Vahe 13

Ko ha Fuʻu Kakai Lahi ʻi Muʻa ʻi he Taloni ʻo Sihová

1. (a) Ko e hā naʻe pau ke hokosia ʻe he kau sevāniti ko ia ʻa e ʻOtuá ki muʻa he kuonga Kalisitiané, pe ko e toko 144,000, ki pea nau maʻu ʻa honau palé? (e) Ka ko e hā ʻa e meʻa ʻe malava ki he fuʻu kakai lahi ko ia ʻoku moʻui ʻi he taimi ʻe hoko mai ai ʻa e “mamahi lahi”?

 NEONGO naʻe hanga ʻe he kau sevāniti loto-tōnunga ʻa e ʻOtuá talu meia ʻĒpeli kia Sione Papitaiso ʻo fakamuʻomuʻa ʻi heʻenau moʻuí ʻa hono fai ʻo e finangalo ʻo e ʻOtuá, ka naʻe pau ke nau mate kotoa pea tatali ki ha toetuʻu. Kuo pau ke mate foki ʻa e toko 144,000 ʻa ia te nau kau fakataha mo Kalaisi ʻi hono Puleʻanga fakahēvaní ki muʻa pea malava ke nau maʻu honau pale ko iá. Ko hono kehe ʻaupitó, naʻe fakahā ki he ʻapositolo ko Sioné ʻi ha vīsone ʻe ʻi ai ha fuʻu kakai lahi ʻa ia te nau hao moʻui atu ʻi he “mamahi lahi” ʻo ʻikai mate, pea te nau maʻu ʻa e ʻamanaki ko e moʻui taʻengata.​—Fkh. 7:9-17.

Ko Hono ʻIlo Fakapapauʻi ʻa e “Fuʻu Kakai Lahi”

2. Ko e hā naʻe taki atu ki hono maʻu ha mahino maʻalaʻala pe ko hai ʻa e “fuʻu kakai lahi” ʻo e Fakahā 7:9?

² ʻI he ngaahi senituli lahi naʻe ʻikai ke ʻilo pau pe ko hai ʻa e “fuʻu kakai lahi” ko ení. Ka naʻe tokoni ʻa e mahino fakalakalaka ʻo fekauʻaki mo e ngaahi kikite felāveʻi mo iá. ʻI he 1923 naʻe ʻilo ai ko e “fanga sipi” ʻo e talanoa fakaefakatātā ʻa Sīsū ʻia Mātiu 25:31-46 pea mo e “fanga sipi kehe” ʻa ia naʻá ne lave ki ai ʻia Sione 10:16 ko e faʻahinga ia ʻoku nau lolotonga moʻui he taimí ni ʻa ia te nau maʻu ʻa e faingamālie ke moʻui taʻengata ʻi heni ʻi māmani. ʻI he 1931 naʻe ʻilo fakapapau ai ko e faʻahinga ko ia ʻoku fakamatalaʻi ʻe he ʻIsikeli 9:1-11 ʻo pehē ʻoku fakaʻilongaʻi ʻi honau foʻi laʻé ʻe he tangata ʻoku ʻi ai ʻa e vaitohi faka-tangata-tohí ʻoku tatau mo e “fanga sipi” ia ʻo e Mātiu vahe 25. Pea ʻi he 1935,  ko e “fuʻu kakai lahi” ʻo e Fakahā 7:9-17 naʻe ʻiloʻi ʻoku tatau pē ia mo e “fanga sipi” ʻo e talanoa fakaefakatātā ʻa Sīsū ʻo fekauʻaki mo e fanga sipi mo e fanga kosí. Neongo naʻe mahino ʻi he 1923 naʻe ʻosi kamata ke hā mai ʻa e niʻihi ʻo e faʻahinga hangē ha sipi ko ení, ka naʻe toki kamata pē ʻi he 1935 ia ʻa e tupu vave ʻaupito honau tokolahí. ʻI he ʻaho ní ʻoku laui miliona ʻa e faʻahinga ʻoku nau feinga ke fakafekauʻaki kinautolu ki he “fuʻu kakai lahi” ʻo e “fanga sipi kehe,” ʻa ia ʻoku nau maʻu ʻa e hōifua fakaeʻotuá.

