Vahe 9

Ko e Mālohi ʻo e ʻAmanaki ki he Toetuʻú

1. Ko e hā ʻa e ngaahi ʻamanaki fakaofo ʻoku ʻai ke malava ʻe he toetuʻú?

 KAPAU ʻe ʻikai ha toetuʻu, ʻoku ʻikai ha toe ʻamanaki ki ha moʻui ʻi he kahaʻú ki he faʻahinga ʻo e tangatá kuo maté. Ka ko Sihova, ʻi heʻene ʻofa maʻataʻatā, kuó ne fakaʻatā ai ʻa e faingamālie mahuʻinga taʻefakatataua ki he laui piliona kuo nau maté ke nau maʻu ʻa e moʻui taʻengatá. Ko hono olá, ʻoku tau toe maʻu ai ʻa e ʻamanaki fakatupu loto-māfana ke toe fakataha mo e ngaahi ʻofaʻanga kuo nau mohe ʻi he maté.​—Fehoanaki mo Maʻake 5:35, 41, 42; Ngāue 9:36-41.

2. (a) ʻI he ngaahi founga fē kuo fakamoʻoniʻi ai ʻoku mahuʻinga ʻa e toetuʻú ki hono fakahoko ʻa e taumuʻa ʻa Sihová? (e) ʻOku tautefito ki he taimi fē ʻoku hoko ai ʻa e ʻamanaki ki he toetuʻú ko ha matavai mahuʻinga ʻo e mālohi kiate kitautolu?

² Koeʻuhi ko e toetuʻú, ʻoku malava ai ʻe Sihova ke ne fakaʻatā ʻa Sētane ʻo taʻe hoko ai ha maumau tuʻuloa ki heʻene kau sevāniti angatonú, ke aʻu ki hono ngataʻanga ʻo ʻene feinga ke fakamoʻoniʻi ʻa ʻene taukaveʻi loto-kovi ʻa ʻia ʻoku pehē, “ʻE ʻatu ʻe ha tangata ʻene meʻa kotoa telia ʻene moʻui.” (Siope 2:4) Koeʻuhi naʻe fokotuʻu ʻa Sīsū mei he maté naʻá ne malava ai ke ʻoatu ʻa e mahuʻinga ʻo ʻene feilaulau fakaetangatá ʻi he ʻao ʻo e taloni fakahēvani ʻo ʻene Tamaí, pea ʻoku ʻi ai ʻene ʻaonga fakaefakahaofi-moʻui kiate kitautolu. Fakafou ʻi he toetuʻú ko kinautolu ko ia ʻoku kaungāʻea mo Kalaisí ʻoku fakatahaʻi ai kinautolu mo ia ʻi he Puleʻanga fakahēvaní. ʻI he taimi ʻoku tau inumia ai ʻa e ngaahi ʻahiʻahi ko ia ʻokú ne ʻai kitautolu ke tau fehangahangai mo e maté ʻoku hoko ʻa e toetuʻú ko ha matavai ia ʻo e mālohi ʻoku mamaʻo atu mei he mālohi anga-mahení kiate kitautolu kotoa kuo tau maʻu ʻa e tuí.

 ʻUhinga ʻOku Fakatefito Ai ki he Tui Faka-Kalisitiané

3. (a) ʻI he ʻuhinga fē ʻoku hoko ai ʻa e toetuʻú ko ha “tefitoʻi akonaki”? (e) Ko e hā hono ʻuhinga ʻo e toetuʻú ki he māmaní fakalūkufua?

