Vahe 23

Tauhi Maʻu ʻi he Fakakaukaú ʻa e ʻAho ʻo Sihová

1. (a) ʻI he taimi naʻá ke fuofua ako ʻo ʻilo ai ʻoku ofi ʻa e fakahaofi mei he ngaahi mamahi ʻo e tuʻu motuʻá ni, naʻe fēfē ʻa e anga ʻo hoʻo tali ki aí? (e) Ko e hā ʻa e ongo fehuʻi ʻo fekauʻaki mo e meʻá ni ʻoku totonu ke tau fakakaukau fakamātoato ki ai?

 ʻOKU ʻIKAI ha toe veiveiua ko e taha ʻo e ʻuluaki ngaahi meʻa naʻá ke ʻilo mei hono ako ʻo e Tohitapú ʻoku ofí ni ʻa e fakahaofi mei he ngaahi mamahi ʻo e moʻuí ʻi he tuʻu lolotonga ní. (Luke 21:28) Naʻá ke hoko ʻo ʻilo ai ko e taumuʻa ʻa e ʻOtuá ki he foʻi māmaní fakakātoa ke hoko ko ha Palataisi. ʻE ʻikai ke toe ʻi ai ha faihia, tau, mahamahaki mo e maté, pea naʻa mo e ngaahi ʻofaʻanga kuo maté te nau toe moʻui mai. Ko ha ʻamanaki fakaloto-māfana lahi ē! Naʻe fakamamafaʻi ʻa e tuʻunuku mai ʻo e ngaahi meʻá ni kotoa ʻe he fakamoʻoni ko ia naʻe kamata ʻi he 1914 T.S. ʻa e ʻi ai taʻe hā mai ʻa Kalaisi ʻi hono tuʻunga ko e Tuʻi ʻoku lolotonga pulé pea talu mei ai kuo tau ʻi he ngaahi ʻaho fakaʻosi ʻo e māmani anga-fulikivanu ko ení. Kuo fakahoko ʻe he ʻilo ko iá ha ngaahi liliu ki hoʻo moʻuí? ʻOku fakahāhaaʻi moʻoni ʻe hoʻo founga moʻuí ʻokú ke tui pau ʻoku ofí ni ʻa e “ʻaho ʻo Sihova”?

2. (a) ʻE hoko mai ʻafē ʻa e “ʻaho ʻo Sihova”? (e) ʻI he founga fē kuo fakamoʻoniʻi ai ʻoku ʻaonga ʻa e ʻikai ke fakahā mai ʻe Sihova ʻa e “ʻaho ko ia, mo hono houa”?

² ʻOku fakahaaʻi mahino ʻe he Tohitapú ko e “toʻutangata” ko ia naʻa nau mamata ki he kamataʻanga ʻo e ʻi ai ʻa Kalaisí te nau toe mamata ki he “aho lahi o Jihova” ʻa ia te ne fakahoko ai ʻa e fakamaau ki he faʻahinga kotoa pē ʻoku taʻemāʻoniʻoní. (Mt. 24:34; Sēf. 1:14–2:3, PM) Ko e “toʻutangata” ko iá ʻoku nau taʻu motuʻa ʻaupito he taimí ni. Ka ʻoku ʻikai tuhuʻi pau mai ʻe he Tohitapú ʻa e ʻaho tonu matematē ko ia ʻe hoko mai ai ʻa Sīsū Kalaisi ko e tokotaha-fakahoko-tautea ʻa Sihova ki he ngaahi meʻa ʻo e māmani ʻa Sētané. Naʻe pehē ʻe Sīsū: “Ka ko e meʻa ki he ʻaho ko ia, mo  hono houa, ʻoku ʻikai ha taha ʻoku ʻilo ki ai; ʻio, pē ko ha angelo ʻi he langi; pea naʻa mo e ʻAlo ʻoku ʻikai; ngata pē ʻi he Tamai toko taha.” (Mk. 13:32) Kuo hoko ʻo mātuʻaki ʻaonga ʻa e meʻá ni. ʻI he founga fē? Kuo tokoni ia ke fakaeʻa mai ʻa e meʻa ʻoku ʻi he loto ʻo e kakaí. Kapau ʻoku ʻikai ke ʻofa moʻoni ha taha kia Sihova, ʻoku nau hehema ke tolotoloi ʻa hono “ʻaho” ʻi heʻenau fakakaukaú pea nau hanga ke tulitāupau ki he ngaahi meʻa fakamāmani ʻa ia ʻoku hehema ki ai honau lotó. Ko e faʻahinga pē ʻoku hōifua ki ai ʻa Sihova ko ʻene kau sevānití ko e faʻahinga ʻoku nau ʻofa moʻoni kiate iá pea fakahāhaaʻi ia ʻaki ʻenau tauhi ʻaufuatō kiate ia, tatau ai pē pe ko fē ʻa e taimi ʻe toki hoko mai ai ʻa e ngataʻanga ʻo e tuʻu anga-fulikivanú ni. ʻOku ʻikai ke hōifua ʻa e ʻOtuá pea pehē ki hono ʻAló ki he faʻahinga ʻoku nau māmāfana pē pe lotolotoua.​—Fkh. 3:16; Sāme 37:4; 1 Sione 5:3.

