Vahe 17

“Maʻu ʻa e ʻOfa Tautakele ʻIate Kimoutolu”

1, 2. (a) Ko e hā ʻa e meʻa ʻoku faʻa maongo ki he kau haʻu foʻou ki he ngaahi fakataha ʻa e Kau Fakamoʻoni ʻa Sihová? (e) Ko e hā ʻa e toe fakamoʻoni ʻo e ʻulungaanga ko ení ʻoku nau fakatokangaʻi ʻi heʻetau ngaahi fakataha lalahí?

 ʻI HE fuofua haʻu ʻa e kakaí ki he ngaahi fakataha ʻa e fakatahaʻanga ʻo e Kau Fakamoʻoni ʻa Sihová ʻoku faʻa maongo loloto kiate kinautolu ʻa e ʻofa ʻoku fakahāhā aí. ʻOku nau fakatokangaʻi eni ʻi he feohi māfana pea mo e talitali lelei ʻoku fai kiate kinautolu taautaha.

² ʻOku toe fakatokangaʻi ʻe he kau ʻaʻahi mai ki he ngaahi fakataha lalahi ʻa e Kau Fakamoʻoni ʻa Sihová ʻoku mātuʻaki lelei ʻa e tōʻonga ʻa e tokolahi taha ʻo e faʻahinga ʻoku kau ki aí. Naʻe tohi ʻe ha faiongoongo ʻo fekauʻaki mo ha fakataha lahi pehē: ‘ʻOku ʻikai ke maʻu ai ha taha ʻe he faitoʻo kona tapú pe ʻolokaholó. ʻOku ʻikai ha kaikaila mo ha kekekeke ai. ʻIkai ha tauteke. ʻIkai ha fetēkeaki. ʻIkai ha kapekape ai. ʻIkai ha fakakata kovi pe lea ʻuli ai. ʻIkai ha ʻahuʻi tapaka. ʻIkai ha kaihaʻa ai. ʻIkai ke laku noaʻia ai ʻe ha taha ʻa e ngeʻesi kapá ki he musié. Naʻe ngali kehe moʻoni.’ Ko e kātoa ʻo e ngaahi meʻá ni ko e fakamoʻoni ia ʻo e ʻofá, ʻa e faʻahinga ʻofa “ʻoku ʻikai te ne fai taʻetāu, ʻoku ʻikai te ne kumi ʻene lelei aʻana.”​—1 Kol.1Ko 13:4-8.

3. (a) ʻI he faai mai ʻa e taimí, ko e hā ʻoku totonu ke hā mahino ʻo kau ki heʻetau fakahāhā ʻa e ʻofá? (e) ʻI he faʻifaʻitaki kia Kalaisí, ko e hā ʻa e faʻahinga ʻofa kuo pau ke tau fakatupú?

³ Ko e ʻofá ko ha ʻulungaanga ʻokú ne fakahā fakapapauʻi ʻa e kau Kalisitiane moʻoni taki taha. (Sione 13:35) ʻI heʻetau tupulaki fakalaumālié, ʻoku totonu ke tau fakahāhā ia ke kakato ange. Naʻe lotu ʻa e ʻapositolo ko Paulá ke hoko ʻa e ʻofa ʻo hono ngaahi tokouá ʻo “tupulekina ʻo lahi hake ʻaupito.” (Fili. 1:9; 1 Tes. 3:12) Naʻe toe naʻinaʻi ʻa Pita ki hono kaungā-Kalisitiané ke nau ʻai ʻenau ʻofá ke ne fālute “ʻa e ngaahi tokoua kotoa.” (1 Pita 2:17, NW) ʻOku totonu ke  ueʻi kitautolu ʻe heʻetau ʻofá ke tau fai ha meʻa ke lahi ange ʻo ʻikai ko e maʻu pē ʻa e ngaahi fakatahá fakataha mo e kakai ʻa ia ʻoku tau fai ha kiʻi feinga siʻisiʻi pē ke ʻilo kinautolu taautaha. ʻOku totonu ke lahi ange ʻa e meʻa ʻoku kau ki he ʻofá ʻi he pehē pē “Mālō e lelei” ʻi ha taimi. Naʻe fakahā ʻe he ʻapositolo ko Sioné ʻoku totonu ke hoko ʻa e ʻofá ko e moʻui līʻoa. Naʻá ne tohi: “ʻI he meʻá ni kuo tau ʻilo ai ʻa e ʻofá, koeʻuhi [ko e ʻAlo ʻo e ʻOtuá] naʻá ne tuku ange ʻene soulú maʻatautolu; pea ʻoku tau moʻuaʻaki ai ke tuku ange ʻetau soulú maʻa hotau ngaahi tokouá.” (1 Sione 3:16, NW; Sione 15:12, 13) Kuo teʻeki ai ke tau fai ia. Ka te tau tuku moʻoni atu ʻetau moʻuí koeʻuhi ko hotau ngaahi tokouá? Sai, ko e hā hono lahi ke tau tokoniʻi ai kinautolu he taimí ni ʻo mahulu atu mei he meʻa kuo pau ke tau faí, ʻo aʻu ki he taimi ʻoku ʻikai nai ke faingamālie?

