Vahe 15

ʻOku Tataki Fēfē ʻe Sihova ʻa ʻEne Kautahá?

1. Ko e hā ʻa e fakamatala ʻo fekauʻaki mo e kautaha ʻa Sihová ʻoku fakahā mai ʻe he Tohitapú, pea ko e hā ʻoku mahuʻinga ai ia kiate kitautolú?

 ʻOKU fakamaʻalifekina mai ʻe Sihova kiate kitautolu ʻa ʻene kautaha fakahēvani fakaofó ʻo fakafou mai ʻi he Tohitapu fakamānavaʻí. (ʻAi. 6:2, 3; ʻIsi. 1:1, 4-28; Tān. 7:9, 10, 13, 14) Neongo ʻoku ʻikai malava ke tau sio ki he ngaahi meʻa moʻui laumālié, ʻokú Ne ʻai ke tau lāuʻilo ki he ngaahi founga ʻa ia ʻoku ueʻi ai ʻe he ngāue ʻa e kau ʻāngelo māʻoniʻoní ʻa e kau lotu moʻoni ʻi he māmaní. (Sēn. 28:12, 13; 2 Tuʻi 6:15-17; Sāme 34:7; Mt. 13:41, 42; 25:31, 32) ʻOku toe fakamatala ʻa e Tohitapú ʻo kau ki he tafaʻaki hā mai ʻo e kautaha ʻa Sihová pea ʻokú ne toe tokoniʻi kitautolu ke tau maʻu ʻa e mahino ki he anga ʻo ʻene tataki iá. Kapau ʻoku tau maʻu moʻoni ha mahino fakalaumālie ʻo fekauʻaki mo e ngaahi meʻá ni, ʻe tokoni ia kiate kitautolu ke tau “ʻaʻeva taau mo Sihova ke fakahōifuaʻi kakato ia.”​—Kol. 1:9, 10, NW.

Ko Hono ʻIlo Fakapapauʻi ʻa e Konga Hā Maí

2. Talu mei he Penitekosi ʻo e 33 T.S., ko e hā kuo hoko ko e fakatahaʻanga ʻa e ʻOtuá?

² Naʻe feʻunga mo e taʻu ʻe 1,545 ʻa e hoko ʻa e puleʻanga ʻo ʻIsilelí ko e fakatahaʻanga ʻa e ʻOtuá. Ka naʻe ʻikai te nau tauhi ʻa e fuakava ko e Laó pea naʻa nau fakataleʻi ʻa e ʻAlo ʻo e ʻOtuá tonu. Ko ia naʻe fokotuʻu mai ʻe Sihova ha fakatahaʻanga foʻou, pea naʻá ne fai ha fuakava foʻou mo ia. ʻOku fakahā ʻa e fakatahaʻangá ni ʻi he Tohitapú ko e “Taʻahine ko e Uaifi” ʻo Kalaisi, ʻa ia ʻoku faʻuʻaki ʻa e toko 144,000 kuo fili ʻe he ʻOtuá ke nau kau fakataha mo hono ʻAló ʻi hēvani. (ʻEf. 5:22-32; Fkh. 14:1; 21:9, 10) Ko e ʻuluaki faʻahingá naʻe pani ʻaki ʻa e laumālie māʻoniʻoní ʻi he Penitekosi ʻo e  33 T.S. Naʻe ʻomai ʻe Sihova ʻo fakafou mai ʻi he laumālie māʻoniʻoní ʻa e fakamoʻoni hā mahino ko e fakatahaʻanga eni te ne ngāueʻaki ki hono fakahoko ʻa ʻene taumuʻá.​—Hep. 2:2-4.

3. Ko hai he ʻahó ni ʻoku hoko ko e kautaha hā mai ʻa Sihová?

³ ʻI he ʻahó ni ko ha toenga pē ʻo e toko 144,000 ʻoku nau kei ʻi he māmaní. Ka, ʻi hono fakahoko ʻo e kikite ʻa e Tohitapú, kuo fakatahatahaʻi mai ha fuʻu kakai lahi ko e “fanga sipi kehe” ke nau feohi longomoʻui mo kinautolu. Kuo hanga ʻe Sīsū Kalaisi, ko e Tauhi-Sipi Leleí, ʻo fakatahaʻi ʻa e “fanga sipi kehe” ko ení fakataha mo e faʻahinga ko ia ko e toenga ʻo hono kau muimui pani ʻe he laumālié ʻo nau hoko ko e “takanga pe taha” ʻi hono malumalú ʻi hono tuʻunga ko honau ‘tauhi pe taha.’ (Sione 10:11, 16; Fkh. 7:9, 10) Ko e faʻahingá ni kotoa ʻoku nau hoko ko e kautaha fāʻūtaha pē ʻe taha, ko e kautaha hā mai ʻa Sihová ʻi he ʻahó ni.

