Fakahīkihikiʻi ʻa Sihova ko e ʻOtua Moʻoní
Vahe 2
Fakahīkihikiʻi ʻa Sihova ko e ʻOtua Moʻoní
1. (a) Ko hai ʻa e ʻOtua moʻoní? (e) ʻI heʻetau ako ʻo fekauʻaki mo iá, ʻoku totonu ke fēfē ʻene ueʻi ʻa ʻetau moʻuí?
NAʻE tohi ʻa e ʻapositolo ko Paulá ki he kaungā-Kalisitiané ʻo pehē, neongo ʻoku lahi ʻa e faʻahinga ʻoku ui ko e ngaahi ʻotua, “ka kiate kitautolu ʻoku taha pe ʻa e ʻOtua, ko e Tamai . . . pea ʻoku taha pe ʻa e ʻEiki, ko Sisu Kalaisi.” (1 Kol.1Ko 8:5, 6) Ko e ‘ʻOtua pē taha’ ʻa ia naʻe lave ki ai ʻa Paulá ko Sihova, ko e Tokotaha-Fakatupu ʻo e ngaahi meʻa kotoa pē. (Teu. 6:4; Fkh. 4:11) ʻOku tohoaki taʻealataʻofi kiate ia ʻa e faʻahinga loto-houngaʻia ʻa ia ʻoku nau ako ʻo kau ki hono ngaahi ʻulungaangá pea mo e ngaahi meʻa kuó ne fai maʻá e faʻahinga ʻo e tangatá. Ko e hā hono olá? ʻOku fakaenatula pē kiate kinautolu ke nau fakahīkihikiʻi ʻa e Tokotaha ʻa ia ʻoku nau mālieʻia lahi ai, ʻo fai ia fakatouʻosi ʻi he lea mo e ngāue. ʻI he tupulaki ʻo ʻenau ʻofa ki he ʻOtuá, ʻoku ueʻi ai kinautolu ke nau tala ki he niʻihi kehé ʻo fekauʻaki mo ia, pea ʻoku nau fie faʻifaʻitaki kiate ia ki he lahi taha ʻo ʻenau malavá ʻi honau tuʻunga ko e faʻahinga ʻo e tangatá. ʻOku fakalototoʻaʻi kitautolu kotoa ʻe he Tohitapú ke tau fai ia, ʻaki ʻene pehē: “Mou hoko muʻa ko e kau faʻifaʻitaki ki he ʻOtua, ʻo tāu mo e fanau kuo ʻofeina: pea fou ʻi he ʻofa.” (ʻEf. 4:32, 33 [ʻEf. 5:1, 2, PM]) Ke ngāueʻaki ʻa e akonaki ko iá, ʻoku fiemaʻu ke tau hoko ʻo ʻilo ʻa Sihova ʻi hono tuʻunga totonú.
Ngaahi ʻUlungaanga ʻo Sihova
2. Ko e hā ʻa e niʻihi ʻo e ngaahi ʻulungaanga tuʻu-ki-muʻa ʻo e ʻOtuá ʻoku nau ueʻi kitautolu ke tau fakamālōʻiaʻi iá?
2 ʻI he Tohitapú kotoa ʻoku lahi ai ʻa e ngaahi fakamatala fakahangatonu ʻoku nau fakahaaʻi ʻa e ngaahi ʻulungaanga tuʻu-ki-muʻa ʻo e ʻOtuá. ʻI hoʻo lau ʻa e ngaahi fakamatalá ni, vaheʻi ha taimi ke fakakaukau fakalelei pe ko e hā moʻoni ʻa e ngaahi ʻulungaanga ko iá pea mo honau mahuʻinga kiate koé. Hangē ko ení: “Ko e ʻOtua ko e ʻOfa.” (1 Sione 4:8) “Ko ʻene ngaahi founga kotoa ʻoku fakakonisitutone [“fakamaau totonu,” NW].” (Teu. 32:4) “Oku iate ia ae boto.” (Siope 12:13, PM) ʻOku “malohi ia i he mafimafi.” (ʻAi. 40:26, PM) ʻI hoʻo fakalaulauloto ki he ngaahi ʻulungaangá ni, ʻikai ʻoku ueʻi koe ʻe he mālieʻia ki he ʻOtuá ke fakamālōʻiaʻi ia?
