakamoʻui fakaemana ʻo e kuí, ʻa e tulí, ʻa e noá, ʻa e faʻahinga ʻoku konga honau sinó, ʻa e faʻahinga ʻoku faingataʻaʻia fakaeʻatamai pea mo ha faʻahinga ʻoku maʻu ʻe ha ngaahi mahaki kehe. ʻE faifai atu pē, fakafou ʻi honau oʻi fakamātoato kinautolu ki he ngaahi founga māʻoniʻoni ʻa e ʻOtuá, ko e faʻahinga kotoa ko ia ʻoku loto-lelei mo talangofuá ʻe tāmateʻi fakaʻaufuli ʻa e “lao angahalaʻia” ʻiate kinautolú koeʻuhi kae hoko ʻa ʻenau ngaahi ngāue kotoa pē mo ʻenau ngaahi fakakaukaú pea mo e ngaahi holi ʻo honau lotó ʻo fakatupu fakafiemālie fakatouʻosi kiate kinautolu tonu pea ki he ʻOtuá. (Loma 7:21-23; fehoanaki mo ʻAisea 25:7, 8 mo Fakahā 21:3, 4.) Ki muʻa pea toki ngata ʻa e Afeʻi Taʻú, ʻe ʻosi tokoniʻi kinautolu ia ke nau maʻu ʻa e tuʻunga haohaoa kakato ʻo e tangatá. Te nau hoko ʻo ʻatā fakaʻaufuli mei he angahalá pea mo hono ngaahi nunuʻa fakatupu loto-mamahi kotoa pē. ʻE malama totonu mai meiate kinautolu ʻa e ‘ʻīmisi mo e tatau ʻo e ʻOtuá’ ʻi he lotolotonga ʻo ha Palataisi fakaemāmani te ne kātoi ʻa e foʻi kolopé fakakātoa.​—Sēn. 1:26.

15. ʻI he ngataʻanga ʻo e Afeʻi Taʻú, ko e hā ʻa e ngāue ʻe fai ʻe Kalaisí, pea ko e hā hono taumuʻá?

¹⁵ ʻI he ʻosi ʻa hono fakafoki ʻe Kalaisi ʻa e faʻahinga ʻo e tangatá ki he tuʻunga haohaoá, te ne toki fakafoki leva ki he Tamaí ʻa e mafai naʻe tuku ange kiate ia ki hono fai ʻo e ngāué ni. Hangē ko ia naʻe kikiteʻi ʻia 1 Kolinitō 15:28: “Ka ʻoka lava ʻa e tuku ki lalo ʻo e meʻa kotoa pe kiate ia [ko e ʻAlo], pea ʻe toki tuku ki lalo, ʻa e ʻAlo ʻe ia kiate ia naʻa ne fai ʻa e tuku ki lalo ʻo e meʻa kotoa pe kiate ia; koeʻuhiā ke tāfataha ʻa e ʻOtua ʻi he meʻa kotoa pe.”

16. Ko e hā ʻe tuku atu ki ai ʻa e faʻahinga ʻo e tangatá kuo fakahaohaoaʻí ʻi he taimi ko iá, pea ko e hā hono ʻuhingá?

¹⁶ ʻI he taimi ko iá ʻe foaki leva ʻa e faingamālie ki he  faʻahinga ʻo e tangatá kuo fakahaohaoaʻí ke nau fakahāhā ai ko ʻenau fili taʻealaliliú ke tauhi ʻa e ʻOtua moʻui mo moʻoni pē tahá ʻo taʻengata. Ko ia ai, ki muʻa ke ohi kinautolu ko hono ngaahi fohá ʻo fakafou ʻia Sīsū Kalaisi, ʻe tuku atu ʻe Sihova ʻa e faʻahinga kotoa ko ʻeni ʻo e tangatá kuo fakahaohaoaʻí ki ha ʻahiʻahi fakaʻosi mo fakaʻāuliliki. ʻE tuku ange mai ʻa Sētane mo ʻene kau tēmenioó mei he luo taʻe hano takelé. ʻE ʻikai uesia tuʻuloa ʻe he meʻá ni ʻa e faʻahinga ʻoku nau ʻofa moʻoni kia Sihová. Ka ko ha taha pē te ne taʻemateaki ʻo fakaʻatā ia ki he tākiekina ke ne talangataʻa kia Sihova ʻe fakaʻauha taʻengata ia fakataha mo e tupuʻi angatuʻu ko ʻení mo ʻene kau tēmenioó.​—Fkh. 20:7-10.

17. ʻI hono fakahoko ʻo e taumuʻa ʻa Sihová, ko e hā ʻa e tuʻunga ʻe toe ʻi ai ʻi he lotolotonga ʻo ʻene meʻa moʻui maʻu-ʻatamai poto kotoa pē?

¹⁷ ʻE hanga leva ʻe Sihova fakafou ʻia Kalaisi ʻo ohi ko hono ngaahi foha ʻa e faʻahinga kotoa ʻo e tangatá kuo fakahaohaoaʻí ʻa ia kuo nau hao mei he ʻahiʻahi fakapapau mo fakaʻosí. Te nau toki maʻu leva ʻa e tuʻunga kakato ʻo e “tauʻataina fakalangi ʻa e fanau ʻa e ʻOtua.” (Loma 8:21) Te nau hoko leva ko ha konga ʻo e fāmili fāʻūtaha mo fakakātoa ʻo e ʻOtuá, pea ʻe hoko ʻa Sihova ko e ʻOtua pē taha ʻo taʻengata kiate kinautolu kotoa pē, ko e Hau Fakaleveleva, pea ko ʻenau Tamai anga-ʻofa. Ko ia ʻe toe hoko leva ʻa e meʻa moʻui maʻu-ʻatamai poto kotoa pē ʻa Sihova ʻi hēvani pea ʻi māmaní, ʻo nau toe fāʻūtaha ʻi he lotu ki he ʻOtua moʻoni pē taha.

Fetalanoaʻaki ʻo Fakamanatu

● Ki muʻa ʻi he angatuʻu ʻi ʻĪtení, ko e hā ʻa e fekāingaʻaki naʻe maʻu ʻe he kau lotu kotoa pē kia Sihová?

● Ko e hā ʻa e fatongia ʻoku ʻi he faʻahinga ko e ngaahi foha ʻo e ʻOtuá?

● Ko hai ʻi he ʻahó ni ko e ngaahi foha ʻo e ʻOtuá? Ko toe hai ʻe hoko ko e fānau ʻa e ʻOtuá, pea ko e hā ʻa e kaunga ʻa e meʻá ni ki he taumuʻa ʻa Sihova ʻo kau ki he lotu fāʻūtahá?

[Fehuʻi ki he Ako]