Vahe 22

Hokohoko Atu ke Leaʻaki ʻa e Folofola ʻa e ʻOtuá ʻi he Loto-Toʻa

1. (a) Ko e hā ʻa e ongoongo lelei naʻe fanongonongo ʻe he kau ākonga ʻa Sīsuú ʻo kamata ʻi he Penitekosi ʻo e 33 T.S., ka ko e hā ʻa e tali ki ai ʻa e kau pule mo e kau tangata matuʻotuʻa ʻo e kau Siú? (e) Ko e hā ʻa e ngaahi fehuʻi ʻoku malava nai ke tau ʻeke kiate kitautolu ʻo fekauʻaki mo e meʻá ni?

 NAʻE hoko ʻa e ngaahi meʻa mahuʻinga lahi tahá ʻi he taʻu ʻe 4,000 tupu ʻo e hisitōlia ʻo e tangatá. Naʻe pani ai ʻa e ʻAlo tonu ʻo e ʻOtuá, ʻa Sīsū Kalaisi, ke ne hoko ko e Tuʻi ki he māmaní kotoa ʻi he kahaʻú. Neongo ʻa hono tāmateʻi fakalao ʻa Sīsū ʻi hono fakatupunga ʻe he ngaahi fili fakalotú, naʻe fokotuʻu hake ʻe Sihova ʻa hono ʻAló mei he maté. Fakafou mai ʻiate ia kuo malava ai ke maʻu ʻa e fakamoʻui mo e ʻamanaki ki he moʻui taʻengata. Ka ʻi he taimi naʻe fanongonongo fakahāhā ai ʻe he kau ākonga loto-tōnunga ʻa Sīsuú ʻa e ongoongo lelei ko ʻení, naʻe hoko ai ha fakafepaki kakaha. ʻUluakí, naʻe tuku pilīsone ai ʻa e toko ua ʻo e kau ʻapositoló, pea naʻe toe hoko pehē pē kiate kinautolu kotoa. Naʻe haha mo tuʻutuʻuni kiate kinautolu ke taʻofi ʻenau leaʻaki ʻo makatuʻunga ʻi he huafa ʻo Sīsuú. (Ng. 4:1-3, 17; 5:17, 18, 40) Ko e hā naʻe totonu ke nau faí? Ko e hā naʻá ke mei fai ʻe koe? Naʻá ke mei hokohoko atu ke fai fakamoʻoni loto-toʻa?

2. (a) Ko e hā ʻa e ongoongo lelei fakaofo ange ʻoku fiemaʻu ke fanongonongo ʻi hotau ʻahó ni? (e) Ko hai kuó ne maʻu ʻa e fatongia ki hono fai iá?

² ʻI he taʻu 1914 T.S. naʻe hoko ai ha toe meʻa fakaofo ange ʻa ia ʻoku ʻi ai hono kaunga mahuʻinga ki he ʻuniveesí kotoa. Naʻe fokotuʻu ai ʻi hēvani ʻa e Puleʻanga ʻo e ʻOtuá ʻi he mafai ʻo Sīsū Kalaisí. Ko hono hokó, naʻe lī hifo ai ki he māmaní ʻa Sētane pea mo ʻene kau tēmenioó. (Fkh. 12:1-5, 7-12) Naʻe kamata mei ai ʻa e ngaahi ʻaho fakaʻosi ʻo e tuʻu fulikivanu lolotonga ní. Ki muʻa ke mate atu ʻa e toʻutangata ko ia naʻa  nau sio tonu ki he ngaahi meʻa naʻe hoko ʻi he 1914, ʻe laiki ʻe he ʻOtuá ʻa e ngaahi meʻa ʻo e tuʻu faka-Sētané fakakātoa ko ení. (Mt. 24:34) ʻE maʻu ʻe he kau hao moʻui atu mei aí ʻa e ʻamanaki ko e moʻui taʻengata. ʻI hono fakahoko ʻo e muʻaki taumuʻa ʻa e ʻOtuá, ʻe hoko ʻa e māmaní kotoa ko ha Palataisi. Kapau kuó ke ʻosi tali ʻa e ongoongo leleí ni, ʻokú ke maʻu ʻa e fatongia ke fakahā atu ia ki he niʻihi kehé. (Mt. 24:14) Ka ko e hā ʻa e tali ki ai ʻoku malava ke ke ʻamanekiná?

