Vahe 11

‘Hanganaki Fuofua Kumi ki he Puleʻanga’

1. (a) ʻI he taʻu ʻe 1,900 kuo maliu atú, ko e hā naʻe pehē ai ʻe Sīsū ke fuofua kumi ki he Puleʻangá? (e) Ko e hā ʻa e fehuʻi ʻoku totonu ke tau ʻeke hifo kiate kitautolú?

 LAHI HAKE he taʻu ʻe 1,900 kuo maliu atú, ʻi ha ma-langa naʻe fai ʻi Kāleli, naʻe enginaki ai ʻa Sīsū ki heʻene kau fanongó: “Ka mou [“hanganaki fuofua,” NW] kumi . . . ki hono puleʻanga, mo e maʻoniʻoni aʻana.” Ka ko e hā hono ʻuhingá? ʻIkai naʻe laui senituli lahi ia mei ai pea toki fakanofo ʻa Kalaisi ki he taloní? ʻIo. Ka ko e Puleʻanga Faka-Mīsaia ko iá ko e founga ia ʻe fakatonuhiaʻi ai ʻa e huafa toputapu ʻo Sihová tonu pea te ne fakahoko ai ʻa ʻene taumuʻa maʻongoʻonga ki he foʻi māmaní. Ko ha taha pē ʻokú ne mahuʻingaʻia moʻoni ʻi he meʻá ni te ne fakamuʻomuʻa ʻa e Puleʻangá ʻi heʻene moʻuí. Naʻe moʻoni ʻeni ʻi he ʻuluaki senitulí pea ʻoku pau pē ʻoku toe moʻoni ʻi he taimí ni he ʻoku lolotonga pule ʻa e Puleʻangá. ʻOku fakahāhā ʻe hoʻo tōʻonga moʻuí ʻokú ke fuofua kumi ki he Puleʻanga ʻo e ʻOtuá?​—Mt. 6:33.

2. Ko e hā ʻa e ngaahi meʻa ʻoku tuli tōtōivi ki ai ʻa e kakai tokolahi?

² ʻOku mahuʻingaʻia lahi ange ʻa e kakai tokolahi ʻi he ngaahi meʻa kehe. ʻOku nau tuli tōtōivi ki he koloá pea mo e valá, meʻakai pea mo e ngaahi meʻa fakamatelié mo e ngaahi meʻa fakafiefia kehe ʻa ia ʻoku malava ke fakatau mai ʻaki ʻa e paʻangá. (Mt. 6:31, 32) ʻOku fakahāhā ʻe heʻenau tōʻonga moʻuí ʻa e tokanga makehe kiate kitá pea mo e fiefiá. ʻOku nau ʻai ʻa e ʻOtuá ʻo fika ua ʻi heʻenau moʻuí​—ʻo kapau ʻoku ʻi ai pē haʻanau tui kiate ia.

3. (a) Ko e hā ʻa e faʻahinga koloa naʻe fakalototoʻaʻi ʻe Sīsū ʻa ʻene kau ākongá ke nau kumi ki ai, pea ko e hā hono ʻuhingá? (e) Ko e hā ʻoku ʻikai fiemaʻu ai ke fuʻu hulu fau ʻa e tokanga ki he ngaahi fiemaʻu fakamatelié?