Faʻunga Fakateokalati

4. Ko hai ʻokú ne tataki ʻa e kautahá, pea ʻi he founga fēfē?

⁴ Ko e kupuʻi lea faka-Tohitapu ko e “fakatahaʻanga ʻa e ʻOtua moʻui” ʻokú ne fakamahinoʻi mai ʻa e tokotaha ʻokú ne tataki iá. ʻOku fakateokalati, pe puleʻi ʻe he ʻOtuá ʻa e kautahá ni. ʻOku tokonaki mai ʻe Sihova ʻa e tataki ki heʻene kakaí ʻo fakafou mai ʻi he tokotaha kuó Ne fakanofo ke hoko ko e ʻulu taʻe hā mai ʻo e fakatahaʻangá, ko e ʻEiki ko Sīsū Kalaisí, pea fakafou mai ʻi Heʻene Folofola tonu fakamānavaʻí, ko e Tohitapú.​—1 Tīm. 3:14, 15, NW; ʻEf. 1:22, 23; 2 Tīm. 3:16, 17.

5. (a) Naʻe fakahāhā fēfē ʻa e tataki fakahēvaní ki he fakatahaʻanga ʻi he ʻuluaki senitulí? (e) Ko e hā ʻokú ne fakahaaʻi ʻoku kei hoko ʻa Sīsū ko e ʻulu ʻo e fakatahaʻangá?

⁵ Naʻe mātuʻaki ʻilonga ʻa e tataki fakateokalatí ni ʻi he taimi naʻe ueʻi ai ʻe he laumālie māʻoniʻoní ʻi he Penitekosi ʻo e 33 T.S. ʻa e ʻuluaki kau mēmipa ʻo e fakatahaʻangá ni ke ngāue. (Ng. 2:1-4, 32, 33) Naʻe hā ia ʻi hono tataki ʻe he ʻāngelo ʻa Sihová ʻa e ngaahi meʻa ko ia naʻe iku atu ki hono fakamafola ʻa e ongoongo leleí ʻi ʻAfiliká. (Ng. 8:26-39) Naʻe pehē pē foki ʻi he taimi naʻe ongo mai ai ʻa e leʻo ʻo Sīsū ʻo ʻoatu ʻa e ngaahi fakahinohino ʻi hono fakatafoki ʻo Saula ʻo Tāsusí pea pehē ki he taimi naʻe kamata ai ʻa e ngāue fakamisinale ki he kau Senitailé. (Ng. 9:3-7, 10-17; 10:9-16,  19-23; 11:12) Ka naʻe ʻikai ke tokonaki maʻu pē ʻa e tataki naʻe fiemaʻú ʻi ha ngaahi founga fakaofo pehé ni. ʻI he faai mai ʻa e taimí naʻe ʻikai ke toe ongona ha ngaahi leʻo ia mei hēvani, pe ko ha kau ʻāngelo naʻa nau hā ki ha kau tangata pea naʻe ʻikai ke toe ʻi ai mo ha ngaahi meʻaʻofa fakaemana ʻa e laumālié. Ka naʻe talaʻofa ʻa Sīsū ki hono kau muimui angatonú: “Pea ko eni, ʻoku ou ʻiate kimoutolu ʻe au ʻi he ngaahi ʻaho kotoa pe, ʻo aʻu ki he ngataʻanga ʻo mamani,” pea ʻoku fakahāhā ʻe he ngaahi moʻoniʻi meʻa ʻokú ne fai pehē. (Mt. 28:20; 1 Kol.1Ko 13:8) ʻOku ʻikai ngata pē ʻi hono tali lelei ʻe he Kau Fakamoʻoni ʻa Sihová ʻa hono tuʻunga-ʻulú, ka ʻoku hā mahino naʻe ʻikai ʻaupito te nau mei malava ke hokohoko atu ʻa hono fanongonongo ʻa e pōpoaki ʻo e Puleʻangá ʻi he fehangahangai mo e fakafili kakahá ka ne taʻe ʻoua ʻa ʻene tokoní.