3. (a) Ko e hā ʻa e tali ʻa e kakaí ki he pōpoaki ʻo e Puleʻangá? (e) Ko ia ai, ko e hā ʻa e fehuʻi kuo pau ke tau fehangahangai mo iá?

³ Neongo ʻe tali loto-māfana nai koe ʻe ha niʻihi ʻi ho tuʻunga ko ha tokotaha-fanongonongo ʻo e Puleʻangá, ʻe loto-taʻehohaʻa pē ʻa e tokolahi taha. (Mt. 24:37-39) ʻE manuki nai ʻa e niʻihi pe fakafepaki kakaha kiate koe. Naʻe fakatokanga ʻe Sīsū ʻo pehē ʻe hoko nai ʻa e fakafepaki ʻe niʻihi mei ho kāinga ʻoʻou pē. (Luke 21:16-19) ʻE toe hoko nai ia ʻi he feituʻu ʻokú ke ngāue aí pe ko e ʻapi akó. ʻI he ngaahi feituʻu lahi ʻo e māmaní ʻoku aʻu ʻo hokosia ʻe he Kau Fakamoʻoni ʻa Sihová ha tapui faka-puleʻanga taʻetotonu. ʻI he fetaulaki tuʻu mo ha niʻihi pe ko e kotoa ʻo e ngaahi tuʻungá ni, te ke hokohoko atu ke leaʻaki ʻa e Folofola ʻa e ʻOtuá ʻi he loto-toʻa?

4. ʻOku lava ʻe heʻete fakapapauʻi fakaekitá ke pau ai te tau hokohoko atu ke tauhi loto-tōnunga ʻa e ʻOtuá?

⁴ ʻOku ʻikai ha toe veiveiua ʻokú ke loto ke ke hoko ko ha sevānti loto-toʻa ʻa e ʻOtuá. Ka, ko e niʻihi naʻa nau fakakaukau heʻikai ʻaupito ha meʻa te ne malava ke ne fakatafokiʻi kinautolú kuo nau siʻaki honau tuʻunga ko e kau fanongonongo ʻo e Puleʻangá. Ko hono kehe ʻaupitó, ʻoku ʻi ai ʻa e niʻihi kehe, kau ai ʻa e faʻahinga ʻoku nau anga loto-foʻi fakaenatula pē, ʻoku nau hokohoko atu taʻe toe tuku ko e kau sevāniti faivelenga ʻa e ʻOtuá. ʻE malava fēfē ke ke hoko ʻo fakapapauʻi ko e tokotaha koe ʻokú ke tuʻu “mau i he tui”?​—1 Kol.1Ko 16:13, PM.

ʻIkai Falala ki Hotau Mālohi ʻOtautolu Pē

5. (a) Ko e hā ʻa e fiemaʻu tefito ke fakamoʻoniʻi ko e kau sevāniti loto-tōnunga kitautolu ʻa e ʻOtuá? (e) Ko e hā ʻoku mātuʻaki mahuʻinga ai ʻa e ngaahi fakatahá?