³ Ka naʻe ʻoange ʻe Sīsū ki heʻene kau ākongá ʻa e akonaki  ko ʻení: “ʻOua naʻa faʻoaki koloa maʻamoutolu ʻi mamani,” koeʻuhi ʻoku ʻikai tolonga ʻo taʻengata ʻa e ngaahi koloa peheé. Naʻá ne pehē: “Kae faʻoaki koloa maʻamoutolu ʻi langi,” ʻaki hono tauhi ʻa Sihova. Naʻá ne ekinaki ki hono kau muimuí ke nau tauhi maʻu honau matá ke “huʻufataha,” ʻo fakahanga ʻenau tokangá ki he meʻa pē ʻe taha, ko e fai ʻo e finangalo ʻo e ʻOtuá. Naʻá ne tala kiate kinautolu: “ʻOku ʻikai te mou lava ke ʻeikiʻaki ʻa e ʻOtua mo Koloa fakatouʻosi.” Kae fēfē ʻa e ngaahi fiemaʻu fakamatelie kuo pau ke maʻú​—ʻa e meʻakai, vala mo e nofoʻanga? Naʻe akonaki ʻa Sīsū: “ʻOua naʻa mou lotomoʻua.” Naʻá ne fakahanga ʻenau tokangá ki he fanga manupuná​—he ʻoku fafangaʻi kinautolu ʻe he ʻOtuá. Naʻá ne fakalototoʻaʻi hono kau muimuí ke nau ako ha meʻa mei he ngaahi matalaʻiʻakaú​—he ʻoku fakakofu fakaʻofoʻofa kinautolu ʻe he ʻOtuá. ʻIkai ʻoku mahuʻinga ange ʻa e kau sevāniti fakaetangata ʻatamai poto ʻa Sihová ʻi ha taha pē ʻo e ngaahi meʻá ni? Naʻe pehē ʻe Sīsū: “Ka mou [“hanganaki fuofua,” NW] kumi . . . ki hono puleʻanga, mo e maʻoniʻoni aʻana, pea ʻe ʻatu mo ia foki ʻa e ngāhi meʻa ko ia kotoa.” (Mt. 6:19-34) ʻOkú ke tui ki ai? ʻOku fakahāhā ia ʻe hoʻo ngaahi ngāué?

ʻOua ʻe Tuku ke Kāsia ʻa e Moʻoni ʻo e Puleʻangá

4. Kapau ʻoku fuʻu fakamamafa lahi ha taha ki he ngaahi meʻa fakamatelié, ʻe iku nai ki he hā? Fakatātaaʻi ʻa e meʻa ni.

⁴ Kapau ʻoku fuʻu hulu fau ʻa e tokanga ʻa ha taha ʻo kau ki he ngaahi meʻa fakamatelié, ʻoku malava ke iku ai ki ha fakatuʻutāmaki. Neongo ʻokú ne taukaveʻi haʻane mahuʻingaʻia ʻi he Puleʻangá, kapau ʻokú ne fakamuʻomuʻa ʻa e ngaahi meʻa kehé ʻi hono lotó, ʻe kāsia leva ai ʻa e moʻoni ʻo e Puleʻangá. (Mt. 13:18, 19, 22) Ko e fakatātā, ʻi ha taimi ʻe taha naʻe ʻeke ai ʻe ha tokotaha pule koloaʻia kei talavou kia Sīsū: “Ko e ha te u fai, kae tō moʻoku ʻa e moʻui taʻengata”? Naʻe fakahāhā ʻe he anga ʻo ʻene tali ki he tali naʻe fai ange ʻe Sīsuú ko ha tokotaha ia naʻe moʻui taau pea fai lelei ki he niʻihi kehé. Ka naʻe fuʻu tōtuʻa ʻa ʻene mahuʻingaʻia ki heʻene ngaahi koloa fakamatelié. Naʻe ʻikai malava ke ne fakamavaheʻi ia mei ai ka ne hoko ko ha tokotaha muimui ʻo Kalaisi. Ko ia naʻá ne tuku ange atu ha faingamālie naʻe mei malava ai ke taki atu ai ia ke ne hoko ko ha tokotaha pule fakataha mo  Kalaisi ʻi he Puleʻanga fakahēvaní. Hangē ko ia naʻe leaʻaki ʻe Sīsū ʻi he taimi ko iá: “Hono ʻikai faingataʻa ki he kakai maʻu paʻanga ke hu ki he puleʻanga ʻo e ʻOtua!”​—Mk. 10:17-23.

5. (a) Ko e hā ʻa e ngaahi meʻa naʻe fakalototoʻaʻi ʻe Paula ʻa Tīmote ke ne feʻunga pē ai, pea ko e hā hono ʻuhingá? (e) ʻOku anga-fēfē ʻa hono ngāueʻaki ʻe Sētane ʻa e “ofa ki he paʻanga” ko ha tauhele fakatupu-ʻauha?