3. Ko e hā ʻa e ngaahi tafaʻaki kehe ʻo e anga ʻo Sihová ʻoku fakamānako ʻaupito?
3 ʻI hono toe ʻai ke tau ʻilo lelei ange ʻa hono anga fakamānakó, ʻoku tala mai ʻe he Tohitapú kiate kitautolu ko Sihová ko ha “ʻOtua, ʻAloʻofa mo Anga lelei, Tuai ki he Houhau, pea Fonu ʻi he Kelesi mo e Moʻoni.” (ʻEki. 34:6) “Ko koe, ʻe Sihova, ʻokú ke anga-lelei mo tokateu ke fakamolemole.” (Sāme 86:5, NW) “He oku lele fetoutou mo liliuaki ae fofoga o Jihova i mamani kotoabe, ke fakaha malohi a ene afio ke kau mo kinautolu oku tokaga totonu ho nau loto kiate ia.” (2 Kal. 16:9, PM) “ʻOku ʻikai ke filifilimanako ʻa e ʻOtua: ka neongo pē ko e fēʻia ʻa e kakai, ka ʻilonga ʻa ia ʻoku ʻapasia kiate ia, pea ngāue fai ki he totonu, ʻoku ngofua ke ne aʻu mai kiate ia.” (Ng. 10:34, 35) Ko Sihova ʻokú ne “foaki ʻataʻatā pe” pea ko e “ʻOtua fiefia.” (Sēm. 1:5; 1 Tīm. 1:11, NW) Ko ha toki meʻa fakaongoʻimālohi ē ke tauhi ʻa e ʻOtua taʻealafakatataua ko ení pea ke aʻusia ʻa ʻene tokanga anga-ʻofá!
4. (a) Ko e hā ʻa e faʻahinga anga-līʻoa ʻoku fiemaʻu ʻe Sihová, pea ʻoku mahuʻinga fēfē ia? (e) Ko e hā ʻoku fakaafeʻi mai kitautolu ʻe he Sāme 34:3 ke tau kau ki aí?
4 ʻI he fetāiaki mo hono ngaahi ʻulungaangá ko e moʻoniʻi meʻa ko ia “ko ha ʻOtua ʻoku fiemaʻu kiate ia ʻa e anga-līʻoa maʻataʻatā.” (ʻEki. 20:5, NW) Kuo pau ke tau anga-līʻoa kakato kiate ia kae fakahōifua ʻa e tauhi kiate iá. ʻE ʻikai te tau toe ʻofa foki ki he māmani ʻa ia ʻoku ʻotua ai ʻa Sētané. (1 Sione 2:15-17; 2 Kol.2Ko 4:3, 4) ʻOku ʻafioʻi ʻe Sihova ha faʻahinga fakangalingali pē ʻo e māʻoniʻoní. ʻOkú ne ʻafioʻi lelei fakaʻaufuli ʻo ʻikai ngata pē ʻi he meʻa ʻoku tau faí kae pehē foki ki he anga ʻo ʻetau fakakaukau ʻo fekauʻaki mo e meʻa ko iá pea mo e faʻahinga tokotaha ʻoku tau feinga ke tau hoko ki aí. Kapau ʻoku tau ʻofa moʻoni ki he māʻoniʻoní, te ne tokoniʻi kitautolu. (Sel. 17:10; Pal. 15:9) Koeʻuhi ko e ngaahi ʻulungaanga ʻo Sihová, ʻoku laui miliona ʻa e kakai ʻi māmani lahi kuo nau tali fiefia ʻa e fakaafe ʻa e tangata-tohi-sāme ʻi he Tohitapú ʻa ia naʻá ne tohi ʻo pehē: “Mou kau mo au ke viki [fakahīkihikiʻi, NW] ʻa Sihova, pea tau hakeakiʻi hono huafa fakataha.” (Sāme 34:3) Ko ha taha koe ʻo kinautolu?