³ Ko e toetuʻú, hangē ko ia ʻoku fakahā ʻia Hepelū 6:1, 2 (NW), ko ha “tefitoʻi akonaki,” ko e konga ia ʻo e makatuʻunga ʻo e tuí ʻa ia ka ʻikai ia heʻikai ʻaupito malava ke tau hoko ko ha kau Kalisitiane matuʻotuʻa. Ka ʻoku kehe ʻaupito eni ia ki he fakakaukau ʻa e māmaní fakalūkufua. ʻI he ʻikai ke ʻi ai ha tuʻunga fakalaumālié, ʻoku tokolahi ange ʻa e kakai ʻoku nau moʻui ʻo tuli pē ki he fiefiá. ʻOku nau sio ko e moʻui pē ko ení ʻoku moʻoní. (1 Kol.1Ko 15:32) Ko e faʻahinga ko ia ʻoku nau pīkitai ki he ngaahi lotu lahí, ʻi loto ʻi he Puleʻanga-Haʻa-Kalisitiané pe ʻi tuʻa, ʻoku nau fakakaukau kuo nau maʻu ha soulu taʻe faʻa mate, ʻa ia ʻokú ne ʻai ke ʻikai ke fiemaʻu ai ʻa e toetuʻú. a Ko ha taha pē ʻokú ne feinga ke fakafehoanaki ʻa e ongo foʻi fakakaukaú ni ʻokú ne ʻilo ʻoku toe puputuʻu ange ia ʻi he fokotuʻu ha ʻamanaki. ʻOku malava fēfē ke tau tokoni ki he faʻahinga ʻoku nau loto-lelei ke fanongó?​—Ng. 17:32.

4. (a) Ki muʻa ke malava ke houngaʻia ha taha ʻi he toetuʻú, ko e hā nai ʻoku fiemaʻu ke tau fetalanoaʻaki ki ai mo iá? (e) Ko e hā ʻa e ngaahi konga Tohitapu te ke ngāueʻaki ke fakamatalaʻi pe ko e hā ʻa e soulu? Ko e tuʻunga ʻo e kau maté? (f) Kae fēfē ʻo kapau ʻe ngāueʻaki ʻe ha taha ha liliu Tohitapu ʻoku ngalingali ʻokú ne fakaʻuliʻulilātaiʻi ʻa e ngaahi moʻoni ʻoku maʻu ʻi he ngaahi konga Tohitapu ko iá?

⁴ Ki muʻa ke malava ke houngaʻia ʻa e faʻahinga peheé ki he fakaofo ʻo e tokonaki ko e toetuʻú, ʻoku fiemaʻu ke mahino kiate kinautolu pe ko e hā ʻa e soulú pea mo e tuʻunga ʻoku ʻi ai ʻa e maté. ʻI he taimi lahi, ko ha ngaahi konga Tohitapu pē ʻe niʻihi ʻoku feʻunga ke ne fakamahino ʻa e ngaahi meʻá ni ki ha tokotaha ʻoku fiekaia ki he moʻoní. (Sēn. 2:7; ʻIsi. 18:4; Sāme 146:3, 4) Ka ʻoku ʻi ai ʻa e ngaahi liliu fakaeonopooni ʻe niʻihi mo e ngaahi pulusinga fakaleakeheʻi ʻo e Tohitapú ʻoku nau fakaʻuliʻulilātaiʻi ʻa e ngaahi moʻoni ko ení. Ko ia ʻe fiemaʻu nai ke fai ha fakakaukau ki he ngaahi kupuʻi lea naʻe ngāueʻaki ʻi he ngaahi ʻuluaki lea ʻo e Tohitapú.