4. (a) Ko e hā ʻa e toe founga ʻoku malava nai ke tau fakahāhā ai ʻa e ʻofá ke lahi ange? (e) Ko e hā ʻoku mātuʻaki mahuʻinga ai ke maʻu ʻa e ʻofa tautakele ʻiate kitautolu?

⁴ ʻOku toe mahuʻinga ke maʻu ha ongoʻi māfana moʻoni ki hotau ngaahi tokouá fakataha mo e ngaahi ngāue ʻa ia ʻoku nau fakahā ʻa e loto ke moʻui līʻoá. ʻOku naʻinaʻi mai ʻa e Folofola ʻa e ʻOtuá kiate kitautolu: “Mou feʻofaʻaki ʻi he ʻofa fakatokoua.” (Loma 12:10, NW) ʻOku tau ongoʻi pehē kotoa ki ha faʻahinga ʻe niʻihi. ʻE lava ke tau fakakau mai ke toe tokolahi ange ʻi he faʻahinga ko ia ʻoku tau ongoʻi ʻofa pehē ki aí? ʻI he fakaʻau ke ofi ange ʻa e ngataʻanga ʻo e tuʻu motuʻá ni, ʻoku mātuʻaki mahuʻinga kiate kitautolu ke tau toe vāofi ange ki hotau ngaahi tokoua Kalisitiané. ʻOku fakatokanga mai ʻa e Tohitapú ʻo fekauʻaki mo e meʻá ni, ʻo pehē: “Ka ko e ngataʻanga ʻo e ngaahi meʻa kotoa kuo ofí ni: . . . Sinoemeʻa, mou maʻu ʻa e ʻofa tautakele ʻiate kimoutolu, koeʻuhi ʻoku ʻufiʻufi ʻe he ofá ha fufuʻunga angahala.”​—1 Pita 4:7, 8, NW.

5. Ko e hā ʻe hala ai ke ʻamanekina ʻe ʻikai ke ʻi ai ha ngaahi palopalema ʻe malanga hake ʻi he vā ʻo e kau memipa ʻo ha fakatahaʻanga?

⁵ ʻOku moʻoni, ʻi heʻetau kei ʻi he tuʻunga taʻehaohaoá, ʻe ʻi ai ʻa e ngaahi taimi te tau fai ai ʻa e ngaahi meʻa ʻo loto-mamahi ai ha niʻihi kehe. ʻOku pehē pē kiate kinautolu, te nau fai angahala mai kiate kitautolu ʻi ha ngaahi founga kehekehe. (1 Sione 1:8) Kapau te ke aʻusia ha tuʻunga pehē, ko e hā ʻoku totonu ke ke faí?

 Ko e Meʻa ke Fai ʻi he Malanga Hake ha Ngaahi Palopalema

6. (a) Ko e hā nai ʻoku ʻikai ke toutou tatau ai ʻa e akonaki ʻa e Tohitapú pea mo ʻetau ngaahi hehemá? (e) Ka ko e hā ʻa e ola ʻo kapau te tau ngāueʻaki ʻa e akonaki ʻa e Tohitapú?