3. Ko e hā naʻe leaʻaki ʻe Sīsū ko e fakatokanga ia kiate kitautolu ʻo fekauʻaki mo e meʻá ni?

³ Naʻe pehē ʻe Sīsū ʻi haʻane lea fakatokanga ki he kau ʻofa kia Sihová: “Mou tokanga, mou ʻā pē: he ʻoku ʻikai te mou ʻilo pe fakakū hono taimi.” (Mk. 13:33-37) ʻOkú ne ekinaki mai kiate kitautolu ke ʻoua te tau ʻai ʻa e kaí mo e inú pe ko e “faʻa lotomoʻua ki he moʻui” ke tau fuʻu tokanga ki ai ʻo ngalo ai ʻiate kitautolu ʻa e taimi mafatukituki ʻoku tau ʻi ai.​—Luke 21:34-36; Mt. 24:37-42.

4. Hangē ko ia naʻe fakamatalaʻi ʻe Pitá, ko e hā ʻe hoko ʻi he “ʻaho ʻo Sihova”?

⁴ Ki mui mai ai, naʻe akonaki ʻa e ʻapositolo ko Pitá ki he faʻahinga kotoa kuo nau maʻu ʻa e tui moʻoní ke nau ‘nofoʻaki tali mo tauhi maʻu ʻi he fakakaukaú ʻa e hoko mai ʻa e ʻaho ʻo Sihová, ʻa ia ʻe vela ai ʻa e ngaahi langi ʻo movetevete pea ʻe vela ʻo ʻauha ʻa e ngaahi ʻelemēniti.’ Ko e tuʻunuku mai ʻa e “ʻaho ʻo Sihova” ko ha meʻa ia ʻoku totonu ke ʻoua naʻa fakasiʻisiʻi ʻe ha taha ʻo kitautolu ʻi ha taimi. ʻOku vavé ni ke fetongi ʻa e ngaahi langi fakaefounga-pule hā maí pea mo e sōsaieti anga-fulikivanu ʻo e tangatá ʻe he “ngaahi langi foʻou mo e māmani foʻou” ʻoku ngaohi ʻe he ʻOtuá, pea ko e kotoa ʻo e “ngaahi ʻelemēniti” ʻa ia ʻoku kau ki he māmani lolotonga ní​—ʻa hono anga faʻifaʻitelihá, ʻa hono founga moʻui taʻetaau mo tuli pē ki he ngaahi meʻa fakamatelié​—ʻe fakangata kinautolu ʻi he vela fakaefakaʻauha ʻa e “ʻaho ʻo Sihova.” (2 Pita 3:10-13, NW) ʻOku fiemaʻu ke tau  hanganaki tokanga, ʻo lāuʻilo ʻoku malava ke kamata ʻi ha faʻahinga mōmeniti pē ʻa e ngaahi meʻa mahuʻinga ʻaupito ko ení.​—Mt. 24:44.