6. (a) Ko hai ʻoku faʻuʻaki ʻa e “tamaioeiki agatonu mo boto,” pea ko e hā hono ʻuhingá? (e) Ko e hā ʻa e ngāue naʻá ne ʻoange ki he “tamaioeiki” ko iá?

⁶ Ki muʻa siʻi pē ʻi he pekia ʻa Sīsuú naʻá ne lea ki heʻene kau ākongá ʻo kau ki ha “tamaioeiki agatonu mo boto” ʻa ia ʻe tuku ki ai ʻe ia ʻi hono tuʻunga ko e ʻEikí ha fatongia makehe. Fakatatau ki he fakamatala ʻa Sīsuú ʻe ʻi ai ʻa e “tamaioeiki” ko iá ʻi he taimi ʻe mavahe ai ʻa e ʻEikí ki hēvaní pea te ne kei moʻui ʻi he taimi ʻo e toe foki mai ʻa Kalaisí. ʻOku ʻikai malava ke feʻungamālie ha fakamatala pehē ki ha tokotaha taautaha. Ka ʻoku feʻungamālie ia ki he fakatahaʻanga pani mo angatonu ʻa Kalaisí ʻi he tuʻunga fakakātoa. Naʻe ʻiloʻi ʻe Sīsū te ne fakatau kinautolu ʻaki hono taʻataʻa ʻoʻoná, ko ia naʻe feʻungamālie ʻa ʻene lave kiate kinautolu fakakātoa ko ʻene “tamaioeiki.” Naʻá ne ʻoange kiate kinautolu ʻa e ngāue ke fai, ʻo fekauʻi kinautolu kotoa ke nau ngaohi ākonga pea ke nau hokohoko atu ʻa hono fafangaʻi fakalaumālie ʻa e faʻahinga ko iá, ʻo ʻoange kiate kinautolu “ae mea kai [fakalaumālie] i hono taimi totonu.” Naʻe fakapapauʻi ʻa hono fakanofo ʻo kinautolú ʻaki ʻa e laumālie māʻoniʻoní ʻi he Penitekosi ʻo e 33 T.S.​—Mt. 24:45-47, PM; Mt. 28:19, 20; 1 Kol.1Ko 6:19, 20; fehoanaki mo ʻAisea 43:10.

7. (a) Ko e hā ʻa e ngaahi fatongia kuo fakalahi ange ʻoku maʻu he taimí ni ʻe he “tamaioeiki”? (e) Ko e hā ʻoku mahuʻinga ai ʻa e anga ʻo ʻetau tali ʻa e fakahinohino ʻoku fakafou mai ʻi he founga ko ení?

⁷ ʻI he foki mai ʻa e ʻEikí, kapau ʻe fai loto-tōnunga ʻe he “tamaioeiki” ʻa ʻene ngāué, ʻe tuku kiate ia ʻa e ngaahi  fatongia kuo fakalahi ange. Ko e ngaahi taʻu ko ia ʻe hoko atu aí ko ha taimi ia ki ha ngāue fakaefakamoʻoni ʻi māmani lahi ʻo fekauʻaki mo e Puleʻangá, pea ʻe fakatahatahaʻi ai mo ha “fuʻu kakai lahi” ko e kau lotu kia Sihova ʻi he taumuʻa ke fakahaofi atu kinautolu ʻi he “mamahi lahi.” (Mt. 24:14; Fkh. 7:9, 10) ʻE toe fiemaʻu foki ʻa e meʻakai fakalaumālie ki he faʻahinga ko ení, pea ʻe ʻoatu ia kiate kinautolu ʻe he “tamaioeiki” faʻu fetuiaki ko ení, ko e kau sevāniti pani ʻe he laumālié ʻa Kalaisi. Ke fakahōifua kia Sihova, ʻoku totonu ke tau tali ʻa e fakahinohino ʻokú ne tokonaki mai ʻo fakafou mai ʻi he founga ko ení pea ngāue ke fehoanaki-mālie kakato mo ia.