3. Ko e hā ʻoku ʻikai ʻuhinga ai ʻa ʻenau “tutuʻu ʻi he ʻao ʻo e taloni” ke pehē ko ha faʻahinga ia ki hēvani?

³ ʻOku fakafaikehekeheʻi ʻa e faʻahinga ko ia ʻo e “fuʻu kakai lahi” mei he kau memipa ʻe toko 144,000 ʻo e ʻIsileli fakalaumālié, ʻa ia ʻoku lave ki ai ʻi he konga ki muʻa ʻi he vahe tatau pē ʻo e tohi Fakahā. Naʻe ʻikai mamata ʻa Sione ia ʻi heʻene vīsoné ʻoku ʻi hēvani ʻa e “fuʻu kakai lahi” ko ení. ʻOku ʻikai fiemaʻu ke nau ʻi hēvani, ka ke nau “tutuʻu ʻi he ʻao ʻo e taloni” (faka-Kalisi: e·noʹpi·on tou throʹnou, “ʻi he mata ʻo e taloni”) ʻo e ʻOtuá. Ko honau tuʻuʻangá ʻoku “ʻi he mata” pē ʻo e ʻOtuá, ʻa ia ʻokú ne tala mai kiate kitautolu ʻokú ne ʻafio mai mei hēvani ki he hako ʻo e tangatá. (Fkh. 7:9; Sāme 11:4; fehoanaki mo Sāme 100:1, 2, pehē foki kia Luke 1:74, 75 pea mo Ngāue 10:33, Kingdom Interlinear.) Pehē foki, ʻoku ʻikai fiemaʻu ki he “ngāhi kakai kotoa pe” ke ʻi hēvani ka ke nau ʻi muʻa ʻi he taloni ʻo Kalaisí (ʻuhinga fakatufunga-lea “ʻi hono ʻao”), ʻo hangē ko ia ʻoku fakamatalaʻi ʻia Mātiu 25:31, 32. Ko e moʻoniʻi meʻa ko ia ko e “fuʻu kakai lahi, ʻa ia ʻe ʻikai lava ʻe ha taha hono lau,” ʻoku ʻikai ko ha faʻahinga ia ki hēvani, ʻoku fakahā ia ʻi hono fakahoa atu kia Fakahā 7:4-8 mo e 14:1-4, ʻa ia ʻoku fakahā ai ʻa e fika pau ʻo e tokolahi ʻo e faʻahinga ʻoku toʻo mei he māmaní ke nau ʻi hēvaní.

4. (a) Ko e hā ʻa e “mamahi lahi” te nau hao moʻui atu mei aí? (e) Hangē ko ia ʻoku fakahā ʻia Fakahā 7:11, 12, ko hai ʻoku nau mātā ʻa e “fuʻu kakai lahi” pea kau fakataha mo kinautolu ʻi he lotú?

⁴ ʻI hono ʻilo fakapapauʻi ʻa e “fuʻu kakai lahi,” ʻoku tohi ʻe Sione: “Ko eni ia ʻakinautolu ʻoku haʻu mei he mamahi lahi.” Ko hono moʻoní, ko e meʻa te nau hao moʻui atu mei aí ko e fuʻu mamahi lahi taha ʻe hokosia ʻi he māmaní. (Fkh. 7:13, 14; Mt. 24:21) Ko e kau hao moʻui ko ia mei he ʻaho fakamanavahē ʻo Sihová ʻe ʻikai toe ʻi ai haʻanau tālafili ʻo  fekauʻaki mo e tokotaha ʻoku ʻaʻana honau fakahaofí. Ko ia, hangē ko ia naʻe sio ki ai ʻa Sione ʻi he vīsoné, ʻi heʻenau ʻoatu ʻa e fakamālō ki he ʻOtuá pea mo e Lamí ki honau fakahaofí, ko e ngaahi meʻa moʻui angatonu kotoa pē ʻi hēvani te nau fakatahataha mai honau leʻó fakataha mo e faʻahinga ko ení ʻi he lotu ki he ʻOtua moʻoni pē taha, ʻo pehē: “Emeni: Ko e tapuaki, mo e kololia, mo e poto, mo e fakafetaʻi, mo e fakaʻapaʻapa, mo e mafai, mo e malohi, ʻe lau ia ki hotau ʻOtua, ʻo lauikuonga pea taʻengata. ʻEmeni.”​—Fkh. 7:11, 12.