Tokanga Maʻu Pē ki he Ngaahi Meʻa ʻOku Nau Fakahoko ʻa e Fakaʻilongá

5. (a) Ko e hā hono lahi ʻo e kaunga ki he ngataʻanga ʻo e fokotuʻutuʻu faka-Siú ʻa e tali ʻa Sīsū ki he fehuʻi ʻoku hiki ʻia Mātiu 24:3? (e) Ko e hā ʻa e ngaahi konga ʻo ʻene talí ʻokú ne fakahanga ʻa e tokangá ki he ngaahi meʻa naʻe hoko ʻi he 1914 T.S. ʻo faai mai?

⁵ ʻI he fakakaukau atu ʻo tautefito ki he taimi ʻoku tau lolotonga moʻui aí, ʻoku totonu ke tau ʻilo lelei ʻa e ngaahi fakaikiiki ʻo fekauʻaki mo e fakaʻilonga faʻu fetuiaki ʻa ia ʻokú ne fakapapauʻi ʻa e “ngaahi ʻaho fakaʻosi,” pe ko e “fakaʻosiʻosi ʻo e ngaahi meʻa ʻoku tuʻú ni.” Ke ʻiloʻi totonu ʻa e fakaʻilongá, kuo pau ke tau manatuʻi maʻu pē ko e taimi ko ia naʻe tali ai ʻe Sīsū ʻa e fehuʻi ʻa ʻene kau ākongá ʻa ia ʻoku hiki ʻia Mātiu 24:3 (NW), naʻe kaungatonu pē ʻa e niʻihi ʻo e ngaahi meʻa naʻá ne leaʻakí ki he ngataʻanga ʻo e fokotuʻutuʻu faka-Siú ʻi he ʻuluaki senitulí, ka ʻoku kaunga tefito ʻa hono konga lahi ki he taimi ki mui ʻaupito ia mei ai. Ko e meʻa ko ia naʻá ne fakamatalaʻi ʻi he Mātiu vahe 24 veesi 4 ki he 22 naʻe fakahoko ʻi ha tuʻunga siʻisiʻi pē ʻi he vahaʻa ʻo e 33 mo e 70 T.S. Ka ko e fakahoko lahi ange ʻa e kikité ʻoku hoko ia ʻi hotau ʻahó ni pea fakaʻilongaʻi ai ʻa e vahaʻa taimi talu mei he 1914 T.S. ko e taimi ia kia Kalaisi ke ne “ʻi ai pea mo e fakaʻosiʻosi ʻo e ngaahi meʻa ʻoku tuʻú ni.” (Toe sio kia Maʻake 13:5-20 mo Luke 21:8-24) ʻOku fakamatala ʻa Mātiu 24:23-28 ki he meʻa ʻe hoko mei he 70 T.S. ʻo faai mai ʻo aʻu ki he taimi ʻo e ʻi ai ʻa Kalaisí. (Toe sio kia Maʻake 13:21-23) ʻOku tuhu kotoa ʻa e ngaahi meʻa ʻoku fakamatalaʻi ʻi he Mātiu 24:29–25:46 ki he ngataʻanga ʻo e vahe 25 ki he vahaʻa taimi talu mei he 1914 T.S.​—Toe sio kia Maʻake 13:24-37 mo Luke 21:25-36.

6. (a) Ko e hā ʻoku totonu ai ke tau tokanga fakafoʻituitui ki he founga ʻo hono fakahoko “ʻa e fakaʻilonga” ʻe he ngaahi meʻa ʻoku lolotonga hokó? (e) Tali ʻa e ngaahi fehuʻi ʻi he ngataʻanga ʻo e palakalafi ko ení ke fakahaaʻi ʻa e founga kuo fakahoko ai “ʻa e fakaʻilonga” talu mei he 1914.