⁵ Hili ha ngaahi taʻu mei ai, naʻe tohi ʻa e ʻapositolo ko Paulá kia Tīmote, ʻa ia naʻe ʻi ʻEfesō he taimi ko iá, ko ha senitā fakaepisinisi koloaʻia. Naʻá ne fakamanatu kiate ia: “He talaʻehai naʻa tau haʻu mo kitautolu ha meʻa ki mamani, koeʻuhi foki ʻe ʻikai te tau lava ke ʻalu mo kitautolu ha momoʻi meʻa: pea ʻi heʻetau maʻu ʻetau meʻakai mo e kofu, te tau feʻunga pe ʻi he meʻa ko ia.” ʻOku totonu ke ngāue ke tokonaki mai ha “meʻakai mo e kofu” feʻunga kiate kita pea mo hoto fāmilí. Ka naʻe fakatokanga ʻa Paula: “Ko kinautolu kuo pau honau loto ke koloaʻia, ʻoku nau to ki he ʻahiʻahi, mo e tauhele, mo e ngaahi holi kehekehe, ʻa ia ʻoku fakasesele pea ko e meʻa ʻoku te lavea ai; ko e faʻahinga meʻa ʻoku nau lomekina ʻa e kakai ki he ʻauha mo e malaʻia.” ʻOku olopoto ʻa Sētane. Te ne ʻuluaki fakataueleʻi nai ha taha ʻi ha ngaahi founga siʻisiʻi. ʻOku faʻa toki muimui mai ʻi he meʻá ni ha vilitaki ʻoku lahi ange​—hangē ko ha faingamālie ki ha hiki lakanga ki ha ngāue ʻoku vahe lahi ange ka ʻoku fiemaʻu ke toʻo atu ai ʻa e taimi ia naʻe vaheʻi ki muʻa ki he ngaahi meʻa fakalaumālié. Kapau ʻoku ʻikai te tau tokanga, ʻoku malava ʻe he “ofa ki he paʻanga” ʻo kāsia ʻa e ngaahi meʻa mahuʻinga taʻe hano tatau ʻo e Puleʻangá. Hangē ko ia naʻe leaʻaki ʻe Paulá: “Ko e niʻihi ʻi heʻenau ala ki he meʻa ko ia [ko e paʻanga] kuo nau hē mei he lotu, pea kuo nau hokohokaʻi ʻaki ʻa kinautolu ʻa e ngaahi mamahi lahi.”​—1 Tīm. 6:7-10.

6. (a) Ko e hā kuo pau ke tau faí ke fakaʻehiʻehi mei hano maʻu kita ʻe he tauhelé? (e) Ko ha faʻahinga fakakaukau ia ʻoku fehoanaki mo e moʻoniʻi meʻa ʻi he vakai ki he tuʻunga fakaʻikonōmika ʻo e māmaní he ʻaho ní?

⁶ ʻI he ʻofa moʻoni ki hono tokoua Kalisitiané, naʻe ekinaki ʻa Paula kia Tīmote: “Hola mei he ngaahi meʻa pehe,” pea, “Tau ʻa e tau lelei ʻo e tui.” (1 Tīm. 6:11, 12) ʻOku fiemaʻu ʻa e feinga tōtōivi koeʻuhi ke ʻoua naʻa tau tafia fakataha atu mo e founga moʻui holi ki he ngaahi meʻa fakamatelie ʻo e māmani ʻoku takatakai kiate kitautolú. Ka ʻo kapau ʻoku tau ngāue  mālohi ʻo fetāiaki mo ʻetau tuí, ʻe ʻikai ke teitei liʻaki kitautolu ʻe Sihova. Neongo ʻa e totongi mamafa ʻo e ngaahi meʻa pea mo e mafola lahia ʻo e taʻe maʻu ngāué, te ne ʻai ke pau ʻoku tau maʻu ʻa e meʻa ʻoku mātuʻaki fiemaʻu kiate kitautolú.​—Hep. 13:5, 6.