⁵ Ko hono moʻoní, ʻoku lahi ʻa e ngaahi meʻa ʻoku fekauʻaki mo e hoko ko ha sevāniti loto-tōnunga ʻa e ʻOtuá. Ka ko e meʻa tefito ʻo e ngaahi meʻa kotoa ko iá ko e falala kia Sihova  mo ʻene ngaahi tokonakí. ʻOku anga-fēfē ʻa ʻetau fakahāhā ʻa e falala peheé? Ko e founga ʻe taha ko hono maʻu ʻa e ngaahi fakataha ʻa e fakatahaʻangá. ʻOku naʻinaʻi mai ʻa e Tohitapú kiate kitautolu ke ʻoua naʻa tau siʻaki ia. (Hep. 10:23-25) Ko e faʻahinga kuo nau hokohoko atu ko e kau fakamoʻoni loto-tōnunga ʻa Sihová, ʻo tatau ai pē pe ʻoku nau fehangahangai mo ha loto-hanganoa ʻa e kakaí pe ko ha fakatanga, kuo nau feinga mālohi ke nau maʻu maʻu pē ʻa e ngaahi fakatahá fakataha mo honau kaungālotú. ʻOku tupulaki ʻa ʻetau ʻilo ki he Tohitapú ʻi he ngaahi fakatahá ni, ka ʻoku ʻikai ko e fakamānako pē ʻi he ngaahi meʻa foʻou ʻokú ne tohoaki kitautolú. (Fehoanaki mo Ngāue 17:21.) ʻOku tupu ai ʻa ʻetau houngaʻia ki he ngaahi moʻoni ʻoku ʻiloʻi lelei, pea ʻoku ʻai ke māsila ange ai ʻa ʻetau tokanga ki he ngaahi founga ke ngāueʻaki ai iá. ʻE hoko ʻo maongo loloto ai ki hotau ʻatamaí mo hotau lotó ʻa e faʻifaʻitakiʻanga kuo fokotuʻu ʻe Sīsū maʻatautolú. (ʻEf. 4:20-24) ʻOku tohoaki ai kitautolu ʻo vāofi ki hotau ngaahi tokoua Kalisitiané ʻi he lotu fāʻūtaha pea ʻoku fakatupu-ongoʻimālohi ʻiate kitautolu taki taha ke hokohoko atu hono fai ʻa e finangalo ʻo e ʻOtuá. ʻOku tokonaki mai ʻe he laumālie ʻo Sihová ʻa e tākiekina ʻo fakafou mai ʻi he fakatahaʻangá, pea fakafou mai ʻi he laumālie ko iá ʻoku ʻi hotau lotolotongá ai ʻa Sīsū ʻi he taimi ʻoku tau fakatahataha ai ʻi hono huafá.​—Fkh. 3:6; Mt. 18:20.

6. ʻI ha feituʻu ʻoku tapui ai ʻa e Kau Fakamoʻoni ʻa Sihová, ko e hā ʻa e meʻa ʻoku fai ʻo fekauʻaki mo e ngaahi fakatahá?

⁶ ʻOkú ke maʻu maʻu pē ʻa e ngaahi fakatahá kotoa pea ʻokú ke ngāueʻaki fakafoʻituitui ʻa e meʻa ko ia ʻokú ke fanongo ki aí? ʻI he taimi ʻe niʻihi, ʻi he hoko ha tapui, kuo fiemaʻu ke fai ʻa e ngaahi fakatahá ʻi ha ngaahi kulupu tokosiʻi ʻi ha ngaahi ʻapi. ʻE kehekehe nai ʻa e ngaahi feituʻú mo e ngaahi taimí pea ʻe ʻikai ke faingamālie maʻu pē, ʻo fai nai ʻa e ngaahi fakataha ʻe niʻihi kuo valenga pō. Ka neongo ʻa ʻene taʻe faingamālié pe fakatuʻutāmaki ʻi he tuʻunga fakafoʻituituí, ʻoku feinga tōtōivi ʻa e ngaahi tokoua mo e tuofāfine loto-tōnungá ke nau ʻi he fakataha taki taha.

7. (a) Ko e toe founga fē te tau fakahāhā ai ʻetau falala kia Sihová? (e) ʻOku tokoniʻi fēfē kitautolu ʻe he meʻá ni ke tau hanganaki lea loto-toʻa?

