Vahe 7

Ko e Meʻa ʻOku Tau Ako mei he Fakangofua ʻe he ʻOtuá ʻa e Koví

1. (a) Kapau naʻe tāmateʻi ai leva ʻe Sihova ʻa e ongo angatuʻu ʻi ʻĪtení, ko e hā ne mei hoko kiate kitautolú? (e) Ka, ko e hā ʻa e ngaahi tokonaki anga-ʻofa kuo ʻai ʻe Sihova ke tau ala maʻú?

 NEONGO ʻa e ngaahi faingataʻa ʻoku hoko mai nai ʻi heʻetau moʻuí, naʻe ʻikai ke ʻi ai ha taʻefaitotonu ia mei he tafaʻaki ʻa e ʻOtuá ʻi hotau fanauʻí. Naʻe haohaoa ʻa e ʻuluaki mātuʻa ʻi heʻene fakatupu peá ne foaki kiate kinaua ʻa e Palataisí ko hona ʻapi. Kapau naʻá ne tāmateʻi ai leva kinaua ʻi he hili pē ʻo ʻena angatuʻú, kuo ʻikai ke ʻi ai ha faʻahinga ʻo e tangatá ʻo hangē ko ia ʻoku tau ʻiloʻi he taimí ni mo hono mahamahakí, masivá mo e faihiá. Kaekehe, naʻe manavaʻofa ʻa Sihova ʻo fakaʻatā ʻa ʻĀtama mo ʻIvi ke na maʻu fānau ki muʻa peá na toki maté, neongo te nau maʻu tukufakaholo ʻa e taʻehaohaoá. Naʻá ne fai ha tokonaki ʻo fakafou mai ʻia Kalaisi maʻá e hako ʻo ʻĀtamá ʻa ia te nau ngāueʻi ʻa e tui ke maʻu ʻa e meʻa naʻe mole meia ʻĀtamá​—ʻa e moʻui taʻengata ʻi he malumalu ʻo e ngaahi tuʻunga ʻa ia ʻe malava ai ke maʻu ʻa e fiefia lahi taha ʻi he moʻuí.​—Teu. 32:4, 5; Sione 10:10.

2. Naʻe fai kotoa pē eni koeʻuhi pē ke fakahaofi kitautolu?

² ʻOku taʻealafakatataua ʻa e ngaahi ʻaonga ʻo e meʻá ni kiate kitautolu taki taha. Ka ʻoku tau ako mei he fakamatala ʻa e Tohitapú naʻe ʻi ai ha meʻa naʻe kau ki he meʻá ni ʻa ia ʻoku mahuʻinga mamaʻo ange ia ʻi hotau fakahaofi fakafoʻituituí.

Koeʻuhi ko Hono Huafa Molumalú

3. Ko e hā naʻe kaunga ki hono fakahoko ʻo e taumuʻa ʻa Sihova ki he māmaní pea mo e faʻahinga ʻo e tangatá?

³ Ko e huafa ʻo Sihová, ko hono ongoongo ʻi hono tuʻunga ko e Tokotaha-Hau Fakaleveleva pea ko e ʻOtua ʻo e moʻoní,  naʻe kau ia ki hono fakahoko ʻo ʻene taumuʻa ʻo fekauʻaki mo e māmaní pea mo e faʻahinga ʻo e tangatá. Koeʻuhi ko e tuʻunga ʻo Sihová, ʻoku fiemaʻu ai ke fai ki hono huafá ʻa e ʻapasia kakato ʻoku taau mo iá pea ke talangofua kotoa pē kiate ia kae ʻi ai ʻa e nonga mo lelei ʻa e ʻuniveesí fakakātoa.

4. Ko e hā naʻe kau tonu ki he taumuʻa ko ení?

⁴ Hili ʻa hono fakatupu ʻa ʻĀtama mo ʻIví, naʻá ne vaheʻi kiate kinaua ha ngāue ke na fakahoko. Naʻá ne ʻai ke mahino naʻe ʻikai ko ʻene taumuʻá pē ke puleʻi ʻa e kotoa ʻo e māmaní, ʻo fakalahi atu ʻa e ngaahi fakangatangataʻanga ʻo e Palataisí, ka ke fakakakai ia ʻaki ʻa e ngaahi hako ʻo e ʻuluaki tangatá mo e ʻuluaki fefiné, ko ʻĀtama mo ʻIvi. (Sēn. 1:28) Naʻe taʻefakahoko ʻa e taumuʻá ni koeʻuhi ko ʻena angahalá, ʻo hoko ai ʻa e manuki ki he huafa ʻo e ʻOtuá?