⁶ ʻOku totonu kiate kitautolu taautaha ke tau vakai tokanga ki he ngaahi meʻa ʻoku lolotonga hoko ʻa ia ʻoku nau  fakahoko “ʻa e fakaʻilonga.” ʻI heʻetau fakafehokotaki ʻa e ngaahi meʻa ko ʻeni ʻoku lolotonga hokó ki he kikite ʻa e Tohitapú ʻe tokoniʻi ai kitautolu ke tau hanganaki ‘tauhi maʻu ʻi he fakakaukaú’ ʻa e ʻaho ʻo Sihová. Te ne toe tokoniʻi kitautolu ke lea ʻi he founga fakatupu fakalotoʻi ʻi he taimi ʻoku tau fai fakatokanga ai ki he niʻihi kehé ʻo fekauʻaki mo e tuʻunuku mai ʻa e “taimi sauni ʻa hotau ʻOtua.” (ʻAi. 61:1, 2) Vakai ange ki he ngaahi tafaʻaki ko eni ʻo e “fakaʻilonga” pea fakakaukau ki he ngaahi taumuʻá ni.

 Ko e hā ʻa e founga mātuʻaki kehe ʻaupito naʻe fakahoko ai ʻo kamata mei he taʻu 1914 T.S. ʻa e kikite ko ia “ʻe tuʻu ha kakai ki ha kakai mo ha puleʻanga ki ha puleʻanga”? Ko e hā kuo hoko naʻa mo e ngaahi māhina ki muí ni mai ʻoku tānaki atu ki hono fakahoko ʻo e fakaʻilongá?

 Ko e hā hono lahi kuo uesia ai ʻe he nounou fakameʻatokoní ʻa e foʻi māmaní neongo ʻa e ʻilo fakasaienisi ʻi he senituli 20 ni?

 Kuo ʻi ai moʻoni ha kehekehe ʻi he toutou hoko ʻo e ngaahi mofuike ʻi he feituʻu ki he feituʻu talu mei he 1914 T.S.?

 Ko e hā ʻa e mahaki fakaʻauha ʻi he 1918 naʻe lahi ange ʻa e moʻui ia naʻe mole aí ʻi he moʻui naʻe mole he tau ʻa e māmaní? Neongo ʻa e ʻilo fakafaitoʻó, ko e hā ʻa e ngaahi mahaki ʻoku kei hoko ko e mahaki ʻoku tō mai?

 Ko e hā ʻokú ne fakatuipauʻi koe ko e ngaahi tuʻunga ko ia ʻoku fakamatalaʻi ʻi he 2 Tīmote 3:1-5 ʻoku ʻikai ko ha founga pē ia naʻe toutou hoko pehē, ka ʻoku nau tupulaki ʻo aʻu ki ha tuʻunga fakalilifu ʻi heʻetau ngaʻunu atu ki he ngataʻanga ʻo e ngaahi ʻaho fakaʻosí?

Ko Hono Vaheʻi ʻo e Kakaí

7. (a) Ko e hā ʻa e toe meʻa kehe ʻoku fakamatalaʻi ʻia Mātiu 13:36-43, naʻe fakafehokotaki ʻe Sīsū ki he fakaʻosiʻosi ʻo e ngaahi meʻa ʻoku tuʻu ní? (e) Ko e hā ʻa e ʻuhinga ʻo e talanoa fakatātā ko iá?