⁶ ʻOku tokonaki mai ʻe he Tohitapú ʻa e tataki ʻoku fiemaʻú. Ka ʻoku ʻikai nai ke tatau ʻa e meʻa ko ia ʻokú ne akonaki maí pea mo e meʻa ko ia ʻoku tau hehema ke faí ʻi hotau tuʻunga ko e faʻahinga taʻehaohaoá. (Loma 7:21-23) Ka neongo ia, ko ʻetau ngāue tōtōivi ki aí ʻe fakamoʻoniʻi ai ʻa ʻetau holi loto-moʻoni ke fakahōifuaʻi ʻa Sihová, pea ʻe toe fakalahi ange ai foki ʻa ʻetau ʻofa ki he niʻihi kehé.

7. (a) Kapau ʻoku fakatupu loto-mamahi mai ha taha kiate kitautolu, ko e hā ʻoku totonu ai ke ʻoua te tau fai sauní? (e) Ko e hā ʻoku ʻikai totonu ai ke tau fakaʻehiʻehi mei ha tokoua ʻokú ne fakatupu loto-mamahi mai kiate kitautolu?

⁷ ʻI he taimi ʻe niʻihi ʻoku sio nai ʻa e kakai kuo nau loto-mamahí ki ha ngaahi founga ke fai sauni ki he tokotaha fakatupu loto-mamahí. Ka ko e meʻa ia ʻokú ne ʻai ke toe kovi ange ai ʻa e tuʻunga ko iá. Kapau ʻoku fiemaʻu heni ke fai ha sauni, ʻoku totonu ke tau tuku ia ki he ʻOtuá. (Pal. 24:29; Loma 12:17-21) ʻOku feinga nai ʻa e niʻihi ke tuʻusi ʻosi ʻa e tokotaha fakatupu loto-mamahí mei heʻenau moʻuí, ʻo fakaʻehiʻehi mei he feohi mo ia. Ka heʻikai totonu ke tau fai ia ki hotau kaungālotú. ʻI he konga lahi, ʻoku fakatuʻunga ʻa hono ala tali ʻa ʻetau lotu ʻoku faí ʻi heʻetau ʻofa ki hotau ngaahi tokouá. (1 Sione 4:20) ʻE lava ke tau lea moʻoni ʻo pehē ʻoku tau ʻofa ki ha tokotaha ʻa ia ʻe ʻikai te tau talanoa ki ai pe ko e meʻa fakatupu fakahohaʻa kiate kitautolu ke tau sio tonu ki ai? ʻOku fiemaʻu ke tau fefaʻuhi mo e palopalemá pea fakaleleiʻi ia. Anga-fēfē?

8, 9. (a) Kapau ʻokú te maʻu ha ʻuhinga ke lāunga ai ʻo fekauʻaki mo ha tokoua, ko e hā ʻa e meʻa ʻoku totonu ke faí? (e) Kae fēfē kapau ʻokú ne toutou faihala pē kiate kita? (f) Ko e hā ʻoku totonu ai ke tau fakaleleiʻi ʻa e meʻa ko iá ʻi he foungá ni, pea ko e hā te ne tokoniʻi kitautolu ke tau fai pehē?

⁸ ʻI he meʻá ni naʻe tohi ai ʻe he ʻapositolo ko Paulá: “Mou toutou fekātakiʻaki mo fefakamolemoleʻaki maʻataʻatā, kapau ʻoku maʻu ʻe ha taha ha ʻuhinga ke lāunga ai fekauʻaki mo ha taha. Hangē ko ia naʻe fakamolemoleʻi maʻataʻatā koe ʻe Sihova, ke fai pehē mo koe foki.” (Kol. 3:13, NW) ʻE lava ke ke fai ia? Fēfē kapau ʻoku toutou fai angahala atu ha taha kiate koe ʻi ha ngaahi founga kehekehe?