5. (a) Fakatatau kia Sēnesi 2:17, ʻe mate fakakū ha taha naʻe kai mei he ʻakau ʻo e ʻilo ʻo e leleí mo e koví? (e) Naʻe anga-fēfē ʻa hono fakahoko ia ʻe Sihová, lolotonga ʻene kei tokangaʻi ʻa ʻene taumuʻa ʻo fekauʻaki mo hono fakakakai ʻo e māmaní?

⁵ Naʻe fakatokanga ʻa Sihova kia ʻĀtama kapau te ne talangataʻa ʻo kai mei he ʻakau ʻo e ʻilo ʻo e leleí mo e koví, “ko e ʻaho” te ne kai ai mei aí te ne mate. (Sēn. 2:17) ʻOku moʻoni ʻa e folofola ko eni ʻa e ʻOtuá, he ʻi he ʻaho pē naʻe faihala ai ʻa ʻĀtamá naʻe ui leva ʻe Sihova ʻa e ongo faihalá ni ke na fai ha fakamatala peá ne fakahā ai ʻa e tauteá ko e mate. Naʻe ʻikai malava ke kalo mei he tauteá ni. ʻI he tuʻunga fakaefakamaaú, naʻe mate pē ʻa ʻĀtama mo ʻIvi ʻi he ʻaho ko iá ʻi he anga ʻo e vakai ʻa e ʻOtuá. (Fehoanaki mo Luke 20:37, 38.) Ka, ke fakahoko ʻa ʻene taumuʻa naʻe ʻosi fokotuʻu ʻo fekauʻaki mo hono fakakakai ʻo e māmaní, naʻe fakangofua ai ʻe Sihova ʻa kinaua ke na maʻu ha fāmili ki muʻa peá na toki mate moʻoni. Ka neongo ia, mei he anga ʻo e vakai ʻa e ʻOtuá ko e taʻu ʻe 1,000 ko e ʻaho pē ʻe taha, ko ia ʻi he taimi naʻe ngata ai ʻa e moʻui ʻa ʻĀtamá ʻi he taʻu ʻe 930, naʻe ʻi loto pē ia ʻi he “ʻaho” ʻe taha. (Sēn. 5:3-5; fehoanaki mo Sāme 90:4; 2 Pita 3:8.) Ko ia naʻe pouaki ʻa e moʻoni ʻa Sihova ʻo fekauʻaki mo e taimi ʻe fakahoko ai ʻa e tauteá, pea naʻe ʻikai ke fakataʻeʻaongaʻi ai ʻa ʻene taumuʻa ke fakakakai ʻa e māmaní ʻaki ʻa e fānau ʻa ʻĀtamá. Ka ʻoku ʻuhingá kuo fakangofua ʻa e kakai angahalá ke moʻui ʻi ha taimi.

6, 7. (a) Ko e hā ʻoku fakahā ʻe ʻEkisoto 9:15, 16 ki he ʻuhinga ʻoku kei fakangofua ai ʻe Sihova ʻa e kakai anga-fulikivanú ke hoko atu ʻi ha taimi? (e) ʻI he meʻa fekauʻaki mo Feló, naʻe anga-fēfē ʻa hono fakahāhā ai ʻa e mālohi ʻo Sihová pea naʻe anga-fēfē ʻa e hoko ʻo ʻiloa ai Hono huafá? (f) Ko ia ko e hā ʻe hoko ʻi he ngataʻanga ʻo e tuʻu fulikivanu lolotonga ní?

 ⁶ ʻOku toe fakahā ʻe he meʻa naʻe folofolaʻaki ʻe Sihova ki he pule ʻo ʻIsipite ʻi he ngaahi ʻaho ʻo Mōsesé ʻa e ʻuhinga kuo kei fakangofua ai ʻe he ʻOtuá ʻa e kakai anga-fulikivanú ke hoko atu ʻi ha taimi. ʻI he tapui ʻe Felo ke ʻoua ʻe mavahe ʻa e fānau ʻa ʻIsilelí mei ʻIsipité, naʻe ʻikai ke taaʻi hifo ai leva ʻe Sihova ia. Naʻe ʻomai ʻa e mala ʻe hongofulu ki he fonuá, ʻo ne fakahāhā ʻa e mālohi ʻo Sihová ʻi he ngaahi founga fakaofo mo kehekehe. ʻI he fakatokanga ʻo kau ki he mala hono fitú, naʻe folofola ange ai ʻa Sihova kia Felo ʻo pehē naʻe mei malava noa pē ke ne fakaʻauha ʻa Felo mo hono kakaí mei he māmaní. Naʻe pehē ʻe Sihova: “Ka koeʻuhi naʻa ku fokotuʻu koe ki he meʻa ko eni, ke u fakaha ʻiate koe hoku ivi, pea koeʻuhi ke ongoongoa hoku hingoa ʻi mamani katoa.”​—ʻEki. 9:15, 16.