5. Ko e hā haʻo tokoni ʻe fai ki ha tokotaha pehē ke mahino ki ai pe ko e hā ʻa e soulu?

 ⁵ ʻOku tautefito ʻa hono ʻaonga ʻo e New World Translation ʻi hono ngāueʻaki ki he meʻá ni, koeʻuhi he ʻokú ne liliu lea maʻu pē ʻa e foʻi lea faka-Hepelū ko e neʹphesh pea mo e foʻi lea faka-Kalisi ʻoku fehoanaki-mālie mo ia ko e psy·kheʹ ko e “soulu,” pea ʻi he konga fakalahi (appendix) ʻo ia ʻoku fakahokohoko ai ʻa e ngaahi konga Tohitapu lahi ʻa ia ʻoku maʻu ai ʻa e ongo foʻi leá ni. ʻOku ʻi ai mo e toe ngaahi paaki kehe fakaeonopooni ʻoku nau liliu ʻa e ongo motuʻaʻi lea tatau ʻo ʻikai ko e “soulu” pē ka ʻoku toe pehē foki ki he “meʻa moʻui,” “tokotaha” pea mo e “moʻui”; ʻoku nau liliu ʻa e “ʻeku neʹphesh” ki he “ko au,” pea ko e “ko hoʻo neʹphesh” ki he “ko koe.” Ko hano fakatatau ʻo e ngaahi Tohitapú ni ki he niʻihi ʻo e ngaahi liliu motuʻa angé pe ko e New World Translation ʻe tokoni ia ki ha tokotaha ako loto-moʻoni ke ne ʻilo ʻoku lave ʻa e ongo foʻi lea ʻi he tupuʻi lea ʻa ia ʻoku liliu ko e “soulu” ki he (1) kakai, (2) fanga manu pea (3) mo e moʻui ʻoku nau maʻu. Ka ʻoku ʻikai ʻaupito ke nau fakahoko ʻa e foʻi fakakaukau ko ia ko e soulú ko ha meʻa taʻe hā mai mo ʻikai lava ke ala ki ai ʻa ia ʻoku malava ke mavahe ia mei he sinó ʻi he maté pea ʻoku hoko atu ia ʻo moʻui ʻi ha feituʻu kehe.

6. (a) Ko e hā ʻoku ʻai ai ʻe he ngaahi liliu fakaeonopooni ʻe niʻihi ke puputuʻu ʻa e kau lau tohí fekauʻaki mo e ʻuhinga ʻo e Seoli, Hētesi mo e Kīhená? (e) Ko e hā haʻo fakamatala mei he Tohitapú ki he tuʻunga ʻo e faʻahinga ʻi Seoli, pe Hētesí? ʻI Kīhená?

⁶ ʻIkai ngata ai, ʻoku faitatau maʻu pē ʻa e New World Translation ʻi heʻene ngāueʻaki ʻa e Seoli ke tohi meimei sipela tatau mo e foʻi lea faka-Hepelū ko e sh^eōlʹ pea pehē ki heʻene ngāueʻaki ʻa e Hētesi ki he foʻi lea faka-Kalisi ko e haʹdes pea mo e Kīhena ki he geʹen·na. Ka ʻoku ʻi ai ʻa e ngaahi liliu fakaeonopooni kehe ʻe niʻihi mo e ngaahi toe liliu fakaleakeheʻi ʻe niʻihi ʻo e Tohitapú ʻoku nau hanga ʻo fakapuputuʻuʻi ʻa e tokotaha lau tohí ʻaki ʻenau liliu FAKATOUʻOSI ʻa e haʹdes mo e geʹen·na ki he “heli,” ʻo tānaki atu ki hono ngāueʻaki “ʻa e faʻitoka” pea mo e “feituʻu ʻo e mate” ko e toe ngaahi liliu ʻe niʻihi ki he sh^eōlʹ mo e haʹdes. ʻI hono fakatatau ʻa e ngaahi liliú ʻi he fiemaʻu ke fai peheé, ʻoku malava ke hā mei ai ʻoku tatau pē ʻa Seoli mo Hētesi. (Sāme 16:10; Ng. 2:27) ʻOku fakamahino mai ʻe he Tohitapú ko e Seoli, pe Hētesi, ko e faʻitoka ʻo e faʻahinga ʻo e tangatá, pea ʻoku  fekauʻaki ia mo e mate, ka ʻoku ʻikai mo e moʻui. (Sāme 89:48; Fkh. 20:13) ʻOkú ne toe tuhu foki ki he ʻamanaki ko e foki mai mei ai ʻo fakafou ʻi he toetuʻu. (Siope 14:13; Ng. 2:31) ʻI hono kehe ʻaupitó, ʻoku ʻikai fokotuʻu atu ha ʻamanaki ke toe moʻui ʻi he kahaʻú ʻa e faʻahinga ko ia ʻoku nau ʻalu ki Kīhená, pea toe pehē foki, ʻoku ʻikai ha lave ʻo pehē ʻoku toe moʻui atu ʻa e soulú ʻi ai.​—Mt. 18:9; 10:28.