ʻAhiʻahiʻi Pe ʻOku Taau ki he Fakahaofi

5. (a) ʻOku tau fakapapauʻi fēfē ʻa e meʻa ʻoku fiemaʻu ka tau hoko ai ko ha konga ʻo e “fuʻu kakai lahi” ʻa ia ʻe fakahaofí? (e) ʻI hono tali ʻa e ngaahi fehuʻi ʻi he ngataʻanga ʻo e palakalafí ni, fakamatalaʻi ʻa e meʻa ʻoku fiemaʻu kae hao moʻui atu mei he “mamahi lahi.”

⁵ ʻOku fakahoko ʻa hono fakahaofi ʻo e “fuʻu kakai lahi” ʻo fakatatau ki he ngaahi tuʻunga māʻoniʻoni ʻa Sihová. Ko e ngaahi fakaʻilonga mahino ʻo kau ki hono ʻilo fakapapau ʻa e ngaahi anga ʻo e faʻahinga ko ia ʻe fakahaofí ʻoku fakahā mai ia ʻi he ngaahi lave fakaekikite ʻa e Tohitapú ʻo fekauʻaki mo kinautolú. Ko ia ʻoku malava ki he kau ʻofa ki he māʻoniʻoní ke nau ngāue he taimí ni ʻi he taumuʻa ke hao moʻui atu. Kuo tau ʻosi lave ki he ngaahi konga Tohitapu hono hokó. Ka ke sivisiviʻi fakaʻāuliliki kinautolu he taimí ni, fakataha mo e tokoni ʻa e toe ngaahi konga Tohitapu kehe ʻoku ʻasí, pea fakakaukau atu pe ko e hā kuo pau ke ke fai ka ke hoko ʻo feʻungamālie ai ki he ngaahi fakamatala fakaekikité ni.

 “Fanga sipi kehe” ʻoku lave ki ai ʻia Sione 10:16

 Ko e hā hono ʻuhinga ki ha taha ke ne fanongo moʻoni ki he leʻo ʻo Sīsuú? (Sione 10:27; Mt. 9:9; ʻEf. 4:17-24)

 ʻOku tau fakahāhā fēfē ʻoku tau tali ʻa Kalaisi ko hotau ‘tauhi pē taha’? (Mt. 23:10, 11)

 “Fanga sipi” ʻi he talanoa fakatātā ʻa Sīsū ʻo kau ki he fanga sipi mo e fanga kosí (Mt. 25:31-46)

 Ko hai ʻa e “ngāhi tokoua” ʻo Kalaisí ʻa ia ʻoku nau failelei ki aí? (Hep. 2:10, 11; 3:1)

 ʻI he ngaahi tuʻunga faingataʻa fē ʻoku fiemaʻu ke nau fakahā ʻoku nau fekauʻaki ai kinautolu mo e ngaahi tokoua ʻo Kalaisí ʻi he māmaní? Pea ko e hā ʻa e ngāue ʻoku nau poupou mateaki ki ai? (Fkh. 12:12, 17; Mt. 24:14; 28:19, 20)

  Faʻahinga ʻoku fakaʻilongaʻi ke hao moʻui ʻe he tangata ʻaki ʻa e vaitohi faka-tangata-tohi (ʻIsi. 9:1-11)

 ʻI he founga fē ʻoku nau fakahāhā ai ʻoku ʻikai te nau poupouʻi ʻa e ngaahi meʻa fakalielia ʻoku fai ʻi Selusalema fakaefakatātaá, pe Puleʻanga-Haʻa-Kalisitiané? (Fkh. 18:4, 5)

 Ko e hā ʻoku fakakau ʻi he “fakailoga” ʻa ia ʻokú ne fakafaikehekeheʻi ai kinautolu mei he kau Kalisitiane fakangalingalí pea ʻai kinautolu ke nau taau ke fakahaofí? (1 Pita 3:21; Mt. 7:21-27; Sione 13:35)

6. ʻOku tokoniʻi fēfē kitautolu ʻe he fakamatala ʻa Sione ʻo fekauʻaki mo e “fuʻu kakai lahi” ke mahino ʻa e ʻuhinga naʻe fakahaofi ai kinautolú?