⁷ ʻOku toe fakahāhaaʻi ʻa e falala kia Sihová ʻi he hanga maʻu pē kiate ia ʻi he lotu​—ʻo ʻikai ʻi ha tuʻunga ko ha meʻa  ʻoku angaʻaki hono fai tuʻumaʻu, ka ʻi he ʻiloʻi tupu mei he lotó ʻoku fiemaʻu kiate kitautolu ʻa e tokoni ʻa e ʻOtuá. ʻOkú ke fai pehē? Naʻe toutou lotu ʻa Sīsū ʻi he lolotonga ʻo ʻene ngāue fakafaifekau ʻi he māmaní. (Luke 3:21; 6:12, 13; 9:18, 28; 11:1; 22:39-44) Pea ʻi he pō ki muʻa pea tutuki iá naʻá ne naʻinaʻi ki heʻene kau ākongá: “Leʻo pe mo lotu, ke ʻoua naʻa mou hū ki ha ʻahiʻahi.” (Mk. 14:38) Kapau te tau fetaulaki mo ha loto-taʻehohaʻa lahi ki he pōpoaki fekauʻaki mo e Puleʻangá, ʻoku malava ke fakataueleʻi kitautolu ke tau fakamāmālie ʻi heʻetau ngāue fakamalangá. Kapau ʻoku manukiʻi kitautolu ʻe he kakaí pe kapau ʻoku ʻi ai ha toe fakatanga kakaha ange, ʻe fakataueleʻi nai kitautolu ke tau fakalongo pē koeʻuhi ke ʻoua ʻe hoko mai ia. Ka ʻo kapau te tau lotu tōtōivi ʻo kole ʻa e laumālie ʻo e ʻOtuá ke tokoniʻi kitautolu ke tau hanganaki lea ʻi he loto-toʻa, ʻe maluʻi ai kitautolu mei haʻatau foʻi ki he fakatauele ko iá.​—Luke 11:13; ʻEf. 6:18-20.

Ko ha Fakamatala Fekauʻaki mo e Fai Fakamoʻoni ʻi he Loto-Toʻá

8. (a) Ko e hā ʻoku mahuʻinga makehe ai kiate kitautolu ʻa e fakamatala ʻia Ngāué? (e) Tali ʻa e ngaahi fehuʻi ʻoku fokotuʻu mai ʻi he ngataʻanga ʻo e palakalafí ni, ʻo fakamamafaʻi ʻa e founga ʻoku malava ke tau maʻu ai ha ʻaonga mei he fakamatalá ni.

⁸ Ko e fakamatala ʻoku ʻi he tohi ʻa Ngāué ʻoku ʻi ai ʻene mahuʻinga makehe kiate kitautolu kotoa. ʻOkú ne fakahā ʻa e founga naʻe hanga ai ʻe he kau ʻapositoló mo e muʻaki kau ākonga kehé, ʻa e faʻahinga naʻa nau maʻu ʻa e ngaahi ongoʻi tatau pē mo kitautolú, ʻo ikuʻi ʻa e ngaahi faingataʻaʻiaʻangá pea hoko ʻo fakapapauʻi ai ko e kau fakamoʻoni loto-toʻa mo angatonu kinautolu ʻa Sihova. Tau vakaiʻi ange ha konga ʻo e fakamatala ko iá ʻaki ʻa e tokoni ʻa e ngaahi fehuʻi ʻi laló pea mo e ngaahi konga Tohitapu ʻoku ʻasi mai aí. ʻI heʻetau fai peheé, fakakaukau atu ki he founga ʻe malava ʻe koe ke maʻu fakafoʻituitui ai ha ʻaonga mei he meʻa te ke laú.

 Ko ha kau tangata tuʻunga fakaako māʻolunga ʻa e kau ʻapositoló? Ko e kau tangata anga-taʻeilifia fakaenatula pē kinautolu, ʻo tatau ai pē pe ko e hā ʻa e meʻa naʻe hokó? (Ng. 4:13; Sione 18:17, 25-27; 20:19)

 Ko e hā naʻá ne fakaivia ʻa Pita ke ne lea loto-toʻa ʻi he ʻao ʻo e fakamaauʻanga faka-Siu ʻa ia naʻá ne fakahalaiaʻi ʻa e ʻAlo tonu  ʻo e ʻOtuá ʻi he ngaahi uike siʻi pē ki muʻa ai? (Ng. 4:8; Mt. 10:19, 20)