7. ʻI hono maʻu ʻa e mahino totonú, ʻoku malava fēfē ʻe he toetuʻú ke ne tākiekina ʻa e anga ʻo e fakakaukau mo e ngaahi ngāue ʻa ha taha?

⁷ ʻI hono fakamaʻalaʻala ʻa e ngaahi meʻa ko iá, ʻoku hoko leva ʻa e pekia mo e toetuʻu ʻa Kalaisí ʻo mohu ʻuhinga moʻoni. ʻOku malava ke tokoniʻi leva ha taha ke ne maʻu ʻa e mahino ʻo kau ki he ʻaonga nai kiate ia ʻa e toetuʻú pea ʻoku malava ke ne kamata ke houngaʻia ʻi he ʻofa ʻa Sihová ʻi hono ʻai ha tokonaki fakaofo pehē. Ko e mamahi ʻoku ongoʻi ʻe he faʻahinga kuo mole atu honau ngaahi ʻofaʻangá ʻi he maté ʻoku malava ke fetongi ia ʻaki ʻa e fakatuʻamelie fiefia ke toe fetaulaki ʻi he Fokotuʻutuʻu Foʻou ʻa e ʻOtuá. Naʻe ʻiloʻi ʻe he kau Kalisitiane ʻo e ʻuluaki senitulí ko e toetuʻu ʻa Sīsū Kalaisí ko ha makatuliki ia ʻo e tui faka-Kalisitiané. Naʻa nau fai fakamoʻoni faivelenga ki he niʻihi kehé ʻo fekauʻaki mo e meʻa ko iá pea mo e ʻamanaki ʻoku fakapapauʻi aí. Pehē foki, ko e faʻahinga ko ia ʻoku nau houngaʻia ai ʻi he ʻaho ní ʻoku nau vēkeveke ke vahevahe atu ʻa e moʻoni mātuʻaki mahuʻingá ni ki he niʻihi kehé.​—Ng. 5:30-32; 10:40-43; 13:32-39; 17:31.

Ko Hono Ngāueʻaki ʻa e ‘Kī ʻo Hētesi’

8. Ko e hā ʻa e ʻaonga ʻoku maʻu ʻe he kau muimui ʻo Sīsū kuo pani ʻe he laumālié ʻi hono ngāueʻaki ʻe Sīsū “ʻa e ngaahi kī ʻo mate mo Hetesi”?

⁸ Kuo pau ke mate ʻa kinautolu kotoa ʻe kau fakataha mo Kalaisi ʻi hono Puleʻanga fakahēvaní. Ka ʻoku nau ʻilo lelei ʻa e lea fakamatematē naʻá ne ʻoange ʻi heʻene lea ki he ʻapositolo ko Sioné: “Naʻa ku mate, pea vakai ʻoku ou moʻui ʻo lauikuonga pea taʻengata; pea ʻoku ʻiate au ʻa e ngaahi kī ʻo Mate mo Hetesi.” (Fkh. 1:18) Ko e hā naʻá ne ʻuhinga ki aí? Naʻá ne fakahanga ʻa e tokangá ki he meʻa naʻá ne hokosia pē ʻe ia tonu. Ko ia foki naʻá ne mate. Ka naʻe ʻikai tuku ia ʻe he ʻOtuá ʻi Hētesi. ʻI he ʻaho hono tolú naʻe fokotuʻu hake ia ʻe Sihova tonu ki he moʻui laumālie pea ʻoange kiate ia ʻa e taʻe faʻa mate. ʻIkai ko ia pē, ka naʻe ʻoange kiate ia ʻe he ʻOtuá  “ʻa e ngaahi kī ʻo Mate mo Hetesi” ke ngāueʻaki ki hono tuku ange mai ʻa e niʻihi kehe mei he faʻitoka ʻo e faʻahinga ʻo e tangatá pea mei he ngaahi nunuʻa ʻo e angahala ʻa ʻĀtamá. Koeʻuhi ko ʻene maʻu ʻa e ngaahi kī ko iá, ʻoku malava ai ʻe Sīsū ke fokotuʻu mei he maté ʻa hono kau muimui angatonú. ʻI heʻene fai iá, ʻokú ne ʻoange ki he faʻahinga kuo pani ʻe he laumālié ʻo ʻene fakatahaʻangá ʻa e meʻaʻofa mātuʻaki mahuʻinga ko e moʻui fakahēvani taʻe faʻa mate, ʻo hangē pē ko ia naʻe ʻoange ʻe heʻene Tamaí kiate iá.​—Loma 6:5; Fili. 3:20, 21.