⁷ ʻI he fakahaofi ʻe Sihova ʻa e kau ʻIsilelí, naʻe hoko moʻoni ʻa hono huafá ʻo ʻilo lahia. He ʻahó ni, meimei ko e taʻu eni ʻe 3,500 mei ai, kuo ʻikai ngalo ʻa e meʻa naʻá ne faí. Naʻe ʻikai ngata pē ʻi hono fanongonongo ʻa e huafa fakaeia ko Sihová ka naʻe toe pehē foki ki he moʻoni ʻo fekauʻaki mo e Tokotaha ʻoku ʻoʻona ʻa e huafa ko iá. Naʻe fokotuʻu maʻu ʻe he meʻá ni ʻa e ongoongo ʻo Sihová ko e ʻOtua ʻokú ne tauhi ʻa ʻene ngaahi fuakavá pea ʻokú ne fai ʻa e ngāue koeʻuhi ko ʻene kau sevānití. Naʻe fakahāhā ʻe he meʻá ni ʻoku ʻikai ha meʻa ʻoku malava ke ne taʻofi ʻa ʻene taumuʻá koeʻuhi ko hono mālohi aoniú. Ko e meʻa ʻe toe maongo lahi angé ko e fakaʻauha tuʻunuku maí ni ʻo e tuʻu fulikivanú kotoa, ʻa ia ʻoku hā mai mo taʻe hā mai. ʻE ʻikai ʻaupito ke ngalo ʻi he hisitōliá fakakātoa ʻa e fakahāhā ko ia ʻo e mālohi aoniú pea mo e fakalāngilangi ʻe maʻu mei ai ki he huafa ʻo Sihová. ʻE ʻikai ke ʻi ai ha ngataʻanga ki hono ngaahi ʻaongá!​—ʻIsi. 38:23; Fkh. 19:1, 2.

‘ʻOiau! ʻEne Kilukilua ʻa e Poto ʻa e ʻOtua!’

8. Ko e hā ʻa e toe ngaahi meʻa ʻoku naʻinaʻi mai ʻe Paula kiate kitautolu ke tau fakakaukau ki ai?

⁸ ʻI he tohi ʻa e ʻapositolo ko Paulá ki he kakai Lomá, ʻokú ne langaʻi ai ʻa e fehuʻi: “Oku i he Otua ae taeagatonu?” Pea  ʻokú ne toki tali ʻaki hono fakamamafaʻi ʻa e meesi ʻa e ʻOtuá pea pehē ki heʻene lave ki he meʻa naʻe folofolaʻaki ʻe Sihova kia Feló. ʻOkú ne toe fakamanatuʻi mai ʻa e moʻoniʻi meʻa ko ia ko kitautolu ko e faʻahinga ʻo e tangatá ʻoku tau hangē ha ʻumea ʻi he nima ʻo ha tufunga ipu. ʻOku lāunga ʻa e ʻumeá ʻo fekauʻaki mo hono founga ʻoku ngāueʻaki iá? ʻOku tānaki atu ʻe Paula: “Bea kabau kuo finagalo ae Otua ke fakaha hono houhau, bea fakailo mo hono malohi, naa ne kataki i he kataki fuoloa ae gaahi ibu oe houhau nae tāu moe malaia [“ʻauha,” NW]: Bea koeuhi ke ne fakaha hono lahi o ene lelei ki he gaahi ibu oe aloofa, akinautolu naa ne tomua teuʻi ki he hakeakiʻi, io, akitautolu kuo ne ui, ikai mei he kakai Jiu be, ka mei he kakai Jenitaile foki?”​—Loma 9:14-24, PM.

9. (a) Ko hai ʻa e “gaahi ibu oe houhau nae tāu moe [ʻauha]”? (e) Ko e hā kuo fakahāhā ai ʻe Sihova ʻa e kātaki-fuoloa neongo ʻenau fakafepakituʻú, pea ko e hā ʻe hoko ai ʻa e ikuʻangá ko ha lelei maʻá e faʻahinga ʻoku ʻofa kiate iá?