 ⁹ Naʻe ʻeke ʻe he ʻapositolo ko Pitá ʻa e fehuʻi tatau, pea naʻá ne fokotuʻu ʻo pehē mahalo ʻe totonu ke ne feinga ke fakamolemoleʻi ha tokoua pehē ʻo aʻu ki he tuʻo fitu. Naʻe tali ange ʻe Sīsū: “ʻOku ʻikai te u pehe kiate koe, ʻO tuʻo fitu: ka, ʻO tuʻo fitu liunga ʻaki ʻa e fitungofulu.” Ka ko e hā hono ʻuhingá? Naʻe fakamatalaʻi ʻe Sīsū ʻaki ha talanoa fakatātā ʻa ia naʻe fakaeʻa ai ʻa e kāfakafa ʻo hotau moʻua ki he ʻOtuá ʻi hono fakahoa atu ki ha meʻa ʻoku moʻua mai ʻaki nai ʻe ha taha kiate kitautolu. (Mt. 18:21-35) ʻOku lahi ʻa e ngaahi founga ʻoku tau fai angahala ai ki he ʻOtuá ʻi he ʻaho kotoa pē​—ʻo ngāue siokita ʻi he taimi ʻe niʻihi, ʻi he taimi lahi ʻaki ʻa e meʻa ʻoku tau leaʻakí pe fakakaukau ki aí, pea pehē ki he ʻikai te tau fai ʻa e meʻa ʻoku totonu ke tau faí. ʻI heʻetau mūnoa, ʻoku aʻu ʻo ʻikai nai ke tau fakatokangaʻi naʻe hala ʻa e niʻihi ʻo e ngaahi meʻa naʻa tau faí, pe ʻi he moʻui hamumú ʻoku ʻikai nai ke tau fakakaukau fakamātoato feʻunga ʻo kau ki he meʻá ni. ʻOku malava pē ke kouna atu ʻe he ʻOtuá ʻa ʻetau moʻuí ko ha totongi ki heʻetau ngaahi angahalá. (Loma 6:23) Ka kuo hokohoko mai pē ʻa ʻene meesi kiate kitautolú. (Sāme 103:10-14) Ko ia ai, ʻoku ʻikai ke taʻe ʻuhinga lelei ʻa ʻene fiemaʻu kiate kitautolu ke tau feangaingaʻaki meimei tatau pehē. (Mt. 6:14, 15; ʻEf. 4:1-3) ʻI heʻetau fai iá, kae ʻoua ʻe tukulotoa ʻa e loto-mamahí, ʻoku fakamoʻoniʻi ai ʻoku tau aʻu ki he faʻahinga ʻofa ko ia “ʻoku ʻikai te ne lau ʻa e kovi.”​—1 Kol.1Ko 13:4, 5; 1 Pita 3:8, 9.

10. Ko e hā ʻoku totonu ke te fai ʻo kapau ʻoku loto-mamahi mai ha tokoua kiate kita?

¹⁰ ʻOku ʻi ai nai ʻa e taimi ʻe niʻihi ʻokú te fakatokangaʻi ai, neongo ʻoku ʻikai te te loto-mamahi ki hoto tokouá, ka ʻokú ne loto-mamahi mai kiate kita. Ko e hā ʻoku totonu ke te faí? ʻOku totonu leva ke te talanoa kiate ia ʻo ʻoua ʻe toe toloi pea feinga ke toe fokotuʻu ʻa e melinó. ʻOku naʻinaʻi mai ʻa e Tohitapú kiate kitautolu ke tau tomuʻa fai ia ʻe kitautolu pē. (Mt. 5:23, 24) ʻOku ʻikai nai ke faingofua ke fai pehē. ʻOku fiemaʻu ki ai ʻa e ʻofa fakataha mo e anga-fakatōkilalo. ʻOku mālohi feʻunga ʻa e ongo ʻulungaanga ko iá ʻiate koe koeʻuhi ka ke fai ʻa e meʻa ʻoku akonaki mai ʻe he Tohitapú? Ko ha taumuʻa mahuʻinga eni ke feinga ki ai.

11. Kapau ʻoku fai ʻe ha tokoua ha ngaahi meʻa ʻoku fakatupu loto-mamahi kiate kita, ko e hā ʻoku totonu ke fai ki he meʻa ko iá?