Naʻe ʻOmai ʻe he Muʻaki Kau Ākongá ha Sīpinga

7. ʻI hono fekauʻi atu ʻe Sīsū ʻa e kau ʻapositoló ke malanga ʻi ʻIsilelí, ko e hā ʻa e ngaahi fakahinohino naʻá ne ʻoange kiate kinautolú, pea ko e hā naʻe feʻungamālie ai ia?

⁷ Hili ʻa hono akoʻi feʻungamālie ʻe Sīsū ʻa ʻene kau ʻapositoló naʻá ne fekauʻi atu kinautolu ʻi ʻIsileli ke nau malangaʻi ʻa e ongoongo leleí. “Kuo ofi ʻa e Puleʻanga ʻo Hevani.” Ko ha pōpoaki fakatupu fiefia moʻoni ē! Naʻe ʻi honau lotolotongá ʻa Sīsū Kalaisi, ko e Tuʻi Faka-Mīsaiá. Koeʻuhi naʻe līʻoa atu ʻe he kau ʻapositoló ʻa kinautolu ki he ngāue ʻa e ʻOtuá, naʻe ekinaki ai ʻe Sīsū kiate kinautolu ke nau tui pau ʻe tokangaʻi kinautolu ʻe he ʻOtuá. Ko ia naʻá ne pehē: “ʻOua naʻa toʻo ha meʻa ki he hala, ha tokotoko, pe ha kato ʻoho, pe ha ma, pe ha paʻanga; pe te mou taki sote ʻe ua. Pea ka mou ka hu ki ha fale, mou nofo pe ai, pea hiki pe mei ai.” (Mt. 10:5-10; Luke 9:1-6; 10:4-7) Naʻe fakapapauʻi ʻe Sihova ke fakalato ʻa e ngaahi meʻa ʻoku fiemaʻu kiate kinautolú ʻo fakafou ʻi honau kaungā-ʻIsilelí, ʻa ia naʻa nau angaʻaki ʻa hono talitali lelei ʻa e kau solá.

8. (a) Ko e hā naʻe toe ʻoange ai ʻe Sīsū ha ngaahi fakahinohino kehe ʻi he ki muʻa siʻi pē peá ne pekia? (e) Ka neongo ia, ko e hā naʻe kei fiemaʻu ke fakamuʻomuʻa ʻi heʻenau moʻuí?

⁸ Ki mui mai ai, ki muʻa siʻi pea pekia ʻa Sīsuú, naʻá ne fakaongo atu ki heʻene kau ʻapositoló te nau ngāue ʻi he ngaahi tuʻunga kuo liliu. Tupu mei ha fakafepaki fakaepuleʻanga, heʻikai nai ke kei fai loto-fiefai ʻa e anga-talitali kakaí ʻi ʻIsileli. Pehē foki, te nau ʻoatu leva ʻa e pōpoaki ʻo e Puleʻangá ki he ngaahi fonua Senitailé. ʻI he taimi ko ʻení te nau ʻave leva ha “kato paʻanga” mo ha “kato ʻoho.” Ka neongo ia, naʻe pau ke nau hanganaki fuofua kumi ki he Puleʻanga ʻo Sihová pea mo ʻene māʻoniʻoni ʻaʻaná, ʻo nau tui pau ʻe fai tāpuekina ʻe he ʻOtuá ʻa ʻenau ngaahi feinga ke maʻu ʻa e meʻakai mo e kofu ʻoku fiemaʻu kiate kinautolú.​—Luke 22:35-37.

9. (a) Naʻe anga-fēfē ʻa hono fakamuʻomuʻa ʻe Paula ʻa e Puleʻangá? (e) Naʻe anga-fēfē ʻa hono tokangaʻi ʻene ngaahi fiemaʻu fakaesinó? (f) Ko e hā ʻa e akonaki naʻá ne ʻoange ki he niʻihi kehé ʻo fekauʻaki mo e meʻá ni?