⁹ Talu mei hono fai ʻe Sihova ʻa e fakamatala fakaekikite ʻoku hiki ʻia Sēnesi 3:15, kuo hoko ai ʻa Sētane mo hono hakó ko e “gaahi ibu oe houhau nae tāu moe [ʻauha].” ʻI he lolotonga ʻo e taimi kotoa ko iá kuo kātaki-fuoloa ʻa Sihova. Kuo manumanukiʻi ʻe he kau anga-fulikivanú ʻa ʻene ngaahi foungá; kuo nau fakatangaʻi ʻa ʻene kau sevānití, pea aʻu ʻo tāmateʻi ʻa hono ʻAló. Ka kuo fakahāhā ʻe Sihova ʻa e faʻamataʻofi lahi, pea ʻoku ʻaonga tuʻuloa ia ki heʻene kau sevānití. Kuo maʻu ʻe he meʻa moʻui kotoa pē ʻa e faingamālie ke nau sio ki he ngaahi nunuʻa fakatuʻutāmaki ʻoku hoko ʻi he angatuʻu ki he ʻOtuá. ʻI he taimi tatau pē, naʻe tokonaki mai ʻe he pekia ʻa Sīsuú ʻa e founga ki hono fakahaofi ʻo e faʻahinga ʻo e tangata talangofuá pea ke ‘holoki ʻa e ngaahi ngāue ʻa e Tēvolo.’​—1 Sione 3:8; Hep. 2:14, 15.

10. Ko e hā kuo kei hoko atu ai ʻa hono kātakiʻi ʻe Sihova ʻa e kau anga-fulikivanú ʻi he lolotonga ʻo e taʻu ʻe 1,900 kuo maliu atú?

¹⁰ ʻI he lolotonga ʻo e taʻu lahi hake he 1,900 talu mei he toetuʻu ʻa Sīsuú kuo toe kātakiʻi ai ʻe Sihova ʻa e “gaahi ibu oe houhau,” ʻo taʻotaʻofi honau fakaʻauhá. Ko e hā hono ʻuhingá? Koeʻuhi kuó ne teuteu ʻa e konga hono ua ʻo e hako ʻo e fefiné, ʻa e faʻahinga te nau kau fakataha mo Sīsū Kalaisi ʻi hono Puleʻanga fakahēvaní. (Kal. 3:29) Ko e faʻahingá ni, ʻoku nau toko 144,000, ko e “gaahi ibu oe aloofa” ʻa ia naʻe lave ki ai ʻa e  ʻapositolo ko Paulá. Naʻe ʻuluaki fakaafeʻi ʻa e faʻahinga mei he lotolotonga ʻo e kau Siú ki hono fokotuʻu ʻa e faʻahingá ni. Pea naʻe toki tānaki atu ki ai mo e kau Samēlia naʻe kamú, pea ko hono fakaʻosí ko e kakai mei he ngaahi puleʻanga Senitailé. ʻI he kātaki-fuoloa lahí kuo fakahoko ai ʻe Sihova ʻa ʻene taumuʻá, ʻo ʻikai te ne fakamālohiʻi ai ha taha ke tauhi kiate ia, ka ʻoku foaki mai ai ʻa e ngaahi tāpuaki maʻongoʻonga ki he faʻahinga kuo nau tali loto-houngaʻia ʻene ngaahi tokonaki anga-ʻofá. ʻI he taimí ni kuo mei kakato ʻa e teuteu ʻo fekauʻaki mo e faʻahinga fakahēvani ko iá.

11. Ko e hā ʻa e toe faʻahinga ʻe taha ʻoku nau maʻu ʻa e ʻaonga he taimí ni tupu mei he kātaki-fuoloa ʻa Sihová?

¹¹ Kae fēfē ʻa e kakai ke nofo ʻi he māmaní? ʻI he taimi kuo kotofa ʻe he ʻOtuá ʻe toetuʻu ai mei he maté ʻa e laui piliona pea te nau hoko ko e faʻahinga ʻi māmani ʻi he malumalu ʻo e Puleʻangá. ʻIkai ngata ai, tautefito talu mei he 1935 T.S. kuo malava ai ʻi he kātaki-fuoloa ʻa Sihová ke fakatahatahaʻi fakataha ha “fuʻu kakai lahi” mei he ngaahi puleʻangá kotoa ʻi he taumuʻa ke fakahaofi kinautolu.​—Fkh. 7:9, 10; Sione 10:16.