8, 9. (a) Ko e hā ʻa e fokotuʻutuʻu naʻe ʻi he ʻuluaki senitulí ki hono fakaleleiʻi ʻa e ngaahi fehuʻi ʻo fekauʻaki mo e tokāteliné pea mo hono fai ʻa e tataki naʻe fiemaʻu ʻo fekauʻaki mo hono malangaʻi ʻo e ongoongo leleí? (e) Ko e hā ʻa e fokotuʻutuʻu meimei tatau mo ia ʻoku ʻi he ʻaho ní?

⁸ Ko hono moʻoní, ʻi he taimi ʻe niʻihi ʻe malanga hake nai ai ʻa e ngaahi fehuʻi ʻo fekauʻaki mo e tokāteliné pea mo e founga ke fai ha ngaahi meʻa. Ko e hā leva ʻe faí? ʻOku tala mai ʻe he Ngāue vahe hono 15 ʻo e tohi Ngāué ʻa e founga naʻe fakaleleiʻi ai ha pole ʻo fekauʻaki mo e ngaahi fiemaʻu ki he kau Senitaile naʻe uluí. Naʻe fakahā ʻa e meʻá ni ki he kau ʻapositoló mo e kau tangata matuʻotuʻa ʻi Selusalemá, ʻa e faʻahinga naʻa nau ngāue ʻi he tuʻunga ko e kulupu pulé. Naʻe lava pē ke faihala ʻa e kau tangata matuʻotuʻá ni; naʻe ʻikai ko ha faʻahinga kinautolu naʻe ʻikai te nau taʻe fai ha hala. (Fehoanaki mo Kalētia 2:11-14.) Ka naʻe ngāueʻaki ʻe he ʻOtuá ʻa kinautolu. Naʻa nau fakakaukau atu ki he meʻa naʻe leaʻaki ʻe he Tohitapu fakamānavaʻí ʻo kau ki he tuʻunga ko iá pea pehē ki he fakamoʻoni ʻo e ngāue ʻa e laumālie ʻo e ʻOtuá ki hono kamata ʻo e ngāue ki he kau Senitailé, pea naʻa nau toki fai leva ʻenau filí. Naʻe tāpuakiʻi ʻe he ʻOtuá ʻa e fokotuʻutuʻu ko iá. (Ng. 15:1-29; 16:4, 5) Naʻe toe fekauʻi mei he kulupu tefito ko iá ʻa e faʻahinga ke nau fakalahi atu ʻa hono malangaʻi ʻo e ongoongo leleí ʻo fehoanaki mo e meʻa ko ia naʻe fakamafaiʻi ʻe he ʻEikí.​—Ng. 8:14; Kal. 2:9.

⁹ ʻI hotau ʻahó ni ʻoku faʻuʻaki ʻa e Kulupu Pulé ʻa e ngaahi tokoua pani fakalaumālie mei he ngaahi fonua kehekehe. ʻOku tuʻu ia ʻi he ʻuluʻi ʻōfisi ʻo e Kau Fakamoʻoni ʻa Sihová. ʻOkú ne fai mateaki ʻa hono fakalahi ʻo e ngaahi meʻa ʻo  fekauʻaki mo e lotu maʻa ʻi he malumalu ʻo e tuʻunga-ʻulu ʻo Sīsū Kalaisí. ʻOku maʻu ʻe he ngaahi tokouá ni ʻa e fakakaukau ʻo hangē ko ia ko e ʻapositolo ko Paulá, ʻa ia naʻá ne tohi ʻi he taimi naʻá ne ʻoatu ai ʻa e akonaki fakalaumālié ki hono kaungā-Kalisitiané: “Oku ikai koe mea ke mau buleʻi hoo mou tui, ka koe kau tokoni ki hoo mou fiefia: he oku mou tuu i he tui.”​—2 Kol.2Ko 1:24, PM.

10. (a) ʻOku fakapapauʻi fēfē ʻa e faʻahinga te nau hoko ko e kau mātuʻa pe kau sevānití? (e) Ko e hā ʻoku totonu ai ke tau ngāue fakataha vāofi mo e faʻahinga kuo fakanofo ki he ngaahi tuʻungá ni?