 Ko e hā naʻe fai ʻe he kau ʻapositoló ʻi he ngaahi uike ki muʻa pea ʻomai kinautolu ki he ʻao ʻo e Sanitalimí? (Ng. 1:14; 2:1, 42)

 ʻI hono tuʻutuʻuni atu ʻe he kau pulé kiate kinautolu ke taʻofi ʻenau malangaʻaki ʻo makatuʻunga ʻi he huafa ʻo Sīsuú, ko e hā ʻa e tali naʻe fai ʻe Pita mo Sioné? (Ng. 4:19, 20)

 Hili hono tuku ange kinautolú, ko hai naʻa nau toe hanga ki ai ki ha tokoni? Naʻa nau kole kiate ia ke ne fakangata ʻa e fakatangá, pe ko e hā? (Ng. 4:24-31)

 Ko e hā ʻa e founga naʻe tokonaki mai ai ʻe Sihova ʻa e tokoni ʻi he taimi naʻe feinga ai ʻa e kau fakafepakí ke taʻofi ʻa e ngāue fakamalangá? (Ng. 5:17-20, 33-40)

 ʻI he founga fē naʻe fakahāhā ai ʻe he kau ʻapositoló naʻe mahino kiate kinautolu ʻa e ʻuhinga naʻe fakahaofi ai kinautolú? (Ng. 5:21, 41, 42)

 Naʻa mo e taimi naʻe movetevete ai ʻa e tokolahi ʻo e kau ākongá koeʻuhi ko e kakaha ʻo e fakatangá, ko e hā naʻa nau hokohoko atu hono faí? (Ng. 8:3, 4; 11:19-21)

9. (a) Ko e hā ʻa e ngaahi ola fakatupu fiefia naʻe hoko mei he ngāue fakamalanga ʻa e muʻaki kau ākongá? (e) Kuo tau hoko fēfē ʻo kau ki ai?

⁹ Naʻe ʻikai hoko ko e kulanoa pē ʻa ʻenau ngāue ʻo fekauʻaki mo e ongoongo leleí. ʻI he Penitekosi ʻo e 33 T.S. ʻoku fakafuofua ki he kau ākonga ʻe toko 3,000 naʻe papitaiso ai. “Pea fakautuutu ai ʻa e ului mai ki he ʻEiki ʻa ha kakai naʻe tui, ko e fuʻu tokolahi ʻo e kau tangata mo e kau fefine foki.” (Ng. 2:41; 4:4; 5:14) ʻI he faai mai ʻa e taimí naʻe fakahā ai ʻo pehē naʻa mo e tokotaha ʻo e kau fakatanga faivelenga lahi tahá, ko Saula ʻo Tāsusí, naʻá ne hoko ko ha Kalisitiane pea naʻá ne fai fakamoʻoni loto-toʻa ʻo kau ki he moʻoní. Naʻá ne hoko ʻo ʻiloa ko e ʻapositolo ko Paula. (Kal. 1:22-24) Kuo ʻikai tuku ʻa e ngāue naʻe kamata ʻi he ʻuluaki senitulí. Kuo hoko ʻo mālohi mo vave ange ʻa hono fai ʻo iá ʻi he “ngaahi ʻaho fakaʻosi” ni pea kuó ne aʻu ki he tapa kotoa pē ʻo e foʻi māmaní. Kuo tau maʻu ʻa e monū ke tau kau ki ai, pea ʻi heʻetau fai iá ʻoku malava ke tau ako ai mei he faʻifaʻitakiʻanga naʻe fokotuʻu ʻe he kau fakamoʻoni mateaki naʻa nau ngāue ki ai ki muʻa ʻiate kitautolú.

10. (a) Ko e hā ʻa e ngaahi faingamālie naʻe ngāueʻaki ʻe Paula ke fai fakamoʻoni ai? (e) ʻI he ngaahi founga fē ʻokú ke fakamafola atu ai ʻa e pōpoaki ʻo e Puleʻangá ki he niʻihi kehé?