 ⁹ Naʻe fakahā ʻe he ʻapositolo ko Paulá ha faʻifaʻitakiʻanga lelei ʻo e anga ʻo hono ngāueʻaki ʻa e akonaki ʻa Sīsuú. Naʻe fokotuʻu ʻe Paula ʻa ʻene moʻuí ʻi he ngāue fakafaifekau. (Ng. 20:24, 25) ʻI heʻene ʻalu ki ha feituʻu ke malanga ai naʻá ne tokangaʻi ʻene ngaahi fiemaʻu fakamatelié ʻaki ʻa ʻene ngāue ko e tuitui tēniti. Naʻe ʻikai te ne ʻamanekina ke tokangaʻi ia ʻe he niʻihi kehé. (Ng. 18:1-4; 1 Tes. 2:9; 1 Kol.1Ko 9:18) Ka naʻá ne tali loto-houngaʻia ʻa e anga-talitali kakai mo e ngaahi meʻaʻofa ʻi he taimi naʻe fiemaʻu ai ʻe he niʻihi kehé ke fakahā ʻa ʻenau ʻofá mo ʻenau houngaʻiá ʻaki ʻa e founga ko ení. (Ng. 16:15, 34; Fili. 4:15-17) Naʻe ʻikai te ne fakaʻaiʻai ʻa e kau tangata mo e kau fefine Kalisitiané ke nau siʻaki ʻa honau ngaahi fatongia fakafāmilí ka nau ō ʻo malanga, ka ke nau fakahoko honau ngaahi fatongia kehekehe ʻi ha founga mafamafatatau. Naʻá ne akonakiʻi kinautolu ke nau ngāue ʻaki ʻa honau nimá, ke ʻofa ki honau ngaahi fāmilí pea ke nau nima-homo ʻi he vahevahe atu ki he niʻihi kehé. (ʻEf. 4:28; 2 Tes. 3:7-12; Tai. 2:3-5) Naʻá ne toe ekinaki foki kiate kinautolu ke nau ʻai ʻenau falalá, ʻo ʻikai ʻi he ngaahi koloa fakamatelié, ka ʻi he ʻOtuá pea ngāueʻaki ʻenau moʻuí ʻi ha founga ke fakahāhā ai ʻoku mahino moʻoni kiate kinautolu ʻa e ngaahi meʻa ʻoku mahuʻinga ange ʻi he moʻuí. ʻI he fehoanaki mo e ngaahi akonaki ʻa Sīsuú, ko hono ʻuhingá ke fuofua kumi ki he Puleʻanga ʻo e ʻOtuá pea mo ʻene māʻoniʻoni ʻaʻaná.​—Fili. 1:9-11.

Hanganaki Fakamuʻomuʻa ʻa e Puleʻangá ʻi Hoʻo Moʻuí

10. (a) Ko e hā hono ʻuhinga ʻo e pehē ke ‘fuofua kumi ki he Puleʻangá’? (e) Ka ko e hā ʻoku totonu ke ʻoua naʻa siʻakí?