⁷ ʻOku toe ʻi ai mo e ngaahi meʻa kehe mahuʻinga naʻe fakafehokotaki mahino ʻe Sīsū ki he fakaʻosiʻosi ʻo e ngaahi meʻa ʻoku tuʻu ní. Ko e taha ʻo e ngaahi meʻá ni ko hono vaheʻi ʻo e “fanau ʻo e Puleʻanga” mei he “fanau ʻa e Toko Taha Kovi.” Naʻe lea ʻa Sīsū ʻo kau ki he meʻá ni ʻi heʻene talanoa fakatātā ʻo fekauʻaki mo ha ngoue uite naʻe tō ki ai ʻe ha fili ʻa e tea. ʻOku fakatātaaʻi ʻe he “uite” ʻi heʻene talanoa fakatātaá ʻa e kau Kalisitiane moʻoni kuo paní. Ko e “tea” ko e kau Kalisitiane fakangalingali. ʻI he fakaʻosiʻosi ʻo e ngaahi  meʻa ʻoku tuʻu ní, ʻoku fakamavaheʻi mei he “fanau ʻo e Puleʻanga [ʻo e ʻOtua]” pea fakaʻilongaʻi ki he fakaʻauha ʻa e “tea”​—ʻa e faʻahinga ʻoku nau taku ko e kau Kalisitiane kinautolu ka ʻoku nau fakamoʻoniʻi ko e “fanau ʻa e Toko Taha Kovi” ʻa kinautolu koeʻuhi ʻoku nau pipiki ki he māmani ko ia ʻoku pule ai ʻa e Tēvoló. (Mt. 13:36-43) Kuo hoko moʻoni ʻa e meʻá ni?

8. (a) ʻI he hili ʻa e Tau I ʻa Māmaní, ko e hā ʻa e vahevahe lahi naʻe hoko ʻo fekauʻaki mo e faʻahinga kotoa pē ʻoku taku ko e kau Kalisitiané? (e) ʻI he founga fē naʻe fakamoʻoniʻi ai ʻe he kau Kalisitiane moʻoni kuo paní ʻoku moʻoni ko kinautolu ʻa e “fanau ʻo e Puleʻanga”?

⁸ Ko e moʻoni, ʻi he hili ʻa e Tau I ʻa Māmaní, naʻe fai ai hano vaheʻi lahi ʻo e kakai kotoa pē naʻa nau taku ko e kau Kalisitiane kinautolú ki ha faʻahinga ʻe ua: (1) Ko e haʻa-faifekau ʻo Puleʻanga-Haʻa-Kalisitiané mo honau kau muimui, ʻa ia naʻa nau hoko ʻo poupouʻi mālohi ʻa e Kautaha ʻa e Ngaahi Puleʻangá (ko e Puleʻanga Fakatahataha ʻi he taimí ni), lolotonga ia ʻenau kei pīkitai ki heʻenau mateakiʻi fonuá. (2) Ko e kiʻi tokosiʻi ko e kau Kalisitiane moʻoni kuo pani, ʻa ia ʻi he hili ʻa e taú naʻa nau fai ʻenau poupou kakato ki he Puleʻanga Faka-Mīsaia ʻo e ʻOtuá. ʻI hono fakahāhā ʻa e poupou ki he ngaahi founga-pule ʻo e māmaní ko e founga ia ke maʻu ai ʻa e melinó mo e maluʻangá, naʻe fakahaaʻi mahino ai ʻe he ʻuluaki faʻahingá naʻe ʻikai ko ha kau Kalisitiane moʻoni kinautolu. (Sione 17:16) ʻI hono kehe ʻaupitó, naʻe fakahaaʻi totonu ʻe he kau sevāniti ʻa Sihová ko e Kautaha ʻa e Ngaahi Puleʻangá ko e “meʻa fakalielia ʻo e fakaʻauha” ia ʻi onopooní naʻe lave ki ai ʻi he Mātiu 24:15. ʻI heʻenau fai ʻa hono malangaʻi ʻo e “ogoogolelei ni oe buleaga . . . i mamani kotoabe,” ʻoku nau fakahaaʻi ai ʻoku moʻoni ko kinautolu ʻa e “fanau ʻo e Puleʻanga [ʻo e ʻOtua].” (Mt. 24:14, PM) Pea ko e hā hono olá?