¹⁰ ʻOku tali lelei ʻa e fokotuʻutuʻu fakateokalatí ni ʻe he Kau Fakamoʻoni ʻa Sihová ʻi māmani lahi. ʻOku ngāue fakataha vāofi ʻa ʻenau ngaahi fakatahaʻanga fakalotofonuá kotoa mo e fokotuʻutuʻú ni. ʻOku nau hanga ki he Kulupu Pulé ki hono tokangaʻi ʻa hono fakanofo ʻo e kau mātuʻa mo e kau sevāniti ke nau tokanga ki he ngāue lelei ʻa e ngaahi fakatahaʻangá. ʻOku makatuʻunga ʻi he hā ʻa hono fili ʻo e faʻahinga ʻoku fakanofó? ʻOku fakahā mahino ʻa e ngaahi fiemaʻu ko iá ʻi he Tohitapú. ʻOku fua fakatouʻosi ʻe he kau mātuʻa ʻoku nau fai ʻa e fokotuʻu atú pea mo e faʻahinga ko ia kuo fakamafaiʻi ke nau fai ʻa e fakanofó ha fatongia mafatukituki ʻi he ʻao ʻo e ʻOtuá ke nau pīkitai ki he ngaahi fiemaʻú ni. (1 Tīm. 3:1-10, 12, 13; 5:22; Tai. 1:5-9) ʻOku ʻikai ke fai ha kemipeini ʻi he lotolotonga ʻo e kau memipa ʻo e fakatahaʻangá pe ko hono fai ha hiki nimaʻi fakaefakatahaʻanga. Ka, ʻi he fehoanaki mo e meʻa naʻe fai ʻe he kau ʻapositoló ʻi he taimi ʻo hono fai ha fakanofo ʻi he ʻuluaki senitulí, ko e kau ʻovasia ʻoku nau fatongiaʻaki ʻa hono fai ʻo e fokotuʻu atú, pea mo e faʻahinga ʻoku nau toki fai ki mui ʻa e fakanofó, ʻoku nau fai ha lotu ʻo kole ʻa e tokoni ʻa e laumālie ʻo e ʻOtuá pea ʻoku nau fekumi ki heʻene tatakí mei heʻene Folofola fakamānavaʻí. (Ng. 6:2-4, 6; 14:23; fehoanaki mo Sāme 75:6, 7.) ʻI heʻetau tali lelei ʻa e tataki ʻoku ʻomai ʻe he kau mātuʻá, ʻoku malava ke tau fakahāhā ai ʻetau houngaʻia ki he tokonaki anga-ʻofa mai ko eni ʻa Kalaisi ko e “meʻaʻofa ko e kau tangata” ko ení ke tokoniʻi kitautolu ke tau aʻusia kotoa pē ʻa e “fāʻūtaha ʻi he tui.”​—ʻEf. 4:8, 11-16, NW.

11. (a) Ko e hā ʻa e ngaahi ngāue mahuʻinga ʻoku fakahoko ʻe he kau fefine ʻi loto ʻi he fokotuʻutuʻu fakateokalatí? (e) Ko fē ʻa e taimi ʻoku fiemaʻu ai ke nau ʻai ha pūlou ki honau ʻulú, pea ko e hā hono ʻuhingá?

¹¹ ʻOku fakahinohino mai ʻe he Tohitapú ke maʻu pē ʻe he  kau tangata ʻa e ngaahi tuʻunga ko ia ki hono fai ʻo e tokangaʻi ʻi he fakatahaʻangá. ʻOku ʻikai ko ha meʻa eni ke fakamāʻulaloʻi ai ʻa e kau fefiné, he ko e tokolahi ʻo kinautolu ʻoku kau ki he lotolotonga ʻo e kau ʻea ki he Puleʻanga fakahēvaní. ʻOku toe tokoni ʻa e kau fefine Kalisitiané ki he ongoongolelei ʻo e fakatahaʻangá ʻaki ʻenau anga-fakanānā, ʻulungaanga maʻa mo ngāue tōtōivi ʻi he tokanga ki honau ngaahi fāmilí. (Tai. 2:3-5) ʻOku nau faʻa fai ʻa e konga lahi ʻo e ngāué ʻi hono maʻu mai ʻa e kau mahuʻingaʻia foʻoú mo fakahanga kinautolu ki he kautahá. (Sāme 68:11) Ka ko e faiako ʻi loto ʻi he fakatahaʻangá ʻoku tokangaʻi pē ia ʻe he kau tangata kuo fakanofo ki ai. (1 Tīm. 2:12, 13) Pea kapau ʻoku ʻikai ke ʻi ai ha kakai tangata taau mo e fatongia ʻi ha fakataha kuo ʻosi fokotuʻutuʻu ʻe he fakatahaʻangá, ʻe tui leva ʻe ha fefine hano pūlou ʻi he taimi te ne tokangaʻi ai ʻa e fakataha ko iá pe fai ha lotu. a ʻI he foungá ni ʻokú ne fakahāhā ai ʻa ʻene ʻapasia ki he fokotuʻutuʻu ʻa Sihová, ʻo hangē ko ia naʻe fokotuʻu ʻe Sīsū ʻa e faʻifaʻitakiʻanga ki he faʻahinga kotoa ʻi he anganofo ki heʻene Tamaí.​—1 Kol.1Ko 11:3-16; Sione 8:28, 29.