¹⁰ ʻI he ako ʻa Paula ki he moʻoni ʻo kau kia Sīsū Kalaisí,  naʻe ʻikai te ne toe toloi-meʻa. “Pea ne hanga leva ʻo malangaʻaki ʻa Sisu . . . ʻo pehē, Ko e ʻAlo ʻo e ʻOtua ia.” (Ng. 9:20) Naʻá ne houngaʻia ʻi he ʻofa maʻataʻatā ʻa e ʻOtuá kiate iá pea naʻá ne ʻiloʻi ʻoku fiemaʻu ki he tokotaha kotoa pē ʻa e ongoongo lelei ko ia naʻá ne maʻú. Fakatatau ki he anga-fakafonua ʻo e taimi ko iá, koeʻuhi ko ha tokotaha-Siu ia naʻá ne ʻalu leva ki he ngaahi sinakoké, ʻa ia ko e ngaahi feituʻu faka-Siu ki he fakatahataha ʻa e kakaí, ke fai fakamoʻoni ai. Naʻá ne toe malanga fale-ki-he-fale pea fetalanoaʻaki ke ʻai ke fakakaukau ʻa e kakai ʻi he faiʻanga fakataú. Pea naʻá ne toe loto-lelei ke hiki atu ki ha ngaahi vāhenga-ngāue foʻou ke fanongonongo ai ʻa e ongoongo leleí.​—Ng. 17:17; 20:20; Loma 15:23, 24.

11. (a) ʻI he founga fē naʻe fakahāhā ai ʻe Paula, neongo ʻene loto-toʻá, naʻá ne toe ʻiloʻilo ʻi he founga naʻá ne fai fakamoʻoni aí? (e) Te tau fakahaaʻi fēfē nai ʻa e anga ko iá ʻi he taimi ʻoku tau fai fakamoʻoni ai ki he ngaahi kāinga, ngaahi kaungāngāue pe ngaahi kaungāako?

¹¹ Naʻe loto-toʻa ʻa Paula, ka naʻá ne toe ʻiloʻilo, ʻa ia ʻoku totonu ke pehē pē mo kitautolu. Naʻá ne malanga ki he kakai Siú ʻo fakatuʻunga ʻi he ngaahi talaʻofa naʻe fai ʻe he ʻOtuá ki heʻenau ngaahi kuí. Naʻá ne lea ki he kakai Kalisí ʻo fakatuʻunga ʻi he ngaahi meʻa ʻa ia naʻa nau maheni ki aí. ʻI he taimi ʻe niʻihi naʻá ne ngāueʻaki ʻa e meʻa naʻá ne hokosia tonu pē ʻe ia ʻi heʻene ako ʻo kau ki he moʻoní ko ha founga ia ke ne fai atu ai ha fakamoʻoni. Hangē ko ia naʻá ne fakamatalaʻí: “Pea ʻilonga ha meʻa ʻoku ou fai, ʻoku ou fai koeʻuhi ko e Kosipeli, koeʻuhi ke u ʻinasi ai fakataha mo e kakai kehe.”​—1 Kol.1Ko 9:20-23; Ng. 22:3-21.

12. (a) Neongo ʻa e loto-toʻá, ko e hā naʻe fai ʻe Paula ke fakaʻehiʻehi ai mei heʻene ʻai ke toutou fakafepaki ki he kau fakafepakí? (e) ʻI he taimi fē ʻoku fakapotopoto ai ke tau faʻifaʻitaki ki he faʻifaʻitakiʻanga ko iá, pea ʻi he founga fē? (f) ʻOku maʻu mei fē ʻa e mālohi ke hanganaki lea loto-toʻa?