9. ʻOku hoko fakakū ʻa e toetuʻu ʻa e kau Kalisitiane pani mo angatonú?

⁹ ʻE hokosia fakakū ʻe he kau Kalisitiane pani mo angatonú ʻa e toetuʻu ko iá? Kuo ʻosi kamata ia. ʻOku fakamatala ʻa e ʻapositolo ko Paulá ʻo pehē ʻe fokotuʻu kinautolu ʻi he ‘lolotonga ʻo e ʻi ai ʻa Kalaisi,’ ʻa ia naʻe kamata ʻi he 1914 T.S. (1 Kol.1Ko 15:23, NW) ʻI he taimí ni, ʻi he taimi ʻe ngata ai ʻenau moʻui fakaemāmaní, heʻikai te nau talitali ʻi he maté ki he toe foki mai ʻa honau ʻEikí. ʻI heʻenau maté pē ʻoku fokotuʻu hake leva kinautolu ʻi he laumālie, ʻo “liliu kotoa pe, ʻi ha foʻi momeniti, ʻi ha foʻi kemo pe.” Ko ha fiefia lahi ē ka ko kinautolu, koeʻuhi “ko ʻenau ngaahi ngaue te nau muimui atu mo kinautolu”!​—1 Kol.1Ko 15:51, 52; Fkh. 14:13.

10. Ko e hā ʻa e toe toetuʻu ʻe hokó, pea ʻe kamata fakakū ia?

¹⁰ Ka ʻoku ʻikai ngata pē ia ʻi heʻenau toetuʻú. ʻOku fakahā ʻi hono ui ia ko e “ʻuluaki toetuʻu” kuo pau ke ʻi ai mo e toetuʻu ʻe hoko mai ai. (Fkh. 20:6) Ko e faʻahinga ko ia te nau maʻu ʻa e toetuʻu ko ʻeni hono hokó te nau maʻu ʻa e ʻamanaki fiefia ko e moʻui taʻengata ʻi ha māmani Palataisi. ʻE hoko fakakū ia? ʻOku fakahā ʻe he tohi ʻa Fakahā ʻe hoko ia ʻi he hili ʻa hono toʻo atu “ʻa mamani mo e langi” ʻo e fokotuʻutuʻu fulikivanu lolotonga ní. ʻOku ofí ni ʻaupito ʻa e ngataʻanga ʻo e fokotuʻutuʻu motuʻá. ʻI he hili iá, ʻi he taimi kuo kotofa ʻe he ʻOtuá, ʻe kamata leva ʻa e toetuʻu ke moʻui ʻi he māmaní.​—Fkh. 20:11, 12.

11. Ko hai ʻe kau atu ki he kau angatonu ʻe fokotuʻu mai ke moʻui ʻi he māmaní, pea ko e hā ko ha ʻamanaki fakatupu-fiefia ai ia?