12. (a) Ko hono olá, ko e hā kuo tau ako ʻo fekauʻaki mo Sihova tonu? (e) Ko e hā ʻa hoʻo fakakaukau ki he founga kuo lavaʻi ai ʻe Sihova ʻa e ngaahi meʻá ni?

¹² Kuo hoko ha taʻeangatonu ʻi he kotoa ʻo e ngaahi meʻá ni? Mole ke mamaʻo! Kapau ʻoku taʻotaʻofi ʻe he ʻOtuá ʻa e fakaʻauha ʻo e kau anga-fulikivanú, ʻa e “gaahi ibu oe houhau,” koeʻuhi ke ne fakahāhā ʻa e manavaʻofá ki he niʻihi kehé ʻo fehoanaki-mālie mo ʻene taumuʻá, ko e hā ha totonu ʻa ha taha ke toe lāunga? Kaekehe, ʻi heʻetau fakatokangaʻi ʻa hono fakaeʻa ʻo ʻene taumuʻá, ʻoku tau ako lahi ai ʻo fekauʻaki mo Sihova tonu. ʻOku tau ofo ʻi he ngaahi tafaʻaki ʻo hono ʻulungaangá ʻa ia kuo hā mahino maí​—ʻa ʻene fakamaau-totonú, ʻa ʻene meesí, ʻa ʻene kātaki-fuoloá, mo e makehe atu ʻo hono potó. ʻE tuʻu taʻengata ʻa hono lavaʻi fakapotopoto ʻe Sihova ʻa e polé ko ha fakamoʻoni ki he moʻoniʻi meʻa ko ia ko ʻene founga pulé ko e lelei tahá ia. ʻOku tau lea fakataha mo e ʻapositolo ko Paulá: “ʻOiau! ʻene kilukilua ʻa e koloa mo e poto mo e ʻilomeʻa ʻa e ʻOtua! hono ʻikai taʻemahakulea ʻene ngaahi tuʻutuʻuni, mo taʻemafakatotoloa hono ngaahi founga!”​—Loma 11:33.

 Faingamālie ke Fakahāhā ʻEtau Anga-Līʻoá

13. (a) Ko e hā ʻa e faingamālie ʻoku tuku mai kiate kitautolu ʻi he taimi ʻoku tau kātekina ai ha faingataʻaʻia? (e) Ko e hā te ne tokoniʻi kitautolu ke tau fai ʻa e meʻa ʻoku fakapotopotó?

¹³ ʻOku ʻi ai ʻa e ngaahi tuʻunga ʻokú ne fakahoko ʻa e faingataʻaʻia moʻoni kiate kita koeʻuhi kuo teʻeki ai ke fakaʻauha ʻe he ʻOtuá ʻa e kau anga-fulikivanú pea fakahoko mai ʻa e toe fakafoʻou naʻe kikiteʻi ki he faʻahinga ʻo e tangatá. Ko e hā ʻoku tau fai ʻi he ngaahi tuʻunga pehe ní? ʻOku tau vakai ki ai ko ha ngaahi faingamālie ia ke kau ai ki hono fakaʻataʻatā mei he huafa ʻo Sihová ʻa e tukuakiʻi loí pea ke fakamoʻoniʻi ko e Tēvoló ko ha tokotaha-loi? ʻOku malava ke fakaivimālohi lahi kitautolu ke fai pehē ʻaki ʻetau manatuʻi ʻa e akonakí ni: “E hoku foha, ke ke boto koe, bea ke fakafiefiaʻi hoku loto, koeuhi keu faa tali ia aia oku manuki kiate au.” (Pal. 27:11, PM) Ko Sētane, ʻa e tokotaha ʻoku manuki kia Sihová, naʻá ne taukaveʻi kapau ʻe faingataʻaʻia fakamatelie pe fakaesino ʻa e kakaí te nau tukuakiʻi ʻa e ʻOtuá, pea aʻu ʻo nau lauʻikoviʻi ia. (Siope 1:9-11; 2:4, 5) ʻOku tau fakafiefiaʻi ʻa e loto ʻo Sihová ʻaki ʻetau ʻofa-mateaki ki he ʻOtuá ʻi he fehangahangai mo e ngaahi faingataʻá, pea ʻoku tau fakahāhā ai ʻoku ʻikai moʻoni ʻa e taukaveʻi ko ia ʻi he meʻa ʻoku fekauʻaki mo kitautolú. ʻOku tau tui pau ʻoku ʻofa moʻoni ʻa Sihova ki heʻene kau sevānití pea hangē ko ia ʻi he meʻa ʻo fekauʻaki mo Siopé, ʻe fakapaleʻi lahi ʻaupito kitautolu ʻe Sihova ʻo kapau ʻoku tau fakamoʻoniʻi ʻetau angatonú.​—Sēm. 5:11; Siope 42:10-16.