9. Ko e hā ʻa e ʻuluaki ola ʻo e ngāue fakamalanga ko eni ʻo fekauʻaki mo e Puleʻangá?

⁹ ʻUluaki, naʻe fai ai ʻa hono fakatahatahaʻi ʻo e toenga ʻo e kau Kalisitiane kuo pani ʻaki ʻa e laumālié. Neongo naʻa nau nofo movetevete holo ʻi he ngaahi puleʻangá, naʻe ʻomai kinautolu ki he fāʻūtaha fakaekautaha ʻi he malumalu ʻo e tataki fakaeʻāngelo.

10. (a) Kuo fēfē ʻa hono fai ʻa e ngāue fakaevahevahe lahi angé, pea ʻoku fehoanaki ia mo e kikite fē? (e) Ko e hā ʻoku fakahaaʻi ʻe he fakahoko ʻo e ngaahi kikité ni?

 ¹⁰ Ko hono hokó leva, ʻo hangē ko ia naʻe kikiteʻi ʻe Sīsuú, naʻá ne kamata ke vaheʻi ʻa e kakai ʻo e ngaahi puleʻanga kotoa pē, “ʻo hange ʻoku vaheʻi ʻe ha tauhisipi ʻa e fanga sipi mei he fanga kosi.” Ko e ngāué ni, ʻa ia ʻoku tataki ʻe Kalaisi mei hono taloni fakahēvaní, kuo hokohoko mai ʻo aʻu ki he lolotongá ni, pea ʻoku ʻi ai hono kaunga kiate koe fakafoʻituitui. ʻOku fakasītuʻaʻi ʻe he tokolahi taha ʻo e faʻahinga ʻo e tangatá ʻa e Puleʻanga ʻo e ʻOtuá pea mo ʻene “fanau” kuo pani ʻaki ʻa e laumālié, ko ia ʻe tuku atu kinautolu ki he “tautea taʻengata” ʻi he mate. Kaekehe, ʻoku fakaaʻu atu ki he niʻihi kehe ʻa e fakaafe ʻa e ʻEikí ke nau maʻu ʻa e nofoʻanga fakamāmani ʻo hono Puleʻangá, mo e ʻamanaki ki he moʻui taʻengata. Ko e faʻahinga ko ʻeni hangē ha sipí kuo nau feohi mo e toenga ʻo e “fanau ʻo e Puleʻanga,” neongo ʻa hono fakahangataha ʻa e fakatanga fakamamahí ki he faʻahingá ni. (Mt. 25:31-46) ʻOku tokoni ʻofa-mateaki ʻa e faʻahinga ko eni hangē ha sipí kiate kinautolu ki hono fanongonongo atu ʻa e pōpoaki mātuʻaki mahuʻinga ʻo fekauʻaki mo e Puleʻangá. ʻOku kau ki he ngāué ni ha fuʻu kakai tokolahi ʻe laui miliona. ʻOku lolotonga fanongoa ʻi he feituʻu kotoa pē ʻo e māmaní ʻa e pōpoaki fekauʻaki mo e Puleʻangá. Ko e hā ʻoku fakahaaʻi ʻe he ngaahi meʻá ni? ʻOku nau fakahaaʻi ʻoku tau mātuʻaki ofi ki he ngataʻanga ʻo e “ngaahi ʻaho fakaʻosi” pea ʻoku tuʻunuku mai ʻa e “ʻaho ʻo Sihova.”

Ko e Hā ʻOku ʻi he Kahaʻú?

11. ʻOku toe ʻi ai ha ngāue fakaemalanga ke fai ki muʻa pea toki hoko mai ʻa e “ʻaho ʻo Sihova”?