¹¹ Ko hai ʻe kau ki aí? Ko e kau sevāniti angatonu ʻa Sihova mei he ngaahi taimi ki muʻa ʻaupito atú. ʻE kau ʻi honau lotolotongá ʻa e kau tangata ʻa ia, koeʻuhi ko ʻenau tui mālohi ki he toetuʻú, naʻe “ʻikai te nau fie tali ʻa e lau fakahaofi”​—ko  ha fakangaloku ʻo ʻenau angatonu ki he ʻOtuá koeʻuhi ka nau hao mei ha mate fakamālohi. (Hep. 11:35) Ko ha meʻa fakafiefia ē ke tau hoko ʻo maheni mo kinautolu pea fanongo meiate kinautolu tonu, ʻi hono fakamatala totonu ʻa e ngaahi fakaikiiki ʻo fekauʻaki mo e ngaahi meʻa naʻe hoko ʻa ia ʻoku fakamatala nounou pē ʻi he Tohitapú! ʻI he lotolotonga ʻo e faʻahingá ni ʻe ʻi ai ʻa ʻĒpeli, ʻa e ʻuluaki fakamoʻoni angatonu ʻa Sihová. Ko ʻĪnoke mo Noa, ʻa e ongo fai fanongonongo taʻemanavahē ʻo e pōpoaki fakatokanga ʻa e ʻOtuá ki muʻa ʻi he Lōmakí. Ko ʻĒpalahame, ʻa ia naʻá ne talitali fiefia ha kau ʻāngelo. Ko Mōsese, ʻa ia naʻe fakafou mai ai ʻa e Lao naʻe ʻomai ʻi he Moʻunga Sainaí. Ko e kau palōfita loto-toʻa ʻo hangē ko Selemaia, ʻa ia naʻá ne mamata tonu ki hono fakaʻauha ʻo Selusalema ʻi he 607 K.M. Pea mo Sione Papitaiso, ʻa ia naʻá ne fanongo ki he ʻOtuá tonu ʻi heʻene fakahā fakapapauʻi ʻa Sīsū ko Hono ʻAló. ʻE toe ʻi ai foki mo e kau ʻofa-mateaki ʻa ia kuo nau mate ʻi he lolotonga ʻo e ngaahi ʻaho fakaʻosi ʻo e fokotuʻutuʻu lolotonga ní.​—Hep. 11:4-38; Mt. 11:11.

12. (a) Ko hai mei he kau mate ʻi Hētesí ʻe fokotuʻu mai? (e) Ko ia ko hai ʻe kau ki aí, pea ko e hā hono ʻuhingá?

¹² ʻI he faai atu ʻa e taimí, ʻe toe ʻi ai ʻa e niʻihi kehe ʻe fokotuʻu hake. ʻOku fakahā ʻa e lahi ʻo hono ngāueʻaki ai ʻe Sīsū ʻa e ‘kī ʻo Hētesi’ maʻá e faʻahinga ʻo e tangatá ʻi he vīsone naʻe ʻoange ki he ʻapositolo ko Sioné ʻa ia naʻá ne sio ai “naʻe li . . . ki he Anoafi” ʻa Hētesi. ʻOku ʻuhinga ia ki he hā? ʻE fakaʻauha ia; ʻe ʻikai ke toe ʻi ai ia koeʻuhi ʻe fakamaha fakaʻaufuli mai ia. Ko ia ai, tānaki atu ki hono fokotuʻu hake ʻo e kau lotu angatonu kia Sihová, ʻe anga-ʻofa ʻa Sīsū ʻo toe ʻomai mei Hētesi, pe Seoli, ʻa e faʻahinga taʻeangatonu. ʻOku ʻikai ʻaupito ha taha ʻi he faʻahingá ni ʻe fokotuʻu mai pē ke fakamaauʻi ʻo taau ke toe mate. ʻI he ʻātakai angatonu ʻi he malumalu ʻo e Puleʻanga ʻo e ʻOtuá ʻe tokoniʻi ai kinautolu ke ʻai ʻenau moʻuí ke fehoanaki mo e ngaahi founga ʻa Sihová. Naʻe fakahā ʻi he vīsoné ni ʻa e folahi ʻo e “tohi ʻo e moʻui,” pea te nau maʻu ai ʻa e faingamālie ke ʻai honau hingoá ki ai. ʻE “fakamāu kinautolu taki taha, ʻo fakatatau ki heʻenau ngāue” ʻa ia ʻe fai ʻi he hili ʻenau toetuʻú. (Fkh. 20:12-14; Ng. 24:15) Ko ia ai, ʻi he vakai mei he tafaʻaki ʻo fekauʻaki mo e meʻa fakaʻosi ʻe hokó, ko ʻenau toetuʻú ʻoku malava ke hoko  ko e “toetuʻu ke moʻui” pea ʻe malava ke nau fakaʻehiʻehi mei he hoko ki he “toetuʻu ke fakamāu [ʻo fakahalaia].”​—Sione 5:28, 29.