14. Kapau ʻoku tau falala kia Sihova ʻi he taimi ʻoku tau kātekina ai ha ngaahi ʻahiʻahi, ko e hā ʻa e toe ngaahi ʻaonga ʻoku malava ke hoko mai kiate kitautolu?

¹⁴ Kapau ʻoku tau falala moʻoni kia Sihova ʻi he taimi ʻoku tau kātekina ai ha ngaahi ʻahiʻahi kātakiʻingataʻa, ʻoku malava ke tau fakatupulekina ai ha ngaahi ʻulungaanga mahuʻinga taʻefakatataua. Koeʻuhi ko e ngaahi meʻa naʻe faingataʻaʻia ai ʻa Sīsuú, naʻá ne ‘ako ke talangofua’ ai ʻi ha founga naʻe ʻikai te ne teitei ʻilo ʻe ia ki muʻa. ʻOku toe malava foki ke tau ako​—ʻo fakatupu ʻa e kātaki-fuoloa, kātekina mo e houngaʻia loloto ange ki he ngaahi founga māʻoniʻoni ʻa Sihová. Te tau tali anga-kātaki ʻa e ako ko iá?​—Hep. 5:8, 9; 12:11; Sēm. 1:2-4.

15. ʻI heʻetau kātekina anga-kātaki ʻa e faingataʻá, ko e hā hono ʻaonga ki ha niʻihi kehe?

 ¹⁵ ʻE fakatokangaʻi ʻe he niʻihi kehé ʻa e meʻa ʻoku tau faí. Koeʻuhi ko e meʻa ʻoku tau kātekina tuʻunga ʻi heʻetau ʻofa ki he māʻoniʻoní, ʻe faifai atu pē ʻo hoko nai ʻa e niʻihi ʻo kinautolu ke nau ʻilo pe ko hai moʻoni ʻa e “ngāhi tokoua” ʻo Kalaisi he ʻaho ní, pea ʻi he kau fakataha mo hono “ngāhi tokoua” ʻi he lotú ʻe malava ai ke nau maʻu ʻa e ngaahi tāpuaki ʻo e moʻui taʻengatá. (Mt. 25:34-36, 40, 46) ʻOku fiemaʻu ʻe Sihova mo hono ʻAló ke nau maʻu ʻa e faingamālie ko iá. ʻOku tau pehē mo kitautolu? ʻOku tau loto-lelei ke kātakiʻi ʻa e faingataʻá kae malava ia?

16. Ko e hā ʻa e fekauʻaki ʻa ʻetau vakai ki ha faingataʻa fakafoʻituitui pehē pea mo e fāʻūtahá?

¹⁶ Ko ha meʻa lelei lahi ē ka ko e taimi ʻoku tau vakai atu ai ko e ngaahi tuʻunga faingataʻa ʻi he moʻuí ko e faingamālie ia ke fakahāhā ai ʻetau anga-līʻoa kia Sihová pea pehē foki ki he kau ki hono fakahoko ʻa hono finangaló! ʻI heʻetau fai peheé ʻoku malava ke ne ʻomi ʻa e fakamoʻoni ʻoku tau ʻunu moʻoni atu ki he fāʻūtaha mo e ʻOtuá mo Kalaisi ʻa ia naʻe lotu ʻa Sīsū ke hoko ki he kau Kalisitiane moʻoni kotoa pē.​—Sione 17:20, 21.

Fetalanoaʻaki ʻo Fakamanatu

● ʻI hono kei fakangofua ʻa e fulikivanú kuo anga-fēfē ʻa hono fakahāhā totonu ʻe Sihova ʻa e ʻapasia lahi ki hono huafa ʻoʻoná?

● ʻI he founga fē kuo tokoni ai ʻa hono kātakiʻi ʻe he ʻOtuá ʻa e “gaahi ibu oe houhau” ke aʻu mai ʻa ʻene meesí kiate kitautolu?

● ʻOku totonu ke fēfē ʻetau vakai atu ki he ngaahi tuʻunga ʻoku fekauʻaki mo e faingataʻa ʻa ia ʻoku tau hokosia fakafoʻituituí?

[Fehuʻi ki he Ako]