Vahe 18

ʻOku Fiemaʻu ke Tau Anga-Līʻoa Faka-ʻOtua ʻi ʻApi

1. (a) ʻI he hili ʻa e ako ʻo kau ki he ngaahi tuʻunga ʻa Sihova ʻo fekauʻaki mo e nofo malí, ko e hā ʻa e ngaahi liliu kuo fai ʻe he faʻahinga tokolahi? (e) Ka ko e toe hā ʻa e meʻa lahi ange ʻoku fekauʻaki mo e moʻui fakafāmili Kalisitiané?

 ʻI HE ngaahi moʻoni fakaloto-māfana naʻa tau ako ki ai ʻi he lolotonga ʻo ʻetau ako Tohitapu ki muʻá naʻe kau ai ʻa e ngaahi moʻoni felāveʻi mo e nofo malí pea mo e moʻui fakafāmilí. Naʻa tau hoko ʻo ʻiloʻi ai ko Sihova ko e Tupuʻanga ia ʻo e nofo malí pea naʻa tau ʻilo ai kuó ne tokonaki mai ʻi he Tohitapú ʻa e tataki mātuʻaki lelei taha ki he ngaahi fāmilí. Ko hono ola ʻo e tataki ko iá, kuo tokolahi ai ʻa e faʻahinga ʻoku taau ke fakaongoongoleleiʻi koeʻuhi kuo nau siʻaki ʻa e founga moʻui ʻo e fehokotaki fakasino taʻetaaú pea kuo lēsisita totonu ʻenau nofo malí. Ka ʻoku kau ki he moʻui fakafāmili Kalisitiané ʻa e meʻa lahi ange ia. ʻOku toe kau foki ki ai ʻa ʻetau fakakaukau atu ki he tuʻuloa ʻo e haʻi ʻo e nofo malí, ko hono fakahoko ʻo hotau ngaahi fatongia ʻi he fāmilí, pea mo e anga ʻo ʻetau feangai mo e ngaahi memipa kehe ʻo e fāmilí.​—ʻEf. 5:33–6:4.

2. (a) ʻOku ngāueʻaki ʻi ʻapi ʻe he tokotaha kotoa pē ʻa e meʻa ʻokú ne ʻilo mei he Tohitapú? (e) ʻI he founga fē ʻoku fakamamafaʻi ai ʻe Sīsū mo Paula ʻa e mahuʻinga ʻo hono fai ʻa e meʻa ko iá?

² ʻOku laui miliona ʻa e kakai ʻoku nau ʻilo ʻa e meʻa ʻoku leaʻaki ʻe he Tohitapú ʻo kau ki he ngaahi meʻá ni. Ka ʻi he taimi ʻoku nau fehangahangai ai mo e ngaahi palopalema ʻi he ʻapí tonu, ʻoku ʻikai te nau ngāueʻaki ia. Fēfē kitautolu? ʻOku pau ʻoku ʻikai ke ʻi ai ha taha ʻo kitautolu te ne fie hangē ko e faʻahinga ko ia naʻe fakahalaiaʻi ʻe Sīsū koeʻuhi ko ʻenau kalo mei he fekau ʻa e ʻOtuá ʻa ia naʻe fiemaʻu ai ki he fānaú ke nau fakaʻapaʻapa ki heʻenau ngaahi mātuʻá, ʻo nau  fakakaukau ʻoku feʻunga pē ʻa e fakangalileleiʻaki ʻa e anga-līʻoa fakalotú. (Mt. 15:4-9) ʻOku ʻikai te tau fie hoko ko e faʻahinga ʻoku nau maʻu ha founga ʻo e anga-līʻoa fakaʻotuá ka ʻoku ʻikai te nau ngāueʻaki ia ‘ki honau fāmilí tonu.’ Ka, ʻoku totonu ke tau saiʻia ke fakahāhā ʻa e anga-līʻoa fakaʻotua moʻoní, ʻa ia “ko e meʻa fakakoloa ʻaupito.”​—1 Tīm. 5:4; 6:6; 2 Tīm. 3:5.

ʻE Tuʻuloa ʻa e Nofo Malí ʻo Fuoloa Fēfē?

3. (a) Ko e hā ʻoku hoko ki he ngaahi nofo mali lahi, ka ko e hā ʻoku totonu ke tau fakapapauʻi ke faí? (e) Ngāueʻaki hoʻo Tohitapú ke tali ʻa e ngaahi fehuʻi ʻoku fakahokohoko ʻi ʻolunga ʻo fekauʻaki mo e tuʻuloa ʻa e nofo malí.

³ ʻOku fakamoʻoniʻi ʻo toe lahi ange, ʻoku mātuʻaki pelepelengesi ʻa e ngaahi haʻi ʻo e nofo malí. ʻOku ʻi ai ʻa e ngaahi hoa mali ʻe niʻihi kuo nau nofo fakataha ʻi ha taʻu ʻe 20, 30 pe 40 ka ʻoku nau fili he taimí ni ke kamata ha “moʻui foʻou” mo ha toe tokotaha kehe. Pea ʻoku ʻikai ngali kehe ke fanongo ʻo kau ki he ngaahi hoa mali kei talavou kuo nau māvae ʻi he hili pē ha ngaahi māhina siʻi ʻo e nofo malí. Neongo pe ko e hā ʻoku fai ʻe he niʻihi kehé, ʻi hotau tuʻunga ko e kau lotu ʻa Sihová ʻoku totonu ke tau maʻu ʻa e holi ke fakahōifuaʻi ʻa e ʻOtuá. Ko e hā ʻa e lau ʻa ʻene Folofolá ʻo fekauʻaki mo e meʻá ni?

 ʻI he mali ʻa ha tangata mo ha fefine, ko e hā hono fuoloa ʻoku totonu ke na ʻamanekina ke na nofo fakataha aí? (Loma 7:2, 3; Mk. 10:6-9)

 Ko e hā ʻa e makatuʻunga pē ʻe taha ki he vete malí ʻoku ngofua ʻi he ʻao ʻo e ʻOtuá? (Mt. 19:3-9; 5:31, 32)

 ʻOku mālohi fēfē ʻa e ongoʻi ʻa Sihova ʻo fekauʻaki mo e ngaahi vete mali ko ia ʻoku ʻikai fakaʻatā ʻe heʻene Folofolá? (Mal. 2:13-16)

 ʻOku poupouʻi ʻe he Tohitapú ko e māvaé ko ha founga ia ke fakaleleiʻi ai ʻa e ngaahi palopalema fakaemalí? (1 Kol.1Ko 7:10-13)

4. Neongo ʻa e ʻalunga fakaeonopooní, ko e hā ʻoku tolonga ai ʻa e ngaahi nofo mali ʻe niʻihi?

⁴ Ko e hā ʻoku tolonga ai ʻa e ngaahi nofo mali ia ʻe niʻihi, ka ko e nofo mali ia ʻe niʻihi​—naʻa mo e ʻi he lotolotonga ʻo e faʻahinga ʻoku nau taukaveʻi ko e kau Kalisitiané​—ʻoku motuhia ia? ʻOku faʻa hoko ko ha meʻa tefito ʻa e tatali ke toki mali kaeʻoua kuo fakatou matuʻotuʻa ʻa e ongo meʻá. ʻOku toe mahuʻinga ʻa hono kumi ha hoa ʻokú ne mahuʻingaʻia ʻi he  ngaahi meʻa tatau pē mo kita pea ʻoku malava ke fetalanoaʻaki tauʻatāina mo ia ki ha ngaahi meʻa. Ka ko e meʻa ʻoku mahuʻinga angé ke hoko ko ha tokotaha ʻoku anga-līʻoa fakaʻotua moʻoní. Kapau ʻoku ʻofa moʻoni ha taha kia Sihova pea tui pau ko ʻEne ngaahi foungá ʻoku totonú, tā ʻe ʻi ai leva ha makatuʻunga lelei ki hono fakaleleiʻi ha ngaahi palopalema ʻe malanga hake. (Sāme 119:97, 104; Pal. 22:19) ʻE ʻikai fakavaivaiʻi ʻa e nofo mali ʻa ha tokotaha pehē ʻe he fakakaukau ko ia ʻoku pehē, kapau ʻe ʻikai ke lavameʻa ʻa e nofo malí, ʻe malava leva ke ne māvae pe vete mali. ʻE ʻikai te ne ngāueʻaki ʻa e ngaahi tō nounou ʻa hono hoá ko ha kalofanga ia ke ne kalo ai mei hono ngaahi fatongia ʻoʻoná. Ka, te ne ako ke fekuki mo e ngaahi palopalema ʻo e moʻuí pea kumi ki ha ngaahi fakaleleiʻanga ʻe ala ngāueʻakí.

5. (a) Ko e hā ʻa e kaunga ki he meʻá ni ʻa e ʻofa-mateaki kia Sihová? (e) Naʻa mo e taimi ʻoku fetaulaki ai mo e faingataʻa lahí, ko e hā ʻa e ngaahi ʻaonga ʻoku malava ke hoko mai mei heʻete piki maʻu ki he ngaahi tuʻunga ʻa Sihová?

⁵ ʻOku tau ʻilo lelei ʻoku taukaveʻi ʻe he Tēvoló ʻo pehē ʻi heʻetau aʻusia ha faingataʻaʻia fakaekita te tau siʻaki leva ʻa e ngaahi founga ʻa Sihová pea te tau fakakaukau leva ʻo pehē ʻoku lelei ange ke tau fili pē ʻiate kitautolu ʻa e meʻa ʻoku leleí pea mo e meʻa ʻoku koví. Ka ʻoku ʻikai ke pehē ʻa e faʻahinga ʻoku nau ʻofa-mateaki kia Sihová. (Siope 2:4, 5; Pal. 27:11) Ko e tokolahi taha ʻo e Kau Fakamoʻoni ʻa Sihová ʻa ia kuo nau aʻusia ʻa e fakatanga mei honau hoa mali taʻetuí kuo ʻikai te nau liʻaki ʻenau fuakava nofo malí. (Mt. 5:37) ʻOku ʻi ai ʻa e niʻihi, ʻi he hili ha ngaahi taʻu, kuo nau maʻu ʻa e fiefia ʻi he kau mai ʻa honau hoa malí ki hono tauhi ʻa Sihová. (1 Kol.1Ko 7:16; 1 Pita 3:1, 2) Pea ko e niʻihi kehe, ʻa ia ʻoku ʻikai hā mei honau hoa malí ha fakaʻilonga ʻo e liliu pe kuo liʻaki kinautolu ʻe honau hoa malí koeʻuhi ko ʻenau piki maʻu ki heʻenau tuí​—ʻoku toe ʻilo ʻe he faʻahingá ni kuo tāpuakiʻi lahi kinautolu ʻi heʻenau piki maʻu ki he ngaahi tuʻunga ʻa Sihová. ʻI he founga fē? Kuo nau ako mei he tuʻunga ʻoku nau ʻi aí ke nau ʻunu ofi ange kia Sihova. Kuo nau ako ke fakahāhā ʻa e ngaahi ʻulungaanga fakaʻotuá neongo ʻenau faingataʻaʻiá. Ko e faʻahinga eni ʻa ia ʻoku hā mei heʻenau moʻuí ʻa e fakamoʻoni ʻo kau ki he mālohi ʻo e anga-līʻoa fakaʻotuá.​—Sāme 55:22; Sēm. 1:2-4; 2 Pita 1:5, 6.

 Taki Taha Fai ʻEne Tafaʻaki

6. Ko e hā ʻa e fokotuʻutuʻu kuo pau ke tau tokaʻí kae lavameʻa ʻa e nofo malí?

⁶ Ko hono moʻoní, ʻoku toe lahi ange ʻa e meʻa ʻoku fiemaʻú ʻi he nofo fakataha pē kae maʻu ha nofo mali lavameʻa moʻoni. Ko ha fiemaʻu tefito ke tokaʻi ʻe he mēmipa taki taha ʻo e fāmilí ʻa e fokotuʻutuʻu ʻa Sihova ʻo fekauʻaki mo e tuʻunga-ʻulú. ʻOku tokoni eni ki he maau lelei mo e ongoʻi ʻo e maluʻanga ʻi he ʻapí.​—1 Kol.1Ko 11:3; Tai. 2:4, 5; Pal. 1:8, 9; 31:10, 28.

7. ʻOku totonu ke fēfē ʻa hono ngāueʻaki ʻa e tuʻunga-ʻulu ʻi he fāmilí?

⁷ ʻOku totonu ke fēfē ʻa hono ngāueʻi ʻa e tuʻunga-ʻulu ko iá? ʻI ha founga ʻe fakahāhā ai ʻa e ngaahi ʻulungaanga ʻo Sīsū Kalaisí. ʻOku tuʻumaʻu ʻa Sīsū ki hono poupouʻi ʻa e ngaahi founga ʻa Sihová; ʻokú ne ʻofa ki he māʻoniʻoní kae fehiʻa ki he maumau laó. (Hep. 1:8, 9) ʻOkú ne toe ʻofa loloto ki heʻene fakatahaʻangá, ʻo tokonaki ʻa e tataki ʻoku fiemaʻu ki aí pea tokanga ki ai. ʻOku ʻikai te ne loto-mahikihiki mo anga-taʻefakaʻatuʻi ka ʻoku “agavaivai mo agamalu,” pea ko e faʻahinga ʻoku ʻi he malumalu ʻo hono tuʻunga-ʻulú ʻoku ‘nau ʻilo ai ae fiemalie ki honau laumalie.’ (Mt. 11:28, 29, PM; ʻEf. 5:25-33) ʻI he feangai pehē ʻa ha husepāniti mo tamai ki hono fāmilí, ʻoku hā mahino ai ʻokú ne fakamoʻulaloaʻi ia kia Kalaisi, ʻa ia naʻá ne fokotuʻu mai ʻa e faʻifaʻitakiʻanga haohaoa ʻi he anga-līʻoa fakaʻotuá. Ko hono moʻoní, ʻoku toe totonu ki he ngaahi faʻē Kalisitiané ke nau fakahāhā ʻa e ngaahi ʻulungaanga tatau ʻi he feangai mo ʻenau fānaú.

8. (a) ʻI he ngaahi ʻapi ʻe niʻihi, ko e hā ʻoku hā ngalingali ai ʻoku ʻikai ke maʻu ʻa e ngaahi ola lelei ʻoku fiemaʻú ʻi hono ngāueʻaki ʻa e ngaahi founga faka-Kalisitiané? (e) Ko e hā ʻoku totonu ke tau fai ʻo kapau ʻoku tau fehangahangai mo ha tuʻunga pehē?

⁸ Kaekehe, ʻe malanga hake nai ha ngaahi palopalema koeʻuhi ko e tuʻunga taʻehaohaoa ʻa e faʻahinga ʻo e tangatá. Kuo ʻosi hoko nai ʻo tongiloto loloto ʻi ha niʻihi ʻa e loto-fisiʻia ki he tataki mei he niʻihi kehé ki muʻa ia pea naʻe toki kamata ke ngāueʻaki ʻe ha taha ʻi he fāmilí ʻa e ngaahi tefitoʻi moʻoni ʻa e Tohitapú. ʻOku hā ngalingali nai ʻe ʻikai ke ʻi ai ha ola ʻo ha ngaahi kole anga-ʻofa pea mo e anga-lelei. ʻOku tau ʻilo ʻoku pehē ʻe he Tohitapú ke tuku atu ʻa e “lili mo e ʻita mo e feʻiohoʻaki mo e lauʻikovi.” (ʻEf. 4:31) Ka ko e hā ʻoku totonu ke faí ʻo kapau ʻoku hā ngalingali ʻoku ʻikai ke toe ʻaonga ha  meʻa kehe ki he kakai ʻe niʻihi? Ko e hā ʻa e meʻa naʻe fai ʻe Sīsū ʻi he taimi naʻá ne tofanga ai ʻi ha faingataʻa mamafa? Naʻe ʻikai te ne faʻifaʻitaki ki he faʻahinga naʻa nau fai ʻa e fakamanamaná mo e lea koví. Ka, naʻá ne tuku ʻe ia ia ki heʻene Tamaí, ʻo falala kiate ia. (1 Pita 2:22, 23) ʻOku pehē pē, kapau ʻoku malanga hake ʻi ʻapi ha ngaahi tuʻunga faingataʻa pehē, ʻoku tau fakahā ʻa e anga-līʻoa fakaʻotuá ʻi heʻetau hanga kia Sihova, ʻo lotu ʻo kole ʻene tokoní, kae ʻikai ke muimui ki he ngaahi founga ʻo e māmaní.​—Pal. 3:5-7.

9. ʻI he lelei ange ke ʻoua ʻe faʻa lau melé, ko e hā ʻa e ngaahi founga kuo ako ʻe he ngaahi husepāniti Kalisitiane tokolahi ke ngāueʻakí?

⁹ ʻOku ʻikai ke hoko vave maʻu pē ʻa e ngaahi liliu, ka ʻoku ʻaonga moʻoni ʻa e akonaki ʻa e Tohitapú. Ko e ngaahi husepāniti tokolahi ʻa ia naʻa nau faʻa lāunga lahi ʻo fekauʻaki mo e ngaahi hala ʻa honau uaifí kuo nau ʻilo naʻe kamata ʻa hono fakaleleiʻi ʻo e meʻá ni ʻi he taimi naʻa nau maʻu ai ʻa e mahino lahi ange ki he ngaahi feangai ʻa Kalaisi mo ʻene fakatahaʻangá. ʻOku ʻikai ke fokotuʻu ʻaki ʻa e fakatahaʻanga ko iá ha faʻahinga haohaoa ʻo e tangatá. Ka ʻoku ʻofa ʻa Sīsū ki he fakatahaʻangá, ʻo ne fokotuʻu ʻa e faʻifaʻitakiʻanga totonu ki ai, pea aʻu ʻo ne foaki ʻene moʻuí koeʻuhi ko ia pea ʻokú ne ngāueʻaki ʻa e Tohitapú ko ha founga ia ke tokoniʻi ʻaki ia ke fakaleleiʻi koeʻuhi ke hoko ʻo ne leleiʻia ai. (ʻEf. 5:25-27; 1 Pita 2:21) Kuo fakalototoʻaʻi ʻe heʻene faʻifaʻitakiʻangá ʻa e ngaahi husepāniti tokolahi ke nau ngāue ki hono fokotuʻu ha faʻifaʻitakiʻanga lelei pea fai ha tokoni anga-ʻofa ki hono fai ha fakalelei. ʻOku fakatupu ʻe he ngaahi founga peheé ha ngaahi ola mātuʻaki lelei ange ia ʻi he faʻa lau melé pe ko e fakafisi ke talanoa.

10. (a) ʻI he ngaahi founga fē ʻoku malava nai ai ʻe ha husepāniti mo tamai​—naʻa mo ha tokotaha ʻokú ne taukaveʻi ko ha Kalisitiane ia​—ke ne ʻai ʻa e moʻuí ke faingataʻa ki he niʻihi kehe ʻi hono ʻapí? (e) Ko e hā ʻoku malava ke fai ke fakaleleiʻi ai ʻa e tuʻunga ko iá?

¹⁰ Ko e moʻoni, ʻoku fakalanga nai ʻe he ngaahi tō nounou ʻa e husepānití mo tamaí ʻa e ngaahi palopalema ʻi ʻapi. Fēfē kapau ʻoku ʻikai te ne ongongofua ki he ngaahi fiemaʻu fakaeongo ʻo hono fāmilí pe ʻoku ʻikai te ne fai moʻoni ʻa e takí ʻaki hano fokotuʻutuʻu ha fetalanoaʻaki fakafāmili ki he Tohitapú pea mo e ngaahi ngāue kehé? Kuo maʻu ʻe he ngaahi fāmili ʻe niʻihi ha ngaahi ola lelei ʻi he hili ha ngaahi fetalanoaʻaki lea hangatonu kae anga-fakaʻapaʻapa ʻo kau ki he  ngaahi palopalemá. (Pal. 15:22; 16:23; 31:26) Ka neongo ʻoku ʻikai ke maʻu ʻa e ngaahi ola lelei kotoa naʻe fai ki ai ʻa e ʻamanakí, ʻoku malava ʻe he tokotaha taki taha ke ne fai ha tokoni mātuʻaki ʻaonga ki hano fakaleleiʻi ʻa e moʻui fakafāmilí ʻaki hono taki taha fakatupu ʻa e ngaahi fua ʻo e laumālié pea fakahāhā ʻa e tokanga anga-ʻofa pea mo e fakaʻatuʻi ki he ngaahi memipa kehe ʻo e fāmilí. ʻE hoko ʻa e fakalelei, ʻo ʻikai ʻi he tatali ki he tokotaha ko ē ke ne fai ha meʻa, ka ʻi heʻetau taki taha fai ke lelei ʻetau tafaʻakí, ʻo fakahāhā ʻoku tau taki taha anga-līʻoa fakaʻotua ʻi ʻapi.​—Kol. 3:18-20, 23, 24.

Ko e Maʻuʻanga ʻo e Ngaahi Tali

11, 12. (a) Ko e hā ʻa e ngaahi tokonaki kuo tuku mai ʻe Sihova ke tokoniʻi kitautolu ʻi he ngaahi palopalema ʻo e moʻui fakafāmilí? (e) Ko e hā ʻoku fokotuʻu mai ke tau faí kae maʻu ʻa e ʻaonga kakato?

¹¹ ʻOku lahi ʻa e ngaahi maʻuʻanga ʻoku hanga ki ai ʻa e kakaí ki ha akonaki ʻo fekauʻaki mo ʻenau ngaahi meʻa fakafāmilí. Ka ʻoku tau ʻilo ʻoku ʻi he Folofola ʻa e ʻOtuá ʻa e faleʻi mātuʻaki lelei tahá, pea ʻoku tau houngaʻia koeʻuhi ʻoku fakafou mai ʻi heʻene kautaha hā maí ʻokú ne tokoniʻi ai kitautolu ke tau ngāueʻaki ia. ʻOkú ke maʻu ha ʻaonga kakato mei he tokoni ko iá?​—Sāme 119:129, 130; Mai. 4:2.

¹² Tānaki atu ki hono maʻu ʻa e ngaahi fakataha ʻa e fakatahaʻangá, ʻokú ke vaheʻi ha ngaahi taimi pau ke fai ai ha ako Tohitapu fakafāmili? Ko e ngaahi fāmili ʻoku nau fai maʻu pē ʻeni ʻi he uike kotoá ʻoku nau hoko ʻo fāʻūtaha ai ʻi heʻenau lotú. ʻOku fakakoloa ange ai ʻenau moʻui fakafāmilí ʻi heʻenau fetalanoaʻaki ʻo kau ki hono ngāueʻaongaʻaki ʻo e Folofola ʻa e ʻOtuá ki he ngaahi tuʻunga ʻoku nau ʻi aí.​—Fehoanaki mo Teutalōnome 11:18-21.

13. (a) Kapau ʻoku ʻi ai haʻatau ngaahi fehuʻi pau ʻo fekauʻaki mo e ngaahi meʻa fakaemalí pe fakafāmilí, ko fē ʻoku malava ke tau faʻa maʻu mei ai ʻa e tokoni ʻoku fiemaʻú? (e) Ko e hā ʻa e meʻa ʻoku totonu ke hā ʻi he ngaahi fili kotoa pē ʻoku tau faí?

¹³ Mahalo pē ʻoku ʻi ai ha ngaahi fehuʻi pau ʻo fekauʻaki mo ha ngaahi meʻa fakaemali pe fakafāmili ʻokú ke hohaʻa ki ai. Ko e fakatātā, fēfē ʻa e fakavahavaha fanaú? ʻOku totonu ki he Kalisitiané ke nau tali ha ngāue fakaetafa ke taʻofi ʻa e malava ke hoko ha feitamá (sterilization)? ʻE fakatonuhiaʻi ʻa e fakatōtamá ʻo kapau ʻoku hā ngalingali ʻe fanauʻi mai ha kiʻi pēpē ʻoku mele? ʻOku ʻi ai ha ngaahi fakangatangata ki he  faʻahinga ʻo e fehokotaki fakasinó ʻoku totonu ke fai ʻe he husepānití mo e uaifí? Kapau ʻoku ʻikai ke fuʻu loko mahuʻingaʻia ha tokotaha kei talavou ʻi he ngaahi meʻa fakalaumālié, ko e hā ʻa e lahi ʻo hono fiemaʻu ia ke kau fakataha mo e fāmilí ʻi he lotu? ʻOku ʻikai ha toe veiveiua ʻoku ʻi ai haʻo fakakaukau ki he ngaahi meʻá ni taki taha. Ka te ke malava ke tali ia ʻo fakatuʻunga ʻi he ngaahi tefitoʻi moʻoni faka-Tohitapú? Kuo fai ha fakamatala ki he ngaahi fehuʻí ni taki taha ʻi he Ko e Taua Leʻó. Ako ke ngāueʻaki ʻa e ngaahi tohi fakahokohoko (indexes) ʻoku ala maʻú ke maʻu ha fakamatala ki he ngaahi meʻa peheé. Kapau ʻoku ʻikai te ke maʻu ha ngaahi tohi motuʻa ange ʻa ia ʻoku lave ki ai ʻa e index, vakaiʻi ʻa e laipeli ʻi he Kingdom Hall. ʻOua te ke ʻamanekina ha tali ʻIo pe ha tali ʻIkai ki he fehuʻi kotoa pē. ʻI he taimi ʻe niʻihi kuo pau ke ke fai ha fili​—fakataautaha pe ʻi he tuʻunga ko e ongo meʻa mali. Ka ke ako ke fai ʻa e ngaahi fili ʻa ia ʻokú ne fakahā ʻa hoʻo ʻofa kia Sihova pea mo e ngaahi memipa ʻo ho fāmilí. Fai ʻa e ngaahi fili ʻoku fakamoʻoniʻi ai ʻa hoʻo holi fakamātoato ke fakahōifuaʻi lelei ʻa e ʻOtuá. Kapau te ke fai pehē, ʻe hā mahino fakatouʻosi ai kia Sihova pea mo e niʻihi kehe ʻoku nau ʻilo lelei koé ʻokú ke fakahā moʻoni ʻa e anga-līʻoa fakaʻotuá ʻo ʻikai ngata pē ʻi ho ʻapí tonu ka ʻi tuʻa foki.​—ʻEf. 5:10; Loma 14:19.

Fetalanoaʻaki ʻo Fakamanatu

● Ko e hā ʻa e kaunga ʻa e ʻofa-mateaki kia Sihová ʻi heʻete tauhi ʻa e fuakava malí?

● ʻI heʻete tofanga ʻi he ngaahi palopalema fakafāmilí, ko e hā te ne tokoniʻi kitautolu ke fai ʻa e meʻa ʻoku fakahōifua ki he ʻOtuá?

● Neongo ʻoku tō nounou ʻa e niʻihi kehe ʻi he fāmilí, ko e hā ʻoku malava ke tau fai ke fakaleleiʻi ai ʻa e tuʻunga ko iá?

[Fehuʻi ki he Ako]