12. (a) Ko e hā ʻa e anga ʻo e fakakaukau ʻoku naʻinaʻi mai ʻe he Tohitapú ke maʻu ʻe he kau mātuʻá ki honau tuʻungá? (e) Ko e hā ʻa e monū fisifisimuʻa ʻoku malava ke tau kau kotoa ki ai?

¹² ʻI he māmaní, ʻoku lau ʻoku mahuʻinga ha taha ʻokú ne maʻu ha tuʻunga tuʻu-ki-muʻa, ka ʻi he kautaha ʻa e ʻOtuá ʻoku pehé ni ia: “Ko ia ʻoku ne ʻai ia ke hoko ko e siʻi ʻiate kimoutolu kotoa ko ia ia ʻoku lahi.” (Luke 9:46-48, NW; Luke 22:24-26) Ko ia ʻoku akonaki mai ʻa e Tohitapú ki he kau mātuʻá ke nau tokanga ke ʻoua te nau fieʻeiki ki he faʻahinga ko e tofiʻa ʻo e ʻOtuá, ka ke nau hoko ko e faʻifaʻitakiʻanga ki he tākangá. (1 Pita 5:2, 3) ʻOku ʻikai ko ha tokosiʻi makehe pē, ka ko e kotoa ʻo e Kau Fakamoʻoni ʻa Sihová, kakai tangata mo e kakai fefine, ʻoku nau maʻu ʻa e monū fisifisimuʻa ko ia  ko hono fakafofongaʻi ʻa e Hau ʻo e ʻuniveesí, ʻo lea anga-fakatōkilalo ʻi hono huafá pea tala ki he kakaí ʻi ha feituʻu pē ʻo kau ki hono Puleʻangá.

13. Ngāueʻaki ʻa e ngaahi konga Tohitapu ʻoku ʻasi hení, ʻo fetalanoaʻaki ʻi he ngaahi fehuʻi ʻoku fakahokohoko ʻi he ngataʻanga ʻo e palakalafi ko ení.

¹³ ʻOku lelei ke tau ʻeke kiate kitautolu: “ʻOku tau houngaʻia moʻoni ʻi he founga ʻo hono tataki ʻe Sihova ʻa ʻene kautaha hā maí? ʻOku hā ia mei he anga ʻo ʻetau fakakaukaú, leá mo e ngaahi ngāué?” Ko e fakakaukau fakalelei ki he ngaahi poini hono hoko ko ení ʻe malava ke ne tokoniʻi ʻa kitautolu taki taha ke tau fai ha sivisiviʻi pehē:

 Kapau ʻoku tau anganofo moʻoni kia Kalaisi ko e ʻulu ʻo e fakatahaʻangá, ko e hā leva kuo pau ke tau fai, ʻo fakatatau ki he ngaahi konga Tohitapu ko ení? (Mt. 24:14; 28:19, 20; Luke 21:34-36; Sione 13:34, 35)

 ʻI he feinga ke hoko ko e kau Kalisitiane fua lelei, ko e hā hono lahi ʻoku totonu ai ki he faʻahinga kotoa ʻoku nau hoko ko e konga ʻo e kautahá ke nau fakafalala ki he ʻOtuá mo Kalaisi? (Sione 15:5; 1 Kol.1Ko 3:5-7)

 ʻI he taimi ʻoku feinga ai ʻa e kau mātuʻá ke fakatonutonu ʻa e fakakaukau ʻa ha faʻahinga koeʻuhi ke fehoanaki-mālie ʻa ʻenau vakai ki ha ngaahi meʻa mo e toenga ʻo e kautahá, ko e tokanga anga-ʻofa ʻa hai ʻoku totonu ke tau ʻiloʻi ʻi he meʻá ni? (ʻEf. 4:7, 8, 11-13; 2 Kol.2Ko 13:11)

 ʻI he taimi ʻoku tau tali loto-houngaʻia ai ʻa e ngaahi tokonaki fakalaumālie ʻoku fakafou mai ʻi he “tamaioeiki” pea mo hono Kulupu Pulé, ko hai ʻoku tau fakahāhā ki ai ʻa e ʻapasiá? Kae fēfē ʻo kapau te tau lea paetaku ʻo kau ki he faʻahingá ni? (Luke 10:16; fehoanaki mo 3 Sione 9, 10.)