5. Ko e hā te ne tokoniʻi kitautolu ke tau maʻu ʻa e ʻaonga kakato mei heʻetau ako ʻo fekauʻaki mo e anga ʻo Sihová?
5 ʻE toe loloto ange ʻa hoʻo holi ke talanoa ʻo kau ki he ʻOtuá, pea ʻe tokoniʻi lahi koe ʻi hoʻo ngaahi feinga ke faʻifaʻitaki kiate iá ʻo kapau te ke sivisiviʻi fakaʻaufuli ʻa hono ngaahi ʻulungaanga taumamaʻó. Fekumi ke ʻilo (1) fakaʻāuliliki pe ko e hā ʻa e ngaahi anga taki taha, pea pehē nai ki he meʻa ʻokú ne ʻai ia ke kehekehe mei he ngaahi anga ko ē, (2) ko e founga ʻa hono fakahāhā ia ʻe Sihová, pea kia hai, pea mo e (3) founga ʻoku malava ke ke fakahāhā ai ia, pe ko e founga ʻoku totonu ke ne ueʻi ai ʻa e anga ʻo hoʻo fakakaukaú.
6. ʻI hono ngāueʻaki ʻa e ʻofá ko ha fakatātā, fakahāhā ʻa e founga ʻoku malava ke sivisiviʻi ai ʻa e ngaahi ʻulungaanga ʻo Sihová. Fai eni ʻaki haʻo tali ʻa e ngaahi fehuʻi ʻi he ngataʻanga ʻo e palakalafi ko ení, ʻo fakakau mo e ngaahi konga Tohitapú ʻi hoʻo ngaahi talí.
6 Fakakaukau ange ki he fakatātā ko eni pē ʻe taha. ʻI he pehē ʻe he Tohitapú, “ko e ʻOtua ko e ʻOfa,” ʻoku ʻuhinga ia ki he hā? (1 Sione 4:8) Ko hono moʻoní, ʻoku lahi ʻa e ngaahi faʻahinga ʻo e ʻofá. Ko e foʻi lea faka-Kalisi naʻe ngāueʻaki ʻi he potutohí ni ko e a·gaʹpe, ʻa ia ʻoku ʻuhinga ki he faʻahinga māʻolunga taha ʻo e ʻofá, ʻa ia ʻoku fakahāhā tonu meia Sihova ko e ʻOtuá. Ko e faʻahinga ʻofa ko ení ko hano fakahāhā ia ʻo e taʻesiokita fakaʻaufuli. ʻI he tauhi maʻu ia ʻi he fakakaukaú, faʻu haʻo ngaahi tali pē ʻaʻau ki he ngaahi fehuʻi ʻi laló, ʻo ngāueʻaki ʻa e ngaahi konga Tohitapu ʻoku lave ki aí.
ʻOku anga-fēfē ʻa hono fakahāhā ʻa e ʻulungaanga ko ení ʻi he ngaahi ngāue fakaefakatupu ʻa Sihová? (Ng. 14:16, 17)
Ko e hā ʻa e faʻifaʻitakiʻanga tuʻu-ki-muʻa taha ʻo e ʻofa ʻa Sihova ki he faʻahinga ʻo e tangatá? (Sione 3:16) Naʻe fai ʻe Sihova ʻa e meʻá ni koeʻuhi ko ha lelei naʻe ʻi he tangatá? (Loma 5:8)
ʻOku totonu ke tākiekina fēfē ʻe he meʻa naʻe fai ʻe Sihova ʻo fakafou ʻi hono ʻAló ʻa e founga ʻoku tau ngāueʻaki ai ʻa ʻetau moʻuí? (2 Kol.2Ko 5:14, 15, 18, 19)
Ko e hā ʻa e ngaahi founga ʻoku malava nai ke tau fakahāhā ai ʻi hotau tuʻunga ko e kau Kalisitiané, ʻoku tau maʻu ʻa e faʻahinga ʻofa tatau ki hotau kaungā-Kalisitiané? (1 Kol.1Ko 13:4-7; 1 Sione 4:10, 11; 3:16-18)
Ko toe hai ʻoku totonu ke tau fakahāhā ki ai ʻa e ʻofá, pea ʻi he founga fē? (Mt. 5:43-48; 28:19, 20; Kal. 6:10)
7. ʻI hoʻo ako fakafoʻituituí, ʻoku malava fēfē ke ke maʻu ha fakamatala meimei tatau ʻo fekauʻaki mo e toe ngaahi ʻulungaanga kehe ʻo Sihová?