¹⁰ Ko e hā hono lahi ʻo ʻetau kau ki hono vahevahe atu ʻa e ongoongo lelei ʻo e Puleʻangá ki he niʻihi kehé? ʻOku fakatuʻunga ʻa hono konga ʻi hotau ngaahi tuʻungá, pea ki he tuʻunga lahi ʻi he loloto ʻo ʻetau houngaʻiá. Manatuʻi naʻe ʻikai ke pehē ʻe Sīsū ia, ‘Kumi ki he Puleʻangá ʻi he taimi ʻoku ʻikai ke toe ʻi ai ai ha meʻa kehe ke ke faí.’ Pea naʻe ʻikai te ne pehē, ‘ʻI hoʻo talanoa tātātaha pē ʻo kau ki he Puleʻangá, ʻokú ke fai ʻa ia kotoa ʻoku fiemaʻú.’ Pea naʻe ʻikai te ne pehē,  ‘Kamataʻaki ʻa e faivelenga ki he ngaahi meʻa ʻo e Puleʻangá; ka ʻo kapau ʻoku hā ngali tuai ʻa e hoko mai ʻa e Fokotuʻutuʻu Foʻoú, fai pē ha meʻa ʻi he ngāue ʻa e ʻOtuá kae moʻuiʻaki ha founga moʻui ʻo hangē ko e kakai kehé.’ ʻI he ʻilo lelei ʻa e mahuʻinga ʻo e Puleʻangá, naʻá ne fakahaaʻi ʻa e finangalo ʻo ʻene Tamaí ʻi he meʻá ni, ʻo ne pehē: “Hokohoko kumi ki hono puleʻanga.” Pe, hangē ko ia naʻe tohi ʻe he ʻapositolo ko Mātiú: “Ko ia, hanganaki fuofua kumi ki he puleʻanga pea mo ʻene māʻoniʻoni ʻaʻana.” (Luke 12:31, NW; Mt. 6:33, NW) Neongo ʻoku fiemaʻu ki he tokolahi taha ʻo kitautolu ke tau fai ha faʻahinga ngāue ke tokangaʻi ʻa e ngaahi fiemaʻu fakaesino kiate kitautolú pea mo hotau ngaahi fāmilí, ka ʻo kapau ʻoku tau maʻu moʻoni ʻa e tuí, ʻe fakatefito ʻa ʻetau moʻuí ʻi he ngāue ko ia kuo ʻomai ʻe he ʻOtuá kiate kitautolu ʻo fekauʻaki mo hono Puleʻangá. Kaekehe, ʻe ʻikai te tau siʻaki ʻa hotau ngaahi fatongia fakafāmilí.​—1 Tīm. 5:8; Pal. 29:15.

11. (a) Naʻe anga-fēfē ʻa hono fakatātaaʻi ʻe Sīsū ʻa e moʻoniʻi meʻa ko ia heʻikai malava ke ngāue tatau ʻa e tokotaha kotoa pē ʻi hono fakamafola atu ʻa e pōpoaki ʻo e Puleʻangá? (e) Ko e hā ʻa e ngaahi meʻa ʻoku kaunga ki he meʻá ni?

¹¹ ʻOku malava ʻe he niʻihi ʻo kitautolu ke vaheʻi ha taimi lahi ange ki he ngāue fakamalangá ʻi he niʻihi kehe. Ka naʻe fakahāhā ʻe Sīsū ʻi heʻene talanoa fakatātā ʻo fekauʻaki mo e ngaahi faʻahinga kehekehe ʻo e kelekelé, ʻe fua ʻa e faʻahinga kotoa ʻoku hangē honau lotó ko e kelekele leleí. Ko e hā hono lahí? ʻOku kehekehe ʻa e ngaahi tuʻunga ʻo e tokotaha taautaha. ʻOku kau ki he meʻá ni ʻa e taʻumotuʻá, moʻui fakasinó pea mo e ngaahi fatongia fakafāmilí. Ka ʻi he ʻi ai ha houngaʻia moʻoní, ʻoku lahi leva ʻa e meʻa ʻoku malava ke fakahokó.​—Mt. 13:19, 23.

12. Ko e hā ʻa e taumuʻa fakalaumālie lelei ʻoku fakalototoʻaʻi mai tautefito ki he fānau tupú ke nau fakakaukau ki ai?

¹² ʻOku lelei ke tau maʻu ha ngaahi taumuʻa ʻa ia ʻe tokoni kiate kitautolu ke fakalahi ʻa ʻetau kau ki he ngāue fakamalanga ʻo e Puleʻangá. ʻOku totonu ke fakakaukau fakamātoato ʻa e fānau tupú ʻo kau ki he faʻifaʻitakiʻanga lelei ʻaupito ʻa e tokotaha Kalisitiane faivelenga kei siʻi ko Tīmoté. (Fili. 2:19-22) Ko e hā ha meʻa ʻe toe lelei hake ʻi heʻenau kau ki he ngāue fakamalanga taimi-kakató ʻi he taimi ʻoku ʻosi ai ʻenau akó mei he akoʻangá? ʻE toe ʻaonga foki ki he faʻahinga taʻumotuʻa angé ke nau fokotuʻu ha ngaahi taumuʻa lelei fakalaumālie.