⁶ ʻOku tānaki mai ʻa e ngaahi fakaikiiki mahuʻinga ʻe he fakamatala ʻo fekauʻaki mo e “fuʻu kakai lahi” ʻa ia ʻoku hā ʻia Fakahā 7:9-15. ʻI hono fakahā kiate kitautolu ʻoku hā ʻa e “fuʻu kakai lahi” ʻi he hili ʻa e “mamahi lahi,” ʻoku toe tohoaki ʻe he Tohitapú ʻa e tokangá ki he ngaahi meʻa naʻe fakatuʻunga ai honau fakahaofí.

7. Ko e hā naʻa nau fai ki muʻa pea hoko ʻa e “mamahi lahi,” pea ʻoku fakahā fēfē ʻa e meʻa ko iá?

⁷ Neongo ʻoku nau haʻu mei he ngaahi puleʻanga, ngaahi matakali, mo e ngaahi faʻahinga mo e ngaahi lea kotoa pē, ʻoku hā ʻoku nau fāʻūtaha ʻo “tutuʻu ʻi he ʻao ʻo e taloni,” ʻo fakahā ʻoku nau ʻiloʻi ko Sihova, ʻa e Tokotaha ʻoku ʻafio ʻi he taloní, ko e Hau Fakalevelevá ia. Kuo nau fakamoʻoniʻi ʻi heʻenau founga moʻuí ko e kau poupou mateaki kinautolu ʻo hono tuʻunga-pulé. Ko e moʻoniʻi meʻa ko ia ʻoku pehē kuo nau “fō honau kofu, ʻo fakahinehina ʻi he taʻataʻa ʻo e Lami,” ʻoku fakahā ai kuo nau ʻilo mo tali ʻa hono fiemaʻu kiate kinautolu ʻa e mahuʻinga fakaefakamolemole angahala ʻo e feilaulau ʻa Sīsū ko e Lami ʻa e ʻOtuá. (Sione 1:29; 1 Sione 2:2) Kuo nau fakatapui kinautolu ki he ʻOtuá ʻi he tui ʻo makatuʻunga ʻi he feilaulau ko iá, pea kuo fakahaaʻi ia ʻaki ʻa e fakauku ʻi he vaí pea ʻoku nau maʻu leva ai ha tuʻunga maʻa ʻi he ʻao ʻo e ʻOtuá, ʻo hangē ko ia ʻoku fakatātaaʻi ʻe honau ngaahi kofu hinehiná. Kuo ʻikai te nau toupīkoi mei hono fakahāhā ke ʻiloa ʻa ʻenau tui ki he ʻAlo ʻo e ʻOtuá. (Mt. 10:32, 33) ʻI he faitatau mo e meʻá ni hono kotoa, ʻoku fakahā ʻoku nau ʻi he temipale, pe ko e fale fakaʻuniveesi ʻa e ʻOtuá ʻoku fai ai ʻa e lotú, ʻi honau tuʻunga ko e kau lotu ʻoku nau fai ki he ʻOtuá ʻa e “tauhi . . . ʻi he ʻaho mo e po.” Ko ia kuo hoko ʻo ʻiloa ai kinautolu ko e kau poupou mateaki ʻo e  lotu moʻoní pea ko e kau fanongonongo ʻo hono Puleʻangá.​—ʻAi. 2:2, 3.

8. Ke ʻaonga kiate kitautolu ʻa e fakamatalá ni, ko e hā kuo pau ke tau faí?

⁸ ʻOkú ke feʻungamālie mo e ngaahi fakaikiiki ʻo e ngaahi fakamatala fakaekikité ni? ʻOku ʻi ai ha ngaahi founga ʻa ia ʻoku fiemaʻu ai kiate koe ke ke ʻai hoʻo moʻuí ke toe fehoanaki lahi ange mo e meʻa ʻoku fakamatalaʻi hení? Kapau ʻoku pehē, ko e taimi leva ʻeni ke fai ai ia!

Ko e Moʻui ʻi he Palataisi Fakalaumālie

9. Ko e hā ʻa e fakamatala ʻa Sione ki he ngaahi tāpuaki fakalaumālie ʻoku aʻusia ʻe he “fuʻu kakai lahi” pea naʻa mo e taimí ni?