7 Te ke toe fie fakatotolo ki ha ngaahi ʻulungaanga kehe ʻo Sihova? Ki hano kamata, fēfē ke fakatotoloʻi ʻi hoʻo ako fakafoʻituituí ʻa e “fakamaau totonu” mo e “poto,” pea pehē nai ki he “anga-ʻofa” mo e “meesi.” ʻI hono ngāueʻaki ʻa e ngaahi tohi fakahokohoko (indexes) ki he ngaahi tohi ʻa e Watch Tower pea mo ha tohi hokohoko ʻo e ngaahi foʻi lea ʻi he Tohitapú (concordance), te ke maʻu ai ha fakamatala fakamaama lahi ʻaupito.
Tokoniʻi ʻa e Niʻihi Kehé ke Ako ʻa e Moʻoni ʻo Fekauʻaki mo e ʻOtuá
8. (a) Ko e hā ʻa e ngaahi ʻotua ʻoku lotu ki ai ʻa e kakai ʻo e māmaní? (e) Ko hai ʻokú ne poupouʻi ʻa e tuʻunga puputuʻu ko ení, pea ko e hā ʻa e ʻuhinga ʻokú ke tali pehē aí?
8 ʻI he fakafepaki tuʻu ki he lotu ki he ʻOtua moʻoní, ʻoku laui miliona ʻa e ngaahi ʻotua kehe ʻoku lotu ki ai ʻa e faʻahinga ʻo e tangatá. ʻI he senituli hono faá, naʻe tali ai ʻe he Puleʻanga-Haʻa-Kalisitiané ʻa e tui ki ha “Tolu-tahaʻi-ʻotua,” ʻa ia naʻe akoʻi ʻe he kau Pāpiloné, kau ʻIsipité, kau Hinitū pea mo e kau Putá ki muʻa atu. Tānaki atu ki he fakakaukau ko eni ʻo fekauʻaki mo e ʻOtuá, ʻoku ʻi ai ʻa e kau pule mālohi, kau sipoti mo e kau hiva tuʻu-ki-muʻa kuo hoko ʻo ʻotuaʻaki. Kuo toe hoko ʻa e paʻangá, mo kita mo e fehokotaki fakasinó ko e ngaahi ʻotua ʻa ia ʻoku fai ki ai ʻa e mateaki loto-faivelenga. Ko hai ʻokú ne poupouʻi kotoa iá? Ko e “ʻotua ʻo e tuʻu ko eni,” ko Sētane ko e Tēvoló. (2 Kol.2Ko 4:4; 1 Kol.1Ko 10:20) ʻOkú ne feinga ʻaki ʻa e ngaahi founga filioʻi anga-kākā kotoa pē ke fakatafokiʻi ʻa e kakaí meia Sihova, pe ke vahevahe ʻa ʻenau mateakí.