¹¹ ʻI he tafaʻaki ʻe tahá, ʻoku fai nai ʻe ha taha ha ngaahi meʻa ʻoku fakatupu loto-mamahi kiate kita​—pea pehē nai ki  ha niʻihi kehe. Meʻa nī ʻe ʻikai lelei ke lea ha taha kiate ia? Mahalo pē. Kapau te ke fakamatalaʻi ʻa e palopalemá kiate ia ʻi ha founga anga-ʻofa, ʻe hoko mai nai ai ha ngaahi ola lelei. Ka ko e ʻuluaki meʻá ʻoku totonu ke ke ʻeke hifo kiate koe: ‘ʻOku mātuʻaki taʻe faka-Tohitapu ʻa e ngaahi meʻa ʻokú ne faí? Pe ʻoku hoko ʻa e palopalemá tautautefito koeʻuhi ʻoku kehekehe ʻa e ako mo e ʻātakai naʻá ku tupu hake aí mei he ako mo e ʻātakai naʻá ne tupu hake aí?’ Kapau ko ia, tokanga ke ʻoua te ke fokotuʻu ʻa ho ngaahi tuʻunga ʻoʻoú pea fakamaauʻi ia ʻo fakatatau ki he ngaahi tuʻunga ko iá. (Sēm. 4:11, 12) ʻOku tali taʻefilifilimānako ʻe Sihova ʻa e kakai mei he ʻātakai kehekehe kotoa pē pea ʻokú ne anga-kātaki kiate kinautolu ʻi heʻenau tupulaki fakalaumālié.

12. (a) Kapau ʻoku ʻi ai ha faihala mamafa ʻaupito ʻi he fakatahaʻangá, ko hai ʻoku tokanga ki he meʻa ko iá? (e) Ka ko e hā ʻa e ngaahi tuʻunga ʻoku hoko ko e fatongia leva ia ʻo e tokotaha ʻoku fai ki ai ʻa e faihalá ke ne ʻuluaki fai ʻa e ngāue ki aí? Pea ko e hā hono taumuʻá?

¹² Kaekehe, kapau ʻoku kau ha taha ʻi he fakatahaʻangá ʻi ha faihala mamafa ʻaupito, ʻoku fiemaʻu ke fai ha ngāue vave ki ai. Ka ʻe fai ʻe hai? ʻE faʻa fai ia ʻe he kau mātuʻá. Kaekehe, kapau ko e faihala ko iá ʻoku fekauʻaki mo ha meʻa fakapisinisi ʻi he vā ʻo e ngaahi tokouá, pe ko hono ngāuehalaʻaki nai ʻo e ʻeleló ʻi ha founga ʻo uesia lahi ai ha taha, ʻoku totonu leva ki he tokotaha ʻoku fai ki ai ʻa e faihalá ke ʻuluaki feinga ke tokoni ki he tokotaha faihalá ʻiate kinaua pē. ʻOku hā ngali faingataʻa nai eni ki he niʻihi. Ka ko e meʻa ia ʻoku akonaki mai ʻe Sīsū ʻia Mātiu 18:15-17. Ko e ʻofa ki hoto tokouá pea mo ha holi tōtōivi ke kei tauhi ia ko ha tokouá ʻe tokoniʻi ai kita ke te fai ʻa e tokoni ko iá ʻi ha founga ʻa ia, kapau ʻe malava, ʻe aʻu ai ki he loto ʻo e tokotaha faihalá.​—Pal. 16:23.

13. Kapau ʻe malanga hake ha palopalema ʻi hoto vā mo ha tokoua ʻe taha, ko e hā ʻe tokoni kiate kita ke te vakai totonu ai ki he meʻa ko iá?

¹³ ʻI he hoko ha palopalema, tatau ai pē pe ʻoku lahi pe siʻisiʻi, ʻoku tokoniʻi ai kitautolu ʻo kapau ʻoku tau feinga ke maʻu ʻa e anga ʻo e vakai ki ai ʻa Sihová. ʻOku ʻikai te ne hōifua ki he angahalá ʻi ha faʻahinga tuʻunga pē, ka ʻokú ne ʻafioʻi ia ʻiate kitautolu kotoa pē. ʻI heʻene taimi totonu ʻokú ne fakamaʻa atu ai ʻa e kau faihala taʻefakatomalá mei heʻene kautahá. Kae fēfē ʻa e toenga ʻo kitautolú? ʻOku tau maʻu kotoa ʻa ʻene kātaki-fuoloá mo ʻene meesí. ʻOkú ne fokotuʻu mai ʻa e sīpinga ke tau faʻifaʻitaki ki ai. ʻI heʻetau fai iá, ʻoku tapua atu ai meiate kitautolu ʻa ʻene ʻofá.​—ʻEf. 4:32, 33 [ʻEf. 5:1, 2, PM].