⁹ Ko ha taha koe ʻoku ʻamanaki atu ke hao moʻui ʻo kau ʻi he “fuʻu kakai lahi”? Kapau kuó ke faimatematē ki he ngaahi founga māʻoniʻoni ʻa Sihová, tā ʻoku ʻikai ha toe veiveiua kuó ke ʻosi kamata ke aʻusia ʻa e ngaahi tuʻunga kuo talaʻofa ʻa ia kuo feʻungamālie ʻa hono fakalea ko ha palataisi fakalaumālie. Naʻe tala ki he ʻapositolo ko Sioné: “ʻE ʻikai te nau toe fiekaia, ʻumaʻā haʻanau toe fieinua, ʻumaʻā ha momoʻi lave kiate kinautolu ʻa e laʻā, pē ko e ngaahi meʻa fakavelehia. He ko e Lami ʻoku ʻi he loto taloni te ne tauhi kinautolu ʻo hangē ha fanga sipi, pea te ne tataki kinautolu ki he ngaahi matavai ʻo e Vaiola: pea ʻe holoholo ʻe he ʻOtua ʻa e loʻimata kotoa pē mei honau mata.” (Fkh. 7:16, 17) Kuo anga-fēfē ʻa e hoko ʻo moʻoni ʻa e meʻá ni kiate koe?

10. (a) ʻI he ʻuhinga fakalaumālié, ʻi he founga fē ʻoku moʻoni ai ʻa e pehē ko e “fuʻu kakai lahi” “ʻe ʻikai te nau toe fiekaia, ʻumaʻā haʻanau toe fieinua”? (e) Kuó ke aʻusia eni?

¹⁰ Naʻá ke fiekaia mo fieinua ki he māʻoniʻoní ki muʻa peá ke hoko ʻo ʻi he malumalu ʻo e tokanga anga-ʻofa ʻa e Tauhi-Sipi Lelei, ko Sīsū Kalaisí? (Fehoanaki mo Mātiu 5:6) Kapau naʻe pehē, ko e meʻa ko ia naʻá ke mātuʻaki holi ki aí ko ha meʻa ʻoku malava ke tokonaki mai ʻe Sihova tokotaha pē ʻo fakafou mai ʻi hono ʻAló. ʻI hoʻo ako ʻo kau ki he ngaahi founga māʻoniʻoni ʻa Sihová​—ʻene taumuʻa ke fakaʻauha ʻa e kakai anga-fulikivanú, ka ko ʻene ʻofa maʻataʻatā ʻo ne ʻai ke malava ʻa e fakamoʻui ki he fānau ʻa ʻĀtamá​—tā ʻoku ʻikai ha veiveiua, ko e fuofua taimi ia ʻi hoʻo moʻuí naʻá ke ongoʻi fiemālie moʻoni ai. Kuo hokohoko atu ke ʻoatu kiate koe ʻa e fiemālié ʻe he meʻakai mo e inu fakalaumālie ʻoku maʻu mei  he Folofola ʻa e ʻOtuá, ʻa ia ʻoku ʻomai ʻi heʻene kautahá. (ʻAi. 65:13, 14) Pea kapau kuó ke fakatapui koe ki he ʻOtuá ʻo fakafou ʻia Kalaisi kuó ke maʻu leva he taimí ni ha taumuʻa moʻoni ʻi he moʻuí. (Fehoanaki mo Sione 4:32-34.) ʻOku ʻi muʻa ʻiate koe ʻa e ʻamanaki fakafiefia ko e moʻui taʻengata ʻi ha māmani Palataisi, koeʻuhi ko e Lamí “te ne tataki [ʻa e “fuʻu kakai lahi”] ki he ngaahi matavai ʻo e Vaiola.”

11. (a) ʻI he founga fē ʻoku moʻoni ai ʻa e pehē ‘ʻe ʻikai momoʻi lave kiate kinautolu ʻa e laʻā, pe ko e ngaahi meʻa fakavelehia’? (e) ʻOku mahuʻinga fēfē ia kiate koe?

¹¹ ʻI he tuʻunga ko e “fanga sipi” anga-falala, ʻoku toe maluʻi mo tataki ʻe he Tauhi-Sipi Leleí ʻa e faʻahinga ko ia ko e “fuʻu kakai lahi.” Ko hono ʻuhinga ia ‘ʻe ʻikai ha momoʻi lave kiate kinautolu ʻa e laʻā, pe ko e ngaahi meʻa fakavelehia’ ʻi ha founga fakaefakatātā. ʻOku ʻikai ʻuhinga ʻeni ia ʻo pehē, ʻi he tuʻunga ko ha taha ʻo e “fuʻu kakai lahi,” ʻe ʻikai te ke toe faingataʻaʻia ai koe ʻi ha fakatanga mei he māmaní. Ka, ʻokú ne fakahaaʻi ʻe maluʻi koe mei he tuputāmaki kakaha ʻa e ʻOtuá. Pea ʻi he taimi te ne ʻomai ai ʻa e fakaʻauha ki he kakai anga-fulikivanú, ʻe ʻikai uesia ai koe. ʻOku malava ke hokohoko taʻengata atu ʻa e vahaʻangatae lelei ko ení.​—ʻIsi. 38:22, 23; fehoanaki mo Sāme 11:6; 85:3, 4.