9. Ko e hā ʻa e founga lelei taha ke tokoniʻi ai ha taha ke ako ʻa e moʻoni ʻo fekauʻaki mo e ʻOtuá?
9 ʻOku malava fēfē ke tau tokoniʻi ʻa e faʻahinga peheé, tatau ai pē pe ko e kau Kalisitiane lau pē pe ko e niʻihi kehé, ke nau ʻilo ʻa e moʻoni ʻo fekauʻaki mo e ʻOtuá? Ko e founga lelei tahá ko hono fakahāhā kiate kinautolu ʻi he anga-fietokoni ʻa e meʻa ʻoku leaʻaki pē ʻe he Tohitapú ʻo fekauʻaki mo e ʻOtua moʻoní pea mo hono angá. ʻOku fiemaʻu leva ke tau poupouʻi eni ʻaki ʻa e ʻulungaanga ʻa ia ʻokú ne fakahāhā ʻa e ngaahi ʻulungaanga fakaʻotuá ʻi heʻetau moʻui ʻatautolú.—1 Pita 2:12.
10. ʻI he talanoa ki ha taha tui Tolu-tahaʻi-ʻotua, ko e hā ʻoku ʻikai fakapotopoto ai ke fakamahalo ʻo pehē ʻoku tau ʻilo lelei ʻa e meʻa ʻokú ne tui ki aí?
10 Kae fēfē kapau ʻoku taukaveʻi atu ʻe he faʻahinga ko e kau mēmipa ʻo e ngaahi siasi ʻo Puleʻanga-Haʻa-Kalisitiané, ʻo pehē ʻoku faka-Tohitapu ʻa ʻenau tui ki he “Tolu-tahaʻi-ʻotua”? Ko e ʻuluaki meʻá, fakatokangaʻi ange, neongo ʻoku ʻi ai ʻa e ngaahi fakamatala fakaesiasi kuo hiki ʻo fekauʻaki mo e tokāteline “Tolu-tahaʻi-ʻotua,” ʻoku tokolahi ʻa e faʻahinga ʻoku ʻi ai pē ʻenau ngaahi fakakaukau ʻanautolu pē. Fakaafeʻi kinautolu ke nau fakahā ia, pea tokoniʻi leva kinautolu ke nau fakafehoanaki ʻenau ngaahi tuí mo e meʻa ʻoku ʻi heʻenau Tohitapú. Faifai atu pē, pea toe fakaʻaiʻai kinautolu ke nau fakafehoanaki ʻa e akonaki fakahāhā fakaesiasi ko iá pea mo e Folofola ʻa e ʻOtuá.
11. ʻI hono ngāue tahataha ʻaki pē ʻa e ngaahi poini ko eni ʻe nimá, ngāueʻaki ʻa e ngaahi fehuʻi mo e ngaahi konga Tohitapu ʻoku fakahokohoko ʻi he palakalafi ko ení ke fakakaukau ke maʻu ʻa e mahino ki he taʻefaka-Tohitapu ʻo e tokāteline “Tolu-tahaʻi-ʻotua.”
11 ʻI hono manatuʻi ʻa e fiemaʻu ke tokoniʻi ʻa e faʻahinga loto-totonú, fakakaukau pe ʻe anga-fēfē haʻo ngāueʻaki ʻa e ngaahi konga Tohitapu ʻoku hā ʻi laló ke ʻai kinautolu ke fakakaukau ʻo maʻu ʻa e mahino ʻi he ngaahi poini ʻa ia ʻoku hā fakataha mo e ngaahi konga Tohitapú ni:
(1) ʻOku fakamamafaʻi ʻe he kau tui Tolu-tahaʻi-ʻotua ʻe niʻihi ʻa e foʻi fakakaukau ʻo pehē ʻoku ʻi ai ʻa e Toko Tolu fakaʻotua (ko e Tamai, ko e ʻAlo mo e Laumālie Māʻoniʻoni) ka ko e ʻOtua pē taha.
Ka ʻoku fakahā ʻe he Ngāue 2:4, 17 ko ha tokotaha ʻa e “Laumālie Māʻoniʻoni”?