 Ko e hā ʻoku totonu ai ke ʻoua te tau fakaanga lahi ʻo kau ki he kau mātuʻa kuo fakanofó? (Ng. 20:28; Loma 12:10)

14. (a) Ko e hā ʻoku tau fakahāhā ʻaki ʻa e anga ʻo ʻetau fakakaukau ki he kautaha fakateokalatí? (e) ʻI he fekauʻaki mo e meʻá ni, ko e hā ʻa e ngaahi faingamālie kiate kitautolu ke tau fakamoʻoniʻi ko e Tēvoló ko ha tokotaha-loi pea ke fakafiefiaʻi ʻa e loto ʻo Sihová?

¹⁴ ʻOku feangai ʻa Sihova pea mo kitautolu ʻi he ʻahó ni ʻo fakafou mai ʻi heʻene kautaha hā mai ʻi he malumalu ʻo Kalaisi ko e ʻulu kuo fakanofo. Ko ia ʻoku fakahāhā ʻi ha founga moʻoni ʻe he anga ʻo ʻetau fakakaukau ki he kautahá ni ʻa hotau tuʻunga ʻo kau ki he pole ʻo fekauʻaki mo e tuʻunga-haú. (Hep. 13:17) ʻOku taukaveʻi ʻe Sētane ʻo pehē ʻoku ueʻi kitautolu kotoa ʻe he holi ki he ʻaonga fakaekita, pea ko ʻetau tokanga tefitó ko kita pē. Ka ʻo kapau ʻoku tau  loto-fiefia ke fakaʻatā kitautolu ke ngāue ʻi ha faʻahinga founga pē ʻoku fiemaʻú, pea ʻi he taimi tatau pē ʻoku tau fakaʻehiʻehi mei he leaʻaki pea mo hono fai ʻa e ngaahi meʻa ʻokú ne tohoaki mai ʻa e tokanga taʻetotonu kiate kitá, ʻoku tau fakamoʻoniʻi ai ko e Tēvoló ko ha tokotaha-loi. Kapau ʻoku tau ʻofa mo fakaʻapaʻapa ki he faʻahinga ʻoku nau ‘fai ʻa e taki muʻá’ ʻi hotau lotolotongá, ʻo faʻifaʻitaki ki heʻenau tuí kae fakafisi mei he hoko ko ha taha ʻoku ‘fakahekeheke ke maʻu ha meʻa,’ ʻoku tau fakafiefiaʻi ai ʻa e loto ʻo Sihová. (Hep. 13:7; Sut. 16, NW) ʻI hono fakatupulekina ʻa e ʻapasia totonu ki he kautaha ʻa Sihová pea fai ʻaufuatō ʻa e ngāue ʻoku fakahinohino mai ʻe Sihová, ʻoku tau ʻoatu ai ʻa e fakamoʻoni ʻoku moʻoni ko Sihova ko hotau ʻOtuá pea ʻoku tau fāʻūtaha ʻi he lotu kiate ia.​—1 Kol.1Ko 15:58.

[Fakamatala ʻi lalo]

Fetalanoaʻaki ʻo Fakamanatu

● Ko e hā ʻa e kautaha hā mai ʻa Sihova ʻi he ʻaho ní? Ko e hā hono taumuʻá?

● Ko hai kuo fakanofo ko e ʻulu ʻo e fakatahaʻangá? ʻOkú ne tokonaki mai ʻa e tataki anga-ʻofa maʻatautolú ʻo fakafou mai ʻi he ngaahi fokotuʻutuʻu hā mai fē?

● Ko e hā ʻa e ngaahi fakakaukau totonu ʻoku totonu ke tau fakatupulekina ʻo kau ki he fatongiá pea mo e faʻahinga ʻi he kautahá?

[Fehuʻi ki he Ako]