13. (a) Ko hai ʻe ʻikai ke toetuʻú? (e) ʻOku totonu ke fēfē ʻa hono ueʻi ʻetau moʻuí ʻe he ʻiloʻi ʻo e moʻoni ʻo fekauʻaki mo e toetuʻú?

¹³ Ko hono moʻoní, ʻe ʻikai ke toetuʻu ʻa ia kotoa pē naʻe moʻuí. Naʻe ʻi ai ʻa e niʻihi naʻa nau fai ha ngaahi angahala ʻa ia ʻoku ʻikai malava ke fakamolemoleʻi. Ko e faʻahinga ko ia ʻe tāmateʻi ʻi he “mamahi lahi”, ʻa ia ʻoku ofi ní, ʻe kau ia ʻi he lotolotonga ʻo e faʻahinga te nau hokosia ʻa e fakaʻauha taʻengatá. (Mt. 12:31, 32; 23:33; 24:21, 22; 25:41, 46; 2 Tes. 1:6-9) Ko ia, neongo ʻoku fakahāhā ʻa e meesi kehe ʻaupito ʻi hono tuku ange mai ʻa e faʻahinga kotoa pē ʻoku nau ʻi Hētesí, ʻoku ʻikai ke ʻomai ai ʻe he toetuʻú ha makatuʻunga ke tau hoko ʻo taʻe hohaʻa ʻo fekauʻaki mo e anga ʻo ʻetau moʻui he taimi ní. Ka, ʻoku totonu ke ne ueʻi kitautolu ke tau fakahāhā ʻa hono loloto ʻo ʻetau houngaʻia ʻi he ʻofa maʻataʻatā moʻoni ko eni ʻa e ʻOtuá.

Fakaivimālohi ʻi he ʻAmanaki ki he Toetuʻú

14. ʻOku malava fēfē ke hoko ʻa e toetuʻú ko ha tupuʻanga ʻo e mālohi lahi ki ha taha ʻokú ne fakaofiofi atu ki he ngataʻanga ʻo ʻene moʻui lolotonga ní?

¹⁴ Ko kinautolu kuo nau ʻai ʻa e ʻamanaki toetuʻú ko e meʻa ʻoku nau mātuʻaki tui ki aí ʻoku malava ke nau maʻu ha mālohi lahi mei ai. ʻI he taimi ʻoku nau fakaofi atu ai ki he ngataʻanga ʻo ʻenau moʻuí, ʻoku nau ʻilo heʻikai malava ke nau toloi ʻa e maté, ʻo tatau ai pē pe ko e hā ha ngaahi founga fakafaitoʻo ʻoku ngāueʻaki. (Koh. 8:8) Kapau kuo nau femoʻuekina ʻi he ngāue ʻa e ʻEikí pea ngāue mateaki fakataha mo ʻene kautahá, ʻoku malava leva ke nau hanga atu ki he kahaʻú mo e loto-maʻu. ʻOku nau ʻilo te nau toe maʻu ʻa e moʻui ʻi he taimi tukupau ʻa e ʻOtuá ʻo fakafou ʻi he toetuʻu. Pea ko ha moʻui fiefia lahi ē ʻe hoko! Ko e “moʻui moʻoni”, ʻo hangē ko ia naʻe uiʻaki ʻe he ʻapositolo ko Paulá.​—1 Tīm. 6:19; 1 Kol.1Ko 15:58; Hep. 6:10-12.