Ko e hā ʻoku ʻaonga ai ke fakatokangaʻi pe ko e toko fiha ʻoku lave ki ai ʻi he ngaahi konga Tohitapu taki taha ko ení? (Sione 17:20-22; Ng. 7:56; Fkh. 7:10)
(2) ʻOku tui ʻa e niʻihi ʻo pehē ko e kau mēmipa kotoa ʻo e “Tolu-tahaʻi-ʻotua” ʻoku nau lāngilangiʻia tatau, ʻoku ʻikai ha taha ʻe lahi ange pe siʻi ange ʻiate kinautolu, ʻoku nau tatau tofu pē pea taʻekamataʻanga pe ngataʻanga.
ʻOku pehē ʻa e lau ʻa e Tohitapú? (Ke maʻu ʻa e tali, sio kia Sione 14:28; Mātiu 24:36; Fakahā 3:14.)
(3) ʻOku tuhu ʻa e kakai ʻe niʻihi ki he Sione 1:1 ko ha fakamoʻoni ia ki he “Tolu-tahaʻi-ʻotua.” ʻOku nau taukaveʻi ko e potutohi faka-Kalisi ʻo e tohí ni naʻe ʻikai ha muʻanauna taʻepau ai (“ha”) pea ko ia ai, kuo pau ke pehē ʻa e konga tohí ni: “naʻe ʻOtua ʻa Folofola,” kae ʻoua ʻe pehē ko “ha ʻotua.”
Ka ko e toko fiha ʻoku lave ki ai ʻi he Sione 1:1? Toko tolu? Pe toko ua? Ko e hā ʻoku toe fepaki ai ʻa e Sione 1:18 mo e tokāteline “Tolu-tahaʻi-ʻotua”?
Ko e moʻoni ʻoku ʻikai ke ʻi ai ha muʻanauna taʻepau ʻi he lea faka-Kalisí, ka ʻoku ʻi ai ia ʻi he ngaahi lea lahi, pea ʻoku ngāueʻaki ia ʻi he ngaahi lea ko iá ke ne fakahā ʻa e ngaahi fakakaukaú ʻi ha founga totonu. Kapau ʻoku fakakaukau ha taha ʻo pehē ʻoku hala ke ngāueʻaki ʻa e muʻanauna taʻepaú ʻi he taimi ʻoku liliu lea ai ʻa e Sione 1:1, te ne toe fiemaʻu nai ke ʻoua ʻe ngāueʻaki ia ʻi he Ngāue 12:22 ʻo fakatatau ki he King James Version mo e ngaahi liliu kehé? (Ko ha toe liliu ʻe taha ʻo e Sione 1:1, ʻa ia ʻoku hā ʻi he An American Translation, ʻokú ne pehē “naʻe fakaʻotua ʻa Folofola,” ʻa ia, naʻá ne maʻu ʻa e ngaahi ʻulungaanga fakaʻotua tatau mo ia ʻoku maʻu ʻe he ʻOtuá.)
(4) ʻOku toe fakakikihiʻi ʻe he kau tui Tolu-tahaʻi-ʻotuá ʻo pehē ko e foʻi lea faka-Hepelū ʻoku liliu lea ko e “ʻOtua” ʻia Sēnesi 1:1, 26 ko e “El·o·himʹ” pea ko e tuʻunga palulali ia ʻi he lea faka-Hepeluú pea ʻoku ʻuhinga ko e “ngaahi ʻOtua.”
Ko e hā ʻoku ʻikai te ne poupouʻi ai ʻa e akonaki ʻo fekauʻaki mo e Toko Tolu fakaʻotua ʻi he “ʻOtua pē ʻe taha”?
Kapau ʻokú ne fakahaaʻi ko ha “Tolu-tahaʻi-ʻotua” ʻia Sēnesi 1:1, ko e hā ʻokú ne fakahaaʻi ʻia Fakamaau 16:23, ʻa ia ʻoku ngāueʻaki ai ʻa e el·o·himʹ ki he “ʻotua,” fakataha mo e veape faka-Hepelū ʻi he tuʻunga singulali, kae ʻikai ʻi he palulali?