 Fekumi ki he Ngaahi Founga ke ‘Fano Atu’

14. (a) Ko e hā naʻe fakalototoʻaʻi ai ʻe Paula ʻa e kau Kolinitoó ke nau ‘fano atu’? (e) Ko e hā ʻa e lau ʻa e ngaahi konga Tohitapu ʻoku ʻasi hení ʻo hā ai ʻoku lelei kiate kitautolu kotoa ke tau fakakaukau ʻo kau ki he meʻá ni?

¹⁴ Naʻe fakamoleki ʻe he ʻapositolo ko Paulá ʻa e ngaahi māhina lahi ʻi hono langa hake ʻa e fakatahaʻanga ʻi Kolinitō, Kalisi. Naʻá ne ngāue mālohi ke tokoniʻi ʻa e ngaahi tokoua aí pea naʻá ne ʻofa kiate kinautolu. Ka naʻe ʻi ai ʻa e niʻihi ʻo kinautolu naʻe ʻikai te nau ongoʻi loto-māfana kiate ia. Naʻa nau fuʻu fakaanga. Naʻá ne naʻinaʻi kiate kinautolu ke “fano” atu ʻi hono fakahāhā ʻa e ʻofá. (2 Kol.2Ko 6:11-13; 12:15) ʻOku lelei kiate kitautolu kotoa ke tau fakakaukau atu ki hono lahi ʻo ʻetau fakahāhā ʻa e ʻofa ki he niʻihi kehé pea fekumi ki he ngaahi founga ke “fano” atu ai ia.​—1 Sione 3:14; 1 Kol.1Ko 13:3.

15. Ko e hā ʻoku malava ke tokoni kiate kitautolu ke tupulaki ʻi he ʻofa ki ha taha pē ʻa ia ʻoku ʻikai nai ke tau ongoʻi vāofi ki ai?

¹⁵ ʻOku ʻi ai ha niʻihi ʻi he fakatahaʻangá ʻoku faingataʻa kiate kitautolu ke vāofi mo ia? Kapau te tau fai ke mahulu atu mei he meʻa kuo pau ke tau faí ke ʻufiʻufi ha faʻahinga fehālaaki siʻisiʻi pē mei heʻenau tafaʻakí, ʻo hangē pē ko ia ko ʻetau fiemaʻu ke nau fai pehē mai pē kiate kitautolú, ʻe tokoni ia ke ʻai ke māfana ai ʻa e vahaʻangatae ʻiate kitautolú. (Pal. 17:9; 19:11) ʻE toe lava ke lelei ange ʻa ʻetau ongoʻi kiate kinautolú ʻo kapau ʻoku tau sio ki honau ngaahi ʻulungaanga leleí pea tuku maʻu ʻetau tokangá ki ai. Kuo tau fakatokangaʻi moʻoni ʻa e ngaahi founga ʻoku ngāueʻaki ai ʻe Sihova ʻa e ngaahi tokouá ni? ʻE ʻai moʻoni ʻe he meʻá ni ke tupulaki ʻa ʻetau ʻofa kiate kinautolú.​—Luke 6:32, 33, 36.

16. ʻI ha founga ʻoku malava ke fakahoko moʻoni, ʻoku malava fēfē ke tau “fano” atu ʻi hono fakahāhā ʻa e ʻofá ki he faʻahinga ʻi heʻetau fakatahaʻangá?