15. Kapau ʻoku fakamanamanaʻi kitautolu ʻe he kau fakatanga fakamālohí, ko e hā ʻoku malava ke ne tokoniʻi kitautolu ke tau tauhi maʻu ʻa e angatonu kia Sihová?

¹⁵ ʻOku ʻikai ko hono ʻilo pē ʻe ʻi ai ha toetuʻú, ka ko hono ʻiloʻi ʻa e Tokotaha ʻa ia ko e Matavai ʻo e tokonaki ko iá ko e  meʻa ia ʻokú ne fakaivia kitautolu ke tau ongoʻi mālohí. ʻOku fakalotolahiʻi kitautolu ʻe he meʻá ni ke tau ʻofa-mateaki ki he ʻOtuá ʻo aʻu pē ʻo kapau ʻoku fakamanaʻiʻaki kitautolu ʻa e maté ʻe he kau fakatanga fakamālohí. Kuo ngāue fuoloa mai ʻaki ʻe Sētane ʻa e manavahē ki he mate mutukiá ko ha founga ke tauhi fakapōpula ai ʻa e kakaí. Ka naʻe ʻikai foʻi ʻa Sīsū ki he manavahē peheé; naʻá ne fakamoʻoniʻi ʻene angatonu kia Sihová ʻo aʻu ki heʻene pekia. ʻI he meʻa naʻe fakahoko ʻe heʻene pekiá naʻá ne tokonaki mai ai ʻa e founga ki hono fakatauʻatāinaʻi ʻa e niʻihi kehé mei he manavahē peheé. (Hep. 2:14, 15) Ko hono ola ʻo e tui ki he tokonaki ko iá, kuo hoko ai ʻa hono kau muimui moʻoní ʻo fuʻu ʻiloa ʻi heʻenau hoko ko e kau tauhi angatonu. ʻI heʻenau aʻusia ʻa e fakatangá, kuo nau fakamoʻoniʻi ‘ʻoku ʻikai te nau mamae ki heʻenau moʻuí’ ʻo lahi ange ia ʻi heʻenau ʻofa kia Sihová. (Fkh. 12:11) Ko e meʻa fakapotopotó, he ʻoku ʻikai te nau feinga ke haofaki ʻenau moʻui lolotonga ní ʻaki hano liʻaki ʻa e ngaahi tefitoʻi moʻoni faka-Kalisitiané, ʻa ia ʻe iku ʻo mole ai ʻa e ʻamanaki ki he moʻui taʻengatá. (Luke 9:24, 25) ʻOkú ke maʻu ʻa e faʻahinga tui ko iá? Te ke maʻu ia ʻo kapau ʻokú ke ʻofa moʻoni kia Sihova pea tukulotoʻi ʻa e ʻaonga kiate koe ʻa e ʻamanaki ki he toetuʻú.

[Fakamatala ʻi lalo]

Fetalanoaʻaki ʻo Fakamanatu

● Ko e hā ʻoku fiemaʻu ai ke mahino ki ha taha pe ko e hā ʻa e soulu pea pehē ki he tuʻunga ʻo e kau maté ki muʻa pea malava ke ne houngaʻia ʻi he toetuʻú?

● Ko hai ʻe foki mai mei he maté? ʻOku totonu ke fēfē ʻa hono ueʻi kitautolu ʻe he ʻilo ko ení?

● ʻOku anga-fēfē ʻa hono fakaivimālohi kitautolu ʻe he ʻamanaki ki he toetuʻú?

[Fehuʻi ki he Ako]