Ko e hā ʻoku ngāueʻaki ai ʻa e tuʻunga palulali ʻo fekauʻaki mo e ʻOtuá ʻi he ngaahi potutohi ko ení ʻi he lea faka-Hepeluú? Ko e taha ia ʻo e founga ʻoku fakahoko ai ʻi he lea faka-Hepeluú ʻa e foʻi fakakaukau ʻo fekauʻaki mo e tuʻunga māʻolunga taha pe ngeia. Kapau naʻe ʻuhinga ʻoku tokolahi ange ʻi he tokotahá, ʻe toe palulali mo e ngaahi veape ʻoku nau ʻalu fakatahá, ka ʻi he ngaahi tuʻunga ʻi ʻolungá ʻoku ʻikai pehē ia.
(5) Koeʻuhi ko e fakamamafaʻi ʻe he ngaahi siasí ʻa Sīsū (fakataha mo e moʻoniʻi meʻa ko ia ʻo pehē kuo toʻo ʻa e huafa ko e Sihová mei he ngaahi liliu Tohitapu lahi), ʻoku fakakaukau ʻa e faʻahinga ʻe niʻihi kia Sīsū pē ʻi he taimi ʻoku lave ai ʻo fekauʻaki mo e ʻOtuá.
Ka ko e hā ʻa e faʻifaʻitakiʻanga ʻi he lotú naʻe tokonaki mai ʻe Sīsū maʻatautolu ke tau faʻifaʻitaki ki aí? (Luke 4:8)
12. Ko e hā naʻe feʻungamālie ai ʻa e pehē ʻe Sīsū ki heʻene Tamaí “ko e ʻOtua moʻonia pe taha”?
12 Neongo ʻoku lave ʻi he Tohitapú ʻo pehē ko ha “ʻotua” pe “ʻOtua Mafimafi” ʻa Sīsū, ka naʻá ne fakahīkihikiʻi ʻa ʻene Tamaí, ʻo ne lave kiate ia ʻo pehē ko “hoku ʻOtua pea ko homou ʻOtua.” (Sione 1:1; 20:17; ʻAi. 9:6 [ʻAi. 9:5, PM]) Naʻá ne loto-tatau mo Mōsese, ʻa ia naʻá ne pehē ki muʻa: “Ko Jihova koia koe Otua [“moʻoni,” NW]; oku ikai ha toko taha mo ia.” (Teu. 4:35, PM) ʻOku mātuʻaki faikehekehe fakaʻaufuli ʻa Sihova mei he ngaahi meʻa ʻoku fai ki ai ʻa e lotú ʻo hangē ko e ngaahi ʻaitoli, kau tangata ʻoku ʻotuaʻaki pea mo Sētane ko e Tēvoló. ʻI hono faikehekehe mei he ngaahi meʻa kotoa ko iá, ko Sihová ʻoku ʻi he tuʻunga, ʻo hangē ko ia naʻe uiʻaki ʻe Sīsū, “ko e ʻOtua moʻonia pe taha.”—Sione 17:3.
“ʻAluʻaki ʻa e Huafa ʻo Sihova”
13, 14. Ko e hā ʻoku kau ki he “ʻilo” mo e “ʻaluʻaki” ʻa e huafa ʻo Sihová?
13 Hili ha ngaahi taʻu ʻo e puputuʻu ʻo kau ki he ʻOtuá, ʻoku fakatupu-fiefia ki he faʻahinga tokolahi ʻa ʻenau fuofua sio ʻi heʻenau Tohitapú ki he huafa fakaeia ʻo e ʻOtuá, ko Sihova. (ʻEki. 6:3) Ka te nau maʻu ʻa e ʻaonga tuʻuloa ʻi he ʻilo ko ení ʻo kapau pē te nau ‘ʻaluʻaki ʻa e huafa ʻo Sihová ʻo taʻengata.’ (Mai. 4:5) ʻOku kau ki he meʻá ni ha meʻa lahi ange ia ʻi hono ʻilo pē ʻa e huafa ʻo Sihová pe ko hono taukaveʻi ko e Kau Fakamoʻoni ʻa Sihova ʻa kinautolu.