¹¹ ʻOku kei ʻi ai ha ngaahi kikite ʻoku toe ke fakahoko ki muʻa pea toki kamata ʻa e ʻaho lahi mo fakamanavahē ʻo Sihová? ʻIo! ʻOku teʻeki ai ke ʻosi ʻa hono vaheʻi ʻo e kakai ʻo fekauʻaki mo e pole ʻo kau ki he Puleʻangá. ʻOku ʻi ai he taimí ni ha kau ākonga foʻou tokolahi ʻaupito ʻi he ngaahi feituʻu ʻe niʻihi ʻa ia naʻe hokosia ai ʻi ha ngaahi taʻu lahi ha fakafepaki mātuʻaki mālohi. Pea naʻa mo e feituʻu ʻoku fakataleʻi ai ʻe he kakaí ʻa e ongoongo leleí, ʻoku kei pouaki pē ai ʻa e fakamaau totonu mo e meesi ʻa Sihová ʻi heʻetau fai ʻa e ngāue fakaefakamoʻoní. Ko ia, hokohoko atu ʻa e ngāué!  ʻOku fakapapauʻi mai ʻe Sīsū kiate kitautolu, ʻi he ʻosi hono fai iá, “e toki hoko mai ae ikuaga.”​—Mt. 24:14, PM.

12. (a) Hangē ko ia kuo fakahā ʻia 1 Tesalonaika 5:2, 3, ko e hā ʻa e meʻa ʻoku teʻeki ai ke hoko ka ʻoku taau ke tokangaʻi? (e) Ko e hā hono ʻuhinga ia kiate kitautolú?

¹² Ko e toe kikite faka-Tohitapu mahuʻinga lahi ʻe taha ʻokú ne kikiteʻi ʻo pehē: “ʻI ha taimi pē ʻoku nau lea ai: ‘Melino mo malu!’ pea fakafokifā leva ʻa e fakaʻauha kiate kinautolu ʻo hangē ko e langā ki he fefine feitama; pea ʻe ʻikai ʻaupito te nau hao.” (1 Tes. 5:2, 3, NW) ʻOku fiemaʻu ke tau tatali mo sio pe ko e hā ʻa e founga ʻe fai ai ʻa hono fanongonongo ko ia ʻo e “melino mo malu.” Ka ʻoku pau ʻe ʻikai ʻuhinga ia kuo hanga ʻe he kau taki ʻo e māmaní ʻo fakaleleiʻi moʻoni ʻa e ngaahi palopalema ʻo e faʻahinga ʻo e tangatá. ʻE ʻikai ke takiheeʻi ʻe he fanongonongo ko iá ʻa e faʻahinga ʻoku nau “tauhi maʻu ʻi he fakakaukaú” ʻa e ʻaho ʻo Sihová. ʻOku nau ʻilo, ʻi he hili leva pē iá, ʻe hoko “fakafokifā . . . ʻa e fakaʻauha”.

13. Ko e hā ʻa e ngaahi meʻa ʻe hoko leva ʻi he hili pē ʻa hono fanongonongo ʻo e “melino mo malu,” pea ko e hā hono fakahokohokó?