13. (a) Ko hai te ne fakapapauʻi ʻa e meʻa ʻoku malava ke ke fai fakafoʻituitui ʻi he ngāue ʻo e Puleʻangá? (e) Ko e hā ʻoku fakamoʻoniʻi ʻo kapau ʻoku tau kumi muʻomuʻa moʻoni ki he Puleʻangá?

 ¹³ ʻI he lelei ange ke ʻoua ʻe fakaangaʻi ʻa e faʻahinga ʻoku tau fakakaukau nai ʻoku malava ke nau ngāue ʻo toe lahi angé, ʻoku totonu ke ueʻi kitautolu ʻe he tuí ke tau ngāue ke laka ki muʻa fakaekita koeʻuhi kae malava ke tau tauhi ʻa e ʻOtuá ki he kakato taha te tau ala fai ʻi he ngaahi tuʻunga ʻotautolu pē. (Loma 14:10-12; Kal. 6:4) Hangē ko ia ʻoku hā ʻi he meʻa ʻo fekauʻaki mo Siopé, ʻoku taukaveʻi ʻe Sētane ʻo pehē ʻoku tau mahuʻingaʻia tefito ʻi heʻetau ngaahi koloa fakamatelié, ʻi heʻetau fiemālie ʻatautolu pē pea mo e lelei fakaekitá, pea ko ha taumuʻa siokita ʻoku tau tauhi ai ʻa e ʻOtuá. Ka ʻo kapau ʻoku tau kumi muʻomuʻa moʻoni ki he Puleʻangá, ʻoku tau kau ʻi hono fakamoʻoniʻi ko e Tēvoló ko e tokotaha-loi ʻataʻatā ia. ʻOku tau fakamoʻoniʻi ʻoku muʻomuʻa ʻi heʻetau moʻuí ʻa e ngāue ki he ʻOtuá kae ʻikai ko e ngaahi koloa fakamatelié pe ko e fiemālie fakaekitá. ʻI he leá pea mo e ngāué ʻoku tau fakamoʻoniʻi ai ʻa ʻetau ʻofa loloto kia Sihová, mo ʻetau poupou mateaki ki hono tuʻunga-haú pea mo ʻetau ʻofa ki hotau kaungātangatá.​—Pal. 27:11; Siope 1:9-11; 2:4, 5.

14. (a) Ko e hā ʻoku ʻaonga ai ke ʻi ai ha taimi-tēpile ki he ngāue fakamalangá? (e) Ko e hā hono lahi ʻo e kau ʻa e Kau Fakamoʻoni tokolahi ki he ngāue fakamalangá, pea ko e hā hono ʻuhingá?