12. Naʻa mo e taimí ni ʻi he founga fē kuo holoholo ai ʻa e loʻimata kotoa pē mei ho matá?

¹² Ko ha ngaahi ʻuhinga fakaofo ē ki he fiefiá ʻoku ʻaʻau ʻo kapau ko ha taha moʻoni koe ʻo e “fuʻu kakai lahi”! ʻOkú ke maʻu ʻa e ʻamanaki fakaofo ke mātā ʻa hono toʻo fakaʻaufuli atu ʻa e kakai anga-fulikivanú pea toki aʻusia ʻa hono fakatauʻatāinaʻi moʻoni ʻa ho ʻatamaí mo ho sinó mei he ngaahi nunuʻa kotoa ʻo e angahalá. Ka naʻa mo e taimí ni ʻoku ʻikai te ke aʻusia ʻe koe ʻa e loto-mamahi ʻoku hokosia ʻe he kakai ʻoku ʻikai te nau ʻilo ʻa e ʻOtuá. ʻOkú ke kamata ke ʻilo ʻa e fiefia ʻoku maʻá e kakai pē ko ia ko honau ʻOtuá ko Sihova. (Sāme 144:15e) ʻI he foungá ni kuó ke ʻosi kamata ai ke aʻusia ʻa hono fakahoko ʻo e talaʻofa: “ʻE holoholo ʻe he ʻOtua ʻa e loʻimata kotoa pē mei honau mata.”

13. Ko e hā ʻe tānaki atu ki he fiefia ʻo e palataisi fakalaumālié ʻi he hokohoko atu ʻa e pule afeʻi taʻu ʻa Kalaisí?

¹³ Hangē pē ko ia ʻe hao moʻui atu ʻa e “fuʻu kakai lahi” ʻi he ngataʻanga ʻo e ngaahi meʻa ʻoku tuʻu ní, ʻe toe pehē pē mo e palataisi fakalaumālié. Kapau ko ha taha koe ʻo kinautolu,  tā te ke hokohoko atu ke aʻusia ha kātoanga kai fakalaumālie ʻo e ngaahi meʻa lolo ʻi he hokohoko atu ʻa e pule afeʻi taʻu ʻa Kalaisí. ʻE loloto ange ʻa hoʻo ʻilo ʻo fekauʻaki mo e ʻOtuá tonu ʻi hoʻo sio ki hono fakahoko lāngilangiʻia ʻa ʻene taumuʻa taʻealataʻofiá. ʻE toe fakalahi ange ʻa hoʻo fiefiá ʻi hoʻo kau ki hono talitali lelei mai ʻa e fuʻu kakai tokolahi mei he maté ke nau fāʻūtaha mo koe ʻi he lotu moʻoní. Pea ko e ngaahi tāpuaki fakamatelie ʻa ia ʻe toki tokonaki maí ʻe tautefito ʻa ʻenau mahuʻingá ki he kau sevāniti mateaki kotoa ʻa e ʻOtuá koeʻuhi ko e fakahāhā ia ʻo e ʻofa ʻa Sihova tonu.​—ʻAi. 25:6-9; Sēm. 1:17.

Fetalanoaʻaki ʻo Fakamanatu

● Ko e hā ʻa e meʻa taʻealafakatataua ʻoku fakafekauʻaki ki ai ʻe he Tohitapú ʻa e “fuʻu kakai lahi,” pea ʻi he founga fē?

● Kapau ʻoku tau fiemaʻu moʻoni ke tau kau ʻi he “fuʻu kakai lahi” ko ia ʻoku hōifua ki ai ʻa e ʻOtuá, ko e hā kuo pau ke tau fai he taimi ní?

● ʻOku mahuʻinga fēfē kiate koe ʻa e ngaahi tāpuaki ʻo e palataisi fakalaumālié?

[Fehuʻi ki he Ako]