¹² ʻI he taimi naʻe hoko ai ʻa e fakafepaki ki he ongoongo leleí ʻo hā ai ʻoku lelei taha ke malanga ʻi ha feituʻu kehe pe ke hiki ki ha vāhengangāue ʻe taha ʻi ha taimi, naʻe fai pehē ʻa Paula kae ʻikai te ne ʻai ke ne toutou fakafepaki ki he ngaahi fili ʻo e moʻoní. (Ng. 14:5-7; 18:5-7; Loma 12:18) Ka naʻe ʻikai ʻaupito te ne mā ʻi he ongoongo leleí. (Loma 1:16) Neongo naʻe taʻefakafiemālie kia Paula ʻa hono ngaohikoviʻi, ʻo aʻu ʻo fakamālohiʻi fakamamahi ʻe he kau fakafepakí, naʻá ne “malohi i ho mau Otua” ke hanganaki fai ʻa e ngāue fakamalangá.  Neongo ʻa e ngaahi tuʻunga faingataʻa naʻá ne fetaulaki mo iá, naʻá ne pehē: “Ka ko e ʻEiki naʻa ne ofi mai, mo ne fakamalohiʻi hoku loto, koeʻuhi ke kakato ʻiate au ʻa e tala ʻo e Kosipeli.” (1 Tes. 2:2, PM; 2 Tīm. 4:17) Ko e ʻulu ʻo e fakatahaʻanga Kalisitiané, ko e ʻEiki ko Sīsuú, ʻokú ne hokohoko atu hono tokonaki mai ʻa e mālohi ʻoku fiemaʻu ki hono fai ʻa e ngāue ko ia naʻá ne kikiteʻi ki hotau ʻaho ní.​—Mk. 13:10.

13. Ko e hā ʻokú ne fakahaaʻi ʻa e loto-toʻa faka-Kalisitiané, pea ko e hā hono makatuʻungá?

¹³ Kuo tau maʻu ʻa e ngaahi ʻuhinga mātuʻaki lelei ke hokohoko atu ai hono leaʻaki ʻa e Folofola ʻa e ʻOtuá ʻi he loto-toʻa, ʻo hangē pē ko ia naʻe fai ʻe Sīsū Kalaisi mo e kau sevāniti loto-tōnunga kehe ʻa e ʻOtuá ʻi he ʻuluaki senitulí. ʻOku ʻikai ʻuhinga ʻeni ia ke tau hoko ʻo anga-fefeka pe anga-fakafepaki. ʻOku ʻikai fiemaʻu ke hoko ʻo anga-taʻefakaʻatuʻi pe ke fakamālohiʻi ʻa e pōpoakí ki he faʻahinga ʻoku ʻikai te nau saiʻia aí. Ka heʻikai te tau foʻi koeʻuhi ko e loto-taʻehohaʻa ʻa e kakaí, pea heʻikai ke tau manavahē ʻo nofo fakalongo pē koeʻuhi ko e fakafepakí. Hangē pē ko Sīsuú, ʻoku tau tuhu ki he Puleʻanga ʻo e ʻOtuá ko e founga-pule totonu ia ki he māmaní kotoa. ʻOku tau leaʻaki ʻa e loto-maʻu koeʻuhi ʻoku tau fakafofongaʻi ʻa Sihova, ko e Hau Fakalevelevá, pea ko e pōpoaki ʻoku tau fanongonongo atú ʻoku ʻikai meiate kitautolu ia ka ʻoku meiate ia.​—Fili. 1:27, 28; 1 Tes. 2:13.

Fetalanoaʻaki ʻo Fakamanatu

● Ko e hā ʻoku mahuʻinga ai ke fakahā atu ʻa e pōpoaki fekauʻaki mo e Puleʻangá ki he tokotaha kotoa pē ʻe malavá? Ka ko e hā ʻa e ngaahi tali ʻoku totonu ke tau ʻamanekiná?

● ʻI he founga fē ʻoku tau fakahāhā ai ʻoku ʻikai te tau feinga ke falala ki hotau mālohi pē ʻotautolú ki hono tauhi ʻa Sihová?

● Ko e hā ʻa e ngaahi meʻa mātuʻaki mahuʻinga ʻoku tau ako mei he tohi ʻa Ngāué?

[Fehuʻi ki he Ako]