¹⁶ Ko hono moʻoní, ʻoku ʻi ai ʻa e ngaahi fakangatangata ki he meʻa ʻoku malava ke tau fai maʻá e niʻihi kehé. Heʻikai malava nai ke tau fakafeʻiloaki ki he tokotaha kotoa pē ʻi he fakataha taki taha. Heʻikai malava nai ke tau fakakau ʻa e tokotaha kotoa pē ʻi he taimi ʻoku tau fakaafeʻi ai ʻa e ngaahi kaungāmeʻá ki ha houa kai. ʻOku tau maʻu kotoa ha ngaahi kaungāmeʻa fekoekoeʻi ʻa ia ʻoku tau fakamoleki ha taimi lahi ange mo kinautolu ʻi ha niʻihi kehe. Ka ʻoku malava ke tau “fano” atu? ʻOku malava ke te fakamoleki ha ngaahi  miniti siʻi pē ʻi he uike taki taha ke ʻai ke te maheni lelei ange mo ha taha ʻi heʻete fakatahaʻangá ʻa ia kuo ʻikai ko ha kaungāmeʻa ofi ia ʻo kita? ʻE lava nai ke te fakaafeʻi ʻi ha taimi ha taha ʻo e faʻahingá ni ke ngāue fakataha mo kita ʻi he ngāue fakamalangá? Kapau ʻoku tau maʻu moʻoni ʻa e feʻofaʻaki tautakelé, ʻoku pau te tau kumi ʻa e ngaahi founga ke fakahāhā ai iá.

17. ʻI he taimi ʻoku tau ʻi he lotolotonga ai ʻo e ngaahi tokoua kuo teʻeki ai ke tau feʻiloaki ki muʻa, ko e hā te ne fakahāhā pe ʻoku tau maʻu ʻa e ʻofa tautakele kiate kinautolu?

¹⁷ ʻOku lahi ʻa e ngaahi faingamālie lelei ʻoku maʻu ʻi he ngaahi fakataha lalahi faka-Kalisitiané ke “fano” atu ai ʻete ʻofá. ʻOku maʻu fakataha nai ai ha toko laui afe. Heʻikai malava ke tau feʻiloaki mo kinautolu kotoa. Ka ʻoku malava ke tau fakahā ʻi heʻetau angafaí ʻoku tau fakamuʻomuʻa ʻa e lelei kiate kinautolú ʻi he lelei ʻatautolú, neongo kuo teʻeki ai ke tau feʻiloaki mo kinautolu ki muʻa. Pea ʻoku malava ke tau fakahāhā ʻa e mahuʻingaʻia ʻi he niʻihi kehe he lolotonga ʻa e taimi ʻoku ʻikai fai ai ʻa e polokalamá ʻaki ʻetau tomuʻa feinga ʻiate kitautolu ke feʻiloaki mo e niʻihi ʻo e faʻahinga ʻoku nofo takai mai kiate kitautolú. ʻE ʻi ai ʻa e ʻaho ʻe hoko ai ʻa e faʻahinga kotoa pē te nau nofo ʻi he māmaní ko e ngaahi tokoua mo e ngaahi tuofāfine, ʻo fāʻūtaha ʻi he lotu ki he ʻOtua mo e Tamai ʻa e faʻahinga kotoa pē. Ko ha fiefia lahi ē ʻe hoko ʻi hono ʻilo kotoa ʻo kinautolu, fakataha mo honau ngaahi ʻulungaanga kehekehe! ʻE ueʻi kitautolu ʻe he ʻofa tautakele kiate kinautolú ke tau saiʻia ke fai pehē. Fēfē ke kamata leva he taimí ni?

Fetalanoaʻaki ʻo Fakamanatu

● ʻI he malanga hake ha ngaahi palopalema ʻi he vahaʻa ʻo e ngaahi tokouá pe ngaahi tuofāfiné, ʻoku totonu ke fēfē ʻa hono fakaleleiʻi iá? Ko e hā hono ʻuhingá?

● ʻI heʻetau tupulaki fakalaumālié, ʻoku totonu ke toe tupulaki ʻetau ʻofá ʻi he ngaahi founga fē?

● ʻOku malava fēfē ke fakahāhā ʻa e ʻofa tautakelé ʻo ʻikai ngata pē ʻi he ngaahi kaungāmeʻa vāofí?

[Fehuʻi ki he Ako]