14 ʻOku pehē ʻe Sāme 9:10 (PM) ʻo fekauʻaki mo e mahuʻinga ʻo e huafa ʻo e ʻOtuá: “Ko kinautolu oku ilo ki ho huafa te nau falala kiate koe: . . . E Jihova.” Ko e hā ʻoku kau ki he meʻa ko iá? ʻOku kau ki ai ha meʻa lahi ange ia ʻi hono ʻilo pē ʻa e huafa ko Sihová, ʻa ia ʻoku ʻikai ke iku atu ai pē ia ke te falala kia Sihova. Ko e “ilo” ko eni ki he huafa ʻo e ʻOtuá ʻoku ʻuhinga hení ke mahino pe ko e ʻOtua fēfē ʻa Sihova, ke tokaʻi ʻa hono mafaí, ke talangofua ki heʻene ngaahi fekaú. Pehē foki, ke “ʻaluʻaki ʻa e huafa ʻo Sihova” ʻoku ʻuhinga ia ke fakatapui kita kiate ia mo fakafofongaʻi ia ʻaki ʻete hoko ko ha taha ʻo ʻene kau lotú, ʻo ngāue moʻoni ʻaki ʻete moʻuí ke fetāiaki mo e finangalo ʻo e ʻOtuá. (Luke 10:27) ʻOkú ke fai ia?
15. Ke tau tauhi taʻengata ʻa Sihova, ko e hā ʻoku fiemaʻu ki aí tukukehe ʻa e ongoʻi ko e fatongia ia?
15 Ke tau tauhi taʻengata ʻa Sihova, kuo pau ke ueʻi kitautolu ʻe ha meʻa lahi ange ia ʻi he ongoʻi faifatongia pē. Naʻe naʻinaʻi ʻa e ʻapositolo ko Paulá kia Tīmote, ʻa ia naʻá ne ʻosi tauhi ʻa Sihova ʻi ha ngaahi taʻu lahi: “Akoʻi koe ʻo ʻai ʻa e anga-līʻoa fakaʻotuá ko hoʻo taumuʻa.” (1 Tīm. 4:7, NW) ʻOku tupu ʻa e anga-līʻoá mei he lotó; pea ʻoku ueʻi ia ʻe he houngaʻia ki he tokotaha ko ia ʻoku fakahanga ki aí. Ko e “anga-līʻoa fakaʻotua” ko e ʻapasia tautakele kia Sihova tonu pē. ʻOkú ne fakahāhā ʻa e ʻofa pīkitai kiate ia koeʻuhi ko e houngaʻia kiate ia pea mo ʻene ngaahi foungá. ʻOkú ne ʻai kitautolu ke tau saiʻia ke hoko ʻa e tokotaha kotoa pē ke nau fakamahuʻingaʻi lahi ʻa hono huafá. Kuo pau ke tau ʻai ʻa e “anga-līʻoa fakaʻotua” ko e kolo pe ko e taumuʻa ia ʻi heʻetau moʻuí ke tau ʻaluʻaki ʻa e huafa ʻo Sihová, ko e ʻOtua moʻoni, ʻo taʻengata.—Sāme 37:4; 2 Pita 3:11.
Fetalanoaʻaki ʻo Fakamanatu
● Ko e faʻahinga tokotaha fēfē ʻa Sihova? Ko e hā ʻa e ʻaonga ʻoku tau maʻu ʻi hono maʻu ha mahino lelei ki hono ngaahi ʻulungaangá taki taha?
● ʻOku malava fēfē ke tau tokoniʻi ʻa e kakai kehé ke nau ako ʻa e moʻoni ʻo fekauʻaki mo e ʻOtuá?
● Ko e hā ʻoku kau ki hono “ʻilo” ʻa Sihová mo e ‘ʻaluʻaki ʻa hono huafá’?
[Fehuʻi ki he Ako]