¹⁴ ʻOku malava ke tokoni kiate kitautolu ha taimi-tēpile ke tau lavaʻi ha meʻa lahi ange. Naʻa mo Sihova ʻoku ʻi ai ʻene ‘ngaahi taimi kuo kotofa’ ki hono fakahoko ʻo ʻene taumuʻá, pea ko e meʻa lelei ke tau faʻifaʻitaki ki he meʻa ko iá. (ʻEki. 9:5; Mk. 1:15; Kal. 4:4) Kapau ʻoku malava, ʻoku lelei ke kau ʻi he ngāue fakamalangá tuʻo taha pe ko ha ngaahi taimi lahi ange kuo vaheʻi ʻi he uike taki taha. ʻOku laui mano ʻa e Kau Fakamoʻoni ʻa Sihova ʻi māmani lahi kuo nau hoko ko ha kau taaimuʻa fakataimi pea ʻoku nau fiefia ke fakamoleki ʻo fakaʻavalisi ki he houa ʻe ua pe lahi ange ʻi he ʻaho taki taha ʻi hono malangaʻi ʻa e ongoongo leleí. ʻOku toutou fai pehē ʻa e niʻihi; ka ko e niʻihi kehe, ʻoku nau fai pehē pē ʻi ha ngaahi taimi ʻi he taʻu taki taha. ʻOku toe ʻi ai mo e laui afe ʻoku nau ngāue ko ha kau taaimuʻa tuʻumaʻu, ʻo nau ngāue ʻi he ʻavalisi ʻo ʻikai toe siʻi hifo ʻi he houa ʻe tolu ʻi he ʻaho ki hono fanongonongo ʻa e pōpoaki ʻo e Puleʻangá. ʻOku toe ʻi ai mo e  niʻihi kehe, ko e kau taaimuʻa makehe mo e kau misinale, ʻoku nau toe fakamoleki ʻa e taimi lahi ange ki he ngāue ʻo e Puleʻangá. Pea ʻoku tatau ai pē pe ʻoku tau ʻi ai tonu ʻi he ngāue fakamalangá pe ʻikai, ʻoku malava ke tau fekumi ki ha ngaahi faingamālie ke vahevahe atu ai ʻa e ʻamanaki ʻo e Puleʻangá ʻi he taimi ngali faingamālie kotoa pē ki ha taha pē te ne fie fanongo ki ai. (Fehoanaki mo Sione 4:7-15.) ʻOku totonu kiate kitautolu kotoa ke tau fakakaukau fakamātoato ʻo kau ki he ʻuhinga ʻo e kikite ʻa Sīsū, ʻa ia ko e “ogoogolelei ni oe buleaga e malaga aki i mamani kotoabe, koe mea fakamooni ki he buleaga kotoabe, bea e toki hoko mai ae ikuaga.” ʻOku totonu ko ʻetau holí ke kau ki he kakato taha ʻi he ngāue ko iá ʻo fakatatau ki heʻetau malava ʻi hotau ngaahi tuʻungá.​—Mt. 24:14, PM; ʻEf. 5:15-17.

15. ʻI he fekauʻaki mo ʻetau ngāue fakamalangá, ko e hā ʻokú ke fakakaukau ai ʻoku kaungatonu he taimí ni ʻa e akonaki ʻia 1 Kolinitō 15:58?

¹⁵ ʻI he tapa kotoa pē ʻo e foʻi māmaní, tatau ai pē pe ko e hā ʻa e puleʻanga ʻoku nofo ai ʻa e Kau Fakamoʻoni ʻa Sihová ʻoku nau fāʻūtaha ʻi he kau longomoʻui ki he faingamālie maʻongoʻonga ko eni ʻo e ngāué. ʻOku nau ngāueʻaki kiate kinautolu ʻa e akonaki fakamānavaʻi ʻa e Tohitapú: “Ke mou tuʻu maʻu, taʻe ngaūe, ʻo mou tupulekina maʻu ai pe ʻi he ngaue ʻa e ʻEiki: ʻi hoʻomou ʻilo ni, ko e meʻa ki he ʻEiki, ko hoʻomou fakaongosia ʻoku ʻikai ko e laufanō ia.”​—1 Kol.1Ko 15:58.

Fetalanoaʻaki ʻo Fakamanatu

● ʻI he pehē ʻe Sīsū ke fuofua kumi ki he Puleʻangá, ko e hā naʻá ne fakahā ʻoku totonu ke ʻai ke fika uá?

● Ko e hā ʻa e anga ʻo e fakakaukau ʻoku totonu ke tau maʻu ʻo fekauʻaki mo e tokanga ki he ngaahi fiemaʻu fakaesino kiate kitautolu pea mo hotau fāmilí? Ko e hā ʻa e tokoni ʻe ʻomai ʻe he ʻOtuá kiate kitautolú?

● ʻOku mahuʻinga tatau pē ʻa ʻete kau lahi ki he ngāue ʻo e Puleʻangá mo haʻate kau pē ki ai? Ko e hā hono ʻuhingá?

[Fehuʻi ki he Ako]