¹³ Ko e ʻuluaki meʻá, ʻo hangē ko ia ʻoku fakahā ʻe he Tohitapú, ʻi māmani lahi, ʻe ʻohofi ʻe he kau taki fakapolitikalé ʻa Pāpilone ko e Lahi, ko e ʻemipaea ʻi māmani lahi ʻo e lotu loí, ʻo fakaʻauha ʻosiʻosingamālie ia. (Fkh. 17:15, 16) ʻOku moʻoni ʻoku taau ke fakatokangaʻi eni he naʻa mo e taimí ni ʻoku ʻasi ʻa e ngaahi fakakaukau fakafili ki he ngaahi lotu ʻo Puleʻanga-Haʻa-Kalisitiané. Ko e ngaahi puleʻanga ʻoku ʻi ai ʻenau ngaahi founga fakalūkufua ke fakafepakiʻi ʻa e ngaahi lotú kuo nau ʻosi fai ha tākiekina mālohi ʻi he Puleʻanga Fakatahatahá, pea ko e kakai tokolahi ʻi he ngaahi fonua lotú kuo nau siʻaki ʻa e ngaahi lotu ʻo ʻenau ngaahi kuí. ʻOku ʻuhinga kotoa ʻeni ki he hā? ʻOku ʻuhinga ia ʻoku tuʻunuku mai ʻa hono fakaʻauha ʻo e lotu loi kotoa pē. ʻI he hili iá, ʻi he taimi ʻe hanga loto-fieʻeiki hake ai ʻa e ngaahi puleʻangá, ʻi he mālohi kakato, ʻo fakafepakiʻi ʻa e faʻahinga ʻoku nau pouaki ʻa e tuʻunga-hau fakaleveleva ʻo Sihová, ʻe hoko hifo leva ʻa e houhau fakaeʻotuá ki he ngaahi puleʻanga fakapolitikalé pea mo honau kau poupoú, ʻo iku ai ki he fakaʻauha fakakātoa ʻo kinautolu kotoa. Ko hono fakaʻosí, ʻe lī leva ʻa Sētane mo ʻene kau tēmenioó ki he luo taʻe hano takele,  ʻo taʻofi fakaʻaufuli ai mei hono tākiekina ʻa e faʻahinga ʻo e tangatá. ʻOku moʻoni ʻe hoko ʻeni ko e “ʻaho ʻo Sihova,” ʻa e ʻaho ko ia ʻe hakeakiʻi ai ʻa hono huafá.​—ʻIsi. 38:18, 22, 23; Fkh. 19:11–20:3.

14. Ko e hā ʻe taʻefakapotopoto ai ke fakaʻosiʻaki ʻo pehē ʻoku kei mamaʻo pē ʻa e ʻaho ʻo Sihová?

¹⁴ ʻE hoko tonu matematē mai eni ʻi hono taimi, ʻo fakatatau ki he taimi-tēpile ʻa e ʻOtuá. ʻE ʻikai ke tōmui ia. (Hap. 2:3) Manatuʻi, naʻe hoko vave ʻa e fakaʻauha ʻo Selusalema ʻi he 70 T.S., ʻi he taimi naʻe ʻikai ke ʻamanekina ai ia ʻe he kau Siú, ʻi he taimi naʻa nau fakakaukau ai kuo mahili atu ʻa e fakatuʻutāmakí ia. Pea fēfē ʻa e meʻa naʻe hoko ki Pāpilone ʻo e kuonga muʻá? Ko ha fuʻu kolo ia naʻe mālohi ʻaupito, mo tuʻu maʻu, pea naʻe ʻaaʻi fakakolotauʻi ʻaki ha fuʻu ʻā mālohi ʻaupito. Ka naʻe tō ia ʻi he pō pē ʻe taha. Pehē foki, ʻe hoko “fakafokifā . . . ʻa e fakaʻauha” ki he tuʻu fulikivanu lolotonga ní. ʻI he taimi ʻe hoko mai ai iá, ʻofa ke ʻilo kitautolu ʻoku tau fāʻūtaha ʻi he lotu moʻoni, kuo tau “tauhi maʻu ʻi he fakakaukaú” ʻa e ʻaho ʻo Sihová.

Fetalanoaʻaki ʻo Fakamanatu

● Ko e hā ʻoku mātuʻaki mahuʻinga ai ke “tauhi maʻu ʻi he fakakaukaú” ʻa e ʻaho ʻo Sihová? ʻI he founga fē ʻoku tau fai ai iá?

● Ko e hā ʻa e kaunga fakafoʻituitui kiate kitautolu ʻa hono vaheʻi ʻo e kakaí ʻa ia ʻoku lolotonga faí?

● Ko e hā ʻa e meʻa ʻoku kei ʻi he kahaʻú ki muʻa pea toki kamata ʻa e ʻaho ʻo Sihová? Ko ia ko e hā ʻoku totonu ke tau fai fakafoʻituituí?

[Fehuʻi ki he Ako]