Vahe 14

‘ʻOku Ou Fuakava mo Kimoutolu ki ha Puleʻanga’

1. ʻI he pō ko ia ki muʻa pea pekia ʻa Sīsuú ko e hā ʻa e ʻamanaki naʻá ne fokotuʻu atu ki heʻene kau ʻapositoló?

 ʻI HE pō ko ia ki muʻa pea pekia ʻa Sīsuú naʻá ne tala ai ki heʻene kau ʻapositolo loto-tōnungá: ‘ʻI he ʻapi ʻo ʻeku Tamai ʻoku lahi ʻa e ngaahi nofoʻanga. Ko ʻeku ʻalu ʻeni ke teuteu ha potu moʻomoutolu, koeʻuhi ko e potu ʻoku ou ʻi ai, ke mou ʻi ai foki.’ Naʻá ne toe tala ange kiate kinautolu: “ʻOku ou fuakava mo kimoutolu, hangē ko e fuakava ʻa e Tamai kiate au, ki ha puleʻanga.” (Sione 14:2, 3; Luke 22:29, NW) Ko ha ʻamanaki fakaofo ē naʻá ne fokotuʻu atu kiate kinautolu!

2. Ko e toko fiha te nau kau fakataha mo Kalaisi ʻi hono Puleʻanga fakahēvaní?

² Kaekehe, naʻe ʻikai ʻuhinga ʻa Sīsū ia ko ʻene kau ʻapositolo pē ko iá te nau pule fakataha mo ia ʻi hono Puleʻanga fakahēvaní. Ki mui mai naʻe ʻai ai ke mahino ʻe maʻu ʻe he toko 144,000 kuo huhuʻi mei he māmaní ʻa e monū maʻongoʻonga ko iá. (Fkh. 5:9, 10; 14:1, 4) ʻOku ʻi ai ha niʻihi he ʻahó ni ʻoku nau kakapa atu ke maʻu ia?

Ko Hono Fakatahatahaʻi ʻa e Kau ʻEa ki he Puleʻangá

3. ʻI he ngāue fakamalanga fakahāhā ʻa Sīsuú, ko e hā ʻa e faingamālie naʻá ne fakahangataha ki ai ʻa e tokangá?

³ ʻI he hili ʻa hono tuku pōpula ʻo Sione Papitaiso ʻe Hēlota ʻAnitipasá, naʻe fai ʻe Sīsū ha feingatau mālohi ʻo e ngāue fakamalanga fakahāhā ʻa ia naʻá ne fakahangataha ai ʻa e tokangá ki he “Puleʻanga ʻo Hevani.” (Mt. 4:12, 17) Naʻá ne ʻai ke ʻilo ʻe he kakaí ʻe ʻi ai ʻa e faingamālie kiate kinautolu  ke nau hū ki he Puleʻanga ko iá, pea naʻe tōtōivi ʻa ʻene kau ākongá ʻi he kakapa atu ki he pale ko iá.​—Mt. 5:3, 10, 20; 7:21; 11:12.

4. (a) Naʻe pani ʻaki ʻa e laumālie māʻoniʻoní ʻa e ʻuluaki kau ākonga ʻa Sīsuú ʻanefē? (e) Ko e hā ʻokú ne fakahaaʻi naʻe fakahanga ʻa e tokangá ki hono fakatahatahaʻi ʻo e kau ʻea ki he Puleʻangá mei he taimi ko iá ʻo faai mai?

⁴ ʻI he Penitekosi ʻo e 33 T.S. naʻe paniʻaki ai ʻa e laumālie māʻoniʻoní ʻa e ʻuluaki faʻahinga ʻoku kau ki aí. (Ng. 2:1-4; 2 Kol.2Ko 1:21, 22) Naʻe ʻai ke ʻiloa ai ʻa e tokonaki ʻa e ʻOtuá ki he fakamoʻuí ʻa ia ʻe fakaiku atu ki he moʻui taʻe faʻa mate fakahēvaní. Naʻe ngāueʻaki ai ʻe Pita “ʻa e ngāhi kī ʻo e Puleʻanga ʻo Hevani” ke fakaavaʻaki ʻa e ʻilo ko ení​—ʻuluakí ki he kau Siú, ko hono hokó ki he kau Samēliá, pea toki hoko ki he kakai ʻo e ngaahi puleʻanga Senitailé. (Mt. 16:19) Naʻe fai leva ʻa e tokanga makehe ki hono faʻu ʻa e puleʻanga ʻe pule ki he faʻahinga ʻo e tangatá he taʻu ʻe 1,000, pea ko e meimei kotoa ʻo e ngaahi tohi fakamānavaʻi ʻi he Konga Tohitapu Faka-Kalisi Kalisitiané ʻoku fakahanga tefito ki he kulupu ko eni ʻo e kau ʻea ki he Puleʻangá​—ko e “faʻahinga tapu,” mo e “siʻi kau ʻi ha ui mei langi.” a

5. Naʻe fai honau ui ki he moʻui fakahēvaní koeʻuhi ko ha kau sevāniti lelei ange kinautolu ʻa e ʻOtuá ʻi he faʻahinga ko ia naʻa nau moʻui ki muʻá?

⁵ Ko honau ui ki he moʻui fakahēvaní naʻe ʻikai ʻuhinga ia ʻo pehē ʻoku nau lelei ange nai ʻi he kau sevāniti kotoa ʻa e ʻOtuá ʻa ia naʻa nau mate ki muʻa ʻi he Penitekosi ʻo e 33 T.S. (Mt. 11:11) Ka, naʻe kamata heni ʻa hono fili ʻe Sihova ʻa e faʻahinga te nau kaungāpule mo Sīsū Kalaisí. ʻI he ngaahi senituli nai ʻe 19 hili eni naʻe taha pē ʻa e ui, ko e ui fakahēvaní. Ko ha ʻofa maʻataʻatā ia naʻe foaki ʻe he ʻOtuá ki ha tokolahi fakangatangata ki hono toe fakalahi atu ʻo ʻene ngaahi taumuʻa poto mo anga-ʻofá.​—ʻEf. 2:8-10.

6. (a) Ko e hā kuo pau ai ke hoko ʻa e taimi pea tāpuni ʻa e ui fakahēvaní? (e) Ko hai kuó ne tataki ʻa e ngaahi meʻá ni koeʻuhi ke toe fakahoko mo e kikite ʻo fekauʻaki mo e “fuʻu kakai lahi,” pea ko e hā ʻa e meʻa kuo hoko moʻoni?

⁶ ʻI he faai mai ʻa e taimí kuo fakakakato ai ʻa e tokolahi fakangatangata ʻa ia ko e fika kuo fakapapauʻi ko e toko  144,000. Kuo vavé ni ke fai ʻa hono silaʻi fakaʻosi ʻo e kau ʻIsileli fakalaumālie ko eni ʻo fakahā ai ʻoku nau ʻi ha tuʻunga fakahōifua. (Fkh. 7:1-8) Naʻe toki hanga leva ʻe Sihova, fakafou mai ʻi hono laumālié pea mo e mahino ki heʻene Folofolá ʻa ia ʻokú ne ʻai ke ala maʻu ʻe heʻene kautaha hā maí, ʻo tataki ʻa e ngaahi meʻa koeʻuhi ke ne fakahoko ʻa e toe konga ʻe taha ʻo ʻene taumuʻá, ʻo hangē ko ia ʻoku fakamatalaʻi ʻi he Fakahā 7:9-17. Kuo fakatahatahaʻi mei he ngaahi puleʻanga kotoa ha “fuʻu kakai lahi,” ʻa ia ʻoku nau maʻu ʻa e ʻamanaki fakatupu fiefia ko e hao moʻui atu ʻi he fuʻu mamahi lahí pea moʻui taʻengata ʻi he haohaoa ʻi ha māmani Palataisi. ʻI heʻetau fakakaukau atu ki he meʻa kuo hokó, ʻoku hā mahino naʻe kakato fakalūkufua ʻa e ui fakahēvaní ʻi he taʻu 1935 T.S. nai, ʻi hono maʻu ʻa e ʻilo maʻalaʻala ʻo kau ki he ʻamanaki ke moʻui ʻi he māmaní ʻa e “fuʻu kakai lahi.” Talu mei ai kuo ʻomai ke feohi fakataha mo e laui afe siʻi ʻo e toenga ʻo e faʻahinga ʻe moʻui ʻi hēvaní ʻa e laui miliona ʻo e kau lotu kia Sihova ʻa ia ʻoku nau ʻamanaki tōtōivi ke moʻui taʻengata ʻi heni ʻi he māmaní.

7. ʻOku malava ke maʻu ʻe ha niʻihi ʻi he ʻahó ni ʻa e ui fakahēvaní, pea ko e hā hono ʻuhinga ʻokú ke tali pehē ai?

⁷ ʻOku ʻuhinga ení ʻoku ʻikai ke toe ʻi ai ha taha he taimí ni ʻoku ui ʻe he ʻOtuá ke maʻu ʻa e moʻui fakahēvaní? ʻI he teʻeki ke fai ʻa hono silaʻi fakaʻosi ʻo e faʻahingá ni, ʻoku kei malava pē ki ha niʻihi tokosiʻi kuo nau maʻu ʻa e ʻamanaki ko iá ke hoko nai ʻo taʻe angatonu, pea kuo pau ke fili ha niʻihi kehe ke fetongiʻaki kinautolu. Ka ʻoku hā ngali ʻuhinga lelei ke pehē ʻe tātātaha ke hoko ha meʻa pehé ni.

Ngaahi Foha Fakalaumālie​—Anga-Fēfē ʻEnau ʻIlo ki Ai?

8. Ko e hā ʻa e fakamatala ʻoku ʻomai ʻe Paula ʻo hā ai ʻa e founga ʻoku ʻilo ai ʻe he faʻahinga kuo fanauʻi ʻa kinautolu ʻe he laumālie māʻoniʻoní?

⁸ ʻOku ʻomai ʻe he laumālie ʻo e ʻOtuá ʻa e fakapapau pau ʻo fekauʻaki mo e ohi ko e ngaahi foha fakalaumālié ki he kau Kalisitiane ʻosi papitaiso kuo nau maʻu ʻa e ui fakahēvaní. Naʻe fakahāhā ʻeni ʻe he ʻapositolo ko Paulá ʻi heʻene tohi ki he “faʻahinga tapu” ʻi Lomá, ʻo ne fakamatala ʻa e tuʻunga naʻe ʻi ai ʻa e kau Kalisitiane moʻoni kotoa pē ʻi he  taimi ko iá. Naʻá ne pehē: “He ʻilonga kinautolu ʻoku takiekina ʻe he Laumalie ʻo e ʻOtua, ko kinautolu ia ʻa e ngaahi foha ʻo e ʻOtua. He talaʻeha naʻa mou maʻu ha Laumalie anga-popula, ke mou foki ai ki he manavahe: ka naʻa mou maʻu ʻa e Laumalie anga-faka-tama-ohi; pea ʻi heʻetau ʻiate ia ʻoku tau kalanga, Apa Tamai. Ko e Laumalie ʻoku ne kaungā-fakamoʻoni ʻe ia mo hotau laumalie, ʻo pehe, Ko e fanau ʻa e ʻOtua ʻa kitautolu. Pea kapau ko e fanau, ta ko e ngaahi ea foki, ko e ngaahi ea ʻo e ʻOtua, pea kaungā-ea mo Kalaisi; ʻo kapauā ʻoku tau kaungā-mamahi mo ia, ka tau kaungā-hakeakiʻi foki mo ia.”​—Loma 1:7; 8:14-17.

9. ʻI he founga fē ʻoku ‘kaungā-fakamoʻoni ʻa e laumālie’ mo e laumālie ʻo e faʻahinga ko e ngaahi foha moʻoni kinautolu ʻo e ʻOtuá?

⁹ ʻOku langaʻi heni ʻetau tokangá ʻi he ngāueʻaki ʻe ua ʻo e foʻi lea ko e “laumalie”: “ko e Laumalie” mo e “hotau laumalie.” Ko e ʻuluakí ko e ivi ngāue taʻe hā mai ia ʻo e ʻOtuá. ʻOkú ne fakatupu ʻa e tui pau ʻi heʻene fānau fakalaumālié kuo ohi kinautolu ko e fānau tauʻatāina ʻa e ʻOtuá. ʻOku toe kaungā-fakamoʻoni ʻe he laumālie ko iá ʻo fakafou ʻi he Folofola fakamānavaʻi ʻa e ʻOtuá, ko e Tohitapú, ʻa ia ʻoku hangē haʻane tohi taautaha pē ki heʻene fānau fakalaumālié. (1 Pita 1:10-12) ʻI he taimi ʻoku lau ai ʻe he faʻahinga kuo fanauʻi ʻe he laumālie māʻoniʻoní ʻa e meʻa ʻoku leaʻaki ʻe he Tohitapú ki he faʻahinga ko ia ko e ngaahi foha fakalaumālie ʻo e ʻOtuá, ʻoku totonu ʻenau tali: ‘ʻOku kaungatonu ia kiate au.’ Ko ia ʻoku kaungā-fakamoʻoni ʻa e ivi ngāue ʻo e ʻOtuá ʻi he ngaahi founga kehekehe ki honau laumālié, ʻa ia ko e mālohi ʻokú ne ueʻi honau ʻatamaí mo honau lotó tonu, ko e fānau kinautolu ʻa e ʻOtuá. ʻI he fakatatau mo e meʻa ko ia ʻoku fakahā ʻe he laumālie ʻo e ʻOtuá, ʻoku hanga leva honau ʻatamaí mo honau lotó ki he ʻamanaki ke hoko ʻo kaungāʻea mo Kalaisi, pea ʻoku nau tali leva ʻa e ngaahi fatongia ʻo fekauʻaki mo e fānau fakalaumālie ʻa e ʻOtuá.​—Fili. 3:13, 14.

10. (a) Ko e hā ʻa e ngaahi meʻa ʻoku ʻikai ko e ngaahi meʻa pē ko iá ʻoku fakaʻilongaʻi ai ha Kalisitiane pani? (e) Ko e hā ʻa e anga ʻo e vakai ʻoku maʻu ʻe he “fanga sipi kehe” ʻo fekauʻaki mo honau tuʻunga ʻi he taumuʻa ʻa e ʻOtuá?

¹⁰ ʻOku moʻoni ia fekauʻaki mo koe? Kapau ʻoku pehē, kuó ke maʻu ha monū fakaofo. Kaekehe, ko ha fakakaukau hala ia ki ha taha ke ne fakaʻosiʻaki ʻo pehē koeʻuhi ʻoku  houngaʻia mālohi ha taha ki he ngaahi meʻa fakalaumālie loloto angé, pe ʻokú ne faivelenga ʻi he ngāue fakamalangá pe ʻokú ne mātuʻaki ʻofa lahi ki hono ngaahi tokouá, ko ia ai, kuo pau ko ha Kalisitiane pani ʻe he laumālié ia. ʻOku fai ʻa e ngaahi meʻá ni foki ʻe he tokolahi ʻo e “fanga sipi kehe.” ʻOku toe ueʻi honau lotó foki ʻe he meʻa ʻoku nau lau ʻi he Tohitapú ʻo fekauʻaki mo e kau kaungāʻea ʻo Kalaisí, ka ʻoku ʻikai te nau hīkisia ʻo taku kiate kinautolu ʻa e meʻa ʻoku ʻikai tuku mai ʻe he ʻOtuá kiate kinautolú. (Fehoanaki mo Nōmipa 16:1-40.) ʻOku nau lāuʻilo ki he muʻaki taumuʻa ʻa e ʻOtuá ki he foʻi māmaní pea ʻoku nau ngāue loto-hounga ke kau ki ai.

Ko e Taau ke Maʻu ʻInasi Ai

11. Ko hai ʻoku kau ki he fakamanatu fakataʻu ʻo e pekia ʻa Sīsuú, pea ko e hā hono ʻuhingá?

¹¹ ʻI he taʻu taki taha, ʻi Nīsani 14, he hili ʻa e tō hifo ʻa e laʻaá, ʻoku fakamanatu ai ʻe he kau muimui pani ʻo Sīsū Kalaisí ʻi he tapa kotoa pē ʻo e foʻi māmaní ʻa ʻene pekiá, ʻo fakatatau ki he ngaahi fakahinohino naʻá ne ʻoange ki heʻene kau ʻapositoló. (Luke 22:19, 20) ʻOku toe kau foki ki ai ʻa e “fanga sipi kehe,” ʻo ʻikai te nau ʻinasi ʻi hono maʻu ʻa e maá mo e uainé, ka ʻi he tuʻunga ko e kau mamata loto-houngaʻia.

12. ʻI he founga fē naʻe ʻikai ke fakahāhā ai ʻe he muʻaki kau Kalisitiane ʻe niʻihi ʻi Kolinitō ʻa e houngaʻia totonu ki he ʻOhomohe ʻa e ʻEikí?

¹² ʻOku ʻikai ko ha ouau fakalotu taʻeʻaonga eni ka ʻoku mohu ʻuhinga. Naʻe tohi ʻe he ʻapositolo ko Paulá ʻa e akonaki mamafa ki he kau Kalisitiane ʻi Kolinitō, Kalisi, ʻi he ʻuluaki senitulí ʻa ia naʻe ʻi ai honau niʻihi naʻe ʻikai te nau fakahāhā ʻa e houngaʻia totonu ki he meʻá ni, ʻo ne pehē: “ʻIlonga ʻa ia te ne fai taʻengali ʻene kai ʻa e ma, pe ko ʻene inu ʻi he ipu ʻa e ʻEiki, kuo ne angahala ki he sino mo e taʻataʻa ʻo e ʻEiki.” Ko e hā ʻa e meʻa naʻá ne ʻai ke “taʻengali” ʻa e faʻahinga naʻa nau ʻinasi aí? Naʻe ʻikai te nau teuʻi totonu kinautolu ʻi honau lotó mo honau ʻatamaí. Naʻe ʻi ai ʻa e ngaahi mavahevahe ʻi he fakatahaʻangá. Pehē foki naʻe ʻi ai ʻa e niʻihi naʻa nau maʻu ʻo fuʻu hulu ʻa e meʻakaí mo e inú ki muʻa ʻi he fakatahá. Naʻe ʻikai te nau ʻai ʻa e ʻOhomohe ʻa e ʻEikí ko ha meʻa makehe. Naʻe ʻikai te nau ʻi he tuʻunga ke ʻilo ʻa e ʻuhinga mafatukituki ʻo e maá pea mo e uainé.​—1 Kol.1Ko 11:17-34.

13. Ko e hā ʻa e ʻuhinga ʻo e mā mo e uaine ʻoku tufa ʻi he Fakamanatú?

 ¹³ Ko e hā ʻa e ʻuhinga ko iá? ʻOku ʻikai ke fekauʻaki ia mo ha fakakaukau fakamahalo atu ʻo pehē ʻoku liliu fakaemana ʻa e maá mo e uainé ʻo hoko ko ha meʻa kehe. ʻOku ʻikai ke fai ʻe Kalaisi ʻi ha faʻahinga ʻuhinga ha toe feilaulau ʻi he Fakamanatu taki taha. ʻOku fakahā ʻe he Tohitapú ko e “Misaia, ko e meʻa ʻi hono ʻoatu ta tuʻo taha ke fua ʻa e angahala ʻo e tokolahi.” (Hep. 9:28; 10:10; Loma 6:9) Ko e mā taʻelēvaní pea mo e uaine kulokulá ko ha fakaʻilonga pē ke fakatātāʻaki ʻa e sino moʻoni ʻo Sīsū naʻe feilaulauʻi pea mo hono taʻataʻa moʻoni naʻá ne lilingí. Ka ko ha meʻa mātuʻaki mahuʻinga lahi ē ʻa e ongo meʻa moʻoni ko ení! Naʻe foaki ʻa e sino fakaetangata taʻeangahala ʻo Sīsuú koeʻuhi kae malava ke maʻu ʻe he faʻahinga ʻo e tangatá ʻa e faingamālie ke moʻui taʻengata. (Sione 6:51) Pea kuo fakahoko ha taumuʻa lōua ʻe hono taʻataʻa kuo lilingí​—ko hono fakamaʻa ʻa e angahalá mei he faʻahinga ko ia ʻo e tangatá ʻoku nau tui ki aí, pea pehē ki hono fakahoko ʻa e fuakava foʻou ʻi he vahaʻa ʻo e ʻOtuá pea mo e fakatahaʻanga ko e ʻIsileli fakalaumālié, ʻa ia ʻoku faʻuʻaki ʻa e kau Kalisitiane pani ʻe he laumālié. (1 Sione 1:7; 1 Kol.1Ko 11:25; Kal. 6:14-16) ʻOku ʻai ʻe he ongo tokonaki mahuʻingá ni ke malava ai ki he kau memipa ʻo e “fanga sipi toko siʻi” ke fakahā ʻe he ʻOtuá ʻoku nau māʻoniʻoni, ʻo lau ai kinautolu kuo nau ʻosi maʻu ʻa e tuʻunga haohaoa fakaetangatá. (Luke 12:32) ʻOku fai eni koeʻuhi ke malava ke fanauʻi kinautolu ʻaki ʻa e laumālie māʻoniʻoní ke nau hoko ko e ngaahi foha ʻo e ʻOtuá mo e ʻamanaki ke nau kau fakataha mo Kalaisi ʻi hono Puleʻanga fakahēvaní. ʻI heʻenau maʻu ʻinasi ʻi he mā mo e uaine ʻo e Fakamanatú ʻi he taʻu taki taha, ʻo nau fakahā ai ʻa e fakamoʻoni ki heʻenau ʻamanaki fakahēvaní, ʻoku fakafoʻou mo fakaloloto ai ʻa ʻenau houngaʻia ʻi heʻenau kau ki he “fuakava foʻou” naʻe fakalaloa ai ʻa Kalaisí.​—Hep. 8:6-12.

“Te Tau Ō mo Kimoutolu”

14. (a) Ko e hā ʻoku ʻikai maʻu ʻinasi ai ʻa e “fanga sipi kehe” ʻi he mā mo e uaine ʻo e Fakamanatú, ka ko e hā ʻa e meʻa ʻoku nau fakatuʻamelie atu ki aí? (e) Ko e hā ʻa e anga ʻo ʻenau vakai ki heʻenau feohi fakataha mo e toenga ʻo e kau ʻea ki he Puleʻangá?

¹⁴ ʻOku fakatokangaʻi ʻe he “fanga sipi kehe” ʻa e anga ʻo e fakafeangai ʻa Sihova mo ʻene faʻahinga paní, pea kuo nau  kau fakataha mo kinautolu, ʻo nau pehē: “Te tau ō mo kimoutolu; he kuo mau fanongo ʻoku ʻiate kimoutolu ʻa e ʻOtua.” (Sāk. 8:20-23) ʻOku ʻikai ngata pē ʻi heʻenau fakatahatahá ka ʻoku nau kau fakataha ʻi hono ʻai ke ʻiloa ʻa e ongoongo lelei ʻo e Puleʻangá ʻi he māmaní kotoa. Kaekehe, ʻoku ʻikai kau ʻa e “fanga sipi kehe” ia ʻi he “fuakava foʻou” ki ʻIsileli fakalaumālié pea ʻoku ʻikai te nau kau ʻi he “fuakava . . . ki ha puleʻanga” ʻa ia naʻe fai ʻe Sīsū ki he faʻahinga kuo fili ke maʻu ʻa e moʻui fakahēvaní fakataha mo ia. Ko ia ai, ʻoku ʻikai te nau maʻu ʻinasi ʻi hono maʻu ʻa e mā mo e uaine ʻo e Fakamanatú. (Luke 22:20, 29) Ka ʻi hono aʻusia ʻe he “fuakava foʻou” ʻa hono taumuʻá, ʻa ia ko hono fakatahaʻi ki he Puleʻanga fakahēvaní ʻa e faʻahinga fakamuimui ʻo e “fanga sipi toko siʻi,” ʻoku ʻilo leva ai ʻe he “fanga sipi kehe” ʻoku fakahaaʻi ʻe he meʻá ni ʻoku tuʻunuku mai ʻa e ngaahi tāpuaki te nau maʻu ʻi he māmaní ʻo fakafou mai ʻi he Puleʻanga ko iá. ʻOku nau lau ia ko ha monū ke ngāue fāʻūtaha he lolotonga ʻo e “kuonga fakamui” mo e toenga ʻo e kau ʻea mateaki ki he Puleʻangá.

[Fakamatala ʻi lalo]

Fetalanoaʻaki ʻo Fakamanatu

● Ko e hā ʻoku lahi pehē fau ai ʻa hono fakahanga ʻe he Konga Tohitapu Faka-Kalisi Kalisitiané ʻa e tokangá ki he ʻamanaki fakahēvaní?

● ʻOku ʻilo fēfē ʻe he faʻahinga kuo fanauʻi ke hoko ko e ngaahi foha ʻo e ʻOtuá ʻa e meʻa ko iá? Ko e hā ʻa e ʻuhinga ʻo e mā mo e uaine ʻo e Fakamanatú ʻa ia ʻoku nau maʻu ʻinasi aí?

● ʻOku fakahāhā fēfē ʻe he “fanga sipi kehe” ʻoku nau fāʻūtaha moʻoni mo e “fanga sipi toko siʻi”?

[Fehuʻi